RUBING RA 11-17 NGOND WA 5, 2026
MUMINY 7 Yehova Udi Usu Wetu
Muchingejina Yehova, Nzamb Uda Piur pa Yom Yawonsu
“Yey kusu Nzamb ukata kuyikel pa mangand mawonsu.”—KUS. 83:18.
MU WISWIMP
Tukuman yom yikukasikesha kashinsh ketu anch Yehova ndiy uda piur pa yom yawonsu ni anch ukutukwash kupandakan yakamish turishina nich katat ni yikutushikena machuku ma kurutu.
1. Milong ik yarishay nich Yobu?
YOBU, ikundj wadinga ni ritiy ulejenau mu Bibil washadisha yom yend yawonsu; anend, ukash wend wa mujimbu ni mapit mend. Chikwau kand, Yobu washadisha kalimish kadingay nich. Ni yom yivud yalondau “arunend” yamukasikeshap. Chikupu ni mukajend wamwela anch “mushinga kwey Nzamb chakwel ufa!” (Job 2:9; 15:4, 5; 19:1-3) Yom yiyimp mud yiney yamushikena Yobu, yafanyina kusal anch alik kand kumuchingejin Nzamb wakin ni kulik kwitiy anch Yehova ukutwish kuyichidij antu amukatina ni amusadidina.
2-3. Chisu turishina ni milong, yom ik tukutwisha kutong ni yom ik tukwileja kusutin buku wa Yobu?
2 Yisu yimwing, niyetu tukat kurish ni milong yikata kutubachik kulik kumuchingejin Yehova. Tushich mu “yisu yikash kurish nich.” (2 Tim. 3:1) Ang turishin ni milong yivud mu chisu chimwing tukutwish kuziy ni kwiyov anch tukwetap mutapu wa kuyipandakan. Yom mud yiney yayishikijin kal antu amwing kutong anch Yehova kayibangidinap.
3 Anch niyey wiyovilap kal mutapu winou, kangal washadish ruchingej. Yobu wajingunina anch Yehova ukat kuyikwash antu awonsu ashinshamena. Tukutwish niyetu kwikal ni ruchingej riner rikash muday Tatukwetu wa mwiur. Mulong wa kusal mwamu, el tushinshikinany mukand wa Yobu ni kuman mutapu utwinkishina kashinsh mu yom yijim yaad yiney: cha kusambish, Yehova ud Nzamb uda piur pa yom yawonsu. Cha kaad, Nzamb mwin dikand dawonsu kakutwishap kwitiy anch chom ap chimwing mu mangand minam chimukangesh kuwanish kushilamu kwend, ni ukusal usu wa kwikal ni kashinsh anch kwikil chom ap chimwing chikutwisha kuyipish rawonsu mwom wa antwend ni urund wau ni Ndiy.
SATAN WEZA PAKACH PAU
4. Anany ading akumanganang kal mwiur mud mulejenau mu buku wa Job?
4 Dichuku dimwing, ‘an a Nzamb wakin’ ading akumanganang kal mwiur kurutu kwa Yehova. Verse uwejidinaku anch: “Niyend Sakudimban waseja, wiman pakach pau.” (Job 1:6) Kinak kad kapamp ka kusambish tutanina dijin da Satan mu Bibil. Amutazukin mwamu mulong ukat kumubwambwil Nzamb. Pa chisu chinicha, Satan kadingap kand mwan a Nzamb ushinshamena. Wikala mukankuny wa Yehova ni wa antu awonsu ada mu dijuku da Nzamb da pansh ni da mwiur. Palonday mazu mada mu Disambishil 3:15, Yehova wamekesha anch Satan kadap kand wa mu dijuku da mwiur. Chawiy, Satan kadap kand pakach pa yitang yitazukinau anch “mband,” kwafanyina kudokal “mbut.” Charumburik anch kadap pakach pa yitang ya mu spirit yisadina dijuku da Yehova.
5. Yom ik twilejidina ku yom yasadika mwiur?
5 Yehova wafundikisha yom yasadika mwiur mu Bibil chakwel niyetu tuyijik. Mazu malonday Satan mamekeshin kamu patok anch ud mukamakasu. (Job 1:9; ilakej ni Kujingunik 12:10.) Kufundikish yom yiney yasadika mwiur kutwinkishin kashinsh anch Yehova ukat kusadin ulabu wend wa piur mu mutapu utentamina ni uwanyidina. Chitufundishin kand anch Mwin Dikand Dawonsu utekining mimbu ku yom yikutwisha yitang yawonsu kusal.
