Wapish Mutapu Wey wa Kufundish mu Mudimu wa Kulejan

1. Ukaliweny ik tufanyidina kukudish ni mulong wak? (2 Timote 4:2) (Tal kand chipich.)

YESU wayileja in kwilej end anch: “Ikadishany in kwilej. . . , yifundishany kuziyin ku yom yawonsu yinakulejanya.” (Mat. 28:19, 20) Mazu minam mamekeshin anch Yesu wayinkisha In Kristu awonsu mbil ya kuyifundish antu akwau. Chakin kamu, Yehova ndiy ukata kuyipwit antu awonsu “[ada] mu mwikadil uwanyidina,” ni angel akat kutukwash kuyitan antu a mutapu winou. (Mid. 13:48; Yoh. 6:44; Kuj. 14:6) Chikalap nchik mwamu, kud chom kanang tukutwisha kusal. Shinshikin chilakej chatushilay kambuy Paul ni Barinabas. Bibil umekeshin anch chisu chalejanangau mu sinagog wa ku Ikoniom, “alonda mu mutapu wayibachika In Yuda ni In Grek avud kwikal in kwitiyij.” (Mid. 14:1) Pakad kwidjidjek, Paul ni Barinabas akudisha “ukaliweny wa kufundish.” (Tang 2 Timote 4:2.) In Kristu awonsu afanyidin kusal mwamu.

2. Mulong wak In Kristu amwing iyovil anch kakutwishap kuwapish mutapu wau wa kufundish mu mudimu wa kulejan?

² Antu amwing atongining anch kakutwishap kuwapish mutapu wau wa kufundish mulong kilejap nakash, ap mulong kavadikap ni ukaliweny winou. Amakuny amwing isambidinau mu Bibil niyau iyova mwamu. (Kub. 4:10; Jer. 1:6) Antu amwing akutwish kwiyov anch kijap kufundish nawamp mulong kakwetap malejan ma Bibil mavud ap mulong kakwetap ukaliweny mu mudimu wa kulejan mud ukwetau antu akwau. Chakin kamu, kadap muntu win mwawonsu tukwambamba nend ukusangera rusang ruwamp. Ni yibudikin tukwikala nich yimedinap ching pa usu wetu tusadina. Mud twalondang, Yehova nau angel akat kuman michim yiwanyidina ya antu ikepishina tukata kutanijan nau. Pakwez tukutwish kusal yawonsu tukutwisha mulong wa kulejan mu mutapu uyisangareshina antu. Mutu wa mulong winou ukwisambin yom yisatu yikutwisha kutukwash kuwapish mutapu wetu wa kufundish mu mudimu wa kulejan.

YIBANGINA ANTU UFUNDISHINA

3. Mulong wak Yesu watwishang kupukun michim ya antu afundishangay?

³ Bibil ulejen anch Yesu “wading wij yom yida mu michim ya antu.” (Yoh. 2:25) Mazu minam mamekeshin anch Yesu wading wij yitongijok ya antu ni yibachikin yau, watwishang kupukun michim ya antu afundishangay mulong wading wij maswir mau. Wamanang kand anch ading ayidishin nayimp mu spiritu, ading ayimeshin kand mar kud antakel a marelijon ni kusutin yishankur. (Mat. 9:36; 23:4) Yesu wayikwasha antu kuwapish mwom wau kusutin kuyifundish yom yiwamp, tukutwish kutan yom yiney mu Mafundish mend ma pa Mukandu. Chawiy, antu avud akatang kumutesh Yesu mulong wisambinang yom yiyitadina kamu pakampwil.

4. Mutapu ik tukutwisha kumekesh anch tuyibangidin antu? (Tal kand yipich.)

⁴ Tukutwish kumekesh anch tuyibangidin antu tutanina mu mudimu wa kulejan, anch twikasikesh kwov kurumburik kwa yom yirishinau nich. Tufanyidin kwijik anch muntu win mwawonsu tutanina mu mudimu wa kulejan urishin ni yakamish kanang yidokila ku yibudikin ya mangand minam matakedinau kud Satan. Anch twikal ni chitongijok chinech mu manang, chikutuswapel kuyikwash antu a mu teritwar wetu. Chilakej, ov kud chom chiyimp chasadikina chiyakamishina antu a mu teritwar wetu? Ov, ad anvaj iyakamishina anch anau akutwish kwikal mu ubaj padau ku shikol? Ov, ud muntu urishina ni milong ya kuburen kwa mudimu? Ikasikesha kutongin piur pa mashakamin makwetau antu parishinau ni “yisu yikash” pakad ruchingej riletinay Bibil.​—2 Tim. 3:1; Isay 65:13, 14.

