Sal Usu wa Kumwijik Yehova Nawamp

1. Mutapu ik tukutwisha kwiyov anch twatongijokin pa ronganyin, ra Yehova, manang mend ni yom yasadinay kal?

OV, WATONGIJOKIDINAP kal pa kujimb kwa ronganyin, kwa manang, ni kwa yom yasadinay kal Yehova? Anch twatongijokin pa yom yiney tukuman kamu anch tufanyidin kwikepish nakash kurutu kwend. Ukutwish kwiyov mud mwiyovay kambuy Paul wafunda anch: “Wimpich wa Nzamb ni manang mend ni ronganyin rend yipandaken kujimb! Chikasiken kutesh mitapu yend ya kurumburish ni chikasiken kwov kurumburik kwa jinjil jend!”—Rom 11:33, 34.

2. Yom ik yimekeshina anch tukutwish kumwijik Yehova nawamp?

² Ap anch tukutwishap kwijik yom yawonsu piur pa Yehova, pakwez tukutwish kwijik yom kanang piur pa wuntu wend. Mwant David wamuleja mwanend Salomon anch: “Mwijika Nzamb wa tatukwey, ni kumusadil ndiy nich muchim wey wawonsu. . . Anch wamusot ndiy, ey ukumutan.” (1 Jnsg. 28:9) Kambuy Yohan wayivurisha anamakwend In Kristu a mu mivu chitot ya kusambish anch, Mwan a Nzamb “watwinkishin kal manang chakwel tushiken kumwijik uda wakin.” (1 Yoh. 5:20) Ni Yesu amwinend walonda anch ukuyikwash antu ‘kumwijik Tatukwend nawamp.’—Mat. 11:27.

3. Yom ik tukwileja mu mutu wa mulong winou?

³ Antu awonsu amusadidina Yehova ilejin kal yom yivud piur pend. Chikalap nchik mwamu, tukezap kwimik kwilej piur pa Yehova. (Yoh. 17:3) Chilakej, tukudandamen kwilej yom yivud piur pa yom yimusangareshining ni mutapu tukutwisha kudandamen kumuchingejin. El tumanan yipul yisatu tufanyidina etu awonsu kwiyipul chikalap nchik uvud wa mivu twamusadidina kal Yehova. Cha kusambish: Kumwijik Yehova nawamp kurumburikin ik? Cha kaad, mulong wak tufanyidina kudandamen kumwijik nawamp? Ni cha kasatu, yom ik yikutwisha kutukwash kumwijik nawamp nakash?

KUMWIJIK YEHOVA NAWAMP KURUMBURIKIN IK?

4. Kumwijik Yehova nawamp kurumburikin ik?

⁴ Mulong wa kutesh nawamp chirumburikina kumwijik Yehova nawamp, el tutongijokinan pa yom yakanay kuyisadin In Yuda afanyina kudokal mu usuk mu Babilon. Walonda anch: “Nikez kayinkish impu ya kwijik anch, am, yam [Yehova].” (Jer. 24:7) Chakin kamu, In Yuda adokala mu usuk ading ijaku yom yimwing piur pa Nzamb. Pakwez mulong wa kwilej kumwijik Yehova nawamp afanyina kwipan ni muchim wau wawonsu ni kusal yom ni mayingishin mawamp. Muntu umwing wilejina yom yida mu Bibil urumburil anch: “kud kushalijan kujim pakach pa kwijik yom piur pa Nzamb ni kumwijik Nzamb. Chid kand mud kushalijan kuda pakach pa muntu utangina buku wa rukat ni muntu ukweta yovil ya rukat.” Tufanyidap kwetu kwimen pa kwijik anch Yehova dawiy dijin da nzamb. Tufanyidin kwijik wuntu wend.

5. Chilakej cha Yosiyas chitufundishin anch kwilej kumwijik Yehova kurumburikin ik?

⁵ Ang twilej kumwijik Yehova nawamp, tukwijik yom yimusangareshining ni yakad kumusangaresh. Shinshikin chilakej cha Mwant Yosiyas. Bibil ulondin anch chisu “chawanyishay . . . mivu chinan ya kuyikel kwend, ni pinipa wachading kwend nsangarum, wasambisha kumusurab Nzamb wa ngakiril wend Mwant David.” (2 Jnsg. 34:3) Yosiyas kimenap kwend pa kwilej, pakwez wasalang kand yom kukwatijan ni yom yilejangay. Kusutin muprofet Jeremiy, Yehova walonda anch Yosiyas “wading mwin yakin utentamina” ni anch wayilondinang atuzwendj nau antu ading amekena mud akad usey. Kupwa Yehova walonda kand anch: “Kwinoku kwawiy kurumburik kwa kumwijik [Yehova].—Jer. 22:15, 16.

