Kodi Muli Dzololo Toera Kubatizwa?

 1. Munthu asafunika kucitanji mbadzati kutoma kumanga nyumba?

NYEREZERANI munthu wakuti asafuna kumanga nyumba. Iye asadziwa ntundu wa nyumba inafuna iye kumanga. Kodi iye anaenda kagula pinthu mwakucimbiza mbatoma kuimanga? Nkhabe. Mbadzati kucita pyonsene, pakutoma asanyerezera ntengo wa kobiri inafuna iye kuphatisira. Thangwi yanji? Thangwi iye asafunika kudziwa khala ali na kobiri yakukwana toera kumanga nyumba mpaka kuimalisa. Angacita pyenepi mwanyapantsi, pinamphedza toera kumanga nyumba yace mpaka kuimalisa.

 2. Mwakubverana na Luka 14:27-30, ndi pinthu pipi pinafunika imwe kunyerezera mwadidi mbamudzati kubatizwa?

² Kodi kufuna kwanu Yahova na kupereka takhuta kuna iye kusakucitisani kunyerezera pya kubatizwa? Khala ndi tenepo, musafunika kucita pibodzi pyene ninga pinacita munthu angafuna kumanga nyumba. Thangwi yanji? Onani mafala a Yezu anagumanika pa Luka 14:27-30. (Lerini.) Yezu alonga pinthu pinafunika ife kucita toera kukhala nyakupfundzace. Natenepa, khala musafuna kukhala nyakupfundzace musafunika kupirira nyatwa na kusiya pinthu pinango. (Luka 9:23-26; 12:51-53) Na thangwi ineyi, mbamudzati kubatizwa musafunika kunyerezera mwadidi pyenepi. Natenepa munadzakhala dzololo toera kubatizwa mbamupitiriza kutumikira Mulungu mwakukhulupirika.

 3. Tinadinganji mu nsolo uno?

³ Kodi kubatizwa toera kukhala nyakupfundza wa Kristu ndi pyakunentsa? Inde! Mbwenye ubatizo usafungula njira toera kutambira nkhombo zizinji cincino na ntsogolo. Tendeni tidinge mibvundzo mingasi yakufunika kakamwe thangwi ya ubatizo. Kudinga mibvundzo ineyi kunakuphedzani toera kutawira mbvundzo uyu: “Kodi ndiri dzololo toera kubatizwa?”

 4. (a) Kodi kuperekeka ninji? (b) Mwakubverana na Mateu 16:24, pisabvekanji “kukhondeka” wekha?

⁴ Kodi kuperekeka ninji? Mbamudzati kubatizwa, musafunika kuperekeka. Mu ndzidzi unaperekeka imwe kuna Yahova, musacita phembero kuna iye na ntima onsene mbamumpanga kuti munaphatisira umaso wanu toera kutumikira iye kwenda na kwenda. Mungaperekeka kuna Mulungu, imwe “musakhondeka” mwekha. (Lerini Mateu 16:24.) Natenepa imwe musakhala wa Yahova, pontho unoyu ndi mwai ukulu kakamwe. (Aroma 14:8) Kusiyapo pyenepi, musapanga Yahova pa ntsiku ineyi kuti cinthu cakufunika kakamwe kwa imwe ndi kutumikira iye, tayu cinthu cinango. Kuperekeka ndi dumbiro inacita imwe kuna Mulungu. Yahova nee asatikakamiza toera kucita dumbiro ineyi. Mbwenye tingaicita, iye asadikhira kuti tiikwanirise.​—Masal. 116:12, 14.

 5. Kodi kuperekeka kwasiyana tani na ubatizo?

⁵ Kodi kuperekeka kwasiyana tani na ubatizo? Imwe musaperekeka kuna Yahova panu mwekha. Mbwenye ubatizo usacitwa pa mwinji, kazinji kene usacitwa pa nsonkhano wa cisa peno wa gawo. Mungabatizwa, musapangiza kuna anango kuti mwaperekeka kale kuna Yahova.b Kusiyapo pyenepi, kubatizwa kwanu kusapangiza anango kuti musafuna Yahova Mulungu na ntima wanu onsene, umaso wanu, ndzeru zanu na mphambvu zanu zonsene, pontho muli dzololo toera kutumikira iye kwenda na kwenda.​—Marko 12:30.

6-7. Mwakubverana na 1 Pedhru 3:18-22, thangwi yanji tisafunika kubatizwa?

