Ubatizo Na Uxamwali Wanu Na Mulungu

 1. Thangwi yanji mamuna wa utongi wa ku Etiopya aphemba kubatizwa?

‘ONANI madzi! Ninji cinandipingiza toera ndibatizwe?’ Mbvundzo unoyu wacitwa na mamuna wa utongi wa ku Etiopya mu pyaka dzana yakutoma. Nkristu wakucemerwa Filipi ampangiza kuti Yezu akhali Mesiya wakupikirwa. Nakuti ntimace wakhuiwa kakamwe na pidapfundza iye kubulukira m’Malemba, mamuna wa ku Etiopya acita pinthu mwakubverana na pidapfundza iye. Iye apangiza kuti akhafuna kubatizwa!​—Machitiro 8:26-36.

 2. Thangwi yanji musafunika kunyerezera mwadidi pya ubatizo?

² Khala mwapfundza mwacidikhodikho misolo yakutoma ya bukhu ino na m’bodzi wa Mboni za Yahova, panango musapibva wakukhunganyika toera kubvundza: ‘Ninji cinandipingiza toera ndibatizwe?’ Mpaka pano mwapfundza pya pikiro ya Bhibhlya ya umaso wakukhonda mala mu Paradizu. (Luka 23:43; Apokalipse 21:3, 4) Mwapfundzambo undimomwene wa makhaliro a anyakufa na cidikhiro ca kulamuka muli akufa. (Koelete 9:5; Jwau 5:28, 29) Panango mwatoma kugumanyikana na Mboni za Yahova m’misonkhano yawo ya mpingo, pontho mwaona mwekha kuti asalambira tani mwaundimomwene. (Jwau 13:35) Cinthu cinango cakufunika kakamwe cakuti panango mwatoma kucicita ndi kukulisa uxamwali na Yahova Mulungu.

 3. (a) Kodi ndi matongero api adapasa Yezu atowereri ace? (b) Kodi ubatizo wa m’madzi usacitwa tani?

³ Munapangiza tani kuti musafuna kutumikira Mulungu? Yezu apanga atowereri ace: ‘Ndokoni kapfundzisa anthu a mitundu yonsene, abatizarini.’ (Mateo 28:18) Yezu apereka citsandzo mudabatizwa iye m’madzi. Iye hadakapirwa madzi tayu, pontho hadaikhwa madzi pang’ono basi mu nsolo mwace tayu. (Mateo 3:16) Fala yakuti “kubatiza” yabuluka ku fala Yacigerego inabveka “kubiza m’madzi.” Natenepa ubatizo Wacikristu usabveka kubiza manungo onsene m’madzi.

 4. Kodi ubatizo wa m’madzi usapangizanji?

⁴ Onsene anafuna kukhala na uxamwali na Yahova Mulungu asafunika kubatizwa m’madzi. Ubatizo usapangiza pakweca cifuno canu cakutumikira Mulungu. Usapangizambo kuti imwe mwakomerwa na kucita cifuno ca Mulungu. (Masalmo 40:7, 8) Mbwenye toera kuthema kubatizwa, musafunika kucita mathanyo akufunika.

 5. (a) Ndi ipi thanyo yakutoma toera mutheme kubatizwa? (b) Thangwi yanji misonkhano Yacikristu ndi yakufunika?

⁵ Imwe mwatoma kale kucita thanyo yakutoma. Munjira ipi? Mukupfundza toera kukhala na cidziwiso ca Yahova Mulungu na ca Yezu Kristu, panango kubulukira ku pfundziro ya Bhibhlya yakukhonda phonya. (Lerini Jwau 17:3.) Mbwenye muciri na pizinji toera kupfundza. Akristu asafunika ‘kudziwa kakamwe pire pinafuna Mulungu.’ (Akolose 1:9) Kugumanika pa misonkhano ya mpingo ya Mboni za Yahova kunakuphedzani kakamwe toera kudziwa pinafuna Mulungu. Mphyakufunika kugumanika pa misonkhano ineyi. (Ahebere 10:24, 25) Kugumanika pa misonkhano mwakukhonda phonya kunadzakuphedzani kudziwa pizinji thangwi ya Mulungu.

