Ulambiri Wakutawirika Kwa Mulungu

 1. Tinadzaphindulanji tingalambira Mulungu munjira yadidi?

YAHOVA MULUNGU asatitsalakana kakamwe, pontho asafuna kuti tiphindule na citsogolero cace caufuni. Tingamulambira munjira yadidi, tinadzatsandzaya, pontho tinadzacalira nyatwa zizinji mu umaso. Anadzatipasambo nkhombo na kutiphedza. (Izaiya 48:17) Pana madzana a mauphemberi analonga kuti asapfundzisa undimomwene unalonga pya Mulungu. Ngakhale tenepo, iwo asasiyana kakamwe mu pipfundziso pyawo pyakuti Mulungu mbani na asadikhiranji kwa ife.

 2. Tinadziwa tani njira yadidi yakulambira Yahova? Ndi citsandzo cipi cinatiphedza kubvesesa pyenepi?

² Munadziwa tani njira yadidi yakulambira Yahova? Imwe nkhabe funika kupfundza na kulandanisa pipfundziso pya mauphemberi onsene. Basi ene musafunika kupfundza pinapfundzisadi Bhibhlya thangwi ya ulambiri wandimomwene. Mwacitsandzo: M’madziko mazinji muna nyatwa thangwi ya kobiri yapezi. Khala mwapaswa basa yakudzindikira kobiri ineyi yapezi, kodi mbamudacita tani? Mbamudasaka kudziwa mitundu yonsene ya kobiri yapezi? Nkhabe. Imwe mbamudaphatisira ndzidzi wanu toera kudziwa mwadidi kobiri yandimomwene. Mungamala kudziwa kuti kobiri yandimomwene yakhala tani, munakwanisa kudzindikira kobiri yapezi. Munjira ibodzi ene, tingadziwa mwadidi uphemberi wandimomwene, tinakwanisa kudzindikira mauphemberi aunthawatawa.

 3. Mwakubverana na pidalonga Yezu, kodi tisafunika kucitanji toera Mulungu akomerwe na ife?

³ Mphyakufunika kuti tilambire Yahova munjira inatawirika kwa iye. Anthu azinji asakhulupira kuti mauphemberi onsene asakomeresa Mulungu, mbwenye Bhibhlya nee isapfundzisa pyenepi. Pidakwana tayu munthu kulonga basi kuti ndi Nkristu. Yezu alonga: ‘Si onsene anandicemera Mbuya, Mbuya, anadzapita mu Umambo wakudzulu, mbwenye ale anacita pinafuna Babanga wakudzulu.’ Natenepa, toera kutawirika kwa Mulungu, tisafunika kupfundza pinafuna Mulungu kwa ife na kupicita. Yezu acemera ale anakhonda cita cifuno ca Mulungu ninga anyakucita ‘mabasa akuipa.’ (Mateo 7:21-23) Ninga kobiri yapezi, uphemberi waunthawatawa nkhabe phedza. Kusiyapo pyenepi, uphemberi unoyu ndi wakuphekesa.

 4. Mafala a Yezu thangwi ya njira ziwiri asafuna longanji, na njira zenezi zisatsogolera kupi?

⁴ Yahova asapasa anthu onsene pa dziko yapantsi mwai wakukhala na umaso wakukhonda mala. Toera kukhala maso kwenda na kwenda mu Paradizu, tisafunika kulambira Mulungu mwakutawirika na kukhala maso cincino munjira inatawirika kwa iye. Mwakutsukwalisa, azinji asakhonda kucita pyenepi. Na thangwi ineyi Yezu alonga: ‘Pitani na pa nsuwo ung’onong’ono thangwi nsuwo ukulu na nseu ukulu unaendesa kunatayika anthu. Alipo anthu azinji anapitamo. Ande nsuwo wadidi ngung’ono, na njira ya kuenda ku umaso njing’onombo, mbwenye ndi anthu pang’ono basi anaigumana.’ (Mateo 7:13, 14) Uphemberi wandimomwene usatsogolera anthu ku umaso wa kwenda na kwenda. Uphemberi waunthawatawa usatsogolera anthu toera kufudzwa. Yahova nkhabe funa kuti munthu afudzwe, na thangwi ineyi iye asapasa anthu onsene mwai wakupfundza pya iye. (2 Pedro 3:9) Mwandimomwene, njira inalambira ife Mulungu inakwanisa kutipasa umaso peno kufa.

