An ad ‘Chipan Chidokila kud Yehova’

YOM IK yikata kukwez mu manang anch watesh dizu ‘chipan’? Ukat kutongin nfalang, chikumbu ap chom cha usey nakash ukwetana mu dijuku den chasala kal mivu yivud. Chikalap nchik mutapu chida, chipan chid chom cha usey ni tukatining kamu kuchilam nawamp.

Bibil ulondin anch an ad ‘chipan chidokila kud Yehova.’ (Kus. 127:3) Chakin kamu, anvaj In Kristu akat kuyiman anau mud yipan ya usey yidokila kud Tatukwau wa mwiur. Akat kusal usu wau wawonsu mulong wa kuyichidij ni kuwanish maswir mau, akat kusal kand usu wa kwikal ni kashinsh anch anau akwet musangar ni akat kuyikwash kwikal mu urund wa piswimp ni Yehova.

Pakwez cha ushon, anvaj amwing nlel kayimenap kwau an mud chipan chidokila kud Nzamb. (Isay 49:15; 2 Tim. 3:1-3) Anvaj amwing akatin kamu kuyibangin anau, pakwez chiyikasikedin kusal mwamu mulong wa mayingishin kushalijan. Yom ik yimwing yisadina anch chiyikasiken anvaj kuyibangin anau? Yom ik yichingejinay Yehova anch anvaj asal mulong wa anau? Ni yom ik yifanyidinau kusal anvaj In Kristu mulong wa kutwish kuyilil anau?

YIKOKUJOL

Yibachikin yidokila mu dijuku ap kud antu akwau. Ku jindond jimwing mu mangand omu, anvaj akweta an avud ayilimishining nakash. Chawiy, ambay a uruw akutwish kuyibachik kud antu a mu majuku mau ap kud amutej nau kuval an avud, pamwing ap akukanganyau kwau kulil.
Yakamish mulong wa machuku ma kurutu. Mu jingand jimwing an akemp afil nakash mulong wa kuburen yakuda, mayej ni mitapu ya kwiyokish ya pansh nakash, chawiy ambay a uruw akat kuval an avud mulong wa kwel anch pakwikal amwing akupama. Akwau akutwish kuval an avud ni chitongijok chakwel anch an ez ayilam pakunanapau. Yom yiney yisadikin nakash mu jingand jakadau kuyikwash amapal kud guvernema.
Chiswapelap kulimish uvud wa an a kuval. Ku jindond jikwau, ambay a uruw amwing kijap mwon ufanyidinau kuland mulong wa kukangesh madikaj. Akwau akutwish kutan mwon wa kukangesh madikaj pakwez mwon winou ud wa pansh, chawiy akat kwov wom wa yibudikin yikutwisha kwikal ni mwon winou pa mijimbu yau. Ni akwau kand akutwish kukangany kuland mwon winou mulong ukwet usey nakash.a

YEHOVA UYITIN ANVAJ KUSAL YOM IK?

Dijuku dabudikangaku kal mulong wa kusutish chisu pamwing. Tatuku umuteshin nawamp mwanend changadim ulondina. Maku usengen ndundu ni mwanau. — Sutishany chisu pamwing ni mwanen mwawonsu

Kuwanyish maswir ma anau. Yehova uyitin anvaj kuwanyish maswir ma ku mujimbu ma anau achida kal akemp. Uyitin kusal mudimu ni mushiku chakwel anau ikal ni yakuda, masun, ni ndond ya kushakam yiwamp. Yehova uyitin kand anvaj kuyifumb anau. Chawiy chidap cha manang kud anvaj In Kristu kuyitum anau kuya ku interna. Pakwez afanyidin kwikal ni kashinsh anch anau ad ku yikumbu yau mulong atwish kwilej shikol nawamp, ni kumubangin mwan ni mwan, chakwel an iyova anch ad mu diking ni ayikatin. Yehova ud wisikena; mwamu kayitinap anvaj anch ikal ampich. Chilakej, anvaj atonday Yehova mulong wa kumulil Mwanend ading kwau atuzwendj pakwez asalang mudimu ni mushiku.—Mat. 13:55, 56; Luka 2:24.

Mbil ya Bibil: “Chakin, anch muntu kawanyishinap maswir ma ayend, ni pakampwil ma antu ashicha mu chikumbu chend, watun kal ritiy ni ud muyimp nakash kusutamu muntu wakad ritiy.”—1 Tim. 5:8.

Yehova wij anch anvaj akwikal ni kuswir kwa ukwash anch ananap. Chawiy mutapu umwing ukutwishau an kuyilimish anvajau ud kusutin kwirijek mulong wa kuyibangin pakunanapau. (Kub. 20:12; 1 Tim. 5:4) Pakwez Yehova ukusangar nakash anch anvaj ashinshikin bil pa mutapu ukutwishau kuyibangin anau kadap pa mutapu ukuyibanginau awiy kud anau chisu chikunanapau.—2 Kor. 12:14.