5. Mutapu ik wading ushalijadinay Yesu nau antakel a marelijon mu mutapu wend wa kufundish? (Mateu 11:28-30)

⁵ Yesu wayibanginang antu amuteshang, ni antu amanang mwamu kusutin mutapu uwamp wayisadinangay yom. Yesu wading ushalijadin kamu nau antakel a marelijon. Antakel inay iyovang anch ad a usey nakash kuyisutamu antu akwau, chawiy yisu yivud kayisadingap antu yom mu mutapu uwamp! (Mat. 23:13; Yoh. 7:49) Pakwez Yesu wayilimishang antu. Wading “mwin kwitudish ni mwin kwikepish mu muchim,” yiney yawiy yamukwasha kwikal mulej muwamp. (Tang Mateu 11:28-30.) Niyetu tukutwish kumekesh kalimish kud antu atuteshina.

6. Mutapu ik tukutwisha kumekesh anch tuyanakedin ni tuyilimishin antu alikina kutesh uruu wetu?

⁶ Antu amwing alikining kwau kutesh rusang ruwamp tuyilejina, ni akwau akat kutujimen. Yom ik tukutwisha kusal anch yom yiney yashiken? Yesu watuleja kusal yom yivud kusutamu kwimen kwau pa kudiul. Watuleja “kusal yom yiwamp kud antu [atukisina,]” “kuyiyukish antu [atushingina],” ni “kuyilembil antu [atusaadina.]” (Luka 6:27, 28) Chikutwish kutuswapel kusal mwamu anch twavurik anch akwet mayingishin mayibachikina kulik kutesh uruu wetu. Pakwez, amwing akat kusal mwamu pakad mayingishin. Akwau kand akat kusal mwamu pamwing ap mulong wa milong yikwetau mu dijuku, ap yakamish piur pa mulong kapand wakad kwau kututal etu. Pamwing ap twatanijanang nau pa chisu chiyimp kwau. Mu yom yiney yawonsu, tufanyidin kusadin chiyul chitukasikeshina anch: “Chifanyidin mazu [metu] mikal chisu chawonsu masangareshina, ma kutek mung, chakwel [twijik] mutapu [tufanyidina] kumwakul muntu ni muntu.” (Kol. 4:6) Anch twayanaken antu ni kwijik maswir mau, tukutwishap kujiman swa ni chikutuswapel kuyifundish yom yikutwisha kuyikwash.

SADIN BIBIL CHISU UYIFUNDISHINA ANTU AKWAU

7. Mutapu ik wamekeshay Yesu anch mafundish mend mimedin pa Dizu da Nzamb? (Yoh. 7:14-16)

⁷ Yesu kayifundishangap antu yitongijok yend. Wayilejang yom yidokila mu Dizu da Nzamb, mu mutapu wayiswapelang kutesh ni kulam malejan mayifundishangay ni kumasadin mu mwom wau. Bibil ulondin anch Yesu “wayifundishang mud muntu ukweta ulabu, kadap mud alej a yijil.” Chawiy, “chisak chijim cha antu chashimwoka nakash.” (Mar. 1:22) Pa chirung chinicha, alej a yijil ayifundishang kwau antu yom yalondangau antakel a marelijon. Pakwez, chisu chawonsu Yesu wajimbulang Mikand yapepilau. Mulong Yesu ud Mwan a Nzamb ni wading mwiur, wafanyina kusadin manang mend mulong wa kupwitin nkeu ja antu amuteshang ap mulong wa kumekesh anch wij yom nakash. Pakwez kasalap mwamu. Mafundish mend mimenang pa Dizu da Nzamb ni pa yom ya Nzamb. (Tang Yohan 7:14-16.) Inge, Yesu wayishila in kwilej end chilakej chiwamp.

8. Mutapu ik wimburijay kambuy Pita chilakej cha Yesu?

⁸ In kwilej a Yesu niyau amwimburija Yesu. Ayifundishang antu ching yom yidokila mu Dizu da Nzamb. Chilakej, shinshikin diskur dasalay kambuy Pita pa dichuku da pantekot wa 33 C.C. Pita kilejap kwend nakash. Pakwez, wapukuna michim ya antu amutesha kusutin mutapu warumburilay Mifund ni uprofet uvud wawanishay Yesu. (Mid. 2:14-37) Yibudikin ik yikalaku? “Antu itiya dizu dend nich musangar ayibatisha, ni dichuku dinida kwiweja antu piswimp tunan tusatu (3 000).”​—Mid. 2:41.

