Kwat Mupak wa Kutambul Dibatish

1. a) Yiyukish ik ukwikala nich anch akubatish? b) Yom ik tukumana mu mutu wa mulong winou?

OV, WIPANIN kal amwiney kud Yehova ni kutambul dibatish? Anch mwawiy, chirumburikin anch wamwitin kal Yehova kukulikishin yitil yey ni kukukwash kwikal pakach pa antu amusadidina. (1 Pita 3:21) Chakin kamu wakwatin mupak uwamp nakash; ni washil chilakej chiwamp nakash kud ansand ap antu asu akata kukumangan nen mu chikumangen chen. Chad chid nchik anch kand kal akubatish? Tukwet kashinsh anch umukatin Yehova ni ukatin kusal rusot rend. Wij anch dibatish dikutwish kukukwash kukulikishin yitil yey ni kwikal mu urund wa piswimp ni Yehova. (Mid. 2:38-40) Pakwez chikalap nchik mwamu, ukutwish kwidjidjek kutambul dibatish. Chawiy yom ik yikutwisha kukukwash? Mu mutu wa mulong winou tukuman 1) mulong wak antu amwing akat kwidjidjekang pa kukwat mupak wa kuyibatish, 2) mulong wak chid cha usey kuvurik anch disuden did piswimp, ni 3) yiyukish ukwikala nich anch wakwat mupak wa kutambul dibatish pakad kulab.

YOM YIYIBACHIKINING ANTU AMWING KWIDJIDJEK

2. Mulong wak antu amwing idjidjekining kuyibatish?

² Antu amwing idjidjekining kuyibatish mulong oviling wom. Chilakej, amwing akatining kumusadin Yehova, pakwez oviling wom anch kadap kwau antu awamp ni kakutwishap kamu kumusangaresh. Anch wawiy mutapu utongining, ilejirila maverse makutwisha kukwinkish kashinsh anch Yehova kachingejidinap anch wikala muntu uwanyidina, pakwez ukusangar anch wamwifukwil kukwatijan ni yom utwishina kusal. (Kus. 103:13, 14; Kol. 3:23) Anch wovil wom wa rupompat, mulembila Yehova chakwel akwinkish kashinsh mud kadingay nich nfund a Kuseng walonda anch: “[Yehova] udi niyamam, kinikwovap kwam wom. Ov, antu akwinsal yom ik?”​—Kus. 118:6.

3. Yitongijok ik yikutwisha kuyikangesh antu amwing kutambul dibatish? (Tal kand cha pa chibur.)

³ Antu amwing amukatin kamu Yehova, pakwez idjidjekining kuyibatish mulong atongining anch kakwetap kamu ronganyin riwanyidina. Pakwez chipul cha usey chawiy ech: Yom yinch ukweta kuswir kwa kwijik? Shinshikin chilakej chimwing chilejenau mu Bibil. Kambuy Paul ni Silas amufundisha kalam wa rukan ni dijuku dend uyakin piur pa Yesu, kupwa kwa kuzal kwa divu kwasadika mu rukan mwadingau. Ikundj winou ni dijuku dend ajingunina pamwing ap anch chinech chading kamu chilay. Chikwau kand, ileja yom ya usey uchuku winiwa piur pa Yehova ni Yesu. Mud chibudikin “ayibatisha pawiy kamu pinipa.” (Mid. 16:25-33) Anch umwij kwey Yehova, umukatin nich muchim wey wawonsu, ukwet ronganyin ra pa dishin piur pa mafundish ma Bibil, wakarumukin kal ku yitil yey, ni ukwatin mupak wa kulimish mbil jend, akutwish kwey kukubatish.​—Mar. 12:30.

4. Yom ik yiyikangeshining antu amwing kuyibatish? (Tal kand chipich.)

⁴ Antu amwing akatining kumusangaresh Yehova pakwez atongining anch chikutwish kuyikasiken nakash kuswimp yom yimwing mulong wa kumusangaresh. Chakin, anch tukimbin kukwat mupak, chikwikal cha usey kwijik yom yitina kusal mulong wa mupak winou. (Luka 14:27-30) Pakwez akwau kand, akat kwiyakamish mulong wa yom yikutwishau kulikap mulong wa kumusadin Nzamb. Wawiy mutapu wiyovay Candace walidinau mu uyakin pamwitau kusambish kwilej Bibil pikalay muntu mukurump. Ulondin anch: “Nading nij yom nifanyidina kusal mulong wa Yehova, pakwez muchim wam walikang kwau mulong wa yom nading nisadina mu mangand. Nading nij anch chikwinkasiken kulikap yom yiney.” Akwau oviling wom anch kakutwishap kwau kwikal ni mwom ufanyidinay kwikal nich muntu wabatishinau kal, mulong atongining anch kupwa kwa kuyibatish akutwish kusal chitil chikash ni kuyitek pol pa chikumangen. Anch yawiy yom yikukangeshina kuya kurutu, yom ik ukutwisha kusal?

