RESÖN 4

Fakraupot A‘lelei ‘Ou Mone

“Te‘ ne ‘amnạki pō la a‘fūmou‘ạk ‘e puer‘ạki.”​—Fäeag ‘Es Fuạga 20:18

‘Is ‘atakoa kop la mone la togia tē ne kạunohoga kop la ‘ese. (Fäeag ‘Es Fuạga 30:8) Iạ tē aire, “mone iạ päregat.” (Le‘ Marag Ta 7:12, NW) Iạ kop ma la a‘noa se ‘inoso la hạifäegag hün se mone, ka se fue‘kia mone, la hün ne pefä‘e. (Efeso 4:32) ‘Inoso kop la tua‘nȧk le‘et se le‘et, ka la hạigarueag la rē puer ne mone ta la a‘es‘av‘ȧk tapen.

1 FŪFŪ‘ȦK A‘LELEI PẠU

TĒ NE PUK HA‘A ‘EA: ‘Ka tei le‘et ‘e ‘ausa, ne värvär la fū‘ạkia ta rī lamlama, ka iạ kal päe mumuạ ra, la hat ‘on togi, ne iạ la pō la ‘atakoa‘ạkia rī ta ne ‘igke‘’ (Luke 14:28) Iạ tē pumuet la ‘ạuạr la fiạk‘ȧk ag‘esea, ne ‘ạuạr la a‘es‘av‘ȧk tapen ‘omuạr mone. (Emose 3:3) Rē puer ne tes tä ‘ạuạr kop la togi, ma hisi tä ‘ạuạr la a‘es‘av‘ạki. (Fäeag ‘Es Fuạga 31:16) ‘Ou ‘es mone la togia ta tēet, kat ‘ạligen ra ne ‘äe kop la tög. Matạ‘ pạu la se tinạu. A‘es‘ȧv‘ȧk ma se ‘ou pō heta.​—Fäeag ‘Es Fuạga 21:5; 22:7.

TĒ NE ‘ÄE LA PŌ LA RĒ:

Kepoi ka ‘ou mone tör ti‘ ‘e a‘ofiạg ne huạl ta, rē puer ag‘esea ne tes tä ‘ạuạr la rē

Kepoi ka tē ne togi sir ‘e tē ne a‘fūmou‘ạki, fūfū‘ȧk a‘lelei la a‘mea‘mea‘ạkia tē ne togi. Kel‘ạkiạg het, ‘äe la pō la funua ‘ạmuạr tēla‘ā, ka kal a‘noa ra la ‘ātē hot

2 ‘OU RÄE KOP LA NOJ

TĒ NE PUK HA‘A ‘EA: “Ko ‘ạmis korkor se tē ne lelei, ‘eake ‘e maf ‘on ‘Ạitu ‘esea, ‘e maf ‘on famori tape‘ma.” (2 Korinita 8:21) ‘Äe la fäeag‘ȧk a‘nonojoa se ‘ou sạu ta, hisi ta ‘ou tög ta, ma hisi tä ‘äe ‘es‘av‘ạki.

Häifäegag ma ‘ou sạu ta, ‘e avat ne ‘äe la a‘sokoa ta rē puret hün se a‘es‘av‘ȧk ne ‘ạmuạr mone. (Fäeag ‘Es Fuạga 13:10) Hạifäegag hün se mone la pō la hö‘ fürmariạ se ‘ou ‘inos ta. ‘Es ‘e räet ne togit ne ‘äe pō, ‘eake ‘ou mone, ka mone ne mou se kạunohoag ta.​—1 Timoti 5:8.

TĒ NE ‘ÄE LA PŌ LA RĒ:

A‘fūmou‘ȧk ne hisi tä ‘ạuạr la pō la a‘es‘av‘ȧk, ka kal a‘noa far ra se ‘ou sạu ta

Se tȧr la pefä‘ ta la sok, ma kotä ‘ạuạr la hạifäegag hün se mone

[Kes ‘e rạupeap tä ‘on 14]

‘OU RÄE HÜN SE MONE

Aier mone iạ tē pumuet, ka se fue‘kia la mane‘ạkia ‘ou ‘inos ta, ne ta hün ne kokono. (Mataio 6:25-34) ‘Äe kat a‘noa ra la ‘es mone rạurạut la a‘pumuạ‘ạkia mạuri. Puk Ha‘a ‘ea: “‘Ạu la matmatạ‘, ma ta‘ea fakapạu ‘e küm tē.” (Luke 12:15) Pumuạ se ‘ou ‘inos ta, ‘e tē ne mone la pō la togi. ‘Äe la hat la tạu ma sin, tē ne ‘äe ‘ese, ma se a‘fürmariạ‘ạkia ‘ou hạikạinagag ma ‘Ạitu. Kepoi ka ‘äe, a‘sok tē te‘is, ‘ou kạunohoag ta la ‘oaf‘oaf, ma ‘äe la pō ạlạlum‘ạkiạg ‘on ‘Ạitu.​—Hiperiu 13:5.

[Kes ‘e rạupeap tä ‘on 14]

SẠIO‘ SE ‘ÄEA . . .

Tes tä ‘otou  kạunohoag ta la rē, la se tinạu?

Ka ‘ạmiạr hạifäegag fakmür ‘e kis ‘e rēko ‘otomiạr mone?