Mwimburija “Nzamb wa Rongoj Rawonsu”

1. Mulong wak tufanyidin kuyongoj antu akwau?

ETU AWONSU tukat kunenganan mulong wa “yoziu ya mitapu kushalijan,” chawiy yisu yimwing tukweting kuswir kwa kutwongoj ni kutukasikesh. (1 Pita 1:6) Mud mutapu tukata kusangarang anch atukasikesh, niyetu tufanyidin kwikal aswakela kuyikasikesh antu awonsu arishina ni yakamish. (Mat. 7:12) Yehova, “Nzamb wa rongoj rawonsu,” utufundishin mutapu wa “kuyongoj akwetu mu mar ma mitapu yawonsu.” Tukutwish kwimburij chilakej chend kusutin “kwongojijan umwing ni mukwau.” (2 Kor. 1:3, 4; 1 Tes. 4:18) Tukat kuyongoj akadivar nau anambaz netu, kadap mulong tufanyidin kusal mwamu, pakwez mulong tuyikatin. Mu mutu wa mulong winou tukuman 1) chirumburikina rongoj kukwatijan ni Bibil, 2) mutapu tukutwisha kuyongoj antu akwau, ni 3) yom tufanyidina kusal anch tukwet kuswir kwa rongoj.

CHIRUMBURIKINA RONGOJ KUKWATIJAN NI BIBIL

2. Mu Bibil, dizu “rongoj” dirumburikin ik?

² Mu Bibil, dizu da Grek dikarumwinau anch “rongoj” dikutwish kwikal ni kurumburik kuvud kukwatijan ni mutapu udisadidinau. Chilakej, dikutwish kurumburik “kukasikesh,” “kumwinkish muntu kashinsh,” ap “kumwit muntu kusal chom kanang.” (Rom 12:8) Mu Grek dizu dined akutwish kudikarumun anch “kumutazuk muntu kusej piswimp ni mukwau mulong wa kumukwash.” Chawiy tukutwish kutongijokin murund wezina mau mulong wa kumukwash murunend urishina ni mulong kanang ni kumwinkish yom yiswirikedinay. Muntu ukutwish kumukasikesh murunend mu mitapu kushalijan, pakwez chisu chawonsu ufanyidin kwikal ni kashinsh anch murunend wiyovil nawamp.

3. Chilakej ik chatushilay Barinabas piur pa kuyongoj antu akwau? (Tal kand chipich.)

³ Shinshikin chilakej chimwing chilejenau mu Bibil. Mwin Kristu umwing utazukinau anch Jozef wading ni chaku cha kuyongoj antu akwau, chawiy atwimbuy amupila anch Barinabas, dijin dirumburikina anch “Mwan wa Rongoj.” (Mid. 4:36) Dijin dined damutila nakash, chawiy mu Bibil kamujimbwilap kand pa dijin dend da chivadik. Barinabas wasala kamu yom kukwatijan ni dijin dend dined disu, mulong yisu yivud wayikwasha anamakwend In Kristu padingau mu maswir. Chilakej, chisu chikemp kupwa kwa Saul kwikal Mwin Kristu, waya ku Yerusalem mulong wa kumanijan nau in kwilej. Pakwez ading amwovil wom mulong wayimeshang In Kristu mar. Pakwez Barinabas wamuchingejina Saul ni wamukwasha kwijikijan nau atwimbuy.​—Mid. 9:26-28.

MUTAPU TUKUTWISHA KUYONGOJ ANTU AKWAU

4. Wisu mutapu uwamp wa kuyikasikesh antu akwau? (Rom 1:11, 12)

⁴ Yendinaku anch chiswapel. Yehova ukat kuyisadin atushalapol end mulong wa kuyikasikesh antu akwau. Chilakej, pading paziyinay muprofet Elija, Yehova wamusadina mwangel mulong wa kumukasikesh. (1 Ant 19:4-7) Kambuy Paul wading wij niyend usey wa kuyendin akadivar mulong wa kuyikasikesh. (Tang Rom 1:11, 12.) Anch wamwendin muntu mulong wa kumukasikesh, ambambaku nend mu chisu chilemp pa ndond pa kwambamb kwau nend mu chisu chikemp. (1 Kor. 16:7) Anch ukwetap mutapu wa kumwendin muntu uda mu maswir, chid kand cha usey kumutazuk, kumutumin mesaj ku telefon, ap kumufundin mukand mulong wa kumukasikesh. Itiy akusadin kud Yehova mulong wa kuyikasikesh antu akwau.

