Kwijik Usey ni Kurumburik kwa Dibatish

1. Yom ik yimekeshina anch dibatish did pakach pa mafundish ma usey ma mu Bibil?

TUKWETING musangar nakash anch ayibatish in kwilej a Bibil. Musangar winou wawiy wovau In Kristu a pasak pasalau chikumangan cha kusambish. Ku chikumangan chinicha kwasadika diskur darumburila mafundish ma pa dishin piur pa dibatish ni ayibatisha antu. (Mid. 2:38, 40, 41) Mu kusut kwa machuku, kambuy Paul wafunda anch mu “mafundish ma pa dishin piur pa Kristu” mud kand “mafundish piur pa mitapu kushalijan ya dibatish.” (Heb. 6:1, 2) Ap anch mafundish misambidina piur pa dibatish mameken mud maswapeling kutesh, tufanyidin kwikasikesh kumatesh kamu nawamp. Mulong wak?

2. Mulong wak tukwet kuswir kwa kutesh nawamp mafundish piur pa dibatish?

² Mud mutapu ukata fondasion mukash kukwash chakwel chikumbu chikala chiwamp, kutesh nawamp mafundish piur pa dibatish kukutukwash kwikal ni ritiy rikash. Tukwet kuswir kwa kutesh mafundish minam nawamp anch twilejin Bibil ni tuyil kurutu mulong wa kutambul dibatish, ap anch atubatishin kal kwasutin kal mivu yivud. Chawiy, mu mutu wa mulong winou tukwakul ku yipul yilondwilaku ey: Dibatish dirumburikin ik? Mutapu ik ukata kusadik dibatish da Mwin Kristu? Ni mulong wak akat kutubatish mu dijin da Tatuku, da Mwan ni da spiritu utumbila?

KURUMBURIK KWA DIBATISH DEY

3. Dibatish dimekeshin ik?

³ Anch akubatish, wamekesh kal patok anch witiyin kal uyakin piur pa Yehova Nzamb, piur pa Yesu Kristu, wakarumukin kal ku yitil yey, waswimpin kal mwom wey mulong wa kumusadin Yehova, witiyijin kand anch Yehova umusadidin Yesu mulong wa kuyipandish antu, ni kusutin malembil wamulejin kal Nzamb maswir mey ma kusal rusot rend pamwing ni dirijek Dend. Kupwa kwa kusal machip minam ap kwipan, ni kukubatish, wasambish kal mashakamin masu matwadina ku mwom wa chikupu.

4. Kukwandjik jimu mu mem ni kukubudish yirumburikin ik? (Tal kand chipich.)

⁴ Anch akubatish, akukwandjik jimu mu mem, kupwa akubudish;a chid mud wafa kal, kupwa wavumbuk. (Ilakej ni Kolosay 2:12.) Dibatish dimekeshin anch waswimpin kal yom yijim mu mwom wey. Mutapu ik? Anch akwandjik jimu mu mem, wamekesh kal anch walikin kal mashakamin makur wading nich. Anch akubudish, wasambish kal mwom usu wimedina pa kusal rusot ra Nzamb.

5. Usu uusadina mulong wa kutambul dibatish ufanaken mutapu ik ni mudimu wasalay Nowa mulong wa kutung waat? (1 Pita 3:18-21)

⁵ Tang 1 Pita 3:18-21. Usu uusadina mulong wa kutambul dibatish tukutwish kuwilakej nich usu wasalay Nowa mulong wa kutung waat. Ang uchid kusambishinap kwilej piur pa Yehova, mudimu ukuchingedina kurutu ukutwish kumekan mud upandakena nakash, ap ukutwish kuman anch wilaken ni mudimu ujim wasalay Nowa mulong wa kutung waat. Ov, chid kamu cha usey kusal usu winou wawonsu? Inge! Mulong wak tulondina mwamu? Tongijokin pa chilakej cha Nowa. Nzamb amwinend watenchika mutapu wafanyina kwikal waat ni chamwita Nowa kulondul mutapu watenchikay Nzamb yom mulong wa kupandish mwom ku mabeb mafanyina kushiken. Kusutin ritiy ni ukwash wa Nzamb, Nowa waziyina ni watunga waat. Bibil ulondin anch Nowa wasala yom yawonsu mud mwamulejau kusal kud Nzamb. Niyey ukutwish kusal mwamu​—Dis. 6:22.

6. Dibatish dikutwish kukupandish mutapu ik?

⁶ Mu verse wa 21, kambuy Pita wafunda anch dibatish “dikupandishinany.” Mwaning, uyakin ud anch kukwandjik kwau mu mem kukatap kukupandish ap kujimwangesh yitil yey. Ching kusu mash ma Yesu mawiy makutwisha kukushitwish ku chitil. (1 Yoh. 1:7) Pakwez chikalap nchik mwamu, dibatish did da usey nakash pakach pa yom yikwitinay Nzamb kusal ni dikukukwash “kumwit Nzamb kom kawamp.” Yehova ukusangar nakash kukulikishin yitil yey kusutin rufu ra mwanend Yesu Kristu. Wawiy mutapu ukutwisha kupand kusutin dibatish.