 6. Kodi musafunika kukhala na cidziwiso cakunjipa tani ca Bhibhlya toera kuthema kubatizwa?

⁶ Mwandimomwene, imwe nee musafunika kudziwa pyonsene piri m’Bhibhlya toera kuthema kubatizwa. Mamuna wa utongi wa ku Etiopya akhali na cidziwiso pang’ono, mbwenye afuna ciphedzo toera kubvesesa makhundu anango a Malemba. (Machitiro 8:30, 31) Munjira ibodzi ene, imwe muciri na pizinji toera kupfundza. Imwe cipo munadzafika kunkhomo kwa kupfundza pya Mulungu. (Koelete 3:11) Mbamudzati kubatizwa, musafunika kudziwa na kutawira pipfundziso pyakutoma pya Bhibhlya. (Ahebere 5:12) Pipfundziso pyenepi pisaphataniza undimomwene wa pya makhaliro a anyakufa, kufunika kwa dzina ya Mulungu na Umambo wace.

 7. Kodi kupfundza Bhibhlya kusafunika kukukhuyani tani?

⁷ Mbwenye cidziwiso basi si cakukwana tayu, thangwi ‘nee kubvera peno cikhulupiro, tinacimwana kukomeresa Mulungu.’ (Ahebere 11:6) Bhibhlya isatipanga kuti mudabva anthu anango a nzinda wakale wa Korinto mphangwa Zacikristu, iwo ‘atawira mbabatizwa.’ (Machitiro 18:8) Munjira ibodzi ene, pfundziro ya Bhibhlya isafunika kukuphedzani toera kukhala na cikhulupiro cakuti iyo ndi Mafala akupumirwa na Mulungu. Pontho inakuphedzani kukhulupira mapikiro a Mulungu na mphambvu yakupulumusa ya ntsembe ya Yezu.​—Yoswa 23:14; Machitiro 4:12; 2 Timoti 3:16, 17.

 8. Ndi ninji cinafuna kukukulumizani kulonga na anango pidapfundza imwe?

⁸ Mu ndzidzi unakula cikhulupiro muntima mwanu, munadzaona kukhala kwakunentsa kukhonda panga anango pidapfundza imwe. (Yeremiya 20:9) Munadzakulumizika kakamwe toera kulonga na anango pya Mulungu na pifuniro pyace.​—Lerini 2 Akorinto 4:13.

9, 10. (a) Kodi munatoma kupanga ani undimomwene wa m’Bhibhlya? (b) Musafunika kucitanji khala musafuna kucita khundu m’basa yakumwaza mphangwa inacitwa na Mboni za Yahova?

⁹ Imwe munakwanisa kutoma kupanga anango undimomwene wa m’Bhibhlya mukulonga mwaluso pya undimomwene unoyu kwa acibale anu, axamwali, anyakuendekana na andzanu a pabasa. Mukupita kwa ndzidzi, munadzafuna kucita khundu m’basa yakumwaza mphangwa inacitwa na Mboni za Yahova. Pa ndzidzi unoyu, khalani wakusudzuka toera kulonga pyenepi na Mboni inakupfundzisani Bhibhlya. Pingaoneka kuti mwathema kucita basa ya m’munda, masasanyiro anadzacitwa toera imwe na mpfundzisi wanu mugumanyikane na akulu awiri a mpingo.

¹⁰ Pyenepi pinadzakuphedzani kudziwa mwadidi akulu anango a mpingo Acikristu, anakumbiza nkumbi wa Mulungu. (Machitiro 20:28; 1 Pedro 5:2, 3) Akulu anewa angaona kuti musabvesesa na kukhulupira pipfundziso pyakutoma pya m’Bhibhlya, musakhala mwakubverana na midida ya Mulungu, pontho kuti musafunadi kukhala m’bodzi wa Mboni za Yahova, iwo anadzakupangani kuti mwathema kucita khundu m’basa ya m’munda ninga m’mwazi mphangwa wakukhonda batizwa.

11. Kodi anango asafunika kucita macinjo api mbadzati kuthema kucita khundu m’basa ya m’munda?

¹¹ Ngakhale tenepo, panango musafunika kucita macinjo mu umaso na misambo yanu toera kuthema kucita khundu m’basa ya m’munda. Pyenepi pisaphataniza kusiya pinthu pinango pyakuti mukhapicita ncibisobiso. Mbwenye mbamudzati kuphemba kukhala m’mwazi mphangwa wakukhonda batizwa, musafunika kusiya madawo makulu, ninga ulukwali, kuledzera na kuphatisira mitombwe yakuzunguzisa ongo.​—Lerini 1 Akorinto 6:9, 10; Agalata 5:19-21.

