RUBING RA 25-31 NGOND WA 5, 2026
MUMINY 135 Kutazuk kwa Yehova: “Mwanam Ikundj, Ikal Mwin Manangu”
Ikal Mwin Manang Mulong wa Kusal Yom Yimusangareshina Yehova
“Muntu ukutambula manangu wikatil amwinend, ni ndiy mwin kulam ronganyin ukutan kuwap.”—JNSW. 19:8.
MU WISWIMP
Tukuman mutapu ukutwisha manang kutukwash kusal yom yimusangareshina Yehova chisu turishina ni milong.
1-2. Manang chom ik, ni makutwish kutukwash mutapu ik?
OV, AKUBUREDINAP kal kalimish? Ov, akurumburishinap kal mu mutapu uyimp ni kukudimben makasu? Ap ov, kud yom yimwing yakwovishap kal wom? Anch yom yiney yakushikedinap kal, wij kamu anch chiswapelingap kusal yom yida yiwamp mu yisu mud yiney. Chamusangar, Bibil utulejin mwikadil uwamp ukutwisha kutukwash mu yishiken mud yiney: kwikal mwin manang.
2 Manang ud mwikadil ukutwisha kutukwash kulik kukwat mipak yimedina kwau pa yom tumena ku mes, pakwez yimedina pa yom yivud tukutwisha kwijik piur pa mupak tukimbina kukwat. Chilakej, tukutwish kutesh mulong wak yom yiney yashikenang ni mulong wak muntu wasalang yom mu mutapu kanang. Mwamu tukutwish kukwat mipak yiwamp. Manang makutwish kutukwash kutong kurutu kwa kulond ni kwijik chisu chifanyidina kuninet. (Jnsw. 10:19; Kus. 4:5) Makutwish kand kutukwash kudwutish ujim wetu ni kwiyep yoziu, kwitiy chiyul ni dipup. (Jnsw. 19:20) Anch twikal in manang, yom tukulonda ni yom tukusala yikumusangareshap kwau ching kusu Yehova, pakwez yikuyisangaresh kand antu akwau ni ayinetu tukutaninamu. Chikwikal cha usey nakash kusal mwamu, pakampwil anch atwovish ujim ni atubachik kusal yom yiyimp. Chawiy tushinshikinanyaku nsang ja antu asatu alejenau mu Bibil mulong wa kuman mutapu ukutwisha manang kutukwash kwikal antu ikepishina, kuninet ni kumuchingejin Yehova ni muchim wetu wawonsu.
IKEPISHA PA NDOND PA KWITUTUL
3. Naaman wading nany?
3 Mulong wa kusal yom yiwamp tufanyidin kulikap kwitutul. (1 Pita 5:5) Manang mawiy makutwisha kutukwash kusal mwamu. Mutapu ik? Tushinshikinan chilakej cha Naaman. Wading ushicha mu Siriya, ngand yading kwiyand kwa Isarel. Naaman wading muntu mujim nakash, mulong wading mukurump wa amasalay a mu Siriya. Pakwez, wayela mayej makash ma musong wa kasu.—2 Ant 5:1.
4. Mutapu ik wamekeshay Naaman anch wading wikepishin?
4 Mband wa Naaman wading ni mwilomb wend, changadim umwing Mwin Isarel. Changadim winou ndiy wamuleja anch mu Isarel mud muprofet umwing ukutwisha kumwok nfumwend. (2 Ant 5:2, 3) Naaman wafanyina kwiyipul anch: ‘Ov, kachangadim kinak ka mu muchid wa akankuny netu In Isarel kakutwish kamu kwinlej yom yikutwisha kwinkwash?’ Pakwez Naaman witiyija yom yamulejau. Pa ndond pa kudiburil yom yamulejau, wikepisha ni wakwata mazu minam nich usey. Wamwita mwant Mwin Asiriya chakwel amwitiyin kuya kwiyokishin mu Isarel.—2 Ant 5:4, 5.
5. Yom ik yasadika pashikay Naaman mu Isarel?
5 Naaman washika mu chipang cha Mwant Joram, wading ni kashinsh anch ukuyerik. Pakwez Joram wamana anch Mwant wa In Asiriya wading ukimbin kumurishikish. Pateshay Elisha yom yiney, wamuleja Joram kumutuminay Naaman chakwel amanijan nend. (2 Ant 5:6-9) Yom yasadikap kamu mud mwading muchingejinay Naaman. Elisha kabudikap ap pol mulong wa kumuman Naaman ap kwambamb nend. Pakwez wamutumina muntu wafanyina kumulej yom ya kusal chakwel ayerika.—2 Ant 5:10.