⁶ Kodi ndi pyakufunikadi kubatizwa? Onani mafala anagumanika pa 1 Pedhru 3:18-22. (Lerini.) Bote ikhapangiza kuna anthu kuti Nowa akhakhulupira Mulungu. Munjira ibodzi ene, kubatizwa kwanu kusapangiza pakweca kuti imwe mwaperekeka kuna Yahova. Mphapo ndi pyakufunikadi kubatizwa? Inde. Pedhru alonga kuti ubatizo ndi wakufunika thangwi ‘usakupulumusani.’ Mwandimomwene, ubatizo unatipulumusa tingapangiza cikhulupiro kuna Yezu mbatitawira kuti iye atifera na alamuswa muli akufa mbaenda kudzulu, pontho cincino “ali kunkono wamadyo wa Mulungu.”

⁷ Kusiyapo pyenepi, ubatizo usaticitisa kukhala na “cikumbuntima cadidi.” Tingaperekeka kuna Mulungu mbatibatizwa, tisakhala na uxamwali wakupambulika na iye. Pontho thangwi yakutcunyuka kwathu na ntima onsene na kukhulupira ciomboli, Mulungu asatilekerera madawo athu. Natenepa tinakwanisa kukhala na cikumbuntima cadidi pamaso pace.

 8. Ndi thangwi ipi yakufunika kakamwe inafuna kukucitisani kubatizwa?

⁸ Ndi mathangwi api anafuna kukucitisani kubatizwa? Nakuti mwapfundza mwadidi Bhibhlya, imwe musadziwa pizinji thangwi ya Yahova, makhaliro ace na pinthu pinacita iye. Pyenepi pyakhuya kakamwe ntima wanu, pontho pisakukulumizani toera kunfuna kakamwe. Kufuna kwanu Yahova ndi thangwi yakufunika kakamwe toera kubatizwa.

 9. Mwakubverana na Mateu 28:19, 20, pisabvekanji kubatizwa mu dzina ya Baba, ya Mwana na ya nzimu wakucena?

⁹ Thangwi inango inafuna kukucitisani kubatizwa ndi yakuti imwe mwapfundza undimomwene wa Bhibhlya, pontho musakhulupira pyenepi. Onani pidalonga Yezu thangwi ya basa yakucita anyakupfundza. (Lerini Mateu 28:19, 20.) Mwakubverana na mafala a Yezu, ale anafuna kubatizwa asafunika kubatizwa “mu dzina ya Baba, ya Mwana na ya nzimu wakucena.” Kodi pyenepi pisabvekanji? Imwe musafunika kukhulupira na ntima onsene undimomwene wa Bhibhlya unalonga pya Yahova; Mwanace, Yezu; na nzimu wakucena. Undimomwene unoyu ndi wamphambvu kakamwe, pontho unakwanisa kukhuya ntima wanu. (Aheb. 4:12) Natenepa, tendeni tidinge ungasi mwa undimomwene unoyu.

10-11. Ndi undimomwene upi udapfundza imwe unalonga pya Baba mbamuukhulupira?

¹⁰ Nyerezerani mu ndzidzi udapfundza imwe undimomwene uyu unalonga pya Baba kuti: “Dzina yace ndi Yahova,” iye ndi “Wankulu Kakamwe kupiringana pyonsene pa dziko yapantsi,” pontho ndiye basi “Mulungu wandimomwene.” (Masal. 83:18; Iza. 37:16) Yahova ndi Nciti wathu, pontho “cipulumuso cisabuluka kuna iye.” (Masal. 3:8; 36:9) Iye acita masasanyiro toera kutisudzula ku madawo na kufa, pontho atipasa cidikhiro cakukhala maso kwenda na kwenda. (Juwau 17:3) Mungaperekeka na kubatizwa munapangiza kuti ndimwe m’bodzi wa Mboni za Yahova. (Iza. 43:10-12) Imwe munadzacita khundu ya alambiri a Yahova pa dziko yonsene yapantsi akuti asacemerwa na dzina ya Mulungu, pontho asapangambo anango dzina ineyi.​—Masal. 86:12.

¹¹ Ndi mwai ukulu kakamwe kudziwa pinapfundzisa Bhibhlya thangwi ya Baba. Mungakhulupira undimomwene unoyu, munakulumizika toera kuperekeka kuna Yahova mbamubatizwa.

12-13. Ndi undimomwene upi udapfundza imwe unalonga pya Mwana mbamuukhulupira?

