Ezekiyeli

14 Akulu angasi a Izraeli abwera, mbakhala pantsi patsogolo panga.+ 2 Penepo Yahova alonga na ine, mbandipanga: 3 “Iwe mwana wa munthu, amuna awa atonga kutowera madzimunthu awo akunyanyasa, pontho iwo aikha cinthu patsogolo pa anthu, cakuti cisaadawisa. Kodi ine ndisafunika kucita pinaphemba iwo?+ 4 Natenepa, apange kuti: ‘Ipi ndi pidalonga Yahova, Mbuya Wankulu Kakamwe: “Munthu wa dzindza ya Izraeli angatonga kutowera madzimunthu ace akunyanyasa, mbaikha cinthu patsogolo pa anthu, cakuti cisaadawisa, buluka penepo mbaenda kabvundzisa mprofeta, ine Yahova, ndinadzantawira mwakuthema, mwakubverana na madzimunthu ace mazinji akunyanyasa. 5 Ine ndinadzadza mitima ya mbumba ya Izraeli na kugopa, thangwi iwo onsene andisiya, mbatowera madzimunthu awo akunyanyasa.”’+

6 “Natenepa, panga mbumba ya Izraeli kuti: ‘Ipi ndi pidalonga Yahova, Mbuya Wankulu Kakamwe: “Bwererani, mbamusiya madzimunthu anu akunyanyasa, pontho siyani macitiro anu onsene akunyanyasa.+ 7 Thangwi munthu wa dzindza ya Izraeli peno munthu wa dziko inango wakuti asakhala mu Izraeli, angandisiya, mbatonga kutowera madzimunthu ace akunyanyasa, pontho angaikha patsogolo pa anthu cinthu cakuti cinaadawisa, buluka penepo mbabwera kudzabvundzisa mprofeta wanga,+ ine Yahova, ndine anafuna kudzantawira. 8 Ine ndinadzatcunyusa munthu unoyu, mbandincitisa kukhala cidzindikiro ca cenjezo, iye anadzalongwa mu nsangani, pontho ine ndinadzanfudza pakati pa mbumba yanga,+ natenepa, imwe munadzadziwa kuti ine ndine Yahova.”’

9 “‘Mbwenye mprofeta anganyengezwa, iye mbalonga cinthu, ine Yahova, ndine adanyengeza mprofeta unoyu.+ Penepo ine ndinafuthula djanja yanga, mbandimupha pakati pa mbumba yanga ya Izraeli. 10 Uwiri wawo anadzaona nyatwa thangwi ya madawo awo; madawo a munthu anabvundzisa mprofeta, anadzakhala sawasawa na madawo a mprofeta, 11 toera mbumba ya Izraeli ikhonde kundisiya, pontho mbikhonda kukhala yakupswipa thangwi ya madawo awo onsene. Natenepa, iwo anadzakhala mbumba yanga, ine mbandikhala Mulungu wawo,’+ alonga Yahova, Mbuya Wankulu Kakamwe.”

12 Yahova alonga pontho na ine, mbandipanga: 13 “Iwe mwana wa munthu, anthu a dziko ibodzi angandidawira thangwi yakucita pinthu mwakukhonda kukhulupirika, ine ndinadzafuthula djanja yanga, mbandifudza mbuto zinagumana iwo pyakudya.+ Pontho ine ndinadzatumiza njala mu dziko ineyi,+ mbandipha anthu na pinyama pyene.”+ 14 “‘Mbidakhala kuti amuna awa atatu: Nowa,+ Dhanyeli+ na Yobe+ ali mwenemu, ndiwo basi akhafuna kupulumuka thangwi yakulungama kwawo,’+ alonga Yahova, Mbuya Wankulu Kakamwe.”

15 “‘Peno, khala ine ndatumiza pikala mu dziko ineyi, ipyo mbapithamangisa anthu, dziko ineyi mbikhala thando, anthu mbakhonda kupita na mwenemu thangwi ya pikala,+ 16 ine ndiri kudumbira mu dzina yanga,’ alonga Yahova, Mbuya Wankulu Kakamwe, ‘mbidakhala kuti amuna anewa atatu ali mwenemu, iwo nee mbadakwanisa kupulumusa anawo amuna, nee akazi; akhafuna kupulumuka ndiwo basi, dziko yonsene mbidakhala yakusowa anthu.’”

17 “‘Peno, khala ine ndabweresa supada mu dziko ineyi,+ mbandilonga: “Supada mbipite na mu dziko ineyi” toera iphe anthu na pinyama pyene,+ 18 ine ndiri kudumbira mu dzina yanga,’ alonga Yahova, Mbuya Wankulu Kakamwe, ‘mbidakhala kuti amuna anewa atatu ali mwenemu, iwo nee mbadakwanisa kupulumusa anawo amuna, nee akazi; akhafuna kupulumuka ndiwo basi.’”

19 “‘Peno, khala ine ndatumiza utenda mu dziko ineyi,+ mbandipangiza ukali wanga wakupha anthu, toera kupha mwenemu anthu na pinyama, 20 ine ndiri kudumbira mu dzina yanga,’ alonga Yahova, Mbuya Wankulu Kakamwe, ‘mbidakhala amuna awa atatu: Nowa,+ Dhanyeli+ na Yobe+ ali mwenemu, iwo nee mbadakwanisa kupulumusa anawo amuna, nee anawo akazi; ndiwo basi akhafuna kupulumuka thangwi yakulungama kwawo.’”+

21 “Thangwi ipi ndi pidalonga Yahova, Mbuya Wankulu Kakamwe: ‘Ndi pyenepi pinafuna kucitika ndingadzatumiza nyatwa zinai+ mu Yerusalemu: Supada, njala, pikala na utenda,+ toera kupha anthu na pinyama.+ 22 Mbwenye anthu angasi anafuna kusalikira mwenemu, anadzapulumuka, pontho anadzaendeswa kunja+ pabodzi na anawo amuna na akazi. Iwo ali kubwera kuna imwe, mungaona makhaliro awo na macitiro awo, mwakukhonda penula, imwe munadzabalangazwa thangwi ya nyatwa idabweresa ine mu Yerusalemu, inde, thangwi ya pyonsene pidacita ine mwenemu.’”

23 “‘Iwo anadzakubalangazani mungaona makhaliro awo na macitiro awo, pontho imwe munadzadziwa kuti ine ndikhali na mathangwi adidi toera kucita pinthu pidaacitira ine,’+ alonga Yahova, Mbuya Wankulu Kakamwe.”