9. Chisu tufundishina, mulong wak mafundish metu mafanyidin kwimen pa Dizu da Nzamb?

⁹ Ching kusu Dizu da Nzamb, dawiy dikweta usu wa kuyikwash antu kuswimp mu mwom wau ni kuyikwash kusal yom yimusangareshina Nzamb. (Heb. 4:12) Chawiy, tufanyidin kushindakeshin nakash pa Bibil chisu tuyifundishina antu. Tukatin ‘kulejan dizu,’ kadap yitongijok yidokila kud etu ayinetu. (2 Tim. 4:2) Jinswir 2:6 ulondin anch: “[Yehova] ndiy ukata kupan manangu, mu kan mwend mukat kubudik manangu ni ronganyin.” Chawiy, chisu tukata kusadin Bibil mulong wa kufundish, chid mud tukat kumulik Yehova alonda. (Mal. 2:7) Tukatin kand kuyikwash antu kwijik anch Dizu da Nzamb did da piur nakash kusutamu manang ma an a antu. Yom twilejina mu Bibil yidokil kud Sakatang wetu, ni yitukwashin kusal yom yimusangareshina ni kwikal ni mwom uwamp.​—2 Tim. 3:16, 17.

10. Mutapu ik ukutwisha kumukwash mwin kwilej wa Bibil kushinshikin nakash pa Dizu da Nzamb?

¹⁰ Chisu wirijekina mulong wa kutakel dilejan da Bibil, kimb mitapu ukutwisha kusadin mulong wa kumukwash muntu ufundishina kushinshikin pa yom yilondinay Bibil. Ap anch tukutwish kusadin yipich ap mavideo mulong wa kumufundish muntu twilejina nend malejan ma usey, pakwez tufanyidin kusal usu wa kumukwash kushinshikin nakash pa yom yilondinay Bibil. Chawiy, kimb maverse misambidina yom yijim ni mukwasha kumatongijokin. Chisu usadidina yipich ap mavideo, ikal ni kashinsh anch mwin kwilej wey wa Bibil uteshin nawamp mbil ja Bibil jisambidinawamu. Mulong wa kusal mwamu, ukwetap kuswir kwa kulond nakash ap kutang maverse mavud. Chikalap nchik usu usadina, mushila mwin kwilej wey chisu cha kwov kurumburik kwa chom ni chom chitanginay ap anch chimwitin kumutangiril kand. Anch wasal mwamu, ukwikalap kusu mwin kufundish buku, yipich ap video, pakwez ukwikal muntu ufundishena Bibil.​—1 Kor. 2:13.

11-12. a) Mutapu ik tukutwisha kumushimpishin mwin kwilej wetu wa Bibil muchim? (Mid. 17:1-4) (Tal kand chipich.) b) Yom ik yakadau antu amwing kwijik piur pa Bibil, ni mutapu ik tukutwisha kuyikwash?

¹¹ Ang kud yom yimukasikedina mwin kwilej wey kwitiy, vurik ‘kulejan dizu . . . nich kushimpish muchim kwawonsu.’ Antu awonsu kakatap kuya kurutu mu mutapu umwing. In kwilej amwing akwet kuswir kwa chisu nakash mulong wa kutesh yom wateshina kal ey nawamp. Paul wayileja In Yuda a ku Tesalonik rusang ruwamp yisu yivud, watongijokang nau pamwing kusutin mifund kurutu kwa amwing a pakach pau kutesh yom kurumburik.​—Tang Midimu 7:1-4.