MUTAPU UKATA KUSADIK DIBATISH DA MWIN KRISTU

7. Mutapu ik ufanyidina kusadik dibatish?

⁷ Kudoshaku mbil ya kumwandjik muntu mu mem, Bibil kalondinap yom yikwau yivud piur pa dibatish. Chikalap nchik mwamu, utukwashin kwijik yom ya kusal pa mulong winou. Chikakej, mbil ja Bibil jiyikwashining antu akimbinau kubatish kwijik mutapu wa kudjal; jiyikwashining kand antu akwikalaku kwijik yom yifanyidinau kusal ap kulik kusal chisu cha dibatish. (1 Kor. 14:40; 1 Tim. 2:9) Nlel, nakash amakurump awiy akata kubatishan, pakwez tukatap kuyiman mud ad a usey nakash mulong wa chisend chinech. (1 Kor. 1:14, 15) Dibatish did da usey nakash ap anch dikutwish kusadikin ndond yida kwau antu akemp.​—Mid. 8:36.

8. Yipul ik yikatau kuyipul antu akimbinau kubatish, ni mulong wak? (Mid. 2:38-42) (Tal kand chipich.)

⁸ Bibil umekeshin anch tufanyidin “kulond patok kurutu kwa antu piur pa dipandish” charumburik anch kulond piur pa ritiy rey. (Rom 10:9, 10) Tukat kusal mwamu chisu tukata kuya mu mudimu wa kulejan, pakwez kand dichuku da dibatish. Chawiy chikatau kuyipul antu akimbinau kubatish yipul yaad. Cha kusambish: “Pa dishin dia yakupesh ya Yesu Kristu, ov, wakarumukinany kal kudiokal ku yitil yen ni kwipan ayinen kudi Yehova chakwel usalany rusot rend?” Chipul chinech chikat kukwash kwijik mutapu witenchikinay kal muntu mulong wa kutambul dibatish, ni chifanijadin ni yom yayilejau antu kusal kud Pita pa dichuku da Pantekot. Chipul cha kaad: “Ov, wijany anch kwipan kwen ni dibatish dien yikumekeshinany mudi Atuman a Yehova mu kwinung ku dirijek ditakedilau ku spiritu wa Nzamb?” Chipul chinech chituvurishining anch, mulong wa kulimish machip metu, tufanyidin kulimish umutakel tutambwila kusutin dirijek da Yehova ni kumusadin Yehova pamwing nau ambay netu In Kristu, mud mwasalau in kwilej a mu mivu chitot ya kusambish. (Tang Midimu 2:38-42.) Antu akata kwakul ku yipul yiney nich muchim wawonsu anch mwaning awanyishin yitinau mulong wa kuyibatish.

9. Yom ik yifanyidinay kusal muntu win mwawonsu mulong wa kwikal ni dilau da Nzamb?

⁹ Pamwing ap kurutu kwa kwilej uyakin wading kwey wilimishin ni wasalangap kwey yitil yikash. Ap kand akulila kud anvaj In Kristu akukwasha kumukat Yehova. Anch chid mwamu, ov, ukwet kamu kuswir kwa kukarumuk ni kwa kukubatish mulong wa kwikal ni dilau da Nzamb? Mwaning. Tufanyidin kuvurik anch chikalap nchik mutapu twapama, etu awonsu twaswana chitil chatwaurila ni Nzamb. (Kus. 51:5) Chawiy, anch twilej kumwijik Yehova tufanyidin kukwat mupak wa kutek rusot rend pa ndond ya kusambish. Anch twasal mwamu, tukutwish kukarumuk ni kusambish kusal yom yimusangareshina Tatukwetu wa mwiur. Mwamu akutwish chad kutubatish.​—Mid. 3:19.

10. Yom ik ukutwisha kusal anch watambula dibatish mu relijon mukwau?

¹⁰ Ap anch watambula dibatish mu relijon mukwau, chitin kand kukubatish kakwau mulong wa kwikal Kaman wa Yehova. Mulong wak? Mulong wadingap wija uyakin piur pa Yehova Nzamb ni Yesu Kristu. Ni mud anch wipana amwiney mu malembil kud Nzamb, kwipan kwey kwelap kwimen pa ronganyin rakin piur pa rusot ra Nzamb. Patanijanay kambuy Paul nau In Efes ading abatishinau kal pakad kwikal ni ronganyin riwanyidina ra mafundish ma Win Kristu, wayikwasha kuman anch afanyidin kand kuyibatish kapamp kakwau.b (Mid. 19:1-5) Chid kand mwamu nlel, Yehova witiyining dibatish da muntu uteshina nawamp rusot rend.