¹² Ndi mabvero api adakhala na imwe mu ndzidzi udapfundza imwe undimomwene uyu unalonga pya Mwana? Yezu ndi munthu waciwiri wakufunika kakamwe kudzulu na pa dziko yapantsi. Iye apereka umaso wace toera kutiombola. Tingapangiza na macitiro athu kuti tisakhulupira ciomboli, tinakwanisa kulekererwa madawo athu, tinakhala na uxamwali wakuwanga na Mulungu, pontho tinawina umaso wakukhonda mala. (Juwau 3:16) Yezu ndi Nyantsembe wathu Wankulu. Iye asafuna kutiphedza toera tiphindule na ciomboli, mbatikhala na uxamwali wakuwanga na Mulungu. (Aheb. 4:15; 7:24, 25) Nakuti Yezu ndi Mambo wa Umambo wa Mulungu, Yahova anadzam’phatisira toera kucenesa dzina Yace, kumalisa uipi na kubweresa nkhombo zakukhonda mala m’Paraizu. (Mat. 6:9, 10; Apok. 11:15) Yezu ndi citsandzo cathu. (1 Ped. 2:21) Iye akhazikisa citsandzo cadidi kuna ife mukuphatisira umaso wace toera kucita cifuno ca Mulungu.​—Juwau 4:34.

¹³ Mungakhulupira pinapfundzisa Bhibhlya thangwi ya Yezu, imwe munanfuna kakamwe. Ufuni unoyu unakukulumizani toera kuphatisira umaso wanu kuti mucite cifuno ca Mulungu ninga pidacita Yezu. Natenepa, pyenepi pinakuphedzani toera kuperekeka kuna Yahova mbamubatizwa.

14-15. Ndi undimomwene upi udapfundza imwe unalonga pya nzimu wakucena mbamuukhulupira?

¹⁴ Ndi manyerezero api adakhala na imwe mu ndzidzi udapfundza imwe undimomwene uyu unalonga pya nzimu wakucena? Nzimu wakucena nee ndi munthu, mbwenye ndi mphambvu ya Mulungu. Yahova aphatisira nzimu wakucena toera kutsogolera anthu adalemba Bhibhlya, pontho nzimu unoyu usatiphedza toera kubvesesa pinaleri ife m’Bhibhlya na kupiphatisira. (Juwau 14:26; 2 Ped. 1:21) Mukuphatisira nzimu wace, Yahova asatipasa “mphambvu yakupiringana yacibaliro.” (2 Akor. 4:7) Nzimu unoyu usatipasa mphambvu toera kumwaza mphangwa zadidi, kuthimbana na mayesero, kutsukwala na kupirira pinentso. Pontho usatiphedza toera kupangiza makhaliro adidi kakamwe akuti asacita khundu ya “misapo ya nzimu wakucena.” (Agal. 5:22) Mulungu asapasa nzimu wace ale ananyindira na anam’phemba na ntima onsene.​—Luka 11:13.

¹⁵ Ndi pyakubalangaza kakamwe kudziwa kuti alambiri a Yahova anakwanisa kunyindira nzimu wakucena toera kuaphedza kutumikira Mulungu. Mungakhulupira undimomwene udapfundza imwe thangwi ya nzimu wakucena, pyenepi pinakuphedzani toera kuperekeka kuna Mulungu mbamubatizwa.

16. Tapfundzanji mpaka pano?

¹⁶ Cisankhulo canu ca kuperekeka kuna Mulungu na kubatizwa ndi cakufunika kakamwe. Ninga tapfundza, imwe musafunika kukhala dzololo toera kuthimbana na nyatwa. Mbwenye nkhombo zinafuna kukhala na imwe ndi zizinji kupiringana kuwangisira kunafuna kucita imwe. Ubatizo unakwanisa kukupulumusani, pontho unakucitisani kukhala na cikumbuntima cadidi pamaso pa Mulungu. Thangwi yakufunika kakamwe inafuna kukukulumizani toera kubatizwa ndi kufuna kwanu Yahova Mulungu. Musafunikambo kukhulupira na ntima onsene undimomwene udapfundza imwe unalonga pya Baba, Mwana na nzimu wakucena. Nakuti tamala kudinga mathangwi anafuna kukucitisani kubatizwa, munatawira tani mbvundzo uyu: “Kodi ndiri dzololo toera kubatizwa?”

