“Bazokwumva Bate?”
1 Yezu yavuze ashimitse ati: “Ubutumwa bgiza bukwiye kubanza kuvugwa mu mahanga yose.” (Mrk. 13:10) Naho tugira utwigoro dukomeye, haracariho abantu imiliyoni amajana ubwabo batarashingirwa intahe. Intwaro zimwezimwe ziraburabuza igikorwa cacu. Ibihugu vyinshi bifise abanyagihugu benshi baguma bagwirirana ningoga na ningoga. Ku bw’ivyo none, “bazokwumva bate?”—Rom. 10:14.
2 Niwizigire Yehova: Dutegerezwa kwibuka yuko Yehova azi ingene imitima y’abantu bose imeze. Uko ivy’umuntu vyifashe kwose, nimba arondera ata buryarya ukuri kwerekeye Imana, azokuronka.—1 Ngo. 28:9.
3 Aburahamu yarababazwa n’ababa i Sodoma n’i Gomora. Mugabo Imana yaramukuye amazinda yuko Sodoma kitosanganguwe naho nyene cobonetsemwo abantu cumi gusa b’abagororotsi. (Ita. 18:20, 23, 25, 32) Yehova ntiyigeze ahonereza hamwe abagororotsi n’abanyakibi, nk’uko vyabonekeye mu kuntu Loti n’abakobwa biwe barokotse.—2 Pet. 2:6-9.
4 Igihe kimwe Eliya yarigeze kwiyumvira yuko yari wenyene gusa mu gusukurira Imana y’ukuri. Ariko rero, Yehova yaramukuye amazinda yuko atari wenyene namba kandi yuko igikorwa yari yaratanguye cosozerewe. (1 Abm. 19:14-18) Ibintu vyifashe gute muri kino gihe cacu?
5 Guma Ufise Vyinshi Ukora mu Murimo w’Imana: Ntidushobora kumenya umwanya usigaye wo kurangura igikorwa c’ugushinga intahe ukuntu ungana. Yehova ni we ajejwe ivy’ico gikorwa kandi ariko arakoresha abamarayika biwe ngo bagicungere. (Ivyah. 14:6, 7) Ni we musa ashinga urugero twogezako mu gushingira intahe amahanga yose. Mu gihe Yehova yobishaka, arashobora kubona ko ubutumwa bw’Ubwami bukwiragijwe uko tutari bwigere twibaza, kugira ngo abantu barushirije kuba benshi bashobore “[kw]umva ijambo ry’ubutumwa bgiza, bizere.” (Ivyak. 15:7) Ico Yehova akora kizoba gihuye neza n’uko ari, n’ukuvuga Imana y’urukundo, y’ubukerebutsi kandi iroranya.
6 Ni agateka twatewe gukora mu buryo buhuye n’ivyo Yehova agomba, mu gukora uko dushoboye kwose kugira ngo umuntu wese yumve inkuru nziza.—1 Kor. 9:16.