6. Mud mulejenau mu Kuseng 9:11, anch twamwijik Yehova nawamp chikutuswapel kusal ik?

⁶ Tang Kuseng 9:11. Ang twamwijik Yehova nawamp, chikutuswapel kumuchingejin. Chilakej cha kambuy Paul chimekeshin anch yom yiney yid yakin. Pamukwatau mu rukan kapamp ka nsuden piswimp kwau ni rufu rend, wafunda anch: “Novilap usany. Mulong nimwij Nzamb wanitiyija.” (2 Tim. 1:12) Yom yilejay Paul ni yamushikena mu mwom wend, yamubachika kumuchingejin Nzamb. Paul wading ukwet kashinsh anch Yehova kakumuvuramenap ni kakuvuramenap mudimu wend wamusadinay. Wading kand wij anch ukumuvumbul.

MULONG WAK TUFANYIDIN KUDANDAMEN KUMWIJIK YEHOVA NAWAMP?

7. Kupwa kwa kumusadin Yehova mu mivu yivud, yom ik yikutwisha kutushiken?

⁷ Mu kusut kwa chisu, tukutwish kulik kusal usu nakash wa kumwijik Yehova nawamp mud mutwasalang kwinsambishin pitwileja uyakin. Mulong wak? Chisu tutangina Bibil ayinetu ap nau antu akwau ku yikumangan, tukutwish kushinshikin mutapu ukutwisha yom yiney kutukwash etu ayinetu ap kuyikwash kand antu akwau. Bibil utukasikeshin kusal mwamu. (2 Tim. 3:16, 17) Pakwez Bibil utulejin kand yom yivud piur pa muntu wamupepila. (Kus. 25:8-10) Tufanyidinap kwetu kwimen pa mutapu tukutwisha etu ap antu akwau kutaninamu mu yom yida mu Bibil kushik ni mu chilik cha kukangany kwiyipulap anch: ‘Yom yiney yinfundishin ik piur pa Yehova?’a

8. Kwilej kumwijik Yehova nawamp kukwet usu ik pa urund wetu ni ndiy? (Kuseng 73:24-28)

⁸ Ang twilej kumwijik Yehova nawamp, urund wetu ni ndiy ukwikal uwamp nakash. Chilakej, mutapu ik ukata kwiyov kupwa kwa kutang Bibil dichuku dawonsu, kutal emision wa JW Télédiffusion, ap kupwa kwa kukumangan ku chitentam? Tukat kwiyov anch tud piswimp nakash ni Tatukwetu wa mwiur. Mulong wak? Mulong tukat kwilej yom yivud piur pend. Mud chibudikin, tukat kwov ja kumutumbish ni kumushiman. Tukat kwiyov mud nfund a Kuseng watongijokina pa mutapu wamubanginau kud Yehova ni wafunda anch: “Nzamb udi usu wa muchim wam, ndiy rusot ram chikupu.” (Tang Kuseng 73:24-28.) Usu wawonsu tukusala mulong wa kwilej piur pa Yehova ukat kutubachik kwikal in kujikitish mulong wa urund uwamp tukweta ni ndiy.

9. Ang ‘twamwitiyij Yehova’ tukukwat mipak ya mutapu ik? Let chilakej.

⁹ Ang ‘twamwitiyij Yehova’, twavurik yom twilejina kal piur pend ni twatong mutapu ukatay kwiyov anch twasal yom kanang ap anch twalik kuyisal, tukukwat mipak yiwamp. (Jnsw. 3:​5, 6) Chilakej, akadivar nau anambaz avud atekining yipich ya anfumwau ap akajau mu mabiro mau, ap pa matelefon mau. Kusal mwamu kukat kuyikwash kuyivurik chisu chawonsu, kukat kuyikwash kand kusal yom yikuyisangaresha ni kulik kusal yom yikuyinenganesha. Mutapu umwing kand, niyetu ang twadandamen kutong nakash piur pa Yehova chikutuswapel kusal yom yikumusangaresha.—Kus. 19:13, 14.

