Ukutwish Kwikal ni Musangar ap Anch Akukisin

1. Mazu ik mashimwokishena malonday Yesu piur pa rukis?

MU MAFUNDISH mend ma pa Mukandu, Yesu walonda anch: “Wayukany kwen anch antu akukisany.” (Luka 6:22) Mazu minam mafanyina kuyishimwokish antu ading amuteshina. Mulong kwikil muntu ukatining anch amukis. Chad mulong wak Yesu walonda mazu minam? Chid cha usey kushinshikin chipul chinech, mulong in kwilej a Yesu ayikisin kud antu avud nlel. Tukuman mulong wak antu atukisin ni mulong wak tufanyidin kwikal ni musangar anch atukis.

MULONG WAK ATUKISIN?

2-3. Diyingishin ik diyipompatidinau In Kristu akin, ni kwijik diyingishin dined kutukwashin mutapu ik kuswimp mutapu tuyimena antu atupompatina? (Yohan 16:2, 3)

² Atukisin mulong tumwifukwidin Yehova. Yesu walonda piur pa antu afanyina kuyizengol ap kuyijip in kwilej end anch: “Kashikedinap kumwijik Tatuku ap kwingijik am.” (Tang Yohan 16:2, 3.) Nany ukata kuyibachik antu kuyipompat antu a Nzamb? Ud Satan. Ndiy uda “nzamb wa mangand minam.” (2 Kor. 4:3, 4) Ukat kuyibwik antu pa mes chakwel akangany kwijik uyakin piur pa Yehova ni kuyibachik kuyipompat antu awonsu ija uyakin winou ni amukatina Nzamb. (Yoh. 8:42-44) Kwijik mwamu kutukwashin mutapu ik kuswimp mutapu tuyimena antu atupompatina? Chinech chikat kutukwash kulik kuyikis.

³ Tushinshikinanyaku chilakej cha Pavel,a ushicha mwi ngand mukangeshinau mudimu wetu. Amukwata, amubula nakash ni kumutek mu rukan mu angond avud mulong wading udandamedin kumwifukwil Yehova nich kushinshaman. Katat Pavel ulondin anch: “Nij kamu nawamp anch Satan nau ayilembil end awiy akimbina kutukangesh kumwifukwil Yehova. Chakin kamu, amasalay akata kutukwat kakwetap kwau mulong niyetu ni katukisinap. Asadining kwau mudimu wau.” Mukadivar umwing wa mu Krowasi wapompatau nakash kud anvajend akad kwikal Atuman ulondin anch: “Nimen katat anch Satan ndiy kamu mukankuny nam, kadap anvajam.”​—Efes 6:12.

4. Chilakej cha Yesu ni mwin kwilej Stefan chitufundishin ik? (Tal kand chipich.)

⁴ Tuyikisiningap antu atupompatina. Chawiy tukat kuyilembil. (Mat. 5:44) Yesu ni Stefan atushila chilakej chiwamp pa mulong winou. Pamupampau pa mutond wa mar kud amasalay a In Rom, Yesu walembila anch: “Tatuku, yilikishina.” (Luka 23:34) Palonday mwamu, Yesu wading ukat kumwit Yehova chakwel ayilikishin amasalay ading amupampina. Chimeken anch pakach pa antu itinay yom yiney pading kand antu abachikau kud akankuny nend kutoy anch amujip. Yesu wading wij anch antu inay kadingap kwau kija yom yading yisadinau. Stefan niyend wamwita Nzamb chakwel ayilikishin antu ading akimbina kumujip. (Mid. 7:58-60) Ov, Yehova wakula malembil ma Yesu ni ma Stefan? Mwaning. Tulondin mwamu mulong mu kusut kwa chisu antu avud amujipa Yesu akarumuka, amwitiyija ni ayibatisha. (Mid. 2:36-41) Ni Saul wa ku Tarsis wadinga pakach pa antu amujipa Stefan wikala Mwin Kristu ni winana mulong wa yom yiyimp yasalay.​—1 Tim. 1:13.