 5. Tinadzindikira tani ale ali mu uphemberi wandimomwene?

⁵ Tinagumana tani ‘njira ya ku umaso’? Yezu alonga kuti uphemberi wandimomwene unadzadzindikirwa na makhaliro a anthu anaphembera mwenemo. Iye alonga: ‘Munaadzindikira thangwi ya misapo yawo. Miti yadidi yonsene inabala misapo yadidi.’ (Mateo 7:16, 17) M’mafala anango, ale ali mu uphemberi wandimomwene anadzadzindikirwa na cikhulupiro cawo na makhaliro awo. Maseze iwo nee ndi aungwiro na asadodoma, ninga nsoka, alambiri andimomwene asasaka kucita cifuno ca Mulungu. Tendeni tione njira zitanthatu zinadzindikirisa ale ali mu uphemberi wandimomwene.

6, 7. Kodi alambiri a Mulungu asaona tani Bhibhlya, na Yezu apereka citsandzo cipi thangwi ya pyenepi?

⁶ Alambiri a Mulungu asabulusa pipfundziso pyawo m’Bhibhlya. Bhibhlya isalonga: ‘Malemba onsene ndiye Mulungu adaalembesa toera aphedze anthu pakupfundzisa, pakusumula, pakusandika na pakudziwisa pyakulungama pyonsene. Tenepa munthu wa Mulungu anakhala wakukwana na wakukhunganyika, mbakwanisa kucita pinthu pyadidi pyonsene.’ (2 Timoti 3:16, 17) Mpostolo Paulu alembera Akristu andzace: “Mwatambira mafala a mphangwa zadidi za Mulungu, zidafokotoza ife; hamudaatambira tayu ninga mafala a anthu mbwenye ninga mafala a Mulungu, ande ndiwo mafala a Mulungu.” (1 Atesalonika 2:13) Natenepa, pikhulupiro na pyakucita pya uphemberi wandimomwene nkhabe buluswa m’maonero peno m’miyambo ya anthu. Ipyo pisabuluswa m’Mafala akupumirwa a Mulungu, Bhibhlya.

⁷ Yezu Kristu apereka citsandzo cadidi mukubulusa pipfundziso pyace m’Mafala a Mulungu. Mu phembero kwa Babace wakudzulu, iye alonga: ‘Mphangwa zanu ndi undimomwene.’ (Jwau 17:17) Yezu akhakhulupira Mafala a Mulungu, na pyonsene pidapfundzisa iye pikhabverana na Malemba. Kazinji kene Yezu alonga: “Pyalembwa.” (Mateo 4:4, 7, 10) Buluka penepo, Yezu akhalonga mafala anagumanika mu lemba. Munjira ibodzi ene, mbumba ya Mulungu lero nkhabe pfundzisa manyerezero awo ene. Iwo asakhulupira kuti Bhibhlya ndi Mafala a Mulungu, na asabulusa pipfundziso pyawo basi ene m’Bhibhlya.

 8. Kodi kulambira Yahova kusaphatanizanji?

⁸ Ale ali mu uphemberi wandimomwene asalambira Yahova basi na asadziwisa dzinace. Yezu alonga: ‘Yahova Mulungu wako, unadzankotamira mbulambira iye basi.’ (Mateo 4:10) Natenepa, alambiri andimomwene a Mulungu nkhabe lambira unango kusiyapo Yahova. Kulambira kweneku kusaphataniza kudziwisa anthu dzina ya Mulungu wandimomwene na makhaliro ace. Masalmo 83:18, NM isalonga: “Imwe, wakuti dzina yanu ndi Yahova, imwe mwekha ndimwe Wankulu Kakamwe kupiringana pyonsene pa dziko yapantsi.” Yezu apereka citsandzo mukuphedza anango kudziwa Mulungu, ninga mudalongera iye mu phembero: ‘Ine ndaadziwisa dzina yanu anthu a pantsi pano, adandipasa imwe.’ (Jwau 17:6) Munjira ibodzi ene, alambiri andimomwene lero asapfundzisa anango pya dzina ya Mulungu, cifuniro cace, na makhaliro ace.

