Ese ibitangaza bivugwa muri Bibiliya byabayeho?

ESE hagize umuntu ukubwira inkuru itangaje, uko usanzwe umuzi ntibyagira uruhare mu gutuma uyemera cyangwa ukayihakana? Uretse kuba wakwita ku kuntu uwo muntu yabaze iyo nkuru, wanareba niba azwiho kuvugisha ukuri. N’ubundi kandi, aramutse amaze imyaka myinshi akubwiza ukuri, kandi akaba atarigeze na rimwe akubeshya abigambiriye, waba ufite impamvu zumvikana zo kwemera ibyo arimo akubwira.

Uko ni na ko bimeze ku bitangaza bivugwa muri Bibiliya. Igihe ibyo bitangaza byabaga, nta n’umwe muri twe wariho. Icyakora, dushobora kumenya niba inkuru zivugwa muri Bibiliya ari izo kwiringirwa, kandi ko ari ukuri koko. Twabigeraho dute? Dore bimwe mu bintu bituma turushaho kwizera ko ibitangaza bivugwa muri Bibiliya byabayeho:

Ibitangaza byinshi byakorerwaga ku karubanda. Hari igihe byabonwaga n’abantu babarirwa mu bihumbi, ndetse no muri za miriyoni (Kuva 14:21-31; 19:16-19). Ntibyakorwaga rwihishwa, abantu batareba.

Ntibyakorwaga mu buryo buhambaye. Ababikoraga ntibifashishaga ibikoresho byihariye, ngo babikorere ahantu hateguwe mu buryo budasanzwe, cyangwa se ngo babe bagamije kwibonekeza. Ibitangaza byinshi biboneka muri Bibiliya byakorwaga bitateganyijwe, kandi abantu ni bo babaga bisabiye ko bikorwa (Mariko 5:25-29; Luka 7:11-16). Mu bihe nk’ibyo, uwakoraga ibitangaza ntiyabaga yabiteguye.

Ababikoraga ntibabaga bagamije gushaka icyubahiro, ubutunzi cyangwa kuba ibyamamare. Babaga bagamije guhesha Imana ikuzo (Yohana 11:1-4, 15, 40). Abantu bageragezaga gushakira indonke mu bitangaza, baramaganwaga.—2 Abami 5:15, 16, 20, 25-27; Ibyakozwe 8:18-23.

Ibitangaza bivugwa muri Bibiliya byabaga binyuranye, ku buryo nta muntu buntu wari kugira ubushobozi bwo kubikora. Urugero, umuyaga n’inyanja byaratuzaga, kandi amazi agahindurwa divayi. Hatangwaga itegeko imvura ikagwa cyangwa ntiyongere kugwa, abarwayi bagakira kandi impumyi zigahumuka. Ibyo bitangaza byose, hamwe n’ibindi byinshi, bigaragaza ko hari imbaraga zirenze iz’abantu zatumaga bikorwa.—1 Abami 17:1-7; 18:41-45; Matayo 8:24-27; Luka 17:11-19; Yohana 2:1-11; 9:1-7.

Abarwanyaga Yesu babonye ibyo bitangaza, ntibigeze babihakana. Igihe Yesu yazuraga incuti ye Lazaro, abanyamadini bangaga Yesu ntibigeze bahakana ko Lazaro yari yarapfuye. None se bari kubihakana bate, kandi hari hashize iminsi ine Lazaro ashyinguwe (Yohana 11:45-48; 12:9-11)? Na nyuma y’igihe kirekire Yesu apfuye, abanditsi b’igitabo cya Talmud kirimo amategeko y’idini ry’Abayahudi, bakomeje kwiyemerera ko Yesu yari afite ubushobozi bwo gukora ibitangaza. Icyo bashidikanyagaho gusa, ni aho yakuraga ubwo bushobozi. Mu buryo nk’ubwo, igihe abigishwa ba Yesu bajyanwaga imbere y’urukiko rw’Abayahudi, ntibabajijwe ‘niba barakoraga ibitangaza,’ ahubwo barababajije bati “ni ubuhe bubasha bwabahaye gukora ibyo bintu, cyangwa se ni mu izina rya nde mwabikoze?”—Ibyakozwe 4:1-13.

None se umuntu yakwizera ko ibitangaza bivugwa muri Bibiliya byabayeho? Dukurikije ibyo tumaze gusuzuma, biragaragara neza ko byabayeho. Hari izindi mpamvu twashingiraho twizera ko ibitangaza bivugwa muri Bibiliya byabayeho. Urugero, iyo Bibiliya itubwira inkuru, incuro nyinshi itubwira igihe ibivugwa byabereye, aho byabereye n’abantu bavugwamo. Ndetse n’abantu bajora Bibiliya, batangajwe n’ukuntu inkuru zo muri Bibiliya zisobanurwa mu buryo burambuye. Ubuhanuzi bubarirwa mu magana bwo muri Bibiliya bwarasohoye, ndetse no mu tuntu duto duto. Nanone kandi, Bibiliya irimo inama nyinshi zigaragaza icyo abantu bakora ngo babane neza, izo nama zikaba zarafashije abantu b’ingeri zose. Ku birebana n’inama Bibiliya itanga ku mibanire y’abantu, nta wahakana ko ari zo nziza kurusha izindi.