5. Chilakej cha César chikufundishin ik?

⁵ Nlel kand Yehova ukat kwakul ku malembil tukata kuyilembil antu atupompatina. Shinshikin chilakej cha César uda mu Venezwela. Tatukwend wamupompa nakash pikalay Kaman wa Yehova. César ulondin anch: “Maku wading chilakej chiwamp. Watekang Want wa Nzamb pa ndond ya kusambish, pakwez kamudiulangap tatuku. Watukasikesha kumulimish tatuku. Watukasikesha kand kumuziyin mu yom yawonsu anch yipwitamijadinap ni mbil ja Bibil.” Mu kusut kwa mivu, tatukwend wasambisha kuswimp. César ulondin kand anch: “Dichuku dimwing, kupwa kwa kulembil ni muchim wam wawonsu, namwipula tatuku anch ukwitiy tusambish kwilej nend Bibil. Chikasiken kurumburil mutapu niyova pitiyay.” Mu kusut kwa chisu, tatukwend a César amubatisha. Chakin, kadap antu awonsu atupompatina akata kuswimp mutapu winou, pakwez amwing akat kuswimp mutapu utumenau anch aman kalimish ni mwikadil wetu uwamp. Yom yiney yikat kutusangaresh nakash! Tuchingedin nich impu chisu chikuyipwitay Yehova, Nzamb mwin ranaken uda kand “Nkalansambu wa mangand mawonsu.”​—Dis. 18:25.

6. Kukwatijan ni Marko 13:13, diyingishin ik dikwau ditukisidinau kud antu?

⁶ Atukisin mulong tumulimishin Yesu. Yesu walonda anch In Kristu akin akuyikis kud antu awonsu “mulong wa dijin [dend]” (Tang Marko 13:13.) “Dijin” da Yesu dirumburikin ik? Dirumburikin katumb ni ulabu ukwetay mud Mwant wa Want wa Nzamb. Atukisin kud antu ayichingejidina antakel a mangand, pa ndond pa kumuchingejin Yesu, ntakel watondinay kal Yehova mulong wa kutakel mangand kudosh mu muvu wa 1914. Piswimp ap, Yesu ukushesh maguvernema mawonsu ma an a antu.

7-8. Mulong wak Atuman a Yehova amwing akat kuyisip ni kuyizengol? (Yohan 15:18-20) (Tal kand yipich.)

⁷ Atukisin mulong twiyandjikinap mu mangand minam. Yesu walejana anch in kwilej end akuyikis mulong ‘kadap a mangand’ minam. (Tang Yohan 15:18-20.) Mud In Kristu a mu mivu chitot ya kusambish, niyetu tulikin mikadil, yisal ni mazu makad kumusangaresh Nzamb. Chawiy, akadivar nau anambaz avud akat kuyisip ni kuyizengol ku mudimu ap ku shikol. (1 Pita 4:3, 4) Pakwez tukat kusangar nakash pakuman anch antu amwing akata kutupompat akat kuswimp ni akat kutubaz mulong wa mwikadil wetu uwamp.

⁸ Shinshikin yom yamushikena Ignacio ushicha mu Amérique Centrale. Ku shikol kwilejinangay kwading mulej wamusipang mulong walimishang mbil ja Bibil. Pakwez kurutu kwa kupwish shikol, mulej wend wamwipula yom yamukwashang kulimish mbil ja Bibil mwi ndond yiyimp mud yinaya. Ignacio wamuleja anch mbil ja Bibil jawiy jamuchidijang. Kupwa wamutazuka mulej winou ku yikumangan. Ignacio washimwoka nakash pamumanay ku yikumangan mulong kadingap katongidina anch ukwez! Mulej wend washimwoka nakash mulong amwaka ni chirungul ku yikumangan, chawiy wadandamena kukumangan. Mu kusut kwa chisu, niyend amupompata mulong wasambisha kwilej Bibil. Pakwez wadandamena kuya kurutu mu spiritu ni disuden amubatisha.

9-10. a) Diyingishin ik kand dikwau dikata kuyibachik In Kristu kulik kwiyandjik mu yom ya mangand minam ma Satan? b) Yom ik twilejidina ku chilakej cha kambuy Paul?