10. Ang twilej kumwijik Yehova nawamp chikutuswapel kusal ik?

¹⁰ Yehova watutanga mu chifu chend, charumburik anch tukwet mutapu wa kwimburij mikadil yend. (Dis. 1:26) Chawiy, anch twilej yom yivud piur pa mikadil yend, chikutuswapel kand kwijik mutapu wa kumwimburij. Yesu wayifisha nich alej a yijil nau Afaris mulong kamekeshangap mikadil ya Nzamb. Ap anch ading ij tuyom tukemp tukemp twawonsu twa mu Chijil, Yesu wayileja anch “waduwilany kal yom ya usey nakash yida mu Chijil, kwawiy kulond anch, kutentam, riy, ni kushinshaman.” (Mat. 23:23) Etu tufanyidinap kwikal mud antakel a ma relijon inay, pakwez tufanyidin kusal usu wetu wawonsu mulong wa kuman mutapu umekena mikadil ya Nzamb kusutin yijil yend ni mbil jend. Ang twasal mwamu, chikutuswapel kumwimburij.—1 Yoh. 4:8, 11.

YOM IK YIKUTWISHA KUTUKWASH KUMWIJIK YEHOVA NAWAMP?

11. Mutapu ik washikena kumwijik Yehova kapamp ka kusambish?

¹¹ Nan wakukwasha kumwijik Yehova? Pamwing ap akulidina mu dijuku da anvaj Atuman. Chawiy akuleja pamwing ap nsang ja Bibil jikasikeshidina pa mikadil ya Yehova ap akukwasha kujingunin mikadil yiney kusutin yom yatangay. Ap pamwing ap kud Kaman wa Yehova wakwita kwilej nend Bibil ni witiya. Pasadinay yom ya kufundish nich, mud buku Sanger Mwom Chikupu! mulong wa kukufundish nich, mulej wey wa Bibil wakukwasha kutongijokin pa nsang jida mu Bibil ni kwilej piur pa mikadil ya Yehova kusutin yom yatangay.b (Neh. 8:8; Mid. 14:17) El tumanan mutapu tukutwisha kudandamen kwilej piur pa Yehova.

12-13. Yom ik tukutwisha kwilej piur pa Yehova chisu tutangina Bibil? Let chilakej. (Jeremiy 39:15-18) (Tal kand cha pa chibur.)

¹² Cha kusambish, tukutwish kwilej yom yivud piur pa Yehova kusutin kutang ni kwilej Bibil. Yisu yimwing, Bibil ulejening kamu patok mikadil ya Yehova. (Kub. 34:6, 7) Pakwez yisu yivud ulejening kwend nsang jiyitadina antu ni mipak yakwatau. Chisu utangina nsang jinej, pakish kutongin pa yom ukutwisha kwilej piur pa Yehova.

¹³ Tutongijokinan chilakej ech. Pautangina buku wa Jeremiy 38:6-13, wajingunin anch Ebed Melek Mwin Etiopi, weza kumukwash muprofet Jeremiy. Chid chakin anch tukutong pakad kulab piur pa mutapu tukutwisha kwimburij mushiku wend, kutakaman ni rukat radingay nich mulong wa antu a Nzamb. Mikadil ik kand yikwau ya Yehova ujingunina kusutin rusang riner? (Tang Jeremiy 39:15-18.) Chilakej, yom ik yimekeshina mu maverse minam anch Yehova ukat kukwat nich usey yom yimusadidinau kud antu akwau, ud utentamina ni kakwetingap kasolikany? Yom ik yikwau ujingunina mu rusang riner piur pa Yehova? Chisu chawonsu utangina verse kanang mu Dizu da Nzamb, ikasikesha kujingunin mikadil ya Yehova yimekeshinawamu kupwa mujikitisha ni kumutumbish mulong wa mikadil yiney.

14. Yom ik tufanyidina kusal mulong wa kutaninamu nakash chisu tutadina yom yatangay Nzamb?

¹⁴ Cha kaad, tukutwish kwilej yom yivud piur pa Yehova ang twatongijokin pa yom yatangay. (Kus. 145:9, 10) Pakwez tufanyidin kand kusal yom yivud kusutamu kwau kushinshikin yom yatangay. Antu amwing akat kusutish mwom wau wa kabuj mu kwilej yitang, pakwez kakatap kushiken kujingunin mikadil ya Nzamb ap kusu kwau kwitiy anch udakwa! Kambuy Paul wafunda anch “mikadil yend yakad kumekanang ku mes, mwaning, ukash wend wa chikupu ni winzamb wend, yimeken patok kudokal kwatanginay mangand, mulong yimeken kusutin yom yatangay.” (Rom 1:20) Bibil umwing ukarumwin verse winou anch, “muntu utongina kamu nawamp ukutwish kujingunin mikadil ya Nzamb.” Komb pa kujingunin mikadil ya Nzamb kusutin yom yatangay, tufanyidin kwikal ni chaku cha kuyitongin nakash.

