Ipuk Yom Yikutwisha Kukuletin Kampuw

1-2. Mutapu ik ukutwisha yom yimwing ya usey kutuletin kampuw?

Chisu ik wipukina yom yakimbina kukuletin kampuw? Pamwing ap kud yom yakupwitidina nkeu chisu wada usadina yom kanang ni chakwita kutongin yom ya usey. Chilakej, tong bil anch akutazuk ku telefon chisu wendishina motak. Yom yikutazukidinau yikutwish kwikal ya usey, pakwez ukuman anch chisu chinech yikutwish kukuletin kampuw. Kutek manang ku wendishina kwawiy kuda kwa usey pinap.

² Etu awonsu tukwet yom ya usey ya kusal mu mwom wetu. Twij anch kwipan nakash mu yom ya mu spiritua kwawiy kuda kwa usey nakash. (Mat. 6:33) Atushalapol a Yehova akat kwikasikesh kujingunin yom yikutwisha kuyiletin kampuw mud mukatay kusal shofer ulimishina mbil ja kwendish motak.​—Jnsw. 4:25; Mat. 6:22.

3. Yom ik tukwileja mu mutu wa mulong winou, ni mulong wak?

³ Kwikil muntu ukatining anch chom kanang chimukangesh kumutek Yehova pa ndond ya kusambish mu mwom wend. Chikalap nchik mwamu, kud yom yikutwisha kutuletin etu awonsu kampuw. (Luka 21:34-36) Chawiy el tushinshikinany yom yisatu yikutwisha kutukwash kwijik mutapu wa kutek yom ya mu spiritu pa ndond ya kusambish: 1) yom yikutwisha kutuletin kampuw, 2) mutapu wipukay Yesu yom yafanyina kumuletin kampuw ni 3) mutapu tukutwisha niyetu kwipuk yom yikutwisha kutuletin kampuw.

YOM YIKUTWISHA KUTULETIN KAMPUW

4-6. Yom ik yikutwisha kutuletin kampuw?

⁴ Etu awonsu tukwet yom yivud tufanyidina kusal mu mwom wetu. Chilakej tukutwish kurish ni milong ya mayej, kwikal ni yom ya kusal mulong wa ayinetu ap mulong wa kukwash dijuku detu. Chakin, yom yiney yawonsu yid ya usey ni tufanyidin kuyishinshikin. Pakwez yikutwish kutuletin kampuw. Mutapu ik? Yikutwish kwikal mwamu anch twasambish kuyitongin nakash ni anch yatupwishin chisu ni usu wetu wawonsu.

⁵ Chikwau kand, antu avud pakach petu iyakamishin mulong wa kupwitamijan pantaliken ni milong ya chipolitik, kuburen kwa nfalang, mayej, ni milong yikwau kand yida mu mangand minam. (2 Tim. 3:1) Anch twarish ni yom mud yiney, tukutwish kwiyakamish ni kusambish kuyitongin nakash.

⁶ Pamwing ap twij muntu warishina kal ni yom mud yiney ni tumen mutapu wayipina kal mwom wend. Chakin kamu, antu arishina kal ni yom mud yiney aka kwiyakamish nakash. Antu kayitangap mulong wa kurish ni mar chisu chawonsu. Chawiy, chisu chikatau kurish ni yom yikash mud yiney akat kwiyov anch kakwetap kand mwom uwamp! Mud chibudikin, antu amwing akat kwipan nakash mu kwipuwangej. Yom ik tukutwisha kusal anch twajingunin anch yom mud yatwisambina kal ey yatushikenang kal niyetu? El tushinshikinany mutapu chilakej cha Yesu chikutwisha kutukwash kwipuk yom yikutwisha kutukangesh kumwifukwil Yehova.

MUTAPU WIPUKAY YESU YOM YAFANYINA KUMULETIN KAMPUW

7. Yom ik yafanyina kumuletin Yesu kampuw?

⁷ Kud yom yivud yafanyina kumuletin Yesu kampuw, chilakej milong ya mashakamin ma dichuku dawonsu ni yom ya chipolitik. Pa chirung chend, uzwendj ni mayej yading yipandaken. (Mat. 14:14; Mar. 14:7) Antu ading amen mar mulong wa kuburen kutentam kwa In Rom nau In Yuda. Pamanau antu anch Yesu wading ukwet usu ni ukaliweny wa kusal yilay, akimba kumudish want. (Yoh. 6:14, 15) Chikwau kand, amupaka Yesu kud Satan kusutin kukimb kumwikadish mwant wa mangand mawonsu. (Mat. 4:8, 9) Ni chisu chimwing, kambuy Pita wading murunend wa piswimp nakash wamukasikesha Yesu kulondul njil yiswapela pamwelay anch: “Iyovila riy Nsalejam.”​—Mat. 16:21, 22.

