Kulemedza Anyakubala Athu Akugwesera

 1. Kodi ndi mangawa api ali na ife kwa anyakubala athu, na tisafunika kuaona tani na kucitanji kwa iwo?

“BVERA pinalonga babako, thangwi ndiye adakubala, mbukhonda kupwaza kukalamba kwa mai wako,” apereka uphungu unoyu mamuna wanzeru mu piaka pizinji ndulimu. (Misangani 23:​22) ‘Ine cipo, nkhabe kucita pyenepi!’ panango munakwanisa kulonga. Mbuto mwakupwaza mai wathu​—peno baba wathu​—azinji a ife asapangiza ufuni ukulu kwa iwo. Ife tisapidziwa kuti tiri na mangawa mazinji na anyakubala athu. Cakutoma mwa pyonsene, anyakubala athu atipasa umaso. Ngakhale kuti Yahova ndi Ncera wa umaso, mbadasoweka anyakubala athu ife nee mbitidakhala na umaso tayu. Nkhabepo cinthu cakuti tinakwanisa kupasa anyakubala athu ca ntengo ukulu kakamwe ninga umaso. Tomani kunyerezera kupimana, citsalakano cadidi, kobiri idabvungwa, na ufuni wandimomwene wa kuphedza kukula kwa mwana, kutomera pa uwana wace mpaka kukhala kwace nkulu. Natenepa, mphyakulinganira Mafala a Mulungu kuticenjeza tenepa: “Ulemedze babako na mako . . . towera ukhale pyadidi mbukhalambo wa moyo pyaka pizinji pantsi pano”!​—Aefesi 6:2, 3.

 2. Kodi ana athunga anakwanisa tani ‘kubwezera pire pikhatambira iwo kale’ kwa anyakubala awo?

² Mpostolo Paulu alemba kwa Akristu kuti: “Ana anache peno adzukulu ache, aalere makamaka kulemedza anthu a ku nyumba kwawo, mbabwezera akulu pire pikhadatambira iwo kale. Ipi mphyadidi pa maso pa Mulungu.” (1 Timoti 5:4) Kazinji kene ana athunga ‘asabwezera pire pikhatambira iwo kale’ mu kupangiza kupereka kwawo takhuta thangwi ya piaka pizinji pya ufuni, basa na citsalakano cidapangiza anyakubalawo na ambuya awo kwa iwo. Njira ibodzi yakuti ana anakwanisa kucita pyenepi ndi kudzindikira kuti tenepa ninga munthu onsene, anyakugwesera asafunika kufunwa na kuwangiswa​—kazinji kene mwakukhonda dikhira. Ninga ife tonsene, anyakubala asafunika kupibva kuti asalemedzwa. Iwo asafuna kupibva kuti umaso wawo ndi wakufunika.

 3. Kodi tinakwanisa tani kulemedza anyakubala na ayavu athu?

³ Natenepa, tinakwanisa kulemedza anyakubala athu na ayavu athu mu kuapangiza pakweca kuti tisaafuna. (1 Akorinto 16:​14) Khala anyakubala athu nee asakhala pabodzi na ife, tisafunika kudzindikira kuti iwo angatambira mphangwa zathu asakhala akukomerwa kakamwe. Kualembera tsamba yakukomeresa, kumenya ntokodzi, peno kuacedzera pinaacitisa kukhala akutsanzaya kakamwe. Miyo, anakhala ku Japão, pikhali iye na piaka 82 pyakubalwa alemba: “Mwananga wankazi [wakuti mamunace ndi muyang’aniri wakufamba-famba] andipanga: ‘Mama, ndaphata mwendo, “citani ulendo” pabodzi na ife.’ Iwo asanditumizira ndandanda wawo wa ulendo na numero ya ntokodzi pa sumana ibodzi na ibodzi. Ndisakwanisa kufungula mapa anga mbindilonga: ‘Ah!, iwo cincino ali apa!’ Ndisapereka takhuta kwa Yahova ndzidzi onsene thangwi ya mwai wakukhala na mwana ninga unoyu”