15. Yom ik yasalay Patrick mulong wa kumwijik Yehova nawamp, ni mutapu ik tukutwisha niyetu kumwimburij? (Tal kand chipich.)

¹⁵ Antu amwing ashich mu mavil ni chiswapelap kuman mitond ni annam chisu chawonsu. Anch niyey ud mu vil, ijik anch ukwet kwey mutapu wa kwilej yom yivud piur pa Yehova kusutin yitang. Chilakej, Patrick uda mu Brazaville, vil mujim nakash wa mwi ngand ya Congo Brazzaville ulondin anch: “Dichuku dawonsu nikat kwikasikesh kutal yom yatangay Yehova. Nikat kuman atupwopu akemp akemp ap atujil akemp akata kukimb ya kuda ap ndond ya kushakam. Dichuku dimwing nading nitadin atujil asadina yinswal. Asadinang yom yanonangau ndond kushalijan ni asalang yinswal yiwamp nakash ya kulamin anau.” Patrick wasala kand chom chikwau; yom yiney yamanay Patrick yamukwasha kutong nakash piur pa Sakatang wa yom yawonsu. Ulondin anch: “Nileja anch Yehova ukat kuyibangin nawamp yitang yend yawonsu, ap yitang yimekena kwau mud tuyom twa chamwamu. Yom yiney yanginkisha kand kashinsh anch Yehova wimbangidin niyam ni kakukanganyap kuwanish maswir mam.”

16. Yom ik yamukwasha Mariy makwend a Yesu kumwijik Yehova nawamp nakash, ni mutapu ik tukutwisha kumwimburij? (Tal kand chipich.)

¹⁶ Cha kasatu, tukutwish kwilej kumwijik Yehova nawamp kusutin yom yatusadidinay kal. Yawiy yom yasalay Mariy makwend a Yesu. Wading umwij kal Yehova nawamp ni wading “ukwet dilau [dend].” (Luka 1:30) Yehova wamwinkisha chisend chijim nakash cha kumuval Mwan a Nzamb ni kumulil. Chawiy Yehova wamukasikesha ni wamwinkisha kashinsh kusutin mwangel Gabriyel ni mwanamakwend Elizabet. Mu kusut kwa chisu, Mariy amwinend watongijokina pa yom yamushikena ni yamukwasha kuman anch Yehova ukwet usu nakash, ud mwin ranaken, kakwetap kasolikany ni ukat kuyibangin antu awonsu, ap antu amekena mud kakwetap kwau usey. (Luka 1:46-55) Mud mwamekeshay Mariy muchim wa kujikitish mulong wa yom yamusadinau kud Nzamb, niyetu tufanyidin kwikal in kujikitish anch Yehova watukwash “pa chisu chiwanyidina.” (Heb. 4:16) Anch Yehova wakukwash mu mutapu winou, iyipula anch: ‘Yom yiney yinfundishin ik piur pa Yehova? Mikadil ik ya Yehova nilejidinaku?’

TUKUDANDAMEN KWILEJ KUMWIJIK YEHOVA

17-18. Mulong wak tulondina anch tukudandamen kwilej piur pa Yehova pakad kwimik?

¹⁷ Tongin uvud wa yom tukwileja piur pa Yehova mwi ngand yisu. Akutwinkish mivungur yisu yikutuleja yom yitwitinay kusal. (Kuj. 20:12) Tukwilej kand yom yivud piur pa Nzamb mulong tukwikal piswimp ni yom yatangay. (Isay 11:6-9) Ni tukumwijik kand Tatukwetu nawamp chisu tukusangera yom yisu, mud kuyak anamakwetu akuvumbuka, ni kusej pakemp pakemp ku mwom uwanyidina.

¹⁸ Tukudandamen kwilej kumwijik Yehova. Mulong udingaku chikupu ni chikupu, “ukwet manangu makad musul.” (Kus. 90:2; 147:5) Tukezap “kujingunin yom yawonsu yasalay kudiokal kwinsambishil djat ni kwisudiel.” (Mul. 3:11) Chikalap nchik mivu twasadina kal mu dirijek da Yehova, tufanyidin chisu chawonsu kwikasikesh kwilej yom yivud piur pa Tatukwetu utukatina.