Bǎrakoze Ukugomba kwa Yehova

Ukwizera kw’Abavyeyi Kwǎhawe Impera

KU Bisirayeli, ivuka ry’umwana w’umuhungu ryaratera umunezero mwinshi. Vyasigura ko urwo ruvyaro rwobandanije n’uko iragi ry’ishamvu ryogumye muri uwo muryango. Mugabo nko mu mwaka w’1593 B.G.C., ukwibaruka umuhungu ku Baheburayo vyasa n’uko ari umuvumo kuruta ukuba umuhezagiro. Kuki? Kubera yuko Farawo wo mu Misiri, ku bw’ugutinya iyongerekana ryihuta ry’abanyagihugu b’Abayuda bo mw iteritwari aganza, yategetse yuko abana babo b’abahungu bakivuka bategerezwa kwicwa.—Kuvayo 1:12, 15-22.

Mu kiringo c’ukwo kugerageza iryo honyabwoko ry’ubugesera ni ho Amuramu na Yokebedi, umugabo n’umugore b’Abaheburayo babiranye, bibaruka akana k’agahungu k’intore. Biroroshe kwiyumvira ukuntu umunezero wabo ushobora kuba waranyóshwe n’ugucika ivutu igihe bibuka iryo tegeko rya Farawo. Yamara, uko Amuramu na Yokebedi batereza ijisho kuri ako kana kabo k’agahungu, bariyemeza bashikamye kutagaheba, atakuraba ingaruka zohabaye.—Kuvayo 2:1, 2; 6:20.

Ugukorana Ibintu Ukwizera

Mu kiringo c’amezi atatu Amuramu na Yokebedi bagumye banyegeje ikibondo cabo. (Kuvayo 2:2) Ariko rero ivyo vyarimwo uguhakwa, kubera yuko Abaheburayo n’Abanyamisiri babana hafi na hafi. Uwo ari we wese yafatwa ariko agerageza kurenga itegeko rya Farawo vyashobora gutuma acirwa urwo gupfa—kandi n’ikibondo nyene copfuye. None abo bavyeyi bihebeye ugusenga Imana ni igiki bogize kugira batume ako gahungu kabo n’ubwabo babandanya kubaho?

Yokebedi yaregeranije ingāga z’inkorogoto. Inkorogoto ni igiterwa kirekire gikomeye, gisa n’umugano, kandi gifise umutumba w’imigongo itatu w’intimbatimba ingana n’urutoke. Ishobora gushikana uburebure bw’imetero zitandatu. Abanyamisiri bakoresha ico giterwa mu guhingura impapuro, ibigara, ibitambara vy’ukwerekeza ubwato, inkweto, n’utwato duhwahutse.

Yokebedi akoresheje imitumba y’inkorogoto yarakoze agatebo kagereranye kokwirwamwo ako kana kiwe. Yaciye akoresha kaburimbi n’ishīshi kugira ahome ako gatebo yongere abuze ko kanyengeterwamwo n’amazi. Yokebedi yaciye atereka ico kibondo ciwe muri ako kato agashira mu rubingo ku nkengera z’Uruzi Nili.—Kuvayo 2:3.

Nya Kibondo Cuburwa Aho Kiri

Miriyamu umukobwa wa Yokebedi yarahagaze hafi y’aho kugira arabe ivyociye bikurikira. Maze umukobwa wa Farawo yaraje ku Ruzi Nili kwiyuhagira.a Hari aho kumbure Yokebedi yari azi ko uwo muganwakazi yakunda kugendera ako gace ku Ruzi Nili, hanyuma n’ibigirankana asiga ako gatebo aho koshoboye kwuburwa bitagoranye. Uko vyari bimeze kwose, uwo mukobwa wa Farawo yarabonye ako gatebo gateretswe neza mu rubingo, hanyuma ahamagara umwe mu ncoreke ziwe kugira aje kukazana. Igihe yakabonamwo ako kana kariko kararira, imbabazi ziwe zaciye zivyuka. Yaratahuye ko kari akana k’Agaheburayo. Yamara, yoshoboye gute kureka ikibondo nk’ico c’intore ngo cicwe? Turetse ubuntu bwa kimuntu, uwo mukobwa wa Farawo ategerezwa kuba yarohejwe n’icizero c’Abanyamisiri cari gikwiye hose c’uko ukwemererwa kuja mw ijuru vyava ku bikorwa vy’ubuntu umuntu yakoze mu gihe c’ukubaho kwiwe.b—Kuvayo 2:5, 6.

Miriyamu, uwariko abirabira kure, yaregereye uwo mukobwa wa Farawo. Yarabajije ati: “Mbega sinoja kukuronderera umugore wo mu Baheburayo ngw amukwonkereze?” Uwo muganwakazi yishuye ati: “Ego me, genda.” Miriyamu yarirutse agana aho nyina ari. Bidatevye, Yokebedi yari ahagaze imbere y’uwo mukobwa wa Farawo. Uyo muganwakazi yavuze ati: “Jana uyu mwana, umunyonkereze, nzokugerera.” Vyoshoboka neza ko ico gihe uwo mukobwa wa Farawo yatahuye ko Yokebedi yari nyina w’ico kibondo.—Kuvayo 2:7-9.

Yokebedi yaragumije uwo mwana gushika aho acuka.c Ivyo vyaramuronkeje uturyo twinshi twiza rwose tw’ukumwigisha ivyerekeye Imana y’ukuri, Yehova. Maze Yokebedi yarasubije uwo mwana wa mukobwa wa Farawo, uno uwo muhungu aca amwita Musa, ni ukuvuga “uwarokowe akuwe mu mazi.”—Kuvayo 2:10.

Icigwa Kuri Twebwe

Amuramu na Yokebedi baraboneye akaryo rwose ku kanya gatoyi baronse k’ukwigisha umuhungu wabo ingingo z’ugusenga gutyoroye. Abavyeyi muri iki gihe bakwiye kubigira gutyo nyene. Vy’ukuri, birakenewe rwose ko babigira batyo. Shetani ya Diyǎbule “agendagenda nk’intambge yivuga, arondera uwo arotsa.” (1 Petero 5:8) Yoshima kubona ataye mu vyara vyiwe imikangara b’igikundiro—abahungu n’abakobwa—bafise icizero c’ugucika abasuku beza ba Yehova. Imyaka yabo y’ubuto ntituma Shetani ibagirira akagongwe! Ku bw’ivyo, abavyeyi b’incabwenge barigisha abana babo bakiri bato gutinya Imana y’ukuri, Yehova.—Imigani 22:6; 2 Timoteyo 3:14, 15.

Akigoro Amuramu na Yokebedi bagize kugira banyegeze uruhinja rwabo mu mezi atatu ya mbere y’ubuzima bwarwo, karavugwa mu Baheburayo 11:23 bwa gikorwa cakoranywe ukwizera. Abo bavyeyi batinya Imana bompi barerekanye ko bishimiye ububasha bwa Yehova bw’ukurokora, mu kwanka guheba umwana wabo, kandi ivyo vyaratumye bahezagirwa. Na twebwe nyene dukwiye kwerekana ko twumira akaramata ku mateka n’ingingo vya Yehova, twizeye ko ivyo Yehova yoreka ngo bidushikire amaherezo vyose biri n’ico bizogira ku neza n’ubuhirwe vyacu bizokwamaho.—Abaroma 8:28.

[Utujambo tw’epfo]