8. Mutapu ik wipukay yesu yom yafanyina kumuletin kampuw?

⁸ Mutapu ik wipukay yesu yom yafanyina kumuletin kampuw? Mu mitapu yisatu. Cha kusambish, wimburija mutapu wa kutong wa Yehova. (Yoh. 8:28; 14:9) Cha kaad, wadandamena kwikal ukwatakena nakash mu yom ya mu spiritu. (Mat. 9:35) Cha kasatu, wading wij nawamp yom yida ya usey. (Yoh. 4:34) Kawilap ap pakemp mu mupit wa Satan ni walika kulondul chitongijok cha Pita. (Mat. 4:10; 16:23) Yesu kitiyap anch yom yitonginau antu, yisadinau ap yilondinau yimuletin kampuw ni yimukangesh kusal rusot ra Nzamb. Chakin, kud yom yivud yituletidina kampuw nlel ni yishalijadin ni ya pa chirung cha Yesu. Pakwez anch twamwimburij Yesu tukutwish niyetu kwipuk yom yikutwisha kutuletin kampuw.

MUTAPU WA KWIPUK YOM YIKUTWISHA KUTULETIN KAMPUW

9. Chirumburikin ik kudandamen “kwov kurumburik chida rusot ra Yehova”? (Efes 5:17)

⁹ Ikasikesha kutong mud mutonginingay Yehova. Kusal mwamu kukukukwash kudandamen “kwov kurumburik chida rusot ra Yehova.” (Tang Efes 5:17.) Ukutwish kwijik yom yimusangareshina Yehova kusutin kutang Dizu dend Bibil ni kuditongijokin. Ni tukutwish kusal mwamu ap anch Bibil kalondinap kamu yom patok piur pa mulong tukweta. Mutapu ik? Kusutin kwijik mutapu wa kutong wa Yehova ni kuulondul.

10. Mutapu ik tukutwisha kujingunin mutapu wa kutong wa Yehova?

¹⁰ Tukutwish kujingunin mutapu wa kutong wa Yehova kusutin kwilej Bibil ni kushinshikin mutapu uyisadidiningay antu. (Jer. 45:5) Anch tutangin nsang jida mu Bibil tukutwish kwiyipul anch: ‘Yom yiney yinfundishin ik piur pa Yehova? Mutapu ik nikutwisha kuyisadin mulong wa kuswimp mutapu wam wa kutong?’ Uyakin ud anch mutapu wa kutong wa Yehova ud wa piur nakash ni usutin wetwetu kulemp nakash. (Isay 55:9) Chawiy tufanyidin kuchingejin ukwash wend chakwel tutwish kusal rusot rend. (Kus. 143:10) Ni tufanyidin kumulembil chakwel atukwash kwijik mutapu wend wa kutong ni kuwimburij.​—1 Yoh. 5:14.

11. Yom ik yikatinay Yehova mulong wetwetu?

¹¹ Pitwilejina kwikasikesh kutong mud Yehova, tukuman anch ukatin twipuk yom yikutwisha kutuletin kampuw chakwel twikal irijekina payila mangand minam kushik kwinsuden. (Mat. 24:44) Kakatinap anch yakamish yituziyish chipandakena. (Mat. 6:31, 32) Chawiy Yehova ukat kutukwash anch twasambish kwiyakamish nakash piur pa ukash wetu wa mujimbu, mudimu, chikumbu ap yom yikwau kand yitutadina etu ayinetu ap dijuku detu. Anch twamwit manang ni usu mulong wa kupandakan milong yiney, ukutukwash chakin kamu.​—Kus. 55:23; Jnsw. 3:5-7.