6. a) Yom ik pamwing ap yakimba kumubachik Naaman kwitutul? b) Mutapu ik wamekeshau atushalapol end anch akwet manang, ni yibudikin ik yikalaku? (2 Ant 5:13, 14)
6 Kwinsambishin Naaman kasangarap pamutuminau muntu mulong wa kumulej yom ya kusal. “Naaman wajimana” ni “wafunika, waya nich ujim.” (2 Ant 5:11, 12) Mulong wak? Pamwing ap wading uchingejin anch akumwak ni kalimish mulong wading mukurump wa amasalay. Ap kand, watonga anch umutakel wamwinkishau kud Elisha wamekesha anch uyiburedin In Siriya kalimish. Chikalap nchik mwamu Naaman wakwata mupak wa kuchirik kwol kwend ni mayej. Pakwez, atushalapol end amana anch Elisha wading ukatin kamu kumukwash ni amwita kuswimp mupak wend. Naaman walika kwitutul ni witiya nich kwikepish yom yamulejau kusal kud Elisha; chawiy wayerika!—Tang 2 Ant 5:13, 14.
7. Rusang ra Naaman ritufundishin ik? (Jinswir 22:4) (Tal kand yipich.)
7 Rusang riner ritufundishin ik? Tukumekesh anch tud in manang anch twakwat mipak yakad kwimen kwau pa yom tumena ku mes. Tukumekesh kand anch tud in manang anch twalik kukwat mipak yimedina kwau pa yovil yetu. Kwikal ni manang kukutukwash kwikal ikepishina. Mwamu chikutuswapel kwitiyin anch twijap yom yawonsu. Tukwet kand kuswir kwa ukwash wa antu akwau, ni pakampwil ukwash wa Yehova. Ap anch Naaman kadingap kashalapol wa Yehova; wamekesha anch wading mwin manang payiteshay antu akwau ni kwikepish. Wamutesha mukajend, changadim musuk Mwin Isarel, atushalappol end ni cha usey nakash wamutesha Elisha, kashalapol wa Yehova. Naaman walikap kutongijokin pa yom yamujimesha, chawiy watwisha kukwat mupak uwamp. Anch atwinkish chiyul chimedina pa Bibil, ap anch tuteshinap nawamp umutakel kanang udokila ku dirijkek da Yehova, kurutu kwa kukwat mupak piur pa yom tukusala, tufanyidin kushimpish muchim ni kutong nakash mulong wa kuman anch yom tukimbina kusal yikumekesh anch tud in kwikepish ap in kwitutul.—Tang Jinswir 22:4.
Mud mwateshay Naaman chiyul nich kwikepish, niyetu tufanyidin kutesh nawamp chisu chituyudinau, chisu chitulejinau akwetu milong yau, ap chisu tutambwila umutakel mu dirijek da Yehova (Tal paragraf wa 7)
IKAL MWIN KUNINET PA NDOND PA KUJIMAN
8. Chisu ik chikutwisha kutukasiken kuninet?
8 Kwikal ni manang kukutwish kutukwash kuninet ni kulik kusal yom ni ujim mu yisu yiyimp. Chakin kamu, chiswapelingap kusal mwamu; pakwez ap mwamu tufanyidinap kulond yom yiyimp ni kuyisal antu akwau yom yiyimp kupwa twiyingish nich. (Efes 4:26) Tushinshikinan mutapu wamekeshay David ni Abigayil manang pa chisu chiyimp.
9. Yom ik yamusalau David kud Nabal?
9 Tong mutapu wasadika yom: David ni antwend amuchina Saul ni aya kushakam mwi mpay ya Paran. (1 Sam. 25:1) Padingau mwinimwa, ayichidija atufung a Nabal nau amikoku au. (1 Sam. 25:15, 16) Pashikau pa chisu chakukamb mavuj ma amikoku, David wayituma antwend kumulangwish Nabal, nich kwikepish, wayileja kumwit yakuda. (1 Sam. 25:6-8) Pakwez Nabal wakanganya kumekesh kujikitish mulong wa yom yawonsu yamusadinau kud David nau antwend. Chawiy wayiswejena, ni wayiswingisha awonsu kuwejinaku ni David win.—1 Sam. 25:10, 11.