YEHOVA NDIY UWANYIDINA KUTEK MIMBU
6. Mutapu ik wamekeshay Yehova anch wading utakedin chikumangan chasadika mwiur? (Job 1:7, 8)
6 Tang Job 1:7, 8. Yehova wading utakedin chikumangan chilejenau mu maverse minam. Wamwipula Satan anch: “Ov, wamushinshikinaku kashalapol wam Job?” Chakin kamu, Yehova wading wij anch Satan ukimbin kumupak Yobu. El tumanany katat mutapu wafanyinay Yehova kusadin usu wend mulong wa kumukwash Yobu.
7. Kukwatijan ni Job 1:10, 11, yom ik yalonday Satan piur pa antu amusadidina Yehova?
7 Tang Job 1:10, 11. Yehova ndiy uda piur pa yom yawonsu ni ukat kusadin ulabu wend ni usu wend mu mutapu umenay anch ud uwamp. (Jer. 32:17; Dan. 4:35) Chikalap nchik mwamu, Satan wamekesha kamu anch Yehova ukat kusadin usu wend mu mutapu uyimp. Chilakej, Satan walonda anch Nzamb ukat kuyinkish antu yom yivud mud mwasalay kud Yobu, chakwel amusadin. Walonda kand anch antu amusadidin Yehova mulong kwau wa yom yitanidinawamu. Mutapu ik wakulay Yehova?
8-9. Mimbu ik yamutekinau Satan kud Yehova, ni mulong wak? (Job 1:12) (Tal kand chipich.)
8 Tang Job 1:12. Yehova witiya anch Satan amupak Yobu mulong wa kuman anch wading umukatin kamu chakin, pakwez kamwitiyijap kusal yom yawonsu yikatinay. Nzamb wamuleja patok anch: “Kangal wamupukunaku amwinend.” Kurutu kwa angel awonsu, Yehova wateka mimbu ku yom yafanyinay Satan kusal. Satan kadingap ni usu ap mutapu wa kumatik mimbu yiney. Chid kand mwamu ni nlel. Yehova wasadina ulabu ni usu wend mulong wa kumuchidij Yobu ni kuchidij kalimish kend amwinend.
9 Satan wamukanganya Yobu, mulong Yobu wadandamena kumusadin Nzamb nich kushinshaman. (Job 1:22) Pakwez Djabul wading kand kal apwish kumupak Yobu.
Yehova witiya anch Satan alond yom yitonginay kurutu kwa yitang yawonsu (Tal paragraf wa 8-9)
10. Mulong wak Yehova witiya anch Satan amupak Yobu kapamp kakwau? (Job 2:2-6)
10 Tang Job 2:2-6. Kapamp kinak, Satan wamumesha Yobu mar nakash mulong wa kumuziyish. Satan wafa mukan anch kurutu kwa rufu, Yobu ukumukis Yehova ni ukulik kumusadin. Mulong wa kupwish mulong, Yehova witiya anch Djabul amwas ikundj winou ushinshamena mayej makash. Pakwez kapamp kinak kand, Yehova wamutekina mimbu. Wamuleja anch: “Lam ching kusu mwom wend.” Satan kadingap ni mutapu wa kulik kusal yom yamulejau. Pinap kand, tumen anch Nzamb wa Piur Nakash wading utakedin yom chisu chading chirishinay Yobu ni milong yikash, mulong Satan katwishap kumatik mimbu yamutekinau.
YEHOVA WAPWISHA MAR MA YOBU
11. Papwishay Yehova mar mading mamenay Yobu, mutapu ik wamuyukishay? (Job 42:10-13)
11 Tang Job 42:10-13. Choviken kamu patok anch Yobu washala ushinshamena, chawiy Yehova wamukangesha Satan kumupak kand. Yehova wapwisha mar mading mamenay Yobu. Satan kadingap ni usu wa kumukangesh Yehova kumuchidij Yobu ni kumuyukish.