9, 10. Ndi munjira zipi Akristu andimomwene asapangiza kufunana unango na ndzace?

⁹ Mbumba ya Mulungu isapangiza ufuni wandimomwene kwa unango na ndzace. Yezu alonga: “Na kufunana kwanu anthu onsene anadzadzindikira kuti ndimwe anyakupfundza anga.” (Jwau 13:35) Akristu akutoma akhali na kufunana kweneku unango na ndzace. Ufuni unatipfundzisa Mulungu usamalisa kusankhulana kwa mitundu, madzindza na makhaliro a anthu, pontho kusaagumanyiza pabodzi mu ubale wandimomwene wakukhonda fudzika. (Lerini Akolose 3:14.) Anthu a uphemberi waunthawatawa nkhabe kufunana kweneku kwa ubale. Tisadziwa tani pyenepi? Iwo asaphana unango na ndzace thangwi ya kusiyana kwa madziko na kwa madzindza. Akristu andimomwene nkhabe kwata mpfuti toera kupha abale awo Acikristu peno anango. Bhibhlya isalonga: ‘Ana a Mulungu na ana a Dyabo anadziwika tenepa: uyu anakhonda kucita pya ulungami, si wa Mulungu tayu; siyembo tayu, uyu anakhonda kufuna mbale wace. Tifunane. Tikhonde kucita ninga Kayini, adakhala wa nyakuipa, mbapha m’bale wace.’​—1 Jwau 3:10-12; 4:20, 21.

¹⁰ Inde, ufuni wandimomwene usabveka pizinji kupiringana kukhonda kupha anango. Na ntima onsene, Akristu andimomwene asaphatisira ndzidzi wawo, mphambvu na mpfuma yawo toera kuphedzana na kuwangisana unango na ndzace. (Ahebere 10:24, 25) Iwo asaphedzana unango na ndzace m’midzidzi yakunentsa na asatsalakana anango mwakukhulupirika. Mu umaso wawo asaphatisira uphungu wa Bhibhlya toera ‘kucita pinthu pyadidi kuli anthu onsene.’​—Agalata 6:10.

11. Thangwi yanji mphyakufunika kutawira Yezu Kristu ninga njira inaphatisira Mulungu toera kutipulumusa?

¹¹ Akristu andimomwene asatawira Yezu Kristu ninga njira inaphatisira Mulungu toera kutipulumusa. Bhibhlya isalonga: ‘Kupulumuswa na munthu unango kunacimwanika. Nkhabepo pantsi pa thambo dzina inango idapaswa anthu, toera akwanise nayo kupulumuka.’ (Machitiro 4:12) Ninga taona mu Nsolo 5, Yezu apereka umaso wace ninga ciomboli kwa anthu akubvera. (Mateo 20:28) Pontho, Yezu ndi Mambo adaikhwa na Mulungu mu Umambo wakudzulu kuti adzatonge dziko yonsene yapantsi. Mulungu asafuna kuti ife tibvere Yezu na kuphatisira pipfundziso pyace khala tisafuna umaso wakukhonda mala. Na thangwi ineyi Bhibhlya isalonga: ‘Uyu anakhulupira Mwana, ana umaso wakukhaliratu, mbwenye uyu anakhonda kunkhulupirira hanadzaona umaso tayu.’​—Jwau 3:36.

12. Kodi kukhonda cita khundu ya dziko kusaphatanizanji?

¹² Alambiri andimomwene nkhabe cita khundu ya dziko. Mukhatongwa iye pamaso pa Pilato, ntongi Waciroma, Yezu alonga: ‘Umambo wanga si wa pantsi pano tayu.’ (Jwau 18:36) Mwakukhonda tsalakana dziko inakhala iwo, atowereri andimomwene a Yezu asatongwa na Umambo wace wakudzulu, natenepa asapitiriza na unakatinakati mu nkhani ya ndale za dziko. Iwo nkhabe cita khundu mukumenyana kwawo. Alambiri a Yahova nee asacita khundu mu pisankhulo pya anango ninga kucita nkhundu ya nsoka wa ndale, kufuna kusankhulwa peno kuenda kavotari. Maseze alambiri andimomwene a Mulungu nkhabe cita khundu mu pinthu pya ndale, iwo asabvera mitemo ya dziko. Thangwi yanji? Thangwi Mafala a Mulungu asaatonga “kubvera” utongi wa “akulu a dziko.” (Aroma 13:1, MZ) Anthu andale angaphemba pinthu pyakukhonda bverana na pinafuna Mulungu, alambiri andimomwene asatowezera citsandzo ca apostolo adalonga tenepa: ‘Ife tisafunika kubvera Mulungu ninga ntongi, kupiringana anthu.’​—Machitiro 5:29; Marko 12:17.