5. Mulong wak yisu yimwing chikutwish kutukasiken kuyikasikesh akadivar nau anambaz netu?

⁵ Mulong machuku ma kwinsuden mayil kuyip nakash, tukutwish kwikal ni kashinsh anch chikutukasiken nakash kuyendin akadivar nau anambaz mulong wa kuyongoj. Padingay Paul mu rukan mu Rom, Onezifor wadinga ku Efes wateka mwom wend mu ubaj kusutin kuya kumutal. Pamwing ap afanyina kumutek niyend mu rukan ap kumujip. (2 Tim. 1:16-18) Yawiy yom yikatau kusal akadivar nau anambaz a mu Risi anch ayikas anamakwau In Kristu mulong wa ritiy rau. Chilakej, anch ayitwal Atuman a Yehova ku dirumburish, akadivar nau anambaz akat kuya kwi ndond yiyirumburishidinau mulong wa kuyikasikesh, ap anch kusal mwamu kukat kuyitek mu ubaj. Utongin nchik anch wikasikesh kuyongoj akadivar nau anambaz ney, mud mwasalau atushalapol a Nzamb a pakur ni a katat akwashijana amwing ni akwau ni ikala ni musangar chikalap nchik rupompat?

6. Mutapu ik tukutwisha kumwimburij Yehova chisu tuyongojina antu akwau? (Tal kand chipich.)

⁶ Yitesha. Pamanay muprofet Elija anch mwom wend ud mu ubaj, wamufungwila Yehova muchim wend mu malembil. Nzamb wetu wa rukat wamutesha pading pamulejinay milong yend ap anch wading wij kwend nawamp yom yading yimwakamishina! (1 Ant 19:9, 10, 14) Yehova witiya kand anch muprofet wend Abakuk alond yom yading ku muchim wend ni yakamish yend mu mutapu wamekana mud kadingap kamuchingejidina Yehova. (Aba. 1:2, 3) Nlel Yehova ukat kututesh kand chisu tumulembila ap anch wij nawamp yom tukimbina kumulej. Tukutwish kumwimburij Yehova kusutin kuyitesh akadivar nau anambaz netu nawamp, nich kalimish chisu chilondinau. Ikal ‘uswakela kutesh’ chisu chilondinau, ni lik kuyikaturij ap kuyitadik ap anch alondin ni ujim ni kuchirikin yom yawiy yimwing.​—Yak. 1:19; Mul. 7:9.

7. Mutapu ik tukutwisha kujingunin maswir ma muntu?

⁷ Jingunin maswir mau. Tukutwishap kwijik yom yida mu muchim wa muntu mud mwijingay Yehova, pakwez tukutwish kujingunin mutapu wa kumwongoj muntu anch twamutesh nawamp. Ufanyidinap kutong anch wij yom yiswirikedinay muntu mulong wij yom welang kuswiriken anch wading ey. Tushalijangen umwing ni mukwau. Chawiy ishila chisu cha kumutesh nawamp, mwipula nich nkeu yipul yikutwisha kukukwash kujingunin mutapu wiyovilay.​—Jnsw. 20:5.

8. Yesu wamwongoja Mart ni Mariy mu mutapu ik pafay Lazar? (Tal kand yipich.)

⁸ Shinshikin mutapu wamwongojau Mart ni Mariy kud Yesu pafay mwanamakwau Lazar. Amband inay awonsu aad ading arishin ni mulong umwing, charumburik anch ading ovil ushon mulong afisha mwanamakwau, pakwez Yesu wayikasikesha mu mutapu ushalijadina. Kupwa kwa Mart kwambamb nend, Yesu wamuleja uyakin piur pa divumbuk ni wamukwasha kukasikesh ritiy rend mu kushilamu kwinoku. Pakwez pezay Mariy ukat kudil, Yesu kalondap kand piur pa divumbuk. Wadila pamwing ni Mariy ni wamwipula ndond yading yimujikidinau Lazar. (Yoh. 11:20-35) Dilejan ik kud etu? Pa chisu tuyongojina antu arishina ni milong ap amena mar, tufanyidin kujingunin maswir mau pa ndond pa kutong anch tufanyidin kuyongoj antu awonsu mu mutapu umwing.