12. Let chilakej chimekeshina mutapu wasadinay Yehova usu wend mulong wa kuyipandish atushalapol end amuchingejidina.
12 Mu machuku minam mansuden, Yehova usadidin usu wend mulong wa kuyikwash atushalapol end. Chilakej, mu 1945 Atuman a Yehova 230 apanda chisu chading chiyidoshinau mu rukan mulong wa kuya kuyijip kud amasalay In Nazi. Atuman inay afunda piur pa mar mamanau ni alonda anch, Yehova wayipandisha mud mwayipandishay In Hebereu asatu abudika mu kasu pakad madjimb ma mish. Mutapu umwing kand, Atuman inay adokala mu mar makash, pakwez ikala ni ritiy rikash kusutamu pakur mulong Yehova wayinkisha usu wend. Iyova mud mwiyovay Daniel pamudoshau mu dibuku da atambu. Kudosh kamu pinipa, akwata mupak wa kudandamen kumusadin Yehova. Alonda kand anch kwikal ni mutapu wa kumusadin Yehova chikupu ni chikupu dawiy difut dijim.—Ilakej ni Daniel 3:27; 6:22.
13. Kashinsh ik tufanyidina kwikal nich chisu turishina ni milong? (Tal kand yipich.)
13 Niyetu tukutwish kurish ni milong mu mwom wetu ni kwiyov mud tud mu dibuku da antambu. (1 Pita 5:8-10) Yisu yimwing, tukutwish kuziy nakash ni kuman mud milong yetu yikupwap kwau. Mu yisu mud yiney, kuvurik yom yamushikena Yobu kukutwish kutukwash. Tukutwish kuchingejin nakash mu usu ukwetay Yehova mulong wa kupwish milong yetu chikala katat ap mwi ngand yisu. Yehova watekin kal chisu cha kushesh mangand minam ni kakulikidinap anch dichuku ap dimwing disut.
Yehova ukupwish mar ma atushalapol end ashinshamena (Tal paragraf wa 13)
YEHOVA UYIKATIN ATUSHALAPOL END ASHINSHAMENA
14-15. Yom ik yikatinay Yehova kuyisadin atushalapol end ashinshamena, ni mulong wak? (Job 14:15) (Tal kand cha pa chibur.)
14 Tang Job 14:15. Tatukwetu wa mwiur, uyibangidining nakash antu awonsu amushinshamedina. Ap anch afa, ukuyivumbul mulong uyikwatin nich usey nakash. Pakuyivumbulay antushalapol end mwi ngand yisu, antu awonsu akwov musangar nakash.—Isay 65:17.
15 Ap anch Yobu wadandamena kushakam mu mangand matakedinay Satan, kusutin yom yilejenau mu Bibil twij anch Yehova wamwinkisha kand mwom uwamp nakash kusutamu wadingay nich kurutu kwa kumupak kud Satan. Yiyukish yikalay nich yading yikemp kusutamu yikwikalay nich machuku ma kurutu. Yom yiney yitufundishin anch Yehova ukatin chakin kamu kuyiman atushalapol end ashinshamena akat kusanger mwom. Chikwau kand, Yehova ukuyinkish antu awonsu amushinshamedina mutapu wa kusanger mwom uwanyidina mu paradiz pa divu. (Kuj. 21:3, 4) Ukwet impu ya kuwanish yom yawonsu yilondinay mulong Ndiy uda piur pa yom yawonsu. Kwijik uyakin winou kukat kutukasikesh chisu turishina ni milong!
Kupwa kwa milong yarishay nich, Yobu ni mukajend ayiyukisha kud Yehova (Tal paragraf wa 14-15)
16. Mayingishin ik kand tukweta ma kumuchingejin Yehova Mwin Dikand Dawonsu?
16 Kupwa kwa kushakam machuku mavud pa mangand, Yobu wafa. Pakwez twij anch Yehova ukwet usu wa kumuvumbul, mulong Ndiy Mwin Dikand Dawonsu, uda kand piur pa yom yawonsu. (Kuv. 32:39) Chawiy kwikil muntu ap umwing ukutwisha kumukangesh kuyivumbul antu awonsu akatinay, ni pa chisu chatondinay kal.—Rom 8:38, 39.
