RESÖN 3
Sal ne la A‘leleia Pefä‘e
‘Ạu la hạihanisiạg marös, le‘et se le‘et ko hanisi kukulua ag raksa‘ ma‘oi.”—1 Pita 4:8
‘E avat ne ‘ạuạr la kamat ag‘esea ‘omuạr ‘inos ta, pefä‘e täla kamata e la no‘. Iạ kop ma la sok hün se tū ne a‘häe, huga, ma ‘os fupfupu. Ne pefä‘e kop ma la leum ‘e ‘os kạunohoga, kạumane‘aga, ne tē pöpör ne soko.
‘E av ma‘oi ‘is sạunoa‘ạkia ne pefä‘e la pō la sok, ka Puk Ha‘a fas‘ȧk se ‘isa salat ne ‘is la pō la faktạua. (Mataio 5:23, 24) ‘E ‘ou garue‘ạkiạg ne muạ‘ạkiạg ne Puk Ha‘a, ‘äe la pō la a‘leleia ‘ou pefä‘e.
1 HẠIFÄEGAG‘ẠKIA PEFÄ‘ TA
TĒ NE PUK HA‘A ‘EA: “Ka ma ‘on. . .av het la fäeag.” (Le‘ Marag Ta 3:1, 7) Nā av la hạifäegag‘ạkia pefä‘ ta. Fäeag‘ȧk a‘nonojoa se ‘ou sạu ta ‘ou a‘häe, ma ‘ou huga se tē ne ‘ạuạr hạifäegag‘ạkia. “Fäeag aier ma”, ‘e te‘ ne av ‘i, ma ‘ou sạu ta. (Efeso 4:25) Kepoi ka hạifäegag ta hele‘ la sun, matạ‘ pạu la se hạipeluag. Fäeag rạumạhini kal ue‘ hạipeluạg ra.—Fäeag ‘Es Fuạga 15:4; 26:20.
Kepoi ka ‘äe kat kạu‘ȧk ra, kel‘ȧk ma kikia huạg keresi, se mao‘ȧk la kel‘ȧk se ‘ou sạu ta e‘ạkiga ma hanisi. (Kolosa 4:6) Ȧs‘ȧk la a‘leleia pefä‘ ta ‘e ‘on av mij pạu heta. Se toak‘ȧk ‘omuạr hạifäegaga.—Efeso 4:26.
TĒ NE ‘ÄE LA PŌ LA RĒ:
A‘fūmou‘ȧk ta av leleit la hạifäegag‘ạkia pefä‘ ta
‘Äe täla pō ta av het la fäeag, noh a‘fạliạg. Ma se mut uạn ‘on fäeag ta
2 A‘FẠLIẠG MA KOKON‘ȦK ‘ON RÄE
TĒ NE PUK HA‘A ‘EA: “‘Ạu la mäeavhanis aier le‘et se le‘et. ‘E faktē‘ạkiga, le‘et ma la a‘pumuạ‘ạkia le‘et.” (Roma 12:10) ‘Ou la noh a‘fạliạg ta tē pumuet. Ȧs‘ȧk la ‘inea‘ia huạg ne ‘ou sạu ta, ‘e “mäeav marū . . . ma a‘häe vạivại.” (1 Pita 3:8; Jemesa 1:19) Se rē la fak mane ‘on aga. Rou ‘atakoa tē ne ‘äe rērē‘ia, ma noh a‘fạliạg a‘lelei se tē ne ‘ou sạu ta ‘ea. Ne far‘ȧk la ‘ạuạr la hạifäegag fakmür sin. Kepoi ka ‘äe ‘es ‘e a‘häet ne ‘ou sạu ta, ‘ou kạumaneag leleit, ka ‘eake ‘ou firit, ‘äe kal “‘arū fek ra.”—Le‘ Marag Ta 7:9.
TĒ NE ‘ÄE LA PŌ LA RĒ:
‘Äe la noh a‘fạliạg ma kikia, ‘inea ne tese tē ne ‘ea kat a‘fạiạg lelei ra se ‘ou faliga
Noh a‘fạliạg la pō‘ia fuạg ne tē ne iạ ‘ea. Sạkior tape‘ma se kelkeleag ne ‘on mafa, ma ruerue ne ‘on foro. Ma tape‘ma se tōag ne ‘on lio‘
3 TẠUPIR SE TĒ NE A‘FŪMOU‘ȦK VẠHIA
TĒ NE PUK HA‘A ‘EA: “Te‘ ne kạinag garue ‘atakoa hö‘ koroa. Ka fäefäeag la‘ma ne pepnuju pō la a‘keien ‘it.” (Fäeag ‘Es Fuạga 14:23) ‘Eake la kạu‘ȧk se ta tēet ma tä‘mä‘ie. ‘Ạuạr kop la tạupir se tē ne ‘ạuạr a‘fūmou‘ȧk vạhia. Tē te‘is la‘oag ‘esea ma garue fe‘eni, ka iạ tē hö‘ ‘ofa. (Fäeag ‘Es Fuạga 10:4) Kepoi ka ‘ạuạr la hạigarueag, ‘ạuạr täla “pō‘ia tög” ne ‘omuạr garue fe‘eni.—Le‘ Marag Ta 4:9.
TĒ NE ‘ÄE LA PŌ LA RĒ:
A‘fūmou‘ȧk ne tes tä ‘ạuạr la pō la rē, la a‘leleia ‘omuạr pefä‘e
Sạkior hạisokoag se tē ne ‘ạuạr a‘sok vạhia
[Kes ‘e rạupeap tä ‘on 11]
GARUE ‘AG‘ESEA LA A‘LELEIA PEFÄ‘E
‘E avat ne ‘ạuạr la garue ag‘esea, ‘omuạr ‘inos ta täla ‘oaf‘oaf ka la fūmou, ka ‘eake tēet ne la ho‘am rū ma kokono. (Fäeag ‘Es Fuạga 24:3) ‘Io ma kikia se muạ, ka se hoa‘ hoi‘ạkim pefä‘ ne roā. (Fäeag ‘Es Fuạga 17:9) ‘E avat ne ‘ạuạr la hạigarueag la garue‘ạkia muạ‘ạkiạg ne Puk Ha‘a, ‘ạuạr la pō la faktạu ag‘esea pefä‘ het ma ne ‘ạuạr agtạu.
[Kes ‘e rạupeap tä ‘on 11]
SẠIO‘ SE ‘ÄEA . . .
Tes ta pefä‘et ne gou pa ‘es la hạifäegag ma ‘otou sạu ta?
Tes tä gou la rē, la ‘inea‘ia a‘häe ne ‘otou sạu ta, hün se ta pefä‘ ta?