Kronika Waciwiri

36 Natenepa, anthu a dziko ineyi akwata Yeowazi+ mwana wa Yosiya, mban’khazikisa ninga mambo mu Yerusalemu pa mbuto ya babace.+ 2 Yeowazi akhali na pyaka 23 pyakubalwa pidatoma iye kutonga ninga mambo, pontho iye atonga miyezi mitatu mu Yerusalemu. 3 Mbwenye mambo wa ku Ejitu am’bulusa pa utongi wace ku Yerusalemu, mbakakamiza dziko ineyi toera ipereke nsonkho wa matalento* 100 a parata na talento ibodzi ya ouro.+ 4 Kusiyapo pyenepi, mambo wa ku Ejitu akhazikisa Eliyakimu m’bale wace Yeowazi ninga mambo wa ku Yuda na ku Yerusalemu, mbancinja dzina yace mbikhala Yeowakimu. Mbwenye Neko+ akwata m’bale wace akhacemerwa Yeowazi mbaenda naye ku Ejitu.+

5 Yeowakimu+ akhali na pyaka 25 pyakubalwa pidatoma iye kutonga ninga mambo, pontho iye atonga pyaka 11 mu Yerusalemu. Iye apitiriza kucita pinthu pyakuipa pamaso pa Yahova Mulungu wace.+ 6 Nabhukodhonozore+ mambo wa ku Bhabhilonya abwera toera kum’manga na maunyolo mawiri a nkuwa toera aende naye ku Bhabhilonya.+ 7 Nabhukodhonozore akwata pyombo pinango pya n’nyumba ya Yahova, aenda napyo ku Bhabhilonya mbapiikha n’nyumba yace yaumambo ku Bhabhilonya.+ 8 Mphangwa zinango zinalonga pya umaso wa Yeowakimu, pinthu pyakunyanyasa pidacita iye na pinthu pyonsene pyakuipa thangwi ya iye, pyalembwa m’bukhu ya amambo a ku Izraeli na a ku Yuda; pontho mwanace akhacemerwa Yeowakini adzakhala mambo pa mbuto yace.+

9 Yeowakini+ akhali na pyaka 18 pyakubalwa pidatoma iye kutonga ninga mambo, pontho iye atonga miyezi mitatu na ntsiku khumi mu Yerusalemu. Iye apitiriza kucita pinthu pyakuipa pamaso pa Yahova.+ 10 Pakutoma kwa caka, mambo Nabhukodhonozore atuma anthu toera am’bwerese ku Bhabhilonya,+ pabodzi na pyombo pya n’nyumba ya Yahova.+ Iye akhazikisa Zedekiya m’bale wa pai wace Yeowakini ninga mambo wa ku Yuda na ku Yerusalemu.+

11 Zedhekiya+ akhali na pyaka 21 pyakubalwa pidatoma iye kutonga ninga mambo, pontho iye atonga pyaka 11 mu Yerusalemu.+ 12 Iye apitiriza kucita pinthu pyakuipa pamaso pa Yahova Mulungu wace. Iye nee acepeseka pamaso pa mprofeta Yeremiya+ adancenjeza mwakubverana na pidalonga Yahova. 13 Kusiyapo pyenepi, iye asandukira mambo Nabhukodhonozore,+ wakuti akhadan’dumbirisa mu dzina ya Mulungu, iye apitiriza kukhala wakukhonda bvera, mbaumisa ntima wace, pontho iye nee atawira kubwerera kuna Yahova Mulungu wa Izraeli. 14 Akulu onsene a anyantsembe pabodzi na mbumba, apitiriza kucita pinthu mwakukhonda kukhulupirika, mbacita pinthu pyakunyanyasa pikhacitwa na anthu a madzindza anango. Iwo apswipisa nyumba ya Yahova,+ ikhadacenesa Iye mu Yerusalemu.

15 Yahova Mulungu wa ambuyawo akhaacenjeza kubulukira mwa atumiki ace; akhaacenjeza mwakubwereza-bwereza, thangwi iye akhabvera ntsisi mbumba yace na mbuto yace inakhala iye.* 16 Mbwenye iwo akhasingirira atumiki a Mulungu wandimomwene,+ akhapwaza mafalace,+ pontho akhaseka aprofeta ace+ mpaka kutekera kakamwe kwakuti nee pakhalibve na cidikhiro cakuti mbadawangiswa, penepo Yahova apangiza kuipirwa kwace kuna mbumba yace.+

17 Natenepa, iye aabweresera mambo wa Akaldheya+ adapha aphale awo na supada+ mu templo yawo;+ iye nee abvera ntsisi aphale na atsikana,* nee ankhalamba, nee atenda.+ Mulungu apereka pinthu pyonsene m’manja mwace.+ 18 Pyombo pyonsene pya n’nyumba ya Mulungu wandimomwene, pikulu na ping’ono, pabodzi na mpfuma za n’nyumba ya Yahova, mpfuma za mambo na za atsogoleri ace; pyonsene apikwata mbaenda napyo ku Bhabhilonya.+ 19 Iye apisa nyumba ya Mulungu wandimomwene,+ agomola mpanda wa Yerusalemu,+ apisa na moto nyumba zonsene zakuzungulirwa na mipanda yakuwanga, mbafudza pinthu pyonsene pya ntengo ukulu.+ 20 Ale adakhonda kuphiwa na supada,+ iye aakwata mbaaendesa ku ubitcu ku Bhabhilonya, iwo adzakhala atumiki ace+ na a anace, mpaka mudatoma kutonga+ umambo wa ku Persya, 21 pyenepi pyacitika toera kukwanirisa mafala a Yahova adalongwa na Yeremiya,+ mpaka dziko ingamala kulipa masabudu+ ace. Mu ntsiku zonsene zidakhala iyo madembe, dziko yakoya ntsiku ya Sabudu, mpaka kumala pyaka 70.+

22 Pa caka cakutoma ca utongi wa Siro+ Mambo wa ku Persya, toera akwanirisike mafala a Yahova adalongwa na Yeremiya,+ Yahova akulumiza ntima wa Siro Mambo wa ku Persya toera kukhazikisa ntemo mu umambo wace onsene, mbaulembambo m’matsamba. Ntemo+ unoyu ukhalonga tenepa: 23 “Ipi ndi pinalonga Siro Mambo wa ku Persya: ‘Yahova Mulungu wakudzulu andipasa maumambo onsene a pa dziko yapantsi,+ iye andisankhula toera ndim’mangire nyumba ku Yerusalemu, mu dziko ya Yuda.+ Mbani mwa imwe wakuti ndi wa mbumba yace? Yahova Mulungu wace mbakhale na iye. Natenepa, mbaende kweneko!’”+