Ivyo twigira kuri Yezu

Ingene tworonka agahimbare

Ni igiki gituma umuntu aronka agahimbare?

▪ Yezu yaravuze ibijanye n’agahimbare mu majambo ya mbere na mbere ya ya nsiguro izwi kuruta izindi zose yashikirije. Yavuze ati: “Hahiriwe abazi ko bakeneye ivy’impwemu.” (Matayo 5:3) None yashaka kuvuga iki? Ivyo dukeneye mu vy’impwemu, ni kuvuga mu vy’Imana, ni ibiki?

Kugira ngo tubeho turakenera guhema, kunywa no gufungura, nk’uko biri no ku bikoko. Mugabo kugira ngo tugire agahimbare, hari ikintu dukeneye ibikoko bidakenera, ico na co akaba ari ugutahura intumbero y’ubuzima. Uwaremye ubuzima ni we wenyene ashobora kuturonsa ico kintu dukeneye. Ni co gituma Yezu yavuze ati: “Umuntu ntakabeshweho n’umukate gusa, mugabo azobeshwaho n’ijambo ryose riva mu kanwa ka Yehova.” (Matayo 4:4) Abazi ko bakeneye ivy’Imana barahimbawe kubera ko biyegereza Yehova ya “Mana ihimbawe,” na we akabaha ikintu gihambaye cane kugira ngo umuntu agire agahimbare, ico na co akaba ari icizigiro.​—1 Timoteyo 1:11.

Yezu yatanze icizigiro gute?

▪ Yezu yavuze ati: “Hahiriwe abitonda, kuko bazotorana isi.” (Matayo 5:5) Yezu yarahaye umuryango w’abantu icizigiro mu gukiza abarwaye no mu kuzura abapfuye bagasubira kubaho kw’isi. Ariko kandi yaje azanye ubutumwa butanga icizigiro. Yasiguye ati: “Kuko Imana yakunze isi cane ku buryo yatanze Umwana wayo w’ikinege, kugira ngo umuntu wese amwizera ntarandurwe ahubwo agire ubuzima budahera.” (Yohani 3:16) Abumvira Imana bazokwironkera ubuzima budahera kw’isi. Ibaze nawe kwibanira n’abantu bitonda kandi utigera usaza! Ntibitangaje kuba Ijambo ry’Imana rivuga riti: “Munezerwe mu cizigiro.” (Abaroma 12:12) Yezu yarerekanye kandi ingene umuntu yoronka agahimbare ubu.

Ni uburyo bwo kubaho buzana agahimbare ubuhe Yezu yigishije?

▪ Yezu yaratanze impanuro ngirakamaro nko ku bijanye n’imigenderanire umuntu agiranira n’abandi, umubano w’ababiranye, ukwicisha bugufi be n’ingene umuntu akwiye kubona amatungo. (Matayo 5:21-32; 6:1-5, 19-34) Gukurikiza impanuro Yezu yatanze bizogufasha kugira agahimbare.

Gutanga birazana agahimbare. (Ibikorwa 20:35) Nk’akarorero, Yezu yavuze ati: “Iyo uteretse inzimano, nutumire aboro, abacitse ibihimba vy’umubiri, abacumbagira, impumyi; uzoba uhiriwe, kuko batagira ikintu na kimwe co kukwishura.” (Luka 14:13, 14) Uwuronka agahimbare si urya arondera ko we ubwiwe yohimbarwa, ahubwo ni urya arondera ko abandi bohimbarwa.

Ikintu kiruta ibindi vyose gituma umuntu agira agahimbare ni ikihe?

▪ Kugira ivyo ukoreye abandi birashobora gutuma ugira agahimbare, ariko gukorera Imana vyovyo bishobora gutuma ugira agahimbare karuta ako. Mbere n’abavyeyi bafise agatima keze bakunda abana babo, agahimbare bagira ntigashobora kugereranywa n’ako umuntu agira mu gukorera Imana. Ivyo biribonekeza neza uravye ivyabaye igihe kimwe Yezu ariko arigisha isinzi ry’abantu. Inkuru ivuga iti: “Umugore umwe wo muri [n]ya sinzi ashira ijwi hejuru amubwira ati: ‘Hahiriwe inda yagutwaye n’amabere wonse!’. Mugabo na we avuga ati: ‘Oya, ahubwo, hahiriwe abumva ijambo ry’Imana bakarigumya!’”​—Luka 11:27, 28.

Yezu ubwiwe yarumva ashize akanyota akagira n’agahimbare mu gukora ivyo Se wiwe wo mw’ijuru agomba. Ico Imana igomba ni uko abantu bumva ivyerekeye icizigiro c’ubuzima budahera. Igihe kimwe, Yezu ahejeje gusigurira ico cizigiro umuntu umwe yari yashimishijwe n’ubutumwa yariko arashikiriza, yavuze ati: “Ibifungurwa vyanje ni ugukora ukugomba kw’uwandungitse.” (Yohani 4:13, 14, 34) Na wewe urashobora kwironkera agahimbare kava ku gukora ikintu gihimbara Imana mu kubwira abandi ibijanye n’ukuri kwa Bibiliya.

Ushaka kumenya amakuru yiyongereye, raba ikigabane ca 1 c’iki gitabu Mu vy’ukuri bibiliya yigisha iki?casohowe n’Ivyabona vya Yehova.

[Ifoto ku rup. 16]

Agahimbare nyakuri kava ku kwironsa ivyo dukeneye kugira dutahure intumbero y’ubuzima