Ka Tes ta Titi‘ȧk ne Kạunohoga?

‘E ‘on tạusa, Jihova pa ‘es la kạunohoga la tētē ag‘esea, hạitokoag ‘oris tē fak‘ata ma a‘ne‘ne‘ạkia ‘oris kạunohoga. (Na Hoi‘ạkiag ne Foho 6:6, 7) Ta ‘on‘on Uetnes ‘on Jihova nā av ‘e te‘ ne gasav ‘i la a‘sokoa titi‘ȧk ne kạunohoga. Iris hạifäegag ‘e ta av lelei het ‘e rēko tē fak‘at ne mou se irisa.​—Nōnō ka ‘äe ke noh ‘äe ‘esea he, te‘is av lelei het la hại‘eleag ma ‘Ạitu ‘e ‘ou la sạkior se muạ‘ạkiag ne Puk Ha‘a.

Te‘is av het la ‘is la ‘ut a‘eleaf se Jihova. “‘Ut a‘eleaf se Aitu, ma iạ täla ‘ut a‘elemea se ‘äe.” (Jemesa 4:8) ‘Is ‘inea a‘lelei Jihova ‘e av ne ‘is rakoa ‘on ag pumua ma ‘on gargarue ‘e Puk Ha‘a. Sal lelei het la ‘is la kamatan titi‘ȧk ne kạunohoga  la ‘is la hat ag‘esea Puk Ha‘a, kop ma la tạupir se fūfū‘ȧk he te Rak ne Garue Marag ta. Le‘et ‘e kạunohoag ta la pō la hat ūt ne puk ne väe,ma kotä iris  hạifäegag se tē ne iris rako.

Te‘is av het ne kạunohoga la ‘ut a‘el le‘et se le‘et. Väväne ma ‘oris hạina, o‘o‘i ma lä‘riri‘i, a‘ne‘ne‘ạkia ‘oris hạikạinagaga le‘et se le‘et ‘e av ne iris hat puk ha‘ fak kạunohoga. Iạ noj la av ‘oaf ‘oaf het, ka fürmariet ‘e laloag ne gasav ta.Täe kikia ‘e fạu ne ‘oris lele‘a, o‘o‘i pō la hil ta filo‘ het la iris la hạifäegag, la pō se ma la ‘es‘ao‘ȧk filo‘ het ‘e Watchtower ma Awake! ne ‘e ‘otomis Web site ta, jw.org. ‘Äe la pō la hạifäegag ma ‘ou le‘ ta hün se pefä‘ ne iạ agtạu ma ‘e rako, ma la a‘lelei tapen. ‘Is pō la ȧs‘ȧk la suạ mak ne la rē ‘e tạunạ‘i, ma ‘e vạhiag ne titi‘ȧk ne kạunohoga, ‘is pō la ös ta ‘iom tī het.

A‘sok ne titi‘ȧk ne kạunohoga ‘e te‘ ne gasav ‘i la hạiasoagan kạunohoga la ‘oaf se foh ‘on Jihova, ma Jihova täla ạlạlum‘ạkia ‘os fē‘eni.​—Salamo 1:1-3.

• Ka ‘e rēko tese ta ‘ạmis nā av la a‘sokoa titi‘ȧk ne kạunohoga?

• Ka o‘o‘i la ös tapen titi‘ȧk ne kạunohoga la av ‘oaf‘oaf het?