12. Mutapu ik tukutwisha kurish ni yakamish piur pa yom yisadikina mu mangand minam? (Mateu 5:3)

¹² Dandamen kukwatikan ni yom ya mu spiritu. Etu awonsu tukat kwiyakamish mu chilik kanang piur pa yom yisadikina mu mangand minam mulong tukwetap mutapu wa kuyikangesh. Chawiy, mulong wa kukangesh yom yiney kutuletin kampuw, tufanyidin kukwatikan ni yom ya mu spiritu. Nzamb watutanga ni maswir ma mu spiritu, chawiy tukutwish kwikal ni musangar anch twikasikesh kuwanish maswir minam. (Tang Mateu 5:3.) Tukutwish kuwanish maswir minam kusutin kwilej Dizu dend Bibil ni kusutin kwikasikesh kumwifukwil mu mulad win wawonsu wa mudimu utumbila tukweta mutapu wa kumusadin. Anch twasal mwamu tukumusangaresh kand Yehova, mulong tukusadin chisu chetu nawamp.​—Jnsw. 23:15.

13. Mutapu ik tukutwisha kusadin “nawamp nakash chisu [chetu]”?

¹³ Mulong tud In Kristu, tufanyidin kukwat mupak wa kusadin “nawamp nakash chisu [chetu].” (Efes 5:15, 16) Maverse minam matulejinap kwau kusu mutapu wa kuwanish yisend yetu dichuku dawonsu, pakwez matukasikeshin kushinshikin nawamp mutapu tusadidina chisu chetu pakaday kal Yehova kushesh mangand minam. Chawiy, mutapu ik tukutwisha kusadin nawamp chisu chetu? Anch twakwatakan nakash mu kuteshol jinsang ja yom yiyimp yisadikina, tukwikal mu kampuw, tukuziy ni tukuburen mushiku mu mudimu tumusadidina Yehova. Chawiy chid kamu cha usey nakash anch twitekin mimbu piur pa chisu tusutishina mu kutal ap kutang nsang! Anch twasal mwamu, tukuziyap nakash pakwez tukukwatikan nakash ni yom ya mu spiritu yikata kukasikeshan. Chid kand cha usey kusal yom yivud mu mudimu wa Nzamb, mud kwikal ni chaku cha kuyichirikin antu tutanina mu mudimu wa kulejan. Twij anch chid cha usey kusadin mitapu yawonsu yikutwisha kumekan mulong wa kuyikwash antu chakwel “apand ni ashiken ku ronganyin rakin ra uyakin.”​—1 Tim. 2:4.

14. Kukwatakan mu yom ya mu spiritu kukutwish kutukwash mutapu ik? (Tal kand chipich.)

¹⁴ Kushal akwatakena ni yom ya mu spiritu kukutukwash kutesh nawamp yom yisadikina pa chirung chetu. Chitushimwokishinap kuman kupwitamijan pantaliken ni milong ya chipolitik, kuburen kwa nfalang ni mayej yikat kudandamen kuya kurutu. Yom yiney yikat kutukwash kuman anch uprofet wa Bibil uwanyidin. Pa ndond pa kwikal mu kampuw mulong wa wom tukutwisha kwov, tukwet kashinsh anch yom yakaninay kal Yehova mulong wa machuku ma kurutu yiyil kuwanyin. Chawiy tukutwishap kwiyakamish anch twadandamen kumuchingejin Yehova chakwel atukwash kujijaman.​—Kus. 16:8; 112:1, 6-8.

15. Kwikal “ni manang mawamp” kukutukwash kusal yom ik? (1 Pita 4:7)

¹⁵ Kangal wavuramen yom yida ya usey nakash. Yom yivud yisadikina mu mangand nlel yiyikasikeshin kwau antu kwipuwangej kadap pa mutapu usejina mangand kwinsuden. Ap anch kadap kwipuwangej kwawonsu kuyipina, chid cha usey kwikal “ni manang mawamp” chakwel tulik kuman yom mud muyimenau antu mu mangand. (Tang 1 Pita 4:7.) Chinech chirumburikin ik kud etu? Chirumburikin anch tufanyidin kushinshikin yom nawamp chakwel twikal ni chitongijok chiwamp piur pa kwipuwangej mulong wa kukwat mipak yiwamp. Mipak yiwamp yifanyidin kukwatijan ni mutapu wa kutong wa Yehova ni kumekesh anch twij nawamp yom yida ya usey.​—2 Tim. 1:7.

16. Yom ik yasalay Yesu chisu chikemp kurutu kwa kufa?

¹⁶ Yesu kavuramenap yom yading ya usey nakash. Ap padingay piswimp ni kufa, Yesu wikasikesha kushal ushinshamena kud Yehova ni kusal rusot rend mulong wading wij anch yawiy yom ya usey nakash. Mulong wa diyingishin dined, walembila nakash. Pakwez chinyim ni Yesu, in kwilej end alala kwau tul. “Ading aziyang kal nich ushon.”​—Luka 22:39-46; Yoh. 19:30.