5. Yom ik tufanyidina kushinshikin chisu twiyipwila anch afanyidin kutubatish ap bwat? (Mateu 13:44-46)

⁵ Ang ukimbin kuland chom, ukushinshikinap kwey ching pa usey uchikweta pakwez ukushinshikin kand pa mutapu chikutwisha kukukwash. Yisu yivud tulandining yom tumena anch yikutukwash nakash ap anch yikwet usey uvud. Mutapu umwing kand, chisu tutondina anch afanyidin kutubatish ap bwat, chid cha usey kushinshikin kadap kusu pa usu tufanyidina kusal mulong wa kuswimp mu mwom wetu, pakwez kand pa yom tukutwisha kutaninamu kusutin kwikal mu urund uwamp ni Yehova. Yesu wasadina yilakej yaad mulong wa kutufundish dilejan dined da usey. (Tang Mateu 13:44-46.) Mu yilakej yiney yawonsu yaad, ikuny umwing walandisha yom yawonsu yadingay nich mulong wa kuland yom ya usey yatanay. Niyey ijik anch uyakin wajingunina kal piur pa Want, chid chom cha usey nakash watanina kal. Chawiy, chisu ukusambisha kwiyipul anch chid kamu cha usey kusal usu mulong wa kusadin yom wilejina, ufanyidin kuvurik yilakej yiney ya Yesu. Iyipula anch: ‘Ov, nikwet kamu kashinsh anch nij usey wa uyakin najingunina kal? Ov, nikwatin kamu ni usey urund nikweta ni Yehova, ruchingej rangikishinay kal ni dijuku da akadivar nau anambaz akweta rukat? Yakul yey ku yipul yiney yikutwish kukukwash kuman yom ufanyidina kusal mulong wa kutambul dibatish.

6. Yom ik yikukukwasha kusadin yom wilejina?

⁶ Mu chilakej chend cha mbut, Yesu warumburila muchim wa mutapu ik ukutwisha kumukangesh muntu kuya kurutu mu spiritu. Pakwez walonda kand anch antu amwing akweta “michim yiwamp” akutesh ni kwitiy uruu wa Want. (Luka 8:5-15) Anch wiyakamishin ni umen anch ukutwishap kusadin yom wilejina, kangal waziy. Nzamb ukutwish kukukwash kwikal ni “muchim usu” ukukukwasha kulondul umutakel wend. Mwita Yehova mu malembil chakwel akukwash kukat yom wilejina ni kuyisadin mu mwom wey.​—Ezek. 18:31; 36:26.

7-8. Mulong wak ansand amwing akangeny kutambul dibatish? (Tal kand chipich.)

⁷ Ansand amwing amukatina Yehova idjidjekining pa kuyibatish mulong wa yibachikin ya antu akwau. Chilakej, antu amwing akata kupan yiyul ku mashikol akutwish kuyilej ansand a shikol kusal yom kanang ap anch yijipin mbil ja Nzamb. Pakwez kulondul yiyul mud yiney kukutwish kuyipish mwom yau. (Kus. 1:1, 2; Jnsw. 7:1-5) Ukutwish kwipuk ubaaj winou kusutin kwimburij chilakej cha nfund a Kuseng wamuleja Yehova anch: “Nikwet ronganyin kupandakanamu alej am, mulong nikat kwilej malejan mey.”​—Kus. 119:99.

⁸ Marapor mamekeshin anch anvaj amwing Atuman ayikangeshin anau kutambul dibatish. Ashinshikidin nakash pa mashikol mafanyidinau kwilej an ni midimu yikusalau, ni akat kukangany kuyikwash anau kukwat mipak ya mu spiritu. Chid nchik anch utongin anch kud yom yifanyidinau anvajey kusal mulong wa kukukwash? Ambamb nau. Ikal ni kashinsh anch chikalap nchik mivu ukweta, ukutwish kwikal ni urund uwamp ni Yehova.​—Jnsw. 20:11.