Niba utarizera Bibiliya neza, turagutera inkunga yo kuyisuzumana ubwitonzi. Uko uzagenda uyisobanukirwa ni ko uzagenda urushaho kuyiringira (Yohana 17:17). Uzibonera ko ibitangaza bivugwa muri Bibiliya byabayeho. Numara kubyemera, bizagufasha kwemera ko ibyo Bibiliya ivuga ku birebana n’igihe kizaza, bizabaho nta kabuza.

[Ifoto yo ku ipaji ya 7]

Abanyamadini barwanyaga Yesu ntibigeze bahakana ko Lazaro yari yarapfuye

Ibitangaza bigiye kubaho

ESE haramutse hari umuganga mufitanye gahunda yo kukubaga, kandi akaba ari bukubage ahantu hakomeye, wakumva umeze ute uramutse umenye ko ari wowe wa mbere agiye kubaga aho hantu? Nta gushidikanya ko wahangayika. Ariko se wakumva umeze ute uramutse umenye ko ari we uzi kubaga kurusha abandi, kandi akaba yarabaze abantu babarirwa mu magana bafite uburwayi nk’ubwawe kandi bagakira? Ese ntiwarushaho kwiringira ko hari icyo ari bukumarire?

Iyi si turimo muri iki gihe na yo irarwaye, kandi ikeneye “kubagwa.” Yehova Imana yatanze isezerano binyuriye mu Ijambo rye Bibiliya, ry’uko azongera guhindura isi Paradizo (2 Petero 3:13). Ariko kugira ngo ibyo bigerweho, ababi bazabanza kurimburwa (Zaburi 37:9-11; Imigani 2:21, 22). Ibintu bibabaje byose tubona muri iki gihe bizavaho mbere y’uko paradizo yongera gushyirwaho. Uwavuga ko ibyo nibigerwaho bizaba ari igitangaza, ntiyaba abeshye.​—Ibyahishuwe 21:4, 5.

Abahamya ba Yehova bizera ko ibyo bintu bizabaho vuba aha. Kubera iki? Ibitangaza Yehova Imana yakoze bigaragaza ko afite ububasha bwo gusohoza ibyo yasezeranyije. Gereranya ibitangaza bitandatu gusa bivugwa muri Bibiliya n’ibyo yasezeranyije ko bizabaho mu gihe kizaza.

Turifuza ko wamenya byinshi kurushaho ku birebana n’amasezerano yo muri Bibiliya ahereranye n’igihe kizaza. Uko uzagenda ugira ukwizera gukomeye, ni na ko uzarushaho kwiringira ko ibitangaza Yehova akora bizakugirira akamaro.

[Agasanduku/​Amafoto yo ku ipaji ya 9 n’iya 10]

IGITANGAZA:

YESU YAGABURIYE ABANTU BENSHI AKORESHEJE IMIGATI MIKE N’AMAFI MAKE.​—MATAYO 14:13-21; MARIKO 8:1-9; YOHANA 6:1-14.

ISEZERANO:

“Isi izatanga umwero wayo; Imana, ari yo Mana yacu, izaduha umugisha.”​—ZABURI 67:6.

ICYO BIZATUMARIRA:

NTA WUZONGERA KWICWA N’INZARA.

IGITANGAZA:

YESU YAHUMUYE IMPUMYI.​—MATAYO 9:27-31; MARIKO 8:22-26.

ISEZERANO:

“Amaso y’impumyi azahumuka.”​—YESAYA 35:5.

ICYO BIZATUMARIRA:

IMPUMYI ZOSE ZIZABONA.

IGITANGAZA:

YESU YAKIJIJE UMUNTU WAMUGAYE.​—MATAYO 11:5, 6; YOHANA 5:3-9.

ISEZERANO:

“Ikirema kizasimbuka nk’impala.”​—YESAYA 35:6.

ICYO BIZATUMARIRA:

UBUMUGA BWOSE BUZAKIRA.

IGITANGAZA:

YESU YAKIJIJE ABANTU INDWARA ZITANDUKANYE.​—MARIKO 1:32-34; LUKA 4:40.

ISEZERANO:

“Nta muturage waho uzavuga ati ‘ndarwaye.’”​—YESAYA 33:24.

ICYO BIZATUMARIRA:

INDWARA ZOSE ZIZAVAHO, MAZE TUGIRE UBUZIMA BUZIRA UMUZE.

IGITANGAZA:

YESU YATEGEKAGA IMBARAGA KAMERE.​—MATAYO 8:23-27; LUKA 8:22-25.

ISEZERANO:

“Bazubaka amazu bayabemo, kandi bazatera inzabibu barye imbuto zazo. Ntibazaruhira ubusa.”​—YESAYA 65:21, 23.

“Gukandamizwa bizakuba kure; ntuzabitinya. Uzaba kure y’ikintu cyose giteye ubwoba, kuko kitazakwegera.”​—Yesaya 54:14.

ICYO BIZATUMARIRA:

IMPANUKA KAMERE NTIZIZONGERA KUBAHO.

IGITANGAZA:

YESU YAZUYE ABAPFUYE.​—MATAYO 9:18-26; LUKA 7:11-17.

ISEZERANO:

‘Abari mu mva bose bazazivamo.’​—YOHANA 5:28, 29.

“Inyanja igarura abapfuye bo muri yo, kandi urupfu n’imva na byo bigarura abapfuye bo muri byo.”​—IBYAHISHUWE 20:13.

ICYO BIZATUMARIRA:

ABACU BAPFUYE BAZAZURWA.