Kumala kwa Nyatwa Kuli Cifupi!

“Pa utongi wenewu wakumalisa, Mulungu anadzalamusa utongi unango wakukhonda kufudzika, na wakukhondambo kungonjeswa. Utongi uyu, unadzakunda [mbupasa] manyadzo utongi unango, iwo mbukhala pyawo mwa kuwanga mwene.”​—Daniyele 2:44.

Umambo wa Mulungu ndi utongi wakudzulu. Uli na Mambo wakusankhulwa, Yezu Kristu, wakuti unadzapitira mbuto mautongi onsene a anthu, pontho unadzapasa cibaso kuti cifuno ca Mulungu cinadzacitwa kudzulu na pantsi pano. (Mateo 6:9, 10) Utongi unoyu nkhabe kudzapitirwa mbuto na mautongi a anthu thangwi umambo unoyu unadzakhala ‘wakukhonda kumala wa Mbuyathu, Mpulumusi wathu Yezu Kristu.’ Ntendere wakukhonda mala unadzakhala wakunyindirika.​—2 Pedro 1:11.

“Satani asasangizira anju wa cheza. Mphapo si chinthu chakudzumisa tayu, mabichu a Satani anasangizira adzakazi adidi a Mulungu. Iwo anamalisira sawasawa ninga mabasa awo.”​—2 Akorito 11:14, 15.

Uphemberi waunthawatawa unadzapangiza mabasa a Dyabo, pontho unadzafudzwa pa dziko yapantsi. Bibvu yonsene ya uphemberi inadzamala pabodzi na kuthedzesa ciropa. Pyenepi pinadzacitisa kuti anyakufuna ‘Mulungu wa moyo na wandimomwene,’ amulambire mu njira ibodzi yacikhulupiro, “mu nzimu na mu udidi [peno undimomwene].” Pyenepi pinadzabweresa ntendere na kuphatana!​—1 Atesalonika 1:9; Aefesi 4:5; Jwau 4:23.

“Mulungu anadzakhala pabodzi na anthu, mbapukuta misozi yonsene m’maso mwawo. Kufa hakunadzakhala’po pontho tayu, nee kutsukwala, nee kulira, nee nyatwa, thangwi pya kale pyamala.”​—Apokalipse 21:3, 4.

Yahova Mulungu anadzacita pyenepi kubulukira mwa Mwanace, Yezu, adapereka umaso wace kwa anthu pa dziko yapantsi. (Jwau 3:16) Pantsi pa citsogolero ca Yezu, anthu anadzakhala aungwiro. Nkhabe kudzaonekabve nyatwa thangwi “Mulungu anadzakhala pabodzi na anthu,” pontho ‘anadzapukuta misozi yonsene m’maso mwawo.’ Cincino kusowa ungwiro kwa anthu na nyatwa pinadzaduwalika; “anyakulungama anatambira dziko, mbakhala . . . kuenda na kuenda.”​—Masalmo 37:29.

‘Iye Yezu Kristu akunda nyangumi ule, nyoka ya kale, ndiyo demonyo na Sathani, aimanga pyaka chikwi chibodzi. Aigwisa n’djenje, afunga, mbayikha padzulu pawo chidzindikiro chibodzi towera kutsogolo nyangumi achimwane kunyengerera pontho mitundu ya anthu.’​—Apokalipse 20:2, 3.

Macitiro onsene a Sathani anadzamaliswa pa ndzidzi unafuna kudzamangwa Sathani na mademonyo mbaponywa n’djenje mbuto yakuti nkhabe kudzacita cinthu. Iwo nkhabe kudzacitisabve anthu toera kucita pyakuipa. Ndi kusudzulwa kwanji kunadzakhalapo mu dziko yakusowa macitiro a Sathani na mizimu yakuipa!