MUCHINGEJINA YEHOVA NI MUCHIM WEY WAWONSU
17. Yom ik yimekeshina anch Satan wakangeny kal kuyishesh atushalapol a Yehova?
17 Yom yilondinay Bibil piur pa Yobu yitwinkishin mayingishin mavud ma kumuchingejin Yehova ni muchim wetu wawonsu. Tumujikitishin Yehova nakash mulong kalikidinap anch Satan ayishesha atushalapol end! Twij anch Yehova ndiy Mwin Dikand Dawonsu mulong nlel mu mangand mud antu mamiliyon chidivu amusadidina ni kushinshaman. Yisu yivud twamen kal anch mat makatau kusadin an a antu mulong wa kuyishesh atushalapol a Yehova makatap kusal chom. (Isay 54:17) Ap maguvernema ni marelijon kushalijan mamening anch atushalapol a Yehova kakwetingap mwin kuyikwash, pakwez kakatap kutwish kuyikangesh kumwifukwil Nzamb; ni kwikil chom ap chimwing chikutwisha kutukangesh kulejan uyakin piur pa Yehova ni kumekesh anch Satan ud mukamakasu ni mwin kujipan. Ap rufu rikutwishap kutukangesh kusal mwamu, mulong Yehova ukuyivumbul antu awonsu amushinshamedina.—Ozey 13:14.
18. Mulong wak tufanyidin kwikal ni ruchingej anch machuku ma kurutu makwikal mawamp?
18 Anch twatongijokin pa yom yakin yamushikena Yobu, tukudandamen kwikal ni kashinsh anch Yehova ukutukwash chikalap nchik yom yikutushikena machuku ma kurutu. Pa chirung cha mar makash, atushalapol a Nzamb akumekan mud kakwetap usu, pakwez Satan nau antu end akumekan mud akwet usu nakash. Pakwez mud muyasadika pa chirung cha Yobu, Yehova ukushinshikin yom yawonsu nawamp ni kakulikidinap anch Satan ayisal antwend chom chiyimp chikutwisha kuyishesh rawonsu. Chisu chikat kusej mau mau chikupwishay Yehova mar mawonsu maletishay Satan pa mangand. Sakudimban ni ayilembil end akuyikasin mu ruwengil rakad musul mu mivu 1 000. (Luka 8:31; Kuj. 20:1-3) Kwinsuden, Satan nau antu a kumutambu wend akuyishesh. (Kuj. 20:10) Mud mwalonday Yehova, akumuchany Satan ku mutu ni mwamu kakwikalapaku kand chikupu.—Dis. 3:15; Rom 16:20.
19. Yiyukish ik yikwikalau nich antu amuchingejidina Yehova ni muchim wawonsu? (Tal kand chipich.)
19 Atushalapol akin a Nzamb achingedin nich impu chisu chikwikalau ni mwom uwanyidina ni musangar wakin mwi ngand yisu yikweza piswimp ap. Mwom ukwikal uwamp kusutamu ni mutapu tuutongidina. Yehova utukanin anch: “Talany! Nikat kusal yom yawonsu yisu.” (Kuj. 21:5) Chirumburikin ik? Kakwikal kapamp ka kusambish ka kukolikau antu ku yibachikin yiyimp ya chisum cha Satan nau ayilembil end. Chikwikal chirung chiwamp nakash! Kukwikalap kand yakamish yikumukangesha muntu kulal tul. Antu akupanda ku Armagedon akuyerik mu chilay. Kupwa kukwikal chad divumbuk da anamakwetu afila kal. Tukwikal chad ni mwom mud ukatinay Tatukwetu wa mwiur anch twikal nich!
Atushalapol ashinshamena a pasak ajijamena yakamish, akuyiyukish kud Yehova (Tal paragraf wa 19)
20. Ukwatin mupak wa kusal ik?
20 Pitudandamedina kurish ni milong mu machuku minam mansuden, el tukwatan mupak wa kumuchingejin Yehova ni muchim wetu wawonsu ni kunung chikas ku winyikel wend. Tumekeshan anch tumukatin chakin kamu Tatukwetu wa mwiur ni kumekesh anch Satan ud mukamakasu. Mwaning, tuchingelan nich impu winyikel wa Yehova, Nzamb uda piur pa yom yawonsu ni ukweta impu ya kuyifut atushalapol end ashinshamena mu chilik chijim nakash!
MUMINY 153 Nginka Kutakaman