⁹ Tukatap kand kwiyandjik mu yom ya politik ni mu jinjit. (Yoh. 18:36) Kukwatijan ni chiyul chida mu Rom 13:1, tukat kuyiziyin antakel a mangand minam. Pakwez mulong tud In Kristu, tukatap kwiyandjik mu milong ya politik, tukatap kukimb anch atuvot ap kuyivot antu akwau. Mulong wak? Mulong tumushinshamedin Yehova ni tud ku mutambu wa Want wend utakedinau kud Yesu Kristu. Atuman a Yehova avud ayikwatin mu jinkan mulong wa ritiy rau. Ap mwamu, adandamedin kulejan rusang ruwamp. Kusutin kusal mwamu akat kumwimburij kambul Paul wakwatau mu mivu yivud. (Mid. 24:27; 28:16, 30) Paul wadandamena kulejan rusang ruwamp kud antu awonsu akatang kumutesh, chikupu ni atulam a rukan, amakurump a amasalay, aguverner, ant ni pamwing kand kud Nero Mwant wa In Rom.​—Mid. 9:15.

¹⁰ Chilik chimwing kand, akadivar nau anambaz netu ada mu jinkan niyau akat kwikasikesh kulejan rusang ruwamp kud awonsu akata kuyitesh, chikupu nau anzuj, antakel a maguvernema ni atulam a rukan. Mukadivar umwing wasala mu rukan mivu musamban ni kusut mulong walika kwiyandik mu yom ya politik, wamana anch kamutekap mu rukan mulong wa kumupup, pakwez mulong wa kumukwash kukimb antu akutwisha kwitiy uyakin. Tukweting musangar nakash anch Yehova watukwash kutan antu akatina kutesh rusang ruwamp! (Kol. 4:3) Tushinshikinany kand mayingishin makwau mafanyidina kutubachik kusangar ap anch atukisin mulong tumusadidin Yehova.

MULONG WAK TUFANYIDIN KUSANGAR AP ANCH ATUKISIN

11. Rupompat rikutwish nchik kukasikesh ritiy retu? Let chilakej.

¹¹ Twij anch rukis ra antu a mangand minam ruwanyishin uprofet wa Bibil. Mu uprofet wa kusambish uda mu Bibil, Yehova wasambela kulejan anch Satan ni rubut rend, charumburik anch antu amulondwila akuyikis antu amukatina Yehova ni kumusadin. (Dis. 3:15) Mud mulejenau mu Maevanjil, yisu yivud Yesu walondang anch antu amusadidina Yehova akuyikis. (Mat. 10:22; Mar. 13:9-12; Luka 6:22, 23; Yoh. 15:20) In Kristu akwau afunda Bibil niyau alonda kand mwamu. (2 Tim. 3:12; Yak. 1:2; 1 Pita 4:12-14; Yud 3, 17-19) Chawiy pakatau kutupompat, tukatap kushimwok. Pakwez tukweting musangar mulong uprofet wa Bibil ukat kuwanyin. Kwijik mwamu kukat kutwinkish kashinsh anch tumusadidin Nzamb wakin. Nambaz umwing ushicha mwi ngand mukangeshinau mudimu wetu ulondin anch: “Chisu nipana kud Yehova nading nij anch akwimpopat mu kusut kwa chisu chikemp ap mu machuku ma kurutu. Chawiy milong yikutwisha kwinshiken yikatap kwingakamish.” Nfumwend ud pakach pa antu amupompata. Wamumesha mar ni wosha kand Bibil ni mabuku mend. Pakwez pa ndond pa kwov wom, nambaz winou wikala ni ritiy rikash. (Heb. 10:39) Ulondin anch: “Bibil ulejen anch akutupompat, chawiy nading nij anch dichuku dimwing akwimpompat. Rupompat riner, ranginkisha kashinsh anch nid mu relijon wakin.”

12. Yom ik yamukwasha mukadivar umwing kujijamen rupompat?

¹² Ap anch twij ang dichuku dimwing akutumpompat, chikutwish kutukasiken kujijaman ang yashiken. Mukadivar umwing ulondin yom yamushikena padingay mu rukan. Ulondin anch: “Yisu yimwing naziyang mu manang, ni nading kwam novil ja kudil.” Yom ik yamukwasha mukadivar winou kujijaman? Ulondin anch: “Nalembilang kwam yisu yawonsu. Dichuku dawonsu pamanch, nalembiIang. Ni dichuku dawonsu da kabuj nalembilang anch kwanshiken chakamish. Ni anch yom yiyimp yansalangau antu akwau yanjimesh, nifunginang mu dush, nasambish kulembil.” Mukadivar winou watongijokina kand pa yilakej ya antu a pakur ni ya akadivar nau anambaz netu ajijamena rupompat. Kusal mwamu kwamukwasha kujijamen rupompat ni kwikal ni chisambu chayikanau in kwilej kud Yesu.​—Yoh. 14:27; 16:33.