9. Mutapu ik ukutwisha kusadin Bibil mulong wa kuyongoj antu akwau? (Rom 15:4, 5)

⁹ Sadin Bibil. Kusutin “rongoj ra Mifund,” ukutwish kumukwash muntu kwikal ni ruchingej. (Tang Rom 15:4, 5.) Anch ruchingej rend rakasikan, rikutwish kumwongoj ni kumukasikesh kand. (Isay 40:31) Mutapu ik ukutwisha kutan verse wa kumukasikesh nich muntu mukwau? Antu amwing akat kufundang list wa maverse makutwishau kusadin anch amaswiriken, mud maverse mada mu chikunku chilondina anch “Rongoj” mu buku Mifund ya Ukwash Mulong wa Mashakamin ma Win Kristu. Mwita Yehova akukwash kusadin Bibil nawamp chakwel uman mutapu uwamp wa kumukasikesh muntu. Spiritu wend ukukukwash kuvurik maverse mawanyidina kusadin pa chisu umaswirikedina.​—Yoh. 14:26.

10. Mulong wak tufanyidin kulond mu mutapu uwamp chisu tuyikasikeshina antu akwau?

¹⁰ Lond mu mutapu uwamp. Yisu yimwing chid cha usey kuyongoj arunetu kusutin kuyikwash kuswimp mutapu wau wa kuman milong yirishinau nich. Ang chitin kusal mwamu, tongijok kurutu kwa kulond chakwel kangal mazu mey mamusal nayimp. (Jnsw. 12:18) Yehova watushila chilakej chiwamp nakash pambambay ni Elija. Ikundj winou widimba anch ndiy muprofet umwing kusu wa Yehova washadina kal ni anch mudimu wend ukwetap usey. Nich rukat, Yehova wamukwasha kuwapish yitongijok yend pakad kumufish nich. (1 Ant 19:15-18) Ukutwish niyey kuyikwash antu akwau anch walond mu mutapu uwamp ni watongijokin pa yom ukimbina kulond. Ang wakwil ku yikumangan ap usadin diskur, lond mu mutapu uwamp ni ukuyikasikesha akadivar nau anambaz ney.

11. Yom ik yiswirikediningau antu arishina ni yakamish? (1 Yoh. 3:18)

¹¹ Yinkisha yom yiswirikedinau. Mulong wa kuyongoj antu arishina ni yakamish, tufanyidinap kwetu kusu kulond mazu makasikeshina, pakwez tufanyidin kand kuyinkishaku yom yiswirikedinau. (Tang 1 Yohan 3:18.) Barinabas ud chilakej chiwamp nakash pa mulong winou. Walandisha yom yading yikwetay mulong wa kuyikwash akadivar nau anambaz abatishau kand kal palab adinga mu maswir. (Mid. 4:36, 37) Nlel, ambay netu In Kristu avud akat kwimburij chilakej chend chiwamp kusutin kupan yom yikwetau mulong wa kuyikwash antu ada mu maswir. Gabriela uda mwi ngand ya Polony waziya nakash pajiya chikumbu chend mu mem. Ulondin anch: “Am nau anvajam nading nishicha nau twiyakamisha nakash. Nading niyipwil anch mutapu ik tukutwisha kusal mulong wa kurijek chikumbu chetu. Pakwez akadivar a mu yikumangen ya piswimp eza ni asala mudimu ujim mu dichuku dimwing kwau. Chom chinech chakasikesha ritiy ram anch Yehova ukat kuyisadin antwend mulong wa kuyongoj akwau ada mu mar.”