13. Kodi atowereri andimomwene a Yezu asaona tani Umambo wa Mulungu, na asacitanji?

¹³ Atowereri andimomwene a Yezu asamwaza mphangwa zakuti Umambo wa Mulungu ndi utongi ubodzi basi unadikhira anthu kuti unadzacinja pinthu. Yezu alongeratu: ‘Penepo mphangwa zadidi za Umambo zinamwazwa pantsi ponsene, toera mukhale amboni anga pakati pa anthu a mitundu yonsene. Pingamala ipi, unadzabwera ndzidzi wa kumalisiratu pyonsene.’ (Mateo 24:14) M’mbuto mwakuwangisa anthu kunyindira kuti mautongi a anthu anadzamalisa nyatwa zawo, atowereri andimomwene a Yezu Kristu asamwaza mphangwa zakuti Umambo wakudzulu wa Mulungu ndi utongi unafuna kudzamalisa nyatwa za anthu. (Masalmo 146:3) Yezu atipfundzisa kuphemberera utongi unoyu wakulungama mudalonga iye kuti: ‘Umambo wanu mbudze kuna ife. Pinafuna imwe mbapicitwe pantsi pano ninga kudzulu.’ (Mateo 6:10) Mafala a Mulungu alongeratu kuti Umambo unoyu wakudzulu ‘unadzakunda mbupasa manyadzo mautongi anango, iwo mbukhala pyawo mwa kuwanga mwene.’​—Danyele 2:44; Apokalipse 16:14; 19:19-21.

14. Ndi nsoka upi wauphemberi unaona imwe kuti usakwanirisa pyonsene pinafunika ku ulambiri wandimomwene?

¹⁴ Mwakubverana na pidamala ife kudinga, bvundzikani: ‘Ndi nsoka upi wauphemberi unabulusa pipfundziso pyawo pyonsene m’Bhibhlya na kudziwisa dzina ya Yahova? Ndi nsoka upi unapangiza ufuni unatipfundzisa Mulungu, unakhulupira Yezu, unakhonda cita khundu ya dziko na unamwaza mphangwa zakuti Umambo wa Mulungu ndi cidikhiro cibodzi basi candimomwene kwa anthu? Nkati mwa mauphemberi onsene pa dziko yapantsi, kodi ndi nsoka upi unakwanirisa pinthu pyenepi pyonsene?’ Pisapangiza pakweca kuti ndi Mboni za Yahova.​—Lerini Izaiya 43:10-12.

15. Kusiyapo kukhulupira basi kuti Mulungu alipo, kodi iye asaphembanji pontho?

¹⁵ Kukhulupira Mulungu basi nkhabe kwana toera kunkomeresa. Bhibhlya isalonga kuti ngakhale mademonyo ene asakhulupira kuti Mulungu alipo. (Tyago 2:19) Mbwenye iwo nkhabe cita cifuno ca Mulungu na nkhabe tawirika kwa iye. Toera kukhala akutawirika kwa Mulungu, nee tisafunika kukhulupira basi kuti iye alipo, mbwenye tisafunikambo kucita cifuno cace. Tisafunika pontho kusiya uphemberi waunthawatawa na kuphatisisa ulambiri wandimomwene.

16. Khala munthu ali wakuphatana na uphemberi waunthawatawa, asafunika kucitanji?

¹⁶ Mpostolo Paulu apangiza kuti nee tisafunika kucita khundu ya ulambiri waunthawatawa. Iye alemba: ‘Bulukani pa nsoka wa anthu akukhonda kukhulupira, mbamupambulika. Lekani kukhuya pinthu pyakunyanyasa. Tenepa ndinadzakutambirani.’ (2 Akorinto 6:17; Izaiya 52:11) Natenepa Akristu andimomwene asacalira pinthu pyonsene pyakuphatana na ulambiri waunthawatawa.