Yezu alonga: “Ntsiku zakumalisa” zinadzamala pa ‘nyatwa ikulu.’ Iye apitiriza kulonga: ‘Panadzaoneka nyatwa ikulu, yakupiringana nyatwa zonsene zidaona anthu kutomera kwa pantsi mpaka ntsiku ya lero, ande patsogolo pache nyatwa ninga izo hazinadzaonekabve pontho tayu.’​—Mateo 24:21.

Nyatwa inadzakhala ikulu kakamwe mu njira yakuti pidengwa pyakukhonda dikhirwa pinadzacitika. Pyenepi pinadzamaliswa pa ‘nkhondo ya ntsiku ikulu ya Mulungu,’ inadziwika ninga “Harmagedoni.”​—Apokalipse 16:14, 16, cidzindikiro capantsi.

Konsene kwene, anthu anafuna pinthu pyadidi asadikhira kumaliswa kwa makhaliro ano akuipa a dziko yapantsi. Dingani nkhombo zingasi zinadikhira iwo mu Umambo wa Mulungu.

‘Mwinji ukulu’ unadzakhala mu ntendere mu dziko ipswa: Mafala a Mulungu asalonga kuti ‘mwinji ukulu’ wa anthu akukhonda lengeseka ‘anadzabuluka mu nyatwa ikulu’ mbapulumuswa toera kukhala mu dziko ipswa ya ulungami. (Apokalipse 7:9, 10, 14; 2 Pedro 3:13) Iwo anadzasimba Yezu Kristu thangwi yakupulumuswa kwawo, nakuti iye ndi “Bira ya Mulungu inafudza [madawo] a dziko ya pantsi pano.”​—Jwau 1:29.

Maphindu mazinji anadzaoneka kubulukira ku cipfundziso ca Mulungu: Mu dziko ipswa, “dziko inadzala na udziwisi wa Mulungu.” (Izaiya 11:9) Cipfundziso ca Mulungu cinadzaphataniza pitsogolero pyakuti tinakhala tani mu ntendere na anthu onsene, pontho mwakubverana na makhaliro akudambo. Mulungu apikira: “Ine ndine [Yahova], Mulungu wako, ule anafuna kukupfundisa towera udidi wako, mbakuendesa pa njira inatongwa iwe kutoweza.”​—Izaiya 48:17.

Anyakufunika athu adafa anadzalamuswa mu nthumbi: Pikakhala iye pa dziko yapantsi, Yezu alamusa mwa akufa xamwali wace Lazaro. (Jwau 11:1, 5, 38-44) Natenepa, iye apangiza kuti anadzalamusa mwa akufa anthu azinji mu Umambo wa Mulungu.​—Jwau 5:28, 29.

Ntendere na ulungami unadzakhala kwenda na kwenda: Mu utongi wa Kristu, kuswa mwambo kunadzamala. Tisapidziwa tani? Thangwi Yezu asakwanisa kuona piri m’mitima, pontho iye anadzaphatisira luso ineyi toera kutonga anthu akulungama na akuipa. Ale anakhonda kucinja makhaliro awo akuipa nkhabe kudzatawiriswa kupita mu dziko ipswa ya Mulungu.​—Masalmo 37:9, 10; Izaiya 11:3, 4; 65:20; Mateo 9:4.

Tadinga makhundu akucepa a maprofesiya mazinji a Bhibhlya akuti asalonga pya ndzidzi wakutsandzayisa wa ntsogolo. Pa ndzidzi unadzatonga Umambo wa Mulungu pa dziko yapantsi, “ntendere ukulu kakamwe” unadzakhala kwenda na kwenda. (Masalmo 37:10, 29) Pyonsene pinacitisa nyatwa zinakhuya anthu pinadzamala. Tinakwanisa kunyindira pyenepi thangwi ndi pikiro ya Mulungu: “Onani, ine ndinadzasanduza pyonsene kudza pipswa. . . . Mafala awa ndi akukhulupirika na a udidi [peno andimomwene].”​—Apokalipse 21:5.