O naučnikija mrdingje anglal o saati bašo sudno dive — So vakerela i Biblija?

Ko 24 januari 2023 berš, o naučnikija vakergje kaj o strelke taro saati bašo sudno divea ale popaše uzo 12 rakjate, a adava sikavela kaj paše tano o krajo e svetoskoro.

„O ’saati bašo sudno dive‘ simbolizirinela i opasnost o manuša te uništinen korkori pes. Adaleske so isi vojna ki Ukraina, dar tari nuklearno vojna hem klimatsko kriza, o naučnikija vtornik mrdingje o strelke popaše dži ko 12 o saati rakjate. O strelke tane akana popaše sar nikogaš angleder“ (AFP International Text Wire).
„O naučnikija vtornik vakergje kaj o strelke taro ’saati bašo sudno dive‘ tane mrdime anglal hem kaj ačhile panda 90 sekundija dži ko 12 — o manuša nikogaš na sine doborom paše dži ko Armagedon“ (ABC News).
„Jekh grupa naučnikija taro poviše phuvja predupredingje kaj o rizik o manuša te uništinen korkori pes tano najbaro dži akana“ (The Guardian).

Dali tano paše o krajo e manušengoro hem e phuvjakoro? Dali valjani te dara so ka slučinel pe ki idnina? So vakerela i Biblija?

So ka ovel ki idnina

I Biblija vakerela kaj „i phuv ačhovela zasekogaš“ hem kaj o manuša „ka živinen večno ki late“ (Propovednik 1:4; Psalm 37:29). Znači, o manuša nane te uništinen i phuv, ili te keren la than kote so našti te živinel pe.

Sepak, i Biblija spomninela jekh krajo, na primer oj vakerela kaj „o sveto nakhela“ (1. Jovaneskoro 2:17).

Te šaj te doznajne so značinela o krajo e svetoskoro soj spomnimo ki Biblija, čitin i statija „Što e krajot?“
Te šaj te doznajne so ka slučinel pe ki idnina sprema i Biblija, čitin i statija „Keda ka avel o krajo e svetoskoro?“

Ačhov pozitivno

I Biblija šaj te pomožinel amenge te ačhova pozitivna, iako ko sveto isi problemija. Sar?

I Biblija dela amen korisna sovetija bašo amaro životo (2. Timotej 3:16, 17). Na primer, te šaj te doznajne sar oj šaj te pomožinel tuke te ačhove pozitivno, čitin i statija „Kako da se spraviš so stresot“.
I Biblija dela amen nadež baši idnina (Rimjanja 15:4). Oj točno objasninela amenge so šaj te očekujna akana hem ki idnina, a adava pomožinela amenge te na našava amari nadež, iako isi doborom problemija ko sveto.

Te šaj te ovel tut celosno korist tari Biblija, kaninaja tut besplatno te proučine i Biblija e Jehovaskere svedokoncar.

a „O saati bašo sudno dive tano kerdo te predupredinel sarinen bašo adava kobor siem paše te uniština amari phuv e opasna tehnologiencar so kergjem len. Akava saati setinkerela amen ko opasnostija so valjani te rešina len, ako mangaja te preživinel amari planeta“ (Bulletin of the Atomic Scientists).