Kuyifundish anau piur pa Yehova. Anvaj In Kristu akwet kand chisend cha kuyifumb anau kumukat Yehova ni kumwifukwil. Ku mes ma Yehova, chinech chawiy chom cha usey nakash chifanyidinau anvaj kusal.—Kuv. 6:6, 7.

Mbil ya Bibil: “Dandamenany kuyilidin [anen] mu dipup ni mu umutakel wa Yehova.”—Efes 6:4.

YEHOVA UKATIN KUKUKWASHAN KUYILIL ANEN

Ambay a uruw akat kwambamb ku chikumbu. Bibil ud wa kuburil pa tebur kurutu kwau. — Ambamban kurutu piur pa uvud wa an ukatinanya kuval

Kwitenchik mulong wa machuku ma kurutu. Ang utonginany anch ukez kuvalany an, shinshikinany bil nawamp mashakamin men. Chilakej anch wavalan an avud, ov ukwikalany ni mutapu wa kuyidish, kuyidjik ni kuyifumb? Anch bwat, isamba ni mbay ney wa uruw mulong wa kwijik uvud wa an ukuvalana chakwel utwishan kuyilil mud mukwitinanay Yehova. Chakin, Yehova wij anch kadap chom chin chawonsu tukutwisha kutenchik mu mwom wetu wa machuku ma kurutu. (Mul. 9:11) Pakwez ukuyukish usu wen usadinanya mulong wa kuwanish chisend chen cha winvaj.

Mbil ja Bibl: ‘Kutenchik kwa mwin mushiku kwa kusal yom kushikin ku kupit, pakwez kud ndiy ukusala swa, ukushik ku kuburen.’—Jnsw. 21:5.

“Nany wa pakach pen anch ukimbin kutung rubumbu rilemp, kakushakamap bil ni kusal tupamp mulong wa kuman anch ukwet nfalang ja kurupwish nich?”—Luka 14:28.

Mutekany Yehova pa ndond ya kusambish mu dijuku den. Kumwifukwil Yehova kufanyidin kwikal pa ndond ya kusambish mu dijuku den. Anch wavadinany kal an, salany usu wa kuyifundish awonsu kumukat Yehova. Chisu udanya ku yikumangan, yikwashany kuta matu ni kudosh malejan ku yom yifundishinau. Ikalany ni chaku cha kusal Difukwil da mu Dijuku rubing ni rubing. Yifumbany anen kusal mudimu wa kulejan. Kangal wapanany chisend chinech kud an apamina kal ap kud anamakwen akwau. Kuyifumb an chakwel amukat Yehova kwitining chisu ni usu, pakwez kusal mwamu kud kwa usey nakash.

Mbil ya Bibl: “Kwikil chom chikwau chinsangareshina nakash kusutamu ech: Kutesh anch anam adandamedin kwendin mu uyakin.”—3 Yoh. 4.b

Muchingejinany Yehova. Anch ukwetan an ap anch wovilany chad ja kuval, ikalany ni kashinsh anch mbil jitentamina ja Yehova jid ja usey nakash kusutamu yishankur ya ndond ushichanya.

Yipich: 1. Anvaj ashich pamwing ni mwanau ikundj ku yikumangan. Mwan uzambwil chikas mulong wa kupan chakul. 2. Antu a mu dijuku asadin mudimu wa kulejan pamwing. Tatuku ulejen pamwing ni mwan changadim, maku ndiy ulejen pamwing ni an akemp aad. — Chitin chisu ni usu mulong wa kuwanyish maswir ma mu spiritu ma an

Anch wakwatany mupak wa kutond uvud wa an ukuvalanya, ikalany ni kashinsh anch Yehova ukukubanginany anch wananapany. Chikalap nchik yibachikin ya antu akwau ufanyidinanyap kuval an avud mulong kwau wa kwel anch akukulamany chisu ukunanapanya. Kangal wovany wom anch, ang uvadinanyap an avud kukwikalap muntu ukukulamanya ku upal wen. Yehova ukukaninany anch ukukulamany, ni ukudandamen kuwanyish kushilamu kwend.—Jos. 23:14.

Mbil ja Bibil: “Mukungamena [Yehova] nich muchim wey wawonsu. Kangal wachingejin ronganyin rey amwiney. Mu jinjil jey jawonsu itiyij kudi ndiy, ni ndiy ukutenchik jinjil jey.”—Jnsw. 3:5, 6.

“Nading nsand, katat nananap kal, pakwez kand kal nimumanangap mwin kutentam amulik kudi [Yehova], ap anend aswadin ya kudia.”—Kus. 37:25.