9. Mulong wak antu amwing akutwish kulab pa kutambul dibatish?

⁹ Amwing akat kulik kuyibatish mulong achingedining anch ez ayibatish pamwing ni antu akwau akatinau. Chilakej akat kuchingel anch ayibatish pamwing ni antu a mu dijuku dau ap arunau. Chakin, chiyipinap kwau kusal mwamu. Pakwez ov, dined dawiy diyingishin difanyidina kukukangesh kutambul dibatish? Vurik anch kwipan kud Nzamb mad machip mamutadina muntu ni muntu panrend. Chawiy dibatish dey difanyidinap kwimen pa yom yisadinay muntu mukwau.​—Rom 14:12.

VURIK ANCH DISUDEN DID PISWIMP

10. Yom ik kand yikutwisha kuyilabish antu kutambul dibatish?

¹⁰ Kudoshaku mayingishin twisambina kal, antu amwing akutwish kand kulab kutambul dibatish mulong atongin anch disuden dikwezap kwau katat. Pakwez ov, chitongijok chinech chid kamu chiwamp? Yesu wayibabesha in kwilej end anch: “Irijekany, mulong Mwan a muntu ukwez pa chisu chiwakadany kutongin.”​—Luka 12:40.

11. Kukwatijan ni Kuseng 119:60, kwilej yom yivud piur pa Yehova kukutwish kutubachik kusal yom ik, ni mulong wak?

¹¹ Rukat rawiy rifanyidina kutubachik kwipan kud Yehova. Anch twamwijik Nzamb wetu wa rukat nawamp, chikutuswapel kukat mbil jend ni kujiziyin pakad kulab. (Tang Kuseng 119:60.) Mwin kwilej Yakobu wajimbula diyingishin dikwau da usey difanyidina kutubachiku kuziyin kwi mbil ja Yehova pakad kulab, wamekesha anch kwikil kwau muntu wija yom yikusadika damashik. Anch chisu chawanyin, kakutushilapaku kand ap kusu dichuku dimwing da “kusal yom yiwamp,” komb chinech chawiy chisu cha kusal yom twija anch yid yiwamp.​—Yak. 4:13-17.

12. Yom ik tukutwisha kwilejin ku chilakej cha Yesu piur pa chir cha nviny?

¹² Tongijokin pa chilakej cha Yesu piur pa chir cha nviny. Wafundisha anch antu amwing akusal kwau mudimu saa umwing pakwez akutambul difut pamwing nau antu asalang kal mudimu dichuku da kabuj. Pakwez, man diyingishin dayibachika antu asala mudimu mu saa umwing kulik kusambish pamwing nau akwau. Alonda anch: “Kwikil muntu watwinkishanga mudimu.” Kadap mud anch achina kusal mudimu mu dichuku da kabuj, pakwez kwikil kwau muntu wayinkisha mudimu wa kusal. Kupwa kwa kuyitazuk, aya kapamp kamwing kusal mudimu. (Mat. 20:1-16) Nlel, Yesu watutazukin kal kwikal in kwilej end ni kwipan mu mudimu wa kulejan rusang ruwamp ra Want. Kupwa kwa kutesh kutazuk kwend tufanyidin kwitiy pakad kulab.

13. Yom ik twilejidijna ku rusang ra mband wa Lot?

¹³ Antu amwing alikin kuya kurutu mu spiritu ni kutambul dibatish, mulong atongin anch akutwish kwau kusal mwamu chisu chikemp kurutu kwa disuden kushik. Pakwez uyakin ud anch, ang wachingel nakash, chikukukasiken kand nakash kuswimp mulong wa kumusadin Nzamb. Yesu wading wij uyakin winou, chawiy wayibabesha in kwilej end anch: “Muvurikany mband a Lot.” (Luka 17:31-35) Mband wa Lot wading wij kamu anch Nzamb ukushesh musumb wa Sodom ni Gomor pakad kulab; pakwez kadingap kakatina kusha yom yadingay nich. (Dis. 19:23-26) Rusang riner ritufundishin anch Yehova wayishidin kal antu chisu cha kuswimp ni kumusadin, anch chisu chinech chasut kwapwa kal.​—Luka 13:24, 25.