10. Mutapu ik wamekeshay David ni Abigayil anch ading antu akweta manang? (1 Samwel 25:32, 33) (Tal kand chipich.)
10 Anch witek pa ndond ya David, yom ik wafanyina kusal? Yoviken kwau anch David wova ujim nakash. David wading muntu ukweta yovil yikash, chawiy pa chisu chinicha wajimana nakash kushik ni mu chilik cha kukimb kumujip Nabal! (1 Sam. 25:13, 21, 22) Pakwez, Abigayil mband ukweta manang wamwimika David ni antwend pading payilau mulong wa kumujip nfumwend Nabal. Mutapu ik wamekeshay Abigayil anch wading ukwet manang? Wajingunina anch David wading kwend muntu muwamp chikalap nchik yom yading yikimbinay kusal, chawiy wasala usu wa kumukwash David kudwutish ujim wend. Wamwinkisha yakuda ni wamwinka kand yiyul yiwamp. (1 Sam. 25:18, 23-31) David wamekesha anch wading muntu ukweta manang mulong wamutesha Abigayil ni wajingunina anch yom yamulejay yading yikwatijadin ni chitongijok cha Yehova. Mud chibudikin, David widwutisha ni wipuka kusal yom yiyimp.—Tang 1 Samwel 25:32, 33.
Kusutin mwikadil wa manang wamekeshay David ni Abigayil atwisha kwiyep milong yikash yela kuyishiken (Tal paragraf wa 10)
11. Kwikal ni manang kukutwish nchik kutukwash anch atujimesh? (Jinswir 19:11)
11 Rusang riner ritufundishin ik? Kwikal ni manang kukutwish kutukwash kumekesh chisambu ap anch tukwet mayingishin ma kujiman. Manang makutwish kand kutukwash kutongijokin pa yibudikin ya mazu metu ap yisal yetu. (Tang Jinswir 19:11.) David wadwutisha ujim wend pamanay anch yom yakimbay kusal yelap kumusangaresh Yehova. Anch chom kanang chakujimesh, ikasikesha kulik kukwat mupak chisu ukweta ujim. (Yak. 1:19) Muvurika Yehova ni mulembila chakwel akukwash kuman yom mud muyimenay Ndiy. Anch wasal mwamu, chikukuswapel niyey kuninet.
12. Mutapu ik ukutwishau antu akwau kutukwash kwikal ni chitongijok cha Yehova ni kutukwash kwikuchik?
12 Yehova ukutwish kuyisadin antu akwau mulong wa kutukwash niyetu kujingunin chitongijok chend piur pa mulong kanang, mud mwamusadinay Abigayil mulong wa kumukwash David kutesh yom nawamp. Chawiy kurutu kwa kusal yom chisu ujimena, chid cha usey kumwipulap Mwin Kristu uswila ukutwisha kukukwash kuman yom mu mutapu uwamp. (Jnsw. 12:15; 20:18) Ap kand niyey anch ukwet mutapu wa kumukwash muruney uda mu chishiken kanang, ikasikesha kumwimburij Abigayil. Mukwasha kujingunin yom yikatinay Yehova anch asal. Anch wasal mwamu, Yehova ukukukwash kulond yom yiwamp yikutwisha kuyikwash akwen.
MUCHINGEJINA YEHOVA PA NDOND PA KWOV WOM
13. Manang makutwish kutukwash mutapu ik chisu twovila wom?
13 Yisu yimwing, tukutwish kurish ni milong yikutwisha kutwovish wom. Pakwez manang makutwish kutukwash kupandakan wom wetu, ang twavurik anch milong yawonsu tukutwisha kurish nich mu mangand minam yikutwishap kupandakan usu ukwetay Yehova. (Kus. 27:1) Yehova ukutwish kutukwash ap anch tumenap yom ya kusal mulong wa kupwish mulong wetu. Yawiy yom yamushikena muprofet Yona. Wading ikundj uswila mu spiritu, pakwez wading uswirikedin manang mulong wa kuwanish chisend chikasikena chamwinkishau.
14. Mulong wak Yona widjidjeka kwitiy chisend chamwinkishau kud Yehova?
14 Yehova wamwinkisha Yona chisend chovishena wom: kuya mu musumb wa Niniv mulong wa kulejan uruu wa dirumburish. (Yona 1:1, 2) Anch yeya winkishau chisend chinech, yom ik wafanyina kusal? Yona wafanyina kwendangan ra pansh mu musumb wa Niniv piswimp mwi ngond wa kabuj. In Asiriya ading antu akweta chisum. Ni musumb win wa Niniv ading awutazukin anch “musumb wizwila nich kujipan”! (Nah. 3:1, 7) Chawiy pa ndond pa kusal yom yamulejau kud Yehova, Yona wachina.—Yona 1:3.