“Chawiy dandamenany bil kukimb Want ni kutentam kwa Nzamb, ni yom yikwau yiney yawonsu akez kakuwejinanyay.”—Mat. 6:33.

An ad yipan ya usey yiyinkishinau anvaj kud Yehova. Yehova ukat kusangar nakash anch anvaj ayibangin anau mud musotinay. Akat kuwanyish nich rukat maswir ma ku mujimbu ni ma mu spiritu ma anau; akat kutong piur pa uvud wa an akuvalau; ni akat kusadin mbil ja Nzamb nich kushinshaman pa ndond pa kulondul yishankur ya ndond yishichau. Kusutin kusal mwamu, ambay a uruw In Kristu akat kumekesh anch anau ad chipan cha usey, “chiyukish chidiokila kudi [Yehova].”

Akwet musangar mulong wa mupak wakwatau

Ov, anvaj iyakamishin mulong wa mupak wakwatau wa kuval an akemp? Chinech chawiy chipul chikatau kwiyipul nakash anvaj ada mu jingand murishinau nakash ni milong ya nfalang. Shinshikin yom yilondinau anvaj amwing ashinshamena ashicha mu jingand jinej piur pa mulong winou.

Ov, antu akwau akubachikanya kuval an avud?

“Inge, ni amwing a pakach pau ading akadivar nau anambaz. Ambay a uruw amwing atwipula anch: ‘Mulong wak ukwetany kwen mwan umwing? Munomu mu Afrik, kwikal ni mwan umwing chid kwau mud uvadinanyap kwen. Kuval an aad chid kwau mud ukwet kwey umwing.’ Ap kupwa kwa kuval mwanetu wa kaad mband, adandamena kutubachik chakwel tuval akwau.”—Jeremias

Ov, umenany mar mulong wakwatanya mupak wa kuval an akemp?

“Bwat. Mulong twakwata mupak wa kuval an akemp, am ni mukajam tutwishin kuwanyish nawamp maswir ma dijuku detu ma ku mujimb ni ma mu spiritu. Anlidina mu dijuku da an avud up in a large family ni namana mutapu tatuku ni maku mwamanangau mar mulong wa kuwanyish maswir metu ni kutulil.”—Jeremias

Mutapu ik wiyovilau anen mulong wa mupak wen?

“Anetu iyovil nawamp nakash mulong karishinap ni yakamish mud yirishinau nich an avalau avud akwet anvaj arishina pa kuyilam.”—Filipe

“Anetu akwet musangar mulong iyovil anch ad mu diking ni iyovil kand anch tuyikatin. Tukat kwikal chisu chawonsu ni akadivar nau anambaz aswila mu spiritu akata kutukasikesh kwitekin mipak ya mu spiritu. Nlel tumen anetu akat kwimburij yilakej yiwamp ya akadivar nau anambaz inay.”—Carlos

Ov, watanyidinanyamu kusutin kuval kwau an akemp?

“Chading chituswapedin kuwanyish nawamp maswir ma dijuku detu mulong wa mupak twakwata. Nashadisha mudimu wading winfutinau nawamp mu mivu yisatu. Mulong twading kwetu antu akemp mu dijuku detu, chatuswapela kuwanyish maswir ma dijuku detu chikalap nchik kushadish kwa mudimu winou.”—Jeremias

“Mupak wetu watukwasha kuwanyish nawamp maswir ma ku mujimbu ni ma mu spiritu ma anetu. Chatuswapela kand kusadin kwi ndond kwading maswir nakash ma in kulejan. Chading kand chituswapedin kusutish chisu pamwing ni mwan ni mwan mulong wa kwijik ni kuwanyish maswir mend. Katat anetu awonsu amusadidin Yehova ni adandamedin kwitekin mipak ya mu spiritu ni kuyiwanyish.”—Lenadi

Chad chiyul ik ukutwisha kuyink anvaj?

“Namen kuwanyin kwa mazu mada mu Kuseng 34:10b, malondina anch: “Kwikil chom chikuburenau akata kumulimish [Yehova].” Yehova ukat kutwinkish yom yawonsu ya usey tuswirikedina mu dijuku detu.”—Rafael

a Ambay a uruw ayinau awiy afanyidina kukwat mupak piur pa uvud wa an akuvalau, chisu chikuyivalau ni anch afanyidin kusadin mwon kanang mulong wa kukangesh madikaj. Kwikil muntu ap umwing ufanyidina kuyirumburish piur pa mipak yau. (Rom 14:4, 10-13) Chikwau kand, ambay a uruw In Kristu akat kulam mu manang chiyul chida mu 1 Korint 7:3-5.

b Ap anch an isambidinau mu verse winou wa Bibil amekeshin in kwilej a Kristu, nvaj ukutwish kusadin yovil mud yamekeshay Yohan.