 4. Kodi mwambo wa mauphemberi Aciyuda ukhakulumiza tani anthu kukhala akuuma ntima kwa anyakubalawo akugwesera?

⁴ Kodi kulemedza anyakubala kusaphatanizambo kutsalakana pyakufuna pyawo pyakumanungo? Inde. Pisakhala tenepa kazinji kene. Mu ntsiku za Yezu atsogoleri a mauphemberi Aciyuda akhatsidzikiza mwambo wakuti khala munthu alonga kuti kobiri yace peno unthaka wace ndi “ntsembe ya mu templu” iye akhali wakusudzuka ku pyakutawirira pyakuphatisira pinthu pyace towera kutsalakana anyakubala ace. (Mateo 15:3-6) Kuuma tani ntima kweneku! Mwandimomwene atsogoleri anewa auphemberi nee akhakulumiza anthu towera kulemedza anyakubalawo tayu, mbuto mwace akhaapwaza mbakhonda kuapasa pyakusowa pyawo. Cipo tisafunika kucita pyenepi!​—Deuteronomyo 27:16.

 5. Mwakukhonda tsalakana ciphedzo cinaperekwa na mautongi m’madziko anango, thangwi yanji kulemedza anyakubala m’midzidzi inango kusaphataniza ciphedzo ca kobiri?

⁵ M’madziko mazinji lero, maprogramu anatsidzikiza mautongi asapereka ciphedzo ca pinthu pyakumanungo kwa anyakugwesera, ninga cakudya, nguwo, na nyumba. Kusiyapo pyenepi, anyakugwesera panango asakhala na mpfuma zidakoya iwo towera kutsidzikizika mu unkhalamba wawo. Mbwenye, khala mpfuma ineyi yamala peno ndi yakucepa, ana anakwanisa kulemedza anyakubalawo mu kucita pinakwanisa iwo towera kukwanirisa pyakufuna pyawo. Mwandimomwene, kutsalakana anyakubala akukalamba ndi cipangizo ca kulemedza Mulungu, kwakuti ndi kuperekeka kwa munthu kwa Yahova Mulungu, Ntomesi wa masasanyiro a banja.

 6. Kodi anango asacita masasanyiro api towera kutsalakana pyakufuna pya anyakubalawo?

⁶ Ana athunga azinji asatsalakana pyakufuna pya anyakubalawo akukalamba mwakufuna na mwakupimana. Anango asakwata anyakubalawo towera kukhala nawo pabodzi ku nyumba zawo peno kufuluka towera kakhala cifupi na iwo. Anango afuluka mbaenda kakhala na anyakubalawo. Kazinji kene, masasanyiro anewa asabweresa nkhombo kwa anyakubala na kwa ana.

 7. Thangwi yanji si pyadidi tanyu kucimbiza kucita pisankhulo pya anyakubala akugwesera?

⁷ Ngakhale tenepa, m’midzidzi inango, kufuluka kweneku nee kusakhala kwadidi tayu. Thangwi yanji? Panango ndi thangwi yakuti pisankhulo pyawo apicita mwakucimbiza peno mwantsisi. “Nyanzeru asalengesa mathanyo ache,” Biblya isacenjeza mwaluso. (Misangani 14:15) Mwacitsanzo, panango mai wanu ndi wakugwesera na asanenseka kukhala ekhene na musanyerezera kuti mbipidakhala pyadidi kwa mai wanu kufuluka towera kukhala pabodzi na iwe. Ninga nyanzeru analengesa mathanyo ace, imwe mbamudadinga ntsonga izi zakutowerera: Kodi pyakufunika makamaka kwa iye ndi pipi? Kodi pana masasanyiro a mautongi anapereka ciphedzo capakhundu peno capakweca? Kodi iye asafuna kufuluka? Khala iye asafuna, kodi pyenepi pinadzakhuya tani umaso wace? Kodi iye anadzasiya axamwali? Kodi pyenepi pinakhuya tani manyerezero ace? Kodi mwalonga naye kale thangwi ya pinthu pyenepi? Kodi kufuluka kweneku kunakwanisa tani kukhuya imwe, nzanu wa m’banja, na ananu? Khala mai wanu asafunika citsalakano, mbani anafuna kudzacipereka? Kodi munakwanisa kugawana pyakutawirira pyenepi? Kodi mwalonga nkhani ineyi na onsene ale anafuna kudzacita khundu?