15. Yom ik yamukwasha Yona kumuchingejin Yehova nakash? (Yona 2:6-9)
15 Yona wakandama mu bato wading uyila kulemp ni Niniv. Kushik kwinikwa, amudjubwila mu mem, kupwa Yehova wamupandisha mu chilay. Chawiy, Yona wimenap amwinend usu wa Yehova. (Yona 1:15, 17) Yom yiney yamufundisha Yona dilejan. Wamana anch kadingap kafanyidina kwov wom wa chisend chamwinkishau cha kuya ku Niniv, pakwez wafanyina kwikal ni kashinsh anch Yehova ukumuchidij ku ubaj wawonsu wafanyina kumushiken. (Tang Yona 2:6-9.) Chawiy, pamutumau kud Yehova kapamp ka kaad, Yona kalikap kand. Waya ku Niniv ni mudimu wend wikala ni yibudikin yiwamp nakash.—Yona 3:5.
16. Manang makutwish nchik kutukwash kurish ni yom yitwovishina wom? (Jinswir 29:25) (Tal kand yipich.)
16 Rusang riner ritufundishin ik? Tufanyidinap kulik chom ap chimwing chitukangesh kumwifukwil Yehova, pakampwil kumwov muntu wom. (Tang Jinswir 29:25.) Yona watongijokina pa yom yawonsu yamushikena ni wamana anch wading ukwet kuswir kwa kwikal ni kashinsh anch Yehova ukumukwash, ap anch wading wiyakamishin mulong wa yom yafanyina kumushiken. Mutapu umwing niyetu, tufanyidinap kushinshikin pa yom yitwovishina wom, pakwez tufanyidin kushinshikin pa mutapu watukwashay Yehova mu machuku ma kwinyim. Tukutwish kand kutongijokin pa yilakej ya akadivar nau anambaz apandakana milong yayovisha wom ni atwisha kuwanish yisend yading yiyikasikedina, mulong amuchingejina Yehova.a (Heb. 13:6) Chawiy komb tufanyidin kumekesh anch tukwet manang, kusutin kumuchingejin Yehova nakash ni kuyikwash antu akwau niyau kusal mwamu.
Chilakej cha Yona chitunfundishin anch manang makat kutukwash kutesh yiyul ya Yehova yikata kutukwash kuwanyish yisend yitukasikeshina (Tal paragraf wa 16)
IKAL NI MANANG NI DANDAMEN KUMALAM
17. Mutapu ik tukutwisha kwikal ni manang nakash?
17 Mud twamana kal, manang makutwish kutukwash kupandakan milong yikutwisha kutushiken. Mutapu ik tukutwisha kwikal ni manang nakash? Yehova ud Musul wa manang makin, ukat kumapan kud atushalapol end kusutin Dizu dend ni spiritu wend utumbila. (Neh. 9:20; Kus. 32:8) Ukat kutwinkish manang makutwisha kutukwash kukwat mipak yiwamp ni kulam yovil yetu. (Kus. 119:97-101) Tukwikal ni manang nakash anch twadandamen kwilej Dizu da Nzamb ni twit ukwash wa spiritu wend utumbila. Kusal mwamu, kukutukwash kwikal ni chitongijok chiwamp piur pa mulong ukutwisha kutushiken ni tukwijik mutapu uwamp wa kuupwish, ni mwamu mazu metu ni yisal yetu yikumekesh anch tukwet chitongijok cha Yehova.—Jnsw. 21:11.
18. Tufanyidin kukwat mupak wa kusal ik?
18 Mulong twatesh kal anch manang mad ma usey nakash, chawiy tudandamenany kumit kud Yehova. (Kus. 14:2) Ang twasal mwamu, tukupakishap “kusenguril njil ya manangu.” (Jnsw. 21:16) Pakwez tukudandamen kukwat mipak yiwamp chisu chawonsu ni mu chishiken chawonsu. Mud chibudikin, tukumusangaresh Yehova
MUMINY 42 Malembil ma Kashalapol wa Nzamb
a Chilakej, tang rusang ra Georgiy Porchulyan rilejenau mu mutu wa mulong “Biographies de Témoins de Jéhovah” mu JW Library® ap pa jw.org.