“MU DIJIN DA TATUKU NI DA MWAN NI DA SPIRITU UTUMBILA”

11. Chirumburikin ik kukubatish “mu dijin da Tatuku ni da Mwan ni da spiritu utumbila”? (Mateu 28:18-20)

¹¹ Yesu wapana mbil anch in kwilej asu afanyina kuyibatish “mu dijin da Tatuku ni da Mwan ni da spiritu utumbila.” (Tang Mateu 28:18-20.) Yom ik yakimbay kulond? Mu Bibil, anch isambin dizu “dijin,” yisu yivud dimekeshining mutapu umwijau muntu. Dikutwish kand kumekesh mwaz ukwetay muntu ap ulabu wend. Chawiy anch twasal chom “mu dijin da” muntu ap da chom kanang, tukwet kashinsh ka ulabu ukwetay. Chawiy anch atubatish mu dijin da Yehova ni da Yesu, chirumburikin anch twij anch akwet ulabu wa kutulej yom tufanyidina kusal. Ni anch atubatish mu dijin da spiritu utumbila, chirumburikin anch tulondwil umutakel wend. Tumanany katat mutapu tukutwisha kusal mwamu.

12. Akat kutubatish mu dijin da Tatuku, mu mutapu ik? (Kujingunik 4:11) (Tal kand yipic.)

¹² Mu dijin da Tatuku. Tukat kwitiy anch Yehova ud Tatukwetu wa mwiur ni Mwin Kupan Mwom. Ud Nzamb mwin dikand dawonsu ni Sakatang wa yom yawonsu. (Tang Kujingunik 4:11.) Twitiyin kand anch ukat kutesh malembil, ni tukat kusadin dijin dend nich kalimish patulembila ni patukata kwambamb ni antu akwau piur pend. (Kus. 65:3) Pakwez, mulong wa kutambul dibatish mu dijin da Tatuku, kud kand yom yikwau tufanyidina kwijik. Antu ading amuteshina Pita pa dichuku da Pantekot ading amwij Yehova nawamp, pakwez pa chisu chinicha ading kand akwet kuswir kwa kwijik anch ud Mwin Kupan mwom wa chikupu kusutin Yesu Kristu.​—Rom 5:8.

13. Akat kutubatish mu dijin da Mwan, mu mutapu ik? (Tal kand yipic.)

¹³ Mu dijin da Mwan. Tukat kumwitiy Yesu anch ud mwan kapokal wa Nzamb. Yesu ndiy “njil,” charumburik anch tukutwish kwikal ni urund uwamp ni Yehova kusutin ndiy. (Yoh. 14:6) Yesu ud kand Mupandish, muntu watufila chakwel tutwish kwikal ni mwom. Ronganyin riner ritubachikin kulondul chilakej chend mu mwom wetu wawonsu, kadap kwau ching pa chisu chikutubatishau. (1 Yoh. 2:6) Chawiy tukat kulejan ni mushiku mud mwasalay Yesu, pakad kulik chom ap chimwing chitukangesh. (Luka 4:43) Twitiyin kand kujijamen rupompat mulong wa kumusadin Yehova nich kushinshaman. (2 Tim. 3:12) Tumulimishin Yesu mud “mwant wa chikumangen,” chawiy tukat kuyiziyin akadivar inkishay chisend cha kutakel ni kuyibangin in kwilej end.​—Efes 4:8, 11, 12; 5:23.

14. a) Akat kutubatish mu dijin da spiritu utumbila, mu mutapu ik? (Tal kand yipic.) b) Milad ik yikwau ya dibatish yikatau kutambul In Kristu azizidilau many? (Tal mushet “Milad Yikwau ya Dibatish Yikatau Kutambul In Kristu Azizidilau Many.”)

¹⁴ Mu dijin da spiritu utumbila. Twitiyin uyakin piur pa spiritu utumbila. Chilakej, twij anch spiritu winou kadap muntu ap chikunku cha usatu utumbila, pakwez ud usu wa Nzamb. Twitiyin kand anch spiritu ndiy wayitakela aprofet, chawiy tukata kutangin Bibil ni kusadin mafundish mend. (2 Pita 1:20, 21) Ni tukat kulik kusal yitil yikash, mulong kusal mwamu kukutwish kutukangesh etu ni chikumangen kutambul spiritu wa Nzamb.​—Efes 4:30.

15. Mupak ik tufanyidina kukwat?

¹⁵ Anch ud Mwin Kristu wabatishinau kal, dandamen kuvurik usey wa dibatish ni kukwat mupak wa kushakam kukwatijan ni machip wasala kud Yehova kusutin kwipan ni kutambul dibatish.c Pakwez chid nchik anch kand kal akubatish? Ov, kud chom chikuchirishina kwinyim? Mutu wa mulong wambakedinap ukwisambin yom ukutwisha kusal chakwel ushiken kutambul dibatish.