 8. Kodi mbani anafuna imwe kubvunzisa pa kucita pisankhulo pya kuphedza anyakubala anu akugwesera?

⁸ Nakuti pyakutawirira pya kutsalakana anyakubala pisaphataniza ana onsene a pa banja, kunakhala kwanzeru kugumanyikana pabodzi towera onsene acite pisankhulo pyawo. Longani na akulu a mpingo Wacikristu peno axamwali akuti athimbana kale na makhaliro mabodzi ene panango anakwanisa kukuphedzani. Biblya isacenjeza kuti: “Munthu angachita pinthu pyache nee kubvundzisa, anabwerera nduli, mbwenye angakhala na anyakumulanga azinji anaenda kutsogolo.”​—Misangani 15:22.

9, 10. (a) Mwakukhonda tsalakana unkhalamba wawo, kodi ndi citsalakano cipi cinafunika kupaswa anthu akukalamba? (b) Ngakhale mwana wathunga anakwanisa kucitira anyakubalace pinthu pyonsene, kodi iye asafunika kuapasanji m’midzidzi yonsene?

⁹ Kulemedza anyakubala athu akugwesera kusafunika ntsisi na kubvesera mwadidi. M’midzidzi yakuti anyakugwesera afika mu piaka pya unkhalambadi, panango anakwanisa kukhala akunenseka towera kufamba, kudya na kukumbukira pinthu. Panango asafunika ciphedzo. Kazinji kene ana asaatsidzikiza na asayesera kupereka ciphedzo. Mbwenye anyakugwesera ndi akulu na ali na nzeru na umaso wakudzala na pyakugumana napyo, umaso udakhala iwo mbatsalakanika okhene pabodzi na kucita pisankhulo pyawo pyene. Umunthu wawo na kulemedzwa kwawo kukhali kwakucita basa ninga anyakubala. Anyakubala angaona kuti pyakutawirira pyawo pya kutsalakana umaso wawo pikukwatiwa na anawo, panango anakwanisa kunenseka manyerezero peno kuipirwa. Anango asaipirwa na asakhonda pinthu pinaona iwo kuti pinakwanisa kuabera ufulu wawo.

¹⁰ Nkhabepo njira yakukhonda nensa towera kumalisa nyatwa zenezi, mbwenye ndi pyakukoma ntima kusiya kuti anyakubala akugwesera atsalakanike okhene na acite pisankhulo pyawo pyene angakwanisa. Si kwanzeru tayu kutonga pinafunika kwa anyakubala mbamudzati kulonga nawo. Panango iwo aluza pinthu pizinji. Atawiriseni kuti akoye pinthu pina iwo cincino. Imwe munadzadzindikira kuti na kukhonda kwanu kuonera mwadidi umaso wa anyakubala anu, munadzabverana nawo mwadidi kakamwe. Iwo anadzakhala akutsanzaya na imwe munadzakhalambo akutsanzaya. Ngakhale kuti musafuna kuakakamiza ku pinthu pinango pyakuti ndi pyadidi kwa iwo, kulemedza anyakubala kusafunika kudziwa ukulu wawo na cilemedzo cakuthema. Mafala a Mulungu asacenjeza: “Lamuka pa maso pa ankhalamba mbualemedza.”​—Levitiko 19:32.

11-13. Ngakhale kuti mwana wathunga akhonde kukhala na uxamwali wadidi na anyakubala ace m’midzidzi ya n’nduli, kodi iye anakwanisa tani kupitiriza kuthimbana na nyatwa ya kutsalakana anyakubala ace akugwesera?

¹¹ M’midzidzi inango nyatwa inathimbana na ana athunga pa kulemedza anyakubalawo akukalamba isaphataniza uxamwali wawo wa mu ndzidzi ukhali iwo ana. Panango baba wanu akhali wakumatama na wakusowa ufuni, mai wanu wakutonga na wahaxa. Panango musapibva kukhala wakutsukwala, wakuipirwa, peno wakubva kupha mu ntima thangwi yakuti si ntundu wa anyakubala akhafuna imwe tayu. Kodi munakwanisa kukunda mabvero anewa?a

¹² Basse, adakulira ku Finlândia, asalonga: “Babanga wakundifuya akhali tsacikunda wa SS ku Alemanha nazista. Iye akhaipirwa mwakukhonda nensa, na akhali wakugopswa. Iye akhamenya mai wanga kazinji kene pamaso panga. Ntsiku inango pikhali iye wakuipirwa na ine, abulusa sintu yace mbadimenya nayo kunkhope. Andimenya pikulu kakamwe mpaka ine kugwa pa talimba.”

