Dali o čačipe tano panda važno?

Dali mislinea kaj na dikhjola nisavi razlika maškar o čačipe hem o hovajbe? Izgleda avdive e manušen poviše isi len doverba ko ple čuvstvija hem ko adava so ola verujnena, a na ko čačipe hem faktija. Na primer, sigende ulo popularno o lafi so sine izmislimo te šaj te opišinel adava — „post-čačipe“, javere lafencar prevrtimo čačipe.a Akava lafi but šukar opišinela o sveto avdive koleste so but džene mislinena kaj čačipe na postojnela.

Asavko mislenje nane nešto nevo. Angleder okolu 2.000 berša, o rimsko upraviteli o Pontij Pilat bizi ladž pučlja e Isuse: „Soj tano čačipe?“ (Jovan 18:38). Iako o Pilat na adžikergja o Isus te odgovorinel leske, leskoro pučibe tano but važno. O odgovor so dela i Biblija bašo adava pučibe šaj te pomožinel tuke te razlikujne o čačipe taro hovajbe.

Dali postojnela čačipe?

Oja. Ki Biblija o lafi „čačipe“ koristinela pe keda nešto temelinela pe ko faktija hem ko adava soj točno hem ispravno. Ki late pišinela kaj taro Jehova,b o Devel avela o celosno čačipe hem baši leste vakerela kaj tano Devel e čačipaskoro (Psalm 31:5). Ki Biblija pišinela o čačipe bašo Devel hem sporedinela le svetlinaja koja so vodinela amen ko akava sveto soj ko haos (Psalm 43:3; Jovan 17:17).

Sar te arakhe o čačipe?

O Devel na mangela te prifatina o čačipe tari Biblija bizo te razmislina. Namesto adava, ov pottikninela amen te ispitina o čačipe agjaar so ka koristina amari godi, a na amare čuvstvija (Rimjanja 12:1). Ov mangela te zapoznajna le hem te manga le sa amare gogjaja hem pottikninela amen te uverina amen ko čačipe so siklilem le tari Biblija (Matej 22:37, 38; Apostolija 17:11).

Kastar avela o hovajbe?

I Biblija vakerela kaj o hovajbe avela taro e Devleskoro dušmani, o Satana, hem baši leste vakerela kaj tano „dad e hovajbaskoro“ (Jovan 8:44). Ov vakergja hovajba bašo Devel e prva manušenge (1. Mojseeva 3:1-6, 13, 17-19; 5:5). Ottegani o Satana ponadari da vakerela hovajba te šaj te garavel o čačipe bašo Devel (Otkrovenie 12:9).

Soske avdive isi but hovajba?

Ko amaro vreme koleske so ki Biblija vakerela kaj tano „posledna dive“, o Satana sa poviše hovavela e manušen. Adaleske o manuša but puti hovavena te šaj te anen e javeren ko pogrešno zaklučok hem te iskoristinen len (2. Timotej 3:1, 13). Avdive isto agjaar isi hovajba ko but religie. Bašo amaro vreme, i Biblija prorokujngja kaj o manuša „ka roden učitelen kola so ka vakeren lenge adava so mangena te šunen“ hem „nane te mangen te šunen o čačipe“ (2. Timotej 4:3, 4).

Soske tano važno o čačipe?

Te šaj e manušen te ovel len doverba maškar peste, valjani lenge o čačipe. Keda nane doverba nane amalipa hem o manuša našti te oven zaedno. Sprema i Biblija, o Devel mangela amaro obožavibe te temelinel pe ko čačipe. Ki late pišinela: „Okola so poštujnena [e Devle] mora te služinen leske duhoja hem čačipaja“ (Jovan 4:24). Te šaj te doznajne sar o čačipe šaj te pomožinel tut te pendžare o hovajba so vakerena len o religie hem te oslobodine tut lendar, čitin i serija taro statie e naslovea „Lagi što go ocrnuvaat Bog“.

Soske o Devel mangela te džanav o čačipe?

O Devel mangela te živine zasekogaš, a bašo adava valjani te džane o čačipe baši leste (1. Timotej 2:4). Ako doznajnea e Devleskere merilija bašo ispravno hem pogrešno hem živinea sprema lende, ka ove paše amal lea (Psalm 15:1, 2). Te šaj te pomožinel e manušenge te doznajnen o čačipe, o Devel bičhalgja e Isuse ki phuv. O Devel mangela te šuna o sikajba e Isuseskere (Matej 17:5; Jovan 18:37).

Dali o Devel nekogaš ka cidel o hovajbe?

Oja. O Devel mrzinela keda o manuša hovajbaja iskoristinena e javeren. Ov vetinela kaj ka čistinel i phuv taro okola so birinena ponadari da te hovaven (Psalm 5:6). Tegani ka ispolninel plo vetuvanje da: „O muj kova so vakerela o čačipe ka postojnel zasekogaš“ (Izreki 12:19).