14. Mulong wak ufanyidina kushinshikin mutapu uwanyidina uprofet kushalijan uda mu Bibil?

¹⁴ Yom yisadikina mu mangand dichuku dawonsu yiwanyishin uprofet umekeshina anch disuden did piswimp. Ap anch yom yiney yishikedinap mwi ndond mu uda, kushinshikin yom yisadikina kwi ndond yimwing ni yikwau kufanyidin kukubachik kusal usu wa kutambul dibatish pakad kulab. Shinshikin yom yayilejau In Kristu amwing kud kambuy Pita. Wayileja anch “chishany ku mes,” ap anch “babalany,” mulong “disuden da yom yawonsu [dading] dasej kal piswimp.” (1 Pita 4:7; mazu ma kwinshin.) “Disuden” disambinay dading pamwing ap da ditenchik da yom da In Yuda, charumburik anch chisu chafanyina kusheshik Yerusalem ni tempel wend. Antu afundinay Pita mukand winou ading ashich kulemp ni musumb wa Yerusalem, chawiy kafanyinap kamu kuman mutapu washeshau musumb winou. (1 Pita 1:1) Pakwez kuman mutapu wawanyina uprofet winou kwafanyina kukasikesh kashinsh kau mu kushilamu kwawonsu kwa Yehova. Mutapu umwing kand, anch niyey umen mutapu uwanyidina uprofet wisambidina piur pa disuden da mangand ukwikal uchila ku mes kusutin kukwat mupak wa kukubatish.

15. Chitongijok ik tufanyidina kwikal nich piur pa dichuku da dirumburish da Yehova? (2 Pita 3:10-13)

¹⁵ Mu mukand wend wa kaad, Pita warumburila chitongijok tufanyidina kwikal nich piur pa dichuku da dirumburish da Yehova. In Kristu a mu mivu chitot ya kusambish amanang anch dichuku dined dading dichid kulemp, pakwez Pita wayileja “kudandamen kulam mu manang,” ap “kusot nich impu” dichuku dined. (Tang 2 Pita 3:10-13; mazu ma kwinshin.) Tukutwish kulam dichuku dined mu manang kusutin kwirijek kurutu kwa chisu ni kudichingel nich impu. Tukutwish kumekesh anch tuchingedin dichuku dined kusutin kwikal “antu asadina yom ya mwikadil utumbila ni yisal ya kulamat kud Nzamb.” Tong mutapu ukutwishay Yehova kusangar pakumanay ukat kusal “yisal ya kulamat kud Nzamb”! Ukwov kand musangar nakash ang wipan ni kutambul dibatish.

YIYUKISH UKWIKALA NICH ANCH AKUBATISH KATAT

16. Chisu ik chida chiwamp kutambul dibatish? (2 Korint 6:1, 2) (Tal kand yipich.)

¹⁶ Chinech chawiy chisu cha kutambul dibatish. (Tang 2 Korint 6:1, 2.) Pamutanau ntung Mwin Etiopi kud Filip, wamana anch chid chisu cha usey kumubatish pakad kulab. Kupwa kwa kujingunin rusang ruwamp ni kwikal ni mutapu wa kumubatish, katongap anch: ‘Nifanyidin bil kwilej yom yivud piur pa rusang ruwamp kurutu kwa kwimbatish. Ap kulond anch tuya bil anch twatan mem makwau kurutu oku akwimbatish.’ Pakwez wamwipula Filip anch: “Chom ik chinkangeshina kwimbatish?” (Mid. 8:26, 27, 35-39) Chilakej chiwamp mud ik! Kupwa kwa kumubatish, ntung Mwin Etiopi “wadandamena ni weny wend oku ukat kusangar.”

17. Kashinsh ik ufanyidina kwikal nich?

¹⁷ Anch widjidjekin pa kukubatish, ikal ni kashinsh anch Yehova ukatin kukukwash chakwel wikala murunend. (Rom 2:4) Ukukukwash chakwel ulik kwov wom ap kwiyakamish, ni chakwel upandakan yibachikin ya antu akwau yikutwisha kukukangesh kutambul dibatish. Paukwikala mu urund uwamp ni Nzamb kupwa kwa kukubatish, ukushiken pamwing ap kuman anch ‘yom washila kwinyim’ yidap kand ya usey. (Fil. 3:8, 13) Ukutwish chad kushinshikin pa “yom yida kurutu,” charumburik anch kuwanyin kwa kushilamu kwa Yehova piur pa antu ipanina kud Ndiy ni kuyibatish.​—Mid. 3:19.