¹² Tukutwish kand kushimpish muchim chisu tumwipwila mwin kwilej wa Bibil yipul kusutin kumushil chisu cha kutong chakwel atwakul. Ikasikesha kumutesh nawamp ni kwov kurumburik kwa yom yitonginay. Kupwa, tang ni isambina maverse mamwing makutwisha kumukwash kutesh chitongijok cha Nzamb pa mulong kanang. Chikwau kand, ijik anch antu amwing kijingap kamu chom piur pa Bibil ni kakwetingap kwau chitongijok piur pa yom yidamu. Chikutwish kwikal cha usey kuyilej Bibil wa dipaper. Ukutwish kusadin “Mazu ma Kusambish Nich Dizu da Nzamb,” mada kwi nsambishin kwa Bibil—Dikarumun da Ngand Yisu, mulong wa kumukwash kuman usey wa mafundish mada mu Bibil. Ukutwish kumekesh usey wa Bibil kusutin kutang verse umwing ap maad makwila ku chipul cha 15 mulong wa kumurumburil mutapu ukutwishay Bibil kutukwash kwikal ni musangar. Mu wiswimp, anch wamukwash mwin kwilej wey kuman usu ukwetay Bibil, mafundish mey makumupukun nakash.

PWITIN NKEU PAD YEHOVA

13. Tufanyidin kupwitin nkeu pad nany chisu tufundishina? Let chilakej.

¹³ Patwilejina Bibil nau antu, chitongijok chetu chid cha kuyikwash kumwijik Yehova ni kumusejin piswimp. (Yak. 4:8) Tukutwish kwilakej mudimu wetu ni wa muntu winkishinau torsh mulong wa kumulamin mukwau urijekina yom uchuku. Muntu winou winkinau torsh kakwimunyikinap amwinend, pakwez ukumumunyikin muntu urijekina chakwel aman yom yisadinay. Mutapu umwing kand, chisu tufundishina, tufanyidin niyetu kupwitin nkeu pad Yehova kadap pad etu ayinetu.

14. Mutapu ik ukutwisha kumukwash mwin kwilej wey wa Bibil kukat kumusangaresh Yehova?

¹⁴ Chisu wilejinanya Bibil, mukwasha mwin kwilej wey kukat kusal yom yimusangareshina Yehova. (Jnsw. 27:11) Chitongijok chey chidap kwau kusu cha kumulej kusal yom yida yiwamp ni kwipuk yom yida yiyimp. Ufanyidin kumukwash mwin kwilej wey kusal yom yiney mulong wa kumusangaresh Yehova. Chilakej, ang chimukasikedin mwin kwilej wey kuswimp mwikadil kanang, ukutwish kumwipul anch: “Mulong wak Yehova ukisin mwikadil winou? Mulong wak Yehova ukwitin kulikap mwikadil winou ap anch uukatin? Yom yiney yikwitinay kusal yimekeshin mutapu ik anch ukukatin?” Anch wamukwash mwin kwilej wey wa Bibil kutongijokin nakash pa mikadil ya Yehova, ukumukwash kuman anch Yehova umukatin nakash. Ni kusal mwamu, kukumukwash mwin kwilej wey wa Bibil kukat kusal yom yimusangareshina Yehova.

DANDAMEN KUWAPISH MUTAPU WEY WA KUFUNDISH

15. Yom ik ukutwisha kusal mulong wa kuwapish mutapu wey wa kufundish?

¹⁵ Ukutwish kumulembil Yehova chakwel akukwash kushinshikin mutapu wey wa kufundish ni kuman yom ukutwisha kuwapish. (1 Yoh. 5:14) Kupwa kwa kulembil, ufanyidin kusal yom yikwatijadina ni malembil mey. Chilakej ufanyidin kuta matu ku yom yikatau kufundish ku yikumangan ni kuyisadin. Ukutwish kuya pamwing nau in kulejan akwau ija kufundish nawamp ku dilejan dey da Bibil. Kupwa yipula akulej yom ukutwisha kuwapish. Chisu ufundishina, ufanyidin kand kuvurik anch yom wija ey yawiyap yijay mwin kwilej wey wa Bibil. Chawiy tongin mutapu ukutwishay kwiyov piur pa yom ukwisambinanya nend. Kupwa mukwasha kuman mutapu ukutwisha yom yiney kumukwash mu mwom wend. Yom yilejinay yikutwish kumukwash kumusejin Yehova piswimp ni kwikal ni musangar wakin.​—Kus. 1:1-3.

16. Mulong wak chid cha usey kuwapish mutapu wetu wa kufundish?

¹⁶ Kuyifundish antu akwau kumwijik Yehova kukat kutuletin musangar nakash. Piswimp ap mwi ngand yisu, kukwikal maswir ma kuyifundish antu avud nakash. Chawiy komb, tufanyidin kudandamen kuyibangin antu tufundishina, kusadin Bibil ni kupwitin nkeu pad Yehova chisu tuyifundishina antu akwau. Anch twasal mwamu, tukuwapish mutapu wetu wa kufundish.