17, 18. ‘Babilonya Wankulu’ ndi ninji, na thangwi yanji anthu asafunika ‘kufuluka’ mwenemo mwakucimbiza?

¹⁷ Bhibhlya isapangiza kuti mitundu yonsene ya uphemberi waunthawatawa isacita khundu ya ‘Babilonya Wankulu.’a (Apokalipse 17:5) Dzina ineyi isatikumbusa nzinda wakale wa Babilonya, mudatoma uphemberi waunthawatawa mudamala Cigumula ca ntsiku za Nowa. Pipfundziso pizinji na pinacitwa cincino mu uphemberi waunthawatawa pyatoma kale kakamwe ku Babilonya. Mwacitsandzo, Ababilonya akhalambira alungu atatu peno utatu. Lero, cipfundziso cikulu ca mauphemberi mazinji ndi Utatu. Mbwenye Bhibhlya isapfundzisa pakweca kuti pana Mulungu m’bodzi basi wandimomwene, Yahova, pontho Yezu Kristu ndi Mwanace. (Jwau 17:3) Ababilonya akhakhulupirambo kuti anthu ali na moyo wakukhonda kufa wakuti usapulumuka pakufa kwa manungo, pontho kuti unakwanisa kunentseka m’mbuto yakuthabuka. Lero, cipfundziso cakuti munthu ana moyo peno nzimu wakukhonda kufa wakuti usathabuswa n’djenje ya moto cisapfundziswa na mauphemberi mazinji.

¹⁸ Nakuti ulambiri wa Babilonya wakale wamwazika pa dziko yonsene yapantsi, Babilonya Wankulu wacincino athema kudzindikirwa ninga umambo wa dziko yonsene wauphemberi waunthawatawa. Pontho, Mulungu alongeratu kuti umambo unoyu wauphemberi waunthawatawa unadzamala mwakututumusa. Kodi musaona thangwi yanji mphyakufunika kwa imwe kukhonda kucita khundu ku pinthu pyonsene pya Babilonya Wankulu? Yahova Mulungu asafuna kuti imwe ‘mufuluke’ mwakucimbiza ndzidzi mbuciripo.​—Lerini Apokalipse 18:4, 8.

19. Kodi munadzawinanji mungatumikira Yahova?

¹⁹ Nakuti mwatonga kusiya kucita khundu yauphemberi waunthawatawa, anango anasiya kucedza na imwe. Mbwenye mungatumikira Yahova pabodzi na mbumba yace, munadzawina pizinji kupiringana pidaluza imwe. Ninga anyakupfundza akutoma a Yezu adasiya pinthu pinango mbantowera, imwe munadzakhala na abale na alongo azinji auzimu. Munadzacita khundu ya banja ikulu ya dziko yonsene ya pikwi pya pikwi pya Akristu andimomwene akuti anapangiza ufuni wandimomwene kwa imwe. Pontho, munadzakhala na cidikhiro cakutsandzayisa ca umaso wakukhonda mala ‘pa ndzidzi unafuna kudza.’ (Lerini Marko 10:28-30.) Mukupita kwa ndzidzi, panango ale adasiya kucedza na imwe thangwi ya cikhulupiro canu anadzapfundza Bhibhlya mbadzakhalambo alambiri a Yahova.

20. Kodi ale ali mu uphemberi wandimomwene asadikhiranji ntsogolo?

²⁰ Bhibhlya isapfundzisa kuti mwakukhonda dembuka Mulungu anadzamalisa makhaliro ano akuipa a pinthu mbadzapitirwa mbuto na dziko ipswa yakulungama pantsi pa utongi wa Umambo wace. (2 Pedro 3:9, 13) Dziko ineyi inadzakhala yakutsandzayisa kakamwe! Mu dziko ineyi yakulungama, munadzakhala uphemberi ubodzi basi, ulambiri ubodzi wandimomwene. Kodi si pyandzeru tayu kucita pinaphembwa toera mugumanyikane na alambiri andimomwene kutomera cincino?