12. Thangwi yanji kutcinyuka nkhwakufunika?

¹² Mbamudzati kuthema kubatizwa musafunika kucita mathanyo anango. Mpostolo Pedhro alonga: ‘Mutcinyuke, mbamuzungunuka, toera kulekererwa madawo anu.’ (Machitiro 3:19) Kutcinyuka ndi kutsukwala kakamwe thangwi ya cinthu cidacita imwe. Munthu anadzindikira kuti akhali na umaso wakuipa asafunika kutcinyuka, mbwenye kutcinyuka kusafunikambo kwa munthu wakuti akhali na umaso wakucena pang’ono. Thangwi yanji? Thangwi anthu onsene asadawa na asafuna kulekererwa na Mulungu. (Aroma 3:23; 5:12) Mbamudzati kupfundza Bhibhlya, imwe nee mukhadziwa cifuno ca Mulungu. Mphapo mbamudakwanisa tani kukhala na umaso wakubverana mwadidi na cifuno cace? Natenepa, kutcinyuka nkhwakufunika.

13. Kodi kucinja ndi ninji?

¹³ Kutcinyuka kusafunika kutowererwa na kucinja, peno ‘kuzungunuka.’ Musafunika kucita pizinji kupiringana kutsukwala. Musafunika kusiya makhaliro anu akale a umaso na kuwangisira kucita pyadidi kutomera cincino. Kutcinyuka na kucinja ndi mathanyo akuti musafunika kuacita mbamudzati kubatizwa.

14. Ndi thanyo ipi yakufunika yakuti musafunika kuicita mbamudzati kubatizwa?

¹⁴ Iripo thanyo inango yakufunika yakuti musafunika kuicita mbamudzati kubatizwa. Musafunika kuperekeka kwa Yahova Mulungu.

15, 16. Kodi kuperekeka kwa Mulungu kusabvekanji, na ndi ninji cinakulumiza munthu toera kucita pyenepi?

¹⁵ Munaperekeka imwe kwa Yahova Mulungu mu phembero yakubuluka muntima, musapikira kulambira iye basi kwenda na kwenda. (Deuteronomyo 6:15) Thangwi yanji munthu asafunika kucita pyenepi? Nyerezerani mamuna atoma kubvundzira nkazi. Munadziwa iye kakamwe nkazi unoyu na kuona kuti ali na makhaliro adidi, ufuni wace unathimizirika. Mukupita kwa ndzidzi, anakwanisa kumphemba toera amange naye banja. Ndimomwene kuti kumanga banja kunadzancitisa kukhala na mabasa anango akuthimizirika. Mbwenye ufuni unadzankulumiza kucita thanyo ineyi yakufunika.

¹⁶ Mungadziwa Yahova na kunfuna, munakulumizika kuntumikira mwakukwana peno kumulambira mwakusowa madire. Onsene anafuna kutowera Mwana wa Mulungu, Yezu Kristu, asafunika ‘akhondeke okhene.’ (Marko 8:34) Tinakwanisa kukhondeka tekhene mukukhala na cinyindiro cakuti pifuno pyathu pikhonde kuticimwanisa kubvera Mulungu mwakukwana. Natenepa, mbamudzati kubatizwa, kucita cifuno ca Yahova Mulungu kusafunika kukhala cifuniro canu cakutoma mu umaso.​—Lerini 1 Pedro 4:2.

17. Thangwi yanji anango asacalira kuperekeka kwa Mulungu?

¹⁷ Anango asacalira kuperekeka kwa Yahova thangwi asagopa kucita thanyo ineyi ikulu. Iwo asagopa kuti angaperekeka kwa Mulungu mbakhala Nkristu, anadzakhala na mulando angadawa. Mukugopa kuti panango anadzadodoma mbatsukwalisa Yahova, iwo asanyerezera kuti mphyadidi kukhonda perekeka kwa iye.

18. Ndi ninji cinafuna kukukulumizani kuperekeka kwa Yahova?

¹⁸ Munapfundza imwe kufuna Yahova, munadzakulumizika toera kuperekeka kwa iye na kucita pinakwanisa imwe toera kukhala maso mwakubverana na kuperekeka kwanu. (Koelete 5:3) Pakumala kuperekeka, munadzafunadi ‘kukhala maso ninga munafunira Yahova. Iye Yahova akomerwe na imwe pa pyonsene.’ (Akolose 1:10) Thangwi yakufuna kwanu Mulungu, munadzaona kukhala kwakukhonda nentsa kakamwe kucita cifuno cace. Mwakukhonda penula, munadzabverana na mpostolo Jwau, adalemba: ‘Kufuna Mulungu ndi kutawira matongero ace. Matongero ace hananentsa tayu.’​—1 Jwau 5:3.