13. Yom ik yikutwisha kutukwash kujijamen rukis?

¹³ Rukat retu ripandakenamu rukis. Yesu wamukata tatukwend ni muchim wend wawonsu djat kamu ku rufu rend. Wawiy kand mutapu wayikatay arunend. (Yoh. 13:1; 15:13) Anch niyetu twamukat Yehova ni akadivar nau anambaz netu mu mutapu winou, niyetu tukutwish kujijamen rukis. Mulong wak? Mulong wa kutan chakul, tushinshikinany chilakej cha kambuy Paul.

14. Yom ik yamukwasha Paul kujijaman djat kamu ku rufu?

¹⁴ Machuku makemp kurutu kwa kumujip, Paul wamufundina murunend Timote anch: “Nzamb katwinkishap spiritu wa wom, pakwez watwinkisha spiritu wa usu, [ni] wa rukat.” (2 Tim. 1:7) Yom ik yakimbay Paul kulond? Paul wakimba kulond anch ang tumukatin Yehova nakash tukutwish kwikal ni usu wa kupandakan milong yikash. (2 Tim. 1:8) Chakin kamu, rukat riner rawiy ramukwasha Paul kujijaman djat kamu ku rufu pakad kulikap kumwifukwil Yehova.​—Mid. 20:22-24.

15. Mutapu ik wamekeshijadidinau kal akadivar nau anambaz netu rukat rakin pa chirung chetu? (Tal kand chipich.)

¹⁵ Tuyikatin kamu akadivar nau anambaz netu ajijamedina rupompat. Chawiy amwing pakach petu akat kutek mwom yau mu ubaj mulong wa kuyikwash mud mwasalay Priska ni Akila mulong wa kambuy Paul. (Rom 16:3, 4) Chilakej, akadivar nau anambaz avud a mu Risi aya ku jinkan mulong wa kuyikasikesh anamakwetu akwatau. Nambaz umwing wakwatau pamanay akadivar nau anambaz avud ku rukan wova musangar nakash ni wakanganya kuman ya kulond mu chisu kanang. Rukat riner rakin ramumekeshinau kud anamakwend In Kristu, ramukasikesha nakash pa chisu chading chikwetay kuswir kwa ukwash. Kwikal ni rukat ripandakenamu rukis kukat kutuletin musangar nakash!

16. Mulong wak kambuy Pita walonda anch antu akata kujijamen rupompat mulong amusadidin Nzamb akwikal ni musangar? (1 Pita 4:14)

¹⁶ Twij anch tukat kumusangaresh Yehova chisu tukata kujijamen rupompat. (Tang 1 Pita 4:14.) Kambuy Pita walonda anch akata kujijamen rupompat mulong amusadidin Nzamb akwikal ni musangar. Mulong wak? Mulong rupompat rikat kumekesh anch tukwet “spiritu wa Nzamb.” Pita wading wij nawamp mutapu ukatay kwiyov muntu umusangareshina Nzamb ap anch urishin ni rupompat. Machuku makemp kupwa kwa Pantekot wa muvu wa 33 C.C., amasalay a ku tempel amukwata Pita ni atwimbuy akwau mulong ading alejen rusang ruwamp. Pakwez Pita walejana yitiyij yend nich kutakaman. (Mid. 5:24-29) Ap kupwa kwa kumubul, ndiy ni atwimbuy akwau adandamena kulejan ni asangara “mulong awiy amana anch awanyidin kuman mar mulong wa dijin [da Yesu.]” Niyetu tukutwish kwikal ni musangar chisu turishina ni milong.—Mid. 5:40-42.

17. Yom ik yayilejay Yesu in kwilej end uchuku kurutu kwa dichuku da rufu rend?

¹⁷ Uchuku kurutu kwa dichuku da rufu rend, Yesu wayileja in kwilej end anch: “Muntu mwawonsu winkatina akumukat kud Tatukwam, niyam nikumukat.” (Yoh. 14:21) Tuchingedin kamu nich impu nakash chisu chikutukatau antu mulong tumusadidin Yehova pa ndond pa kutukis! (2 Tes. 1:6-8) Pakwez pa chisu chinech, tufanyidin kuvurik mayingishin mavud matukwashina kwikal ni musangar ap anch atukisin.