¹³ Mbwenye, pakhali pyakucitika pinango. Basse akuthimizira: “Ku khundu inango, iye akhaphata basa yakuwanga na nee akhasiya kutsalakana pyakufuna pya banja tayu. Iye cipo andipangiza kufuna kwace ninga baba, mbwenye ndikhadziwa kuti iye akhali na manyerezero ausumankha. Mai wace akhadanthamangisa panyumba pikhali iye mwana. Kukula kwace kukhali kwakumenyana na anthu na apita mu basa ya unkhondo mbaciri mwana. Ine ndikhadziwa pyenepi, na nee ndikhansandika tayu. Mudakula ine, ndacita pyonsene towera kumphedza mpaka kufa kwace. Pikhali pyakunensa kakamwe, mbwenye ndacita pidakwanisa ine. Ndayesera kukhala mwana wadidi mpaka kunkhomo, na ndisakhulupira kuti iye anditawira ninga mwana wadidi.”

14. Kodi ndi lemba ipi inaphatisirwa m’makhaliro onsene, kuphataniza kwa ale anatsalakana anyakubala akugwesera?

¹⁴ M’makhaliro a pa banja, na m’pinthu pinango, uphungu wa Biblya usaphata basa: “Mukhale na ntima wa ntsisi, na wa udidi, na wakukhurudzika, na wakubverana, na wakupirirambo. Pa kukhala na nthonga piriranani, lekereranimbo. Lekeranani sawasawa ninga mudakulekererani Mbuya.”​—Akolose 3:12, 13.

15. Thangwi yanji kutsalakana anyakubala m’midzidzi inango ndi pyakutsukwalisa?

¹⁵ Kutsalakana anyakubala akuduwala ndi basa ikulu kakamwe, inaphataniza mabasa mazinji, pyakutawirira pizinji na ndzidzi uzinji. Mbwenye kazinji kene khundu yakunensa kakamwe ndi ya manyerezero. Mphyakutsukwalisa kuona anyakubala anu kuluza ungumi wawo, kuluza kukumbuka kwawo na kucimwana kunyindirika okhene. Sandy, wa ku Porto Rico, akulonga: “Mai wanga akhali phata ya banja yathu. Pikhali pyakunensa kakamwe kumuona mbaduwala na kuntsalakana. Cakutoma iye akhatcikhama, buluka penepo akhafunika ndodo, pidamala pyenepi akhafunika pyakuphedzera kufamba, pakumalisira adzafunikira njinga ya anyakulamala. Buluka penepo iye akhapitiriza na kunenseka mpaka kufa kwace. Iye akhakhala na utenda wa câncer m’magogodo na akhafunika citsalakano m’midzidzi yonsene, masiku na masikati. Ife tikhansambisa, kundyesa na tikhaleri kwa iye. Pikhali pinthu pyakunensa kakamwe​—makamaka m’manyerezero. Pidaona ine kuti mama ali kufa, ndalira maningi thangwi ndikhanfuna kakamwe.”

16, 17. Kodi ndi uphungu upi unafuna kuphedza munthu anatsalakana anyakubala akukalamba towera kukhala na maonero akulinganira?

¹⁶ Khala musagumanika m’makhaliro mabodzi ene, kodi munacitanji towera kuthimbana na makhaliro anewa? Kubvera Yahova kubulukira mu kuleri Biblya na kulonga na Iye m’phembero kunadzakuphedzani kakamwe. (Afilipi 4:6, 7) Mu njira yakuphedza, yeserani kudya pyakudya pyakupasa ungumi wadidi na yeserani kugona ndzidzi wakukwana. Mu kucita pyenepi, munadzakhala na ungumi wadidi, wakumanungo na m’manyerezero, towera kutsalakana munthu anafuna imwe kakamwe. Panango munakwanisa kucita masasanyiro a kupuma pa mabasa a ntsiku na ntsiku. Ngakhale kuti ndi pyakunensa kubulusa ferya, ndi kwanzeru kukhala na ndzidzi wakucepa towera kupuma. Towera kukhala na ndzidzi wakupuma, panango munakwanisa kucita masasanyiro kuti munthu unango atsalakane nyakubala wanu wakuduwala mu ndzidzi wakucepa.