19. Thangwi yanji nee musafunika kugopa kuperekeka kwa Mulungu?

¹⁹ Imwe nkhabe funika kukhala waungwiro toera kuperekeka kwa Mulungu. Yahova asadziwa kucimwana kwanu, pontho iye cipo asadikhira kuti mucite pinthu kupiringana pinakwanisa imwe. (Masalmo 103:14) Nakuti iye asafuna kuti mupembere, anadzakutsidzikizani na kukuphedzani. (Lerini Izaiya 41:10.) Khalani na cinyindiro cakuti munganyindira Yahova na ntima wanu onsene, ‘iye anadzazereza njira zanu.’​—Misangani 3:5, 6.

20. Thangwi yanji kuperekeka kwa Yahova nkhabe funika kupitiriza kukhala kwakukhonda dziwika na anango?

²⁰ Kunyerezera mwacidikhodikho pinthu pidamala ife kudinga kunakuphedzani toera kuperekeka kwa Yahova mu phembero. Onsene anafunadi Mulungu asafunikambo ‘kulonga pakweca’ toera apulumuswe. (Aroma 10:10, MZ) Munacita tani pyenepi?

21, 22. Munacita tani ‘malongero apakweca’ a cikhulupiro canu?

²¹ Dziwisani m’bveranisi wa nsoka wa akulu a mpingo wanu kuti musafuna kubatizwa. Iye anadzacita masasanyiro toera akulu angasi a mpingo abwerezere na imwe mibvundzo inalonga pya pipfundziso pyakutoma pya Bhibhlya. Akulu anewa a mpingo angaona kuti mwathema, anadzakupangani kuti munabatizwa pa nsonkhano unatowera.a Pa misonkhano ineyi, kazinji kene pasacitwa nkhani yakubwerezera mabvekero a ubatizo. Pakumala, nyakucita nkhani asaphemba onsene anafuna kubatizwa toera atawire mibvundzo miwiri yakukhonda nentsa ninga njira yakupangiza ‘malongero apakweca’ a cikhulupiro cawo.

²² Ndi ubatizo unakupangizani pakweca ninga munthu wakuperekeka kwa Mulungu, pontho kuti cincino ndimwe m’bodzi wa Mboni za Yahova. Anafuna kubatizwa asabizwa manungo awo onsene m’madzi toera kupangiza mwapakweca kuti iwo aperekeka kwa Yahova.

23. Kodi kubatizwa ‘mu dzina ya Baba na ya Mwana na ya nzimu wakucena’ kusabvekanji?

²³ Yezu alonga kuti anyakupfundzace mbadabatizwa ‘mu dzina ya Baba na ya Mwana na ya nzimu wakucena.’ (Mateo 28:18) Pyenepi pisabveka kuti anafuna kubatizwa asadzindikira utongi wa Yahova Mulungu na wa Yezu Kristu. (Masalmo 83:18; Mateo 28:18) Iye asadzindikirambo basa ya nzimu wakucena wa Mulungu, peno mphambvu yakuphata basa ya Mulungu.​—Agalata 5:22, 23; 2 Pedro 1:21.

24, 25. (a) Ubatizo usaphipirisanji? (b) Ndi mbvundzo upi unafunika kutawirwa?

²⁴ Mbwenye, kubatizwa si kubizwa m’madzi basi tayu. Ndi cidzindikiro cakufunika kakamwe. Kubizwa m’madzi kusaphipirisa kuti imwe mwafa mu uunthu wanu wakale. Kubuluswa m’madzi kusapangiza kuti cincino musakhala maso toera kucita cifuno ca Mulungu. Kumbukanimbo kuti mwaperekeka kwa Yahova Mulungu, tayu kwa basa, kwa cinthu, kwa munthu, peno kwa gulu inango. Kuperekeka na ubatizo ndi matomero a uxamwali wapadhuzi na Mulungu—uxamwali wamuntima na iye.​—Masalmo 25:14.

²⁵ Ubatizo nkhabe pasa cinyindiro cakupulumuka. Mpostolo Paulu alemba: ‘Phatani mabasa a cipulumuso canu na kugopa na kutetemera.’ (Afilipi 2:12) Ubatizo ndi kutoma basi. Mbvundzo ndi uyu: Kodi munakwanisa tani kukhala mu ufuni wa Mulungu? Nsolo wakumalisa wa bukhu ino unadzapereka ntawiro.