Kronika Waciwiri

7 Pidamala Salomoni kucita phembero,+ moto watcita buluka kudzulu+ mbupisa ntsembe zakupiswa na ntsembe zinango; pontho mbiri ya Yahova yadzala n’nyumba ineyi.+ 2 Anyantsembe nee akwanisa kupita n’nyumba ya Yahova, thangwi mbiri ya Yahova ikhadadzala n’nyumba ya Yahova.+ 3 Mbumba yonsene ya Izraeli ikhaona moto mu ndzidzi ukhabuluka iwo kudzulu, mbiri ya Yahova mbikhala padzulu panyumba ineyi, iwo agodama mbakotamisa misolo yawo mpaka pantsi, mbapereka takhuta kuna Yahova, “thangwi iye ndi wadidi, pontho ufuni wace ndi wakukhonda mala.”*

4 Mambo na mbumba yonsene apereka ntsembe kuna Yahova.+ 5 Mambo Salomoni apereka ntsembe: Ng’ombe 22.000 na mabira 120.000. Penepo mambo na mbumba yonsene azimula nyumba ya Mulungu wandimomwene.+ 6 Anyantsembe akhadalimira mu mbuto zawo za basa, sawasawa na Alevi akuti akhali na pyakuimba napyo pikhaphatisirwa toera kutowezera nyimbo zinaimbirwa Yahova.+ (Mambo Dhavidhi acita pyakuimba napyo pyenepi toera kupereka takhuta kuna Yahova, “thangwi ufuni wace ndi wakukhonda mala,”* pa ndzidzi wakuti Dhavidhi akhasimba napyo Mulungu.*) Anyantsembe akhaliza matuluka+ mwakugaluza kutsogolo kwa Alevi, mu ndzidzi wakuti Aizraeli onsene akhali dzololo.

7 Buluka penepo, Salomoni acenesa pakati pa kintalo yakuti ikhali kutsogolo kwa nyumba ya Yahova, thangwi ndi penepo pakhafuna iye kupereka ntsembe zakupiswa+ na mapindi akununa a ntsembe toera kupereka takhuta,* thangwi guwa ya nkuwa+ idacita Salomoni nee mbidakwana toera kuperekapo ntsembe zakupiswa, ntsembe za pyakudya+ na mapindi akununa.+ 8 Pa ndzidzi unoyu, Salomoni acita phwando mu ntsiku zinomwe+ pabodzi na Aizraeli onsene, anthu azinji kakamwe adabwera buluka ku Lebho-Amati mpaka ku Gowa ya Ejitu.+ 9 Pa ntsiku yacisere,* iwo acita nsonkhano ukulu+ pidamala iwo kucita phwando mu ntsiku zinomwe toera kutoma kuphatisira* guwa ya ntsembe, pontho pidamala iwo kucita phwando mu ntsiku zinomwe. 10 Pa ntsiku 23 ya mwezi wacinomwe, iye apanga anthu toera aende m’mamidzi mwawo, iwo aenda mwakutsandzaya m’mamidzi mwawo,+ pontho iwo akhakomerwa m’mitima mwawo thangwi ya pinthu pyonsene pyadidi pidacita Yahova kuna ntumiki wace Dhavidhi, Salomoni na mbumba yace ya Izraeli.+

11 Natenepa, Salomoni amala kumanga nyumba ya Yahova na nyumba ya mambo;+ Salomoni akwanisa kucita mwadidi+ pyonsene pikhafuna iye kucita na nyumba ya Yahova, pontho na nyumba yace. 12 Buluka penepo, Yahova aonekera kuna Salomoni+ namasiku, mbampanga: “Ine ndabva phembero yako, pontho ndasankhula mbuto ino toera ikhale mbuto yanga yakuperekerwa ntsembe.+ 13 Ndingafunga kudzulu madzi mbakhonda kubvumba, ndingatuma anyadzombe toera afudze misapo mu dziko ino, pontho ndingatumiza muliri kuna mbumba yanga, 14 mbumba yanga yakuti isadziwika+ na dzina yanga, iwo angacepeseka,+ mbacita phembero, mbandisaka, mbasiya pinthu pyakuipa pinacita iwo,+ penepo ine ndinaabvesera kubulukira kudzulu, ndinalekerera madawo awo mbandicitisa kuti dziko yako+ ikhale pontho mwadidi. 15 Cincino maso anga anakhala akufunguka, pontho makutu anga anabvesera maphembero anacitwa pa mbuto ino.+ 16 Ine ndasankhula nyumba ino mbandiicenesa toera dzina yanga ikhale pano kwenda na kwenda,+ maso anga na ntima wanga pinakhala mwenemu* ndzidzi onsene.+

17 “Iwe ungafamba munjira zanga ninga pidacita babako Dhavidhi, mbucita pyonsene pidakupanga ine, mbubvera mitemo yanga na matongero anga,+ 18 penepo ine ndinadzakhazikisa mpando waumambo wako,+ ninga mudacita ine cibverano na babako Dhavidhi,+ pidalonga ine kuti: ‘M’banja mwako nee munadzasoweka mwana anafuna kukhala pa mpando waumambo wa Izraeli.’+ 19 Mbwenye imwe mungapeuka mbamusiya kubvera matongero anga na mitemo yanga idakupasani ine, mbamuenda katumikira alungu anango, mbamuagodamira;+ 20 ine ndinadzathamangisa* Aizraeli mu dziko idaapasa ine,+ pontho nyumba idacenesa ine toera dzina yanga ikhale mwenemu ndinadzaiponya kutali na ine; anthu onsene+ a madziko anango anadzaiseka mbaipwaza. 21 Nyumba iyi inadzakhala madembe. Munthu anafuna kupita na penepo anadzumatirwa,+ mbabvundza: ‘Thangwi yanji Yahova acita pyenepi mu dziko iyi na panyumba iyi?’+ 22 Penepo iwo anadzatawira: ‘Ndi thangwi yakuti iwo asiya Yahova+ Mulungu wa ambuyawo, ule adaabulusa mu dziko ya Ejitu,+ mbaphatana na alungu anango, aagodamira mbaatumikira.+ Na thangwi ineyi, iye abweresa nyatwa zenezi zonsene kuna iwo.’”+