¹⁷ Si pyacilendo tayu kwa anthu akulu anatsalakana anyakubala akukalamba kuona kuti pinacita iwo nkhabe kwana. Mbwenye lekani kupasika mulando na pire pinacimwana imwe kucita. M’makhaliro anango munakwanisa kupereka nyakufunika wanu ku nyumba inatsalakanwa ankhalamba. Khala imwe musatsalakana anyakubala, khazikisani pidikhiro pyakulinganira kwa imwe ene. Musafunika kunyerezera mwadidi pyakufunika, tayu pya anyakubalanu basi mbwenye pya ananu, pya nzanu wa m’banja na pyanu pyene.

18, 19. Kodi ndi pikiro ipi yaciphedzo idacita Yahova, na ndi cakucitika cipi cinapangiza kuti Yahova asakwanirisa pikiro yace?

¹⁸ Kubulukira ku Mafala ace, Biblya, Yahova mwakufuna asapereka citsogolero cakuti cinakwanisa kuphedza kakamwe munthu anatsalakana anyakubala akukalamba, mbwenye ciphedzo cinapereka iye si ceneci basi tayu. Mu kupumirwa nyamasalmo alemba: “Mbuya ali duzi na onsene ananchemera, mbaphemba uphedzi wache na ntima wa maso. Ale anangopa anaapasa pinafuna iwo; anaabvera mikhuwo yawo mbaapulumusa.” Yahova anadzapulumusa peno anadzakoya, ale anakhala akukhulupirika ngakhale m’makhaliro akunensa kakamwe.​—Masalmo 145:18, 19.

¹⁹ Myrna, ku Filipina, adziwa pyenepi mukhatsalakana iye mai wace, wakuti akhadamala nzeru na utenda wa nfutete. Myrna alemba: “Nkhabepo nee cinthu cibodzi cinatsukwalisa kakamwe kupiringana kuona munthu anafuna imwe kuthabuka, mbacimwana kukupangani kuti ndi papi panapha. Pikhali ninga kumuona mbalirima pang’ono na pang’ono, mbindikhonda kucita cinthu nee cibodzi. M’midzidzi izinji ine ndikhagodama na ndikhalonga na Yahova thangwi ya kuneta kwanga. Ndikhalira kakamwe ninga Davide, ule adaphemba Yahova kuti akoye misozi yace yonsene m’budu ya nthembe na kuikumbuka. [Masalmo 56:8] Ninga mudapikira Yahova, iye andipasa mphambvu ikhafuna ine. ‘Mbuya abwera dzandibvunulira.’”​—Masalmo 18:18.

20. Kodi ndi mapikiro api a m’Biblya anaphedza anyakutsalakana anyakubala akukalamba towera kukhala na cidikhiro cadidi, ngakhale kuti anatsalakana iwo afe?

²⁰ Anango asalonga kuti kutsalakana anyakubala akukalamba ndi “cithankano cakukhonda malisira mwadidi.” Mwakukhonda tsalakana kuwangisira mu kuatsalakana mwadidi, anyakukalamba asafika pa kufa, ninga pidacitikira mama wa Myrna. Mbwenye ule ananyindira Yahova asadziwa kuti kufa si kumala kwa umaso tayu. Mpostolo Paulu alonga: “Ndinakhulupirambo Mulungu . . . kuti kunadzaoneka kulamuka muli akufa kwa anthu adidi na kwa akuipambo.” (Machitiro 24:​15) Ale adaluza anyakubalawo akugwesera asakhala na cithondoso ca kulamuka muli akufa na pikiro ya kukhala akutsanzaya mu dziko ipswa ya Mulungu, yakuti “kufa hakunadzakhala’po pontho tayu.”​—Apokalipse 21:4.

21. Kodi ndi nkhombo zipi zinagumanika pa kulemedza anyakubala akugwesera?

²¹ Atumiki a Mulungu asalemedza kakamwe anyakubalawo, ngakhale kuti iwo ndi akukalamba. (Misangani 23:22-24) Iwo asaalemedza. Mu kucita pyenepi, asadziwisa pakweca nsangani wakupumirwa wakuti: “Mbasekere babako na mako, mbatsandzaye ale adakubala.” (Misangani 23:25) Kusiyapo pyonsene, ule analemedza anyakubala ace akugwesera asakomeresa na asalemedzambo Yahova Mulungu.