17. Mulong wak antu avud asadidin internet, pakwez yom ik tufanyidina kubabel? (Tal kand chipich.)

¹⁷ Mud in kwilej a Yesu, niyetu chikutwish kutushiken kuziy yisu yimwing. Yom yisadikina mu machuku minam ma nsuden yikutwish kutwakamish nakash. Chawiy antu avud nlel akat kukimb ukwash kusutin internet. Akat kumusadin mulong wa kwambamb nau arunau ap majuku mau mada kulemp mulong wa kuyitumin nsang, yipich, mavideo, ni yom yikwau kand. Ni akat kumusadin kand mulong wa kwipuwangej. Pakwez pa internet pad yom yivud nakash ya kutal ni ya kutang, chawiy antu inay akutwish kusutish chisu chau chivud nakash dichuku dawonsu mulong wa yom yiney. Mulong wa kwikal ni chitongijok chiwamp piur pa internet, tufanyidin kwiyipul anch: ‘Mutapu wam wa kusadin internet winkasikeshin anch winkangeshin kushinshikin nawamp yom yida kamu ya usey nakash?’

18. Mulong wak chid cha usey kwikal ni chitongijok chiwamp chisu twipuwangejina?

¹⁸ Kwikal ni chitongijok chiwamp kukutwish kand kutukwash chisu tutadina mavideo malemp ku televizion, tumavideo twiswimp pa internet ap chisu tusengena masengan ma video. Kwipuwangej kukutwish kutusangeresh, pakwez tufanyidin kwikal ni chitongijok chiwamp. Chilakej, chisu twapwisha kal kutal video umwing, video mukwau ukutwish kumekan kand ni kutwinkish impu ya kutal mavideo makwau pamwing ap mijondila ni mamekeshina yom ya chisum. Yawiy yom yamushikena mukadivar umwing uda mu Aziy. Kwinsambishin watalang kwend tu mavideo tukemp pa internet. Pakwez padandamenay kutal yom yisutishinau, wasambisha kutal mavideo mijondila. Disuden washikena kutal pornografi. Cha musangar, amakurump ni arunend amukwasha; chawiy wakwata mupak wa kujip ma application mamwing ni kulik kusutish chisu chivud pa telefon wend. Yom yamushikena mukadivar winou yitukwashin kuman usey wa kukwat mipak yiwamp piur pa mutapu tusadidina chisu twakad kukwatikan.

19. Yom ik yikutwisha kutushiken anch twakat kwipuwangej nakash?

¹⁹ Tukwet kand kuswir kwa kukwat mipak yiwamp chisu tuyila mu konje ap mu kwipuwangej ni antu akwau. Chakin, etu awonsu tukwet kuswir kwa kwipuwangej ni kupimaku chisu kanang mulong wa kwikal ni ukash wa mujimbu uwamp. Pakwez anch twakat kwipuwangej nakash, tukutwish kushadish chisu cha kusal yom ya usey nakash. (Filip 1:10) Muntu ni muntu ufanyidin kukwat mupak piur pa yom yisadinay ni uvud wa chisu cha kuyisal. Anch wakwat mupak wa kusal yom yiney, ufanyidin kwiyipul anch: ‘Chisu nisutishina mu kwipuwangej ni yom nisadina panida mu konje, yimekeshin anch nikwet chitongijok chiwamp? Ov, nikwet kamu kashinsh anch nij yom yida kamu ya usey nakash ni nitenchikin mulong wa “disuden da yom yawonsu”?’

20. Yiyukish ik tukutaninamu anch twipuk yom yituletidina kampuw?

²⁰ Tufanyidin kwikal ni kashinsh anch kwikil chom chitukangeshina kusal yom ya usey nakash, kumwifukwil Yehova. (Isay 48:17) Kusutin ukwash wend, tukutwish kupandakan milong turishina nich mu mwom wetu. Tukwiyakamishap nakash mulong wa yom yisadikina mu mangand ni tukusutishap chisu chetu chawonsu mu kwipuwangej. Chawiy, tukwatan mupak wa kwikal ni chitongijok cha Yehova, kukwatakan nakash mu mudimu wend ni kulam mu manang metu yom yida kamu ya usey nakash. Anch twasal mwamu, tukwipuk yom yikutwisha kutuletin kampuw ni tukulam “fe mwom wakin.”​—1 Tim. 6:19.