17. Kodi munthu asafunika kucitanji mbadzati kubatizwa?

¹⁷ Mungaona kuti muli dzololo toera kubatizwa, mwakukhonda penula imwe mwacita macinjo mazinji toera kuwangisa uxamwali wanu na Yahova.c Nakuti musapfundza Bhibhlya kazinji kene, imwe mwadziwa pizinji thangwi ya Yahova na Yezu, pontho muli na cikhulupiro cakuwanga. (Aheb. 11:6) Imwe musanyindira na ntima onsene mapikiro a Yahova anagumanika m’Bhibhlya, pontho musakhulupira kuti ntsembe ya Yezu inakwanisa kukusudzulani ku madawo na kufa. Imwe mwatcunyuka madawo onsene adacita imwe, pontho mwaphemba Yahova toera akulekerereni. Imwe mwasiya pinthu pyonsene pyakuipa pikhacita imwe, pontho mwatoma kukhala maso munjira inakomeresa Mulungu. (Mabasa 3:19) Imwe musafuna kakamwe kupanga anango thangwi ya pinthu pinakhulupira imwe. Imwe mwakhazikiswa ninga m’mwazi mphangwa wakukhonda batizwa, pontho musamwaza mphangwa pabodzi na mpingo. (Mat. 24:14) Yahova asakomerwa kakamwe na imwe thangwi yakucita pinthu pyenepi.​—Mis. 27:11.

18. Ndi pinthu pipi pinango pyakuti munthu asafunika kupicita mbadzati kubatizwa?

¹⁸ Mbamudzati kubatizwa pana pinthu pingasi pisafunika imwe kucita. Ninga tapfundza pakutoma, imwe musafunika kuperekeka kuna Mulungu. Citani phembero kuna iye, pontho mpangeni kuti munaphatisira umaso wanu toera kucita cifuno cace. (1 Ped. 4:2) Buluka penepo dziwisani mbveranisi wa akulu a mpingo kuti musafuna kubatizwa. Iye anadzaphemba akulu a mpingo anango toera acedze na imwe. Pontho nee musafunika kudzudzumika pakucedza na akulu a mpingo anewa. Kumbukani kuti abale anewa akufunika asakudziwani mwadidi, pontho asakufunani. Iwo anadzadinga na imwe pinthu pingasi pidapfundza imwe m’Bhibhlya. Thangwi asafuna kuona khala mwabvesesa mwadidi pinthu pidapfundza imwe, pontho khala musadziwa kufunika kwa kuperekeka na kubatizwa. Angaona kuti mwathema, iwo anakudziwisani kuti munabatizwa pa nsonkhano wa cisa peno wa gawo.

19-20. Musafunika kucitanji mungamala kubatizwa, pontho munacita tani pyenepi?

¹⁹ Mungamala kubatizwa, musafunika kucitanji?d Kumbukani kuti kuperekeka ndi dumbiro, pontho Yahova asadikhira kuti mucite pidadumbira imwe. Mungamala kubatizwa, musafunika kukhala maso mwakubverana na pikiro idacita imwe. Munacita tani pyenepi?

²⁰ Khalani akuphatana na mpingo wanu. Kutomera ntsiku idabatizwa imwe, musacita khundu ya “nsoka onsene wa abale.” (1 Ped. 2:17) Kusiyapo pyenepi, imwe muli na abale na alongo anu mu mpingo. Imwe munawangisa uxamwali wanu na iwo mungagumanika pa misonkhano mwakukhonda phonya. Lerini Mafala a Mulungu ntsiku zonsene, pontho nyerezerani mwadidi pinaleri imwe. (Masal. 1:1, 2) Mungamala kuleri mavesi mangasi a Bhibhlya, khalani na ndzidzi wakunyerezera mwadidi pidaleri imwe. Mungacita pyenepi Mafala a Mulungu anakhuya ntima wanu. “Phemberani ndzidzi onsene.” (Mat. 26:41) Mungacita phembero na ntima onsene, pinakuphedzani toera kukhala cifupi na Yahova. “Pitirizani kuikha pa mbuto yakutoma Umambo wa Mulungu.” (Mat. 6:33) Imwe munakwanisa kucita pyenepi mungaikha basa yakumwaza mphangwa pa mbuto yakutoma mu umaso wanu. Mungamwaza mphangwa ndzidzi onsene, munakhala na cikhulupiro cakuwanga, pontho munaphedza anango toera kugumana njira ya umaso wakukhonda mala.​—1 Tim. 4:16.

21. Ndi nkhombo zipi zinafuna kukhala na imwe mungabatizwa?

²¹ Kuperekeka kuna Yahova na kubatizwa ndi cisankhulo cakufunika kakamwe mu umaso wanu. Mwandimomwene ubatizo usaphataniza pinthu pizinji. Panango munathimbana na pinentso, mbwenye pinentso pinafuna kuthimbana na imwe n’dziko ino yakale ndi pya “ndzidzi wakucepa.” (2 Akor. 4:17) Mbwenye kubatizwa kunakucitisani kukhala na umaso wadidi cincino na “umaso wandimomwene” ntsogolo. (1 Tim. 6:19) Natenepa nyerezerani mwadidi, pontho citani phembero toera kutawira mbvundzo uyu: “Kodi ndiri dzololo toera kubatizwa?”