12. Mutapu ik ukutwisha kuyikasikesh anamakwey In Kristu chisu urishina ni yakamish?

¹² Jijamen milong urishina nich. Paul wayifundina In Kristu a ku Tesalonik anch wasangara pijikay anch ading ajijamen ni adandamedin kushal ashinshamena. Wajingunina anch mudimu wasalay mulong wa kuyikwash wadingap wa chamwamu. (1 Tes. 3:5-8) Chawiy Paul wading wij anch, ang washal ushinshamena chikalap nchik yakamish yend wafanyina kuyikasikesh akadivar nend, ap ading akadingap kal kumanijan nend. (Kol. 2:1, 2) Chilik chimwing kand, niyetu tukutwish kuyikasikesh akadivar nau anambaz netu anch aman mutapu utukwashinau kud Yehova kujijamen milong yetu.

13. Yom ik tufanyidina kudandamen kusal chisu tuyongojina antu akwau?

¹³ Shimpish muchim. Usu tusadina mulong wa kuyongoj akadivar nau anambaz aziyina ukutwishap kamu pamwing ap kwikal ni yibudikin yiwamp kapamp kamwing. Chikalap nchik mwamu, Bibil utukasikeshin anch “dandamenany kukasikeshijan umwing ni mukwau.” (1 Tes. 5:11) Shimpish muchim piudandamedina kuyongoj antu aswirikedina ukwash wey. (1 Tes. 5:14) Chakin kamu, niyetu tukutwish kwikal ni kuswir kwa kutwongoj. Yom ik tukutwisha kusal anch twiyov mwamu?

ANCH UKWET KUSWIR KWA KUKWONGOJ

14-15. Yom ik ukutwisha kusal anch unenganen ap wiyakamishin?

¹⁴ Mulembila Yehova. Mwita chakwel akwongoj anch unenganen ap wiyakamishin. (Kus. 94:19) Mufungwila muchim wey ni muleja yom patok. (Kus. 62:9) Chakin kamu, Yehova wij mutapu wiyovila kurutu umulembila. Pakwez anch wamurumburil mutapu wiyovila, mwamu umekeshin anch ukwet ritiy muday ndiy. Ni Yehova ukat kwakul ku malembil mamwitinau ni ritiy. (Mar. 11:24) Filip 4:6, 7 utulejin anch: “Mwijikishany Nzamb kwit kwen; ni chisambu cha Nzamb chisutinamu yom yawonsu tukutwisha kutesh chikulam michim yen ni manang men.”

¹⁵ It ukwash kud antu akwau. Mulejap muruney wa piswimp uswila mu spiritu ap mukurump uchingejidina mutapu wiyovila. Akadivar nau anambaz ney akutwish kukukasikesh, pakwez kakutwishap kwijik mutapu wiyovila ap yom uswirikedina anch uyilejinap kwey. (Jnsw. 14:10) Ukutwish kuyit chakwel akutesh nawamp ap kukulej verse ap mutu wa mulong ukasikeshina.

16. Yom ik yikutwisha kushiken chisu chipakishinau antu akwau kukukasikesh, pakwez yom ik ufanyidina kuvurik?

¹⁶ Shimpish muchim ni ikal mwin kulikishin. Akadivar nau anambaz ney akutwish kurumbuk chisu chikukasikeshinau. Chilakej, akutwish pamwing ap kulond ap kusal chom chikutwisha kukuziyish nakash pa ndond pa kukukasikesh. Anch chom mud chinech chashiken, yishimpishina muchim. (1 Kor. 13:4, 7) Vurik mazu malejenau mu Yakobu 3:2 malondina anch: “Anch muntu kakatap kwipwakal mu kulond, ud muntu uwanyidina.” Vurik anch akadivar nau anambaz ney akatin kamu kukukwash. Kangal wavuramen anch “muchim usotil kusal yom yiwamp, pakwez mujimbu uziyin.”​—Mat. 26:41.

17. Mupak ik tufanyidina kukwat?

¹⁷ Etu awonsu tukwet kuswir kwa kutwongoj ni kutukasikesh, ni tukuswiriken yom yiney nakash payila machuku ma nsuden kuyip nakash ni mulong akankuny a Nzamb adandamedin kutupompat chipandakena. Chawiy, tukwatany mupak wa kudandamen kwongojijan amwing ni akwau.