Tisafunika Kucitanji Toera Mulungu Abvesere Maphembero Athu?
Yahova Mulungu ndi “Nyakubva phembero.” (Masalmo 65:2) Ife tinakwanisa kulonga naye ndzidzi onsene na m’mbuto zonsene, mwakugaluza peno mwaciwerewere. Yahova asafuna kuti ife tincemere “Baba.” Mwandimomwene, iye ndi Baba wadidi kakamwe wakuti ife tinakwanisa kukhala naye. (Mateu 6:9) Mwaufuni, Yahova asatipanga kuti tinacita tani phembero munjira yadidi toera iye atawire maphembero athu.
CITANI PHEMBERO KUNA YAHOVA MULUNGU MU DZINA YA YEZU
“Pyonsene pinafuna imwe kuphemba kuna Baba mu dzina yanga, iye anadzakupasani.”—Juwau 16:23.
Mafala anewa a Yezu asapangiza kuti Yahova asafuna kuti ticite phembero kuna iye, tayu mukuphatisira madzimunthu, anthu akucena, aanju peno ambuyathu adamala kufa, mbwenye tisafunika kucita phembero mu dzina ya Yezu Kristu. Tingacita phembero mu dzina ya Yezu, ife tisatawira kuti Mulungu asabvesera maphembero athu thangwi ya pinthu pidacita Yezu kuna ife. Yezu alonga: “Nkhabe munthu anaenda kuna Baba mbakhonda kupita na pana ine.”—Juwau 14:6.
LONGANI KUBULUKIRA MUNTIMA
“Fungulani mitima yanu kuna iye.”—Masalmo 62:8.
Tingacita phembero kuna Yahova, tisafunika kulonga ninga pinacita mwana angalonga na babace waufuni. M’mbuto mwakukoya maphembero mu nsolo, peno kucita kualeri m’bukhu ya maphembero, ife tinakwanisa kulonga naye mwacilemedzo na kubulukira muntima.
CITANI PHEMBERO MWAKUBVERANA NA PINAFUNA MULUNGU
“Tingaphemba cinthu mwakubverana na pinafuna iye, iye asatibvesera.”—1 Juwau 5:14.
Kubulukira m’Bhibhlya, Yahova Mulungu asatipanga kuti anadzacitanji kuna ife, pontho kuti tisafunika kucitanji kuna iye. Toera maphembero athu akhale akutawirika kuna Mulungu, ife tisafunika kucita phembero “mwakubverana na pinafuna iye.” Toera tikwanise kucita pyenepi, tisafunika kupfundza Bhibhlya toera tidziwe mwadidi Mulungu. Tingacita pyenepi, iye anabvesera maphembero athu.
TINALONGANJI PAKUCITA PHEMBERO?
Phembani Pinthu Pinafuna Imwe. Ife tinakwanisa kuphemba Mulungu toera atipase cakudya, cakubvala na mbuto yakukhala. Ife tinakwanisambo kucita phembero toera kuphemba udziwisi kuti ticite pisankhulo pyadidi na mphambvu toera tikwanise kupirira nyatwa zathu. Tinakwanisambo kuphemba toera tikhale na cikhulupiro cakuwanga, kuphemba kulekererwa na kuphemba ciphedzo ca Mulungu.—Luka 11:3, 4, 13; Tiyago 1:5, 17.
Citani Phembero Thangwi ya Anango. Anyakubala aufuni asatsandzaya kakamwe anawo angatsalakanana mwadidi mbafunana unango na ndzace. Yahova asafunambo kuti anace pa dziko yapantsi afunane, mbatsalakanana mwadidi unango na ndzace. Ife tinakwanisa kucita phembero thangwi ya ndzathu wa m’banja, anathu, abale athu na axamwali athu. Nyakupfundza Tiyago alemba: ‘Citiranani phembero unango na ndzace.’—Tiyago 5:16.
Citani Phembero Toera Kupereka Takhuta. Thangwi ya Nciti wathu, Bhibhlya isalonga: “[Iye] apangiza udidi wace kuna imwe mu kubvumbisa madzi akudzulu na kukupasani midzidzi yakubvuna pinthu pizinji, iye akupasani pyakudya mbatsandzayisa kakamwe mitima yanu.” (Mabasa 14:17) Tinganyerezera pinthu pyonsene pidacita Mulungu kuna ife, tinakulumizika toera kupereka takhuta kuna iye kubulukira m’phembero. Mwandimomwene, ife tisafunikambo kubvera Mulungu toera kupangiza kupereka kwathu takhuta kuna iye.—Akolose 3:15.
KHALANI AKUPIRIRA MBAMUPITIRIZA KUCITA PHEMBERO
Midzidzi inango, ife tinafewa manungo maphembero athu angakhonda kutawirwa mwakucimbiza. Kodi pyenepi pisabveka kuti Mulungu nee asatitsalakana? Nkhabe. Onani pitsandzo pinatowera pinapangiza kuti thangwi yanji tisafunika kupitiriza kucita phembero.
Steve adalongwa mu nsolo wakutoma alonga: “Mbidakhonda kupitiriza kucita phembero, ine mbidaluza cidikhiro, pontho nee mbidakhala wakutsandzaya.” Ninji pidacitisa Steve kucinja manyerezero ace thangwi ya phembero? Iye atoma kupfundza Bhibhlya, pontho apfundza kuti akhafunika kupitiriza kucita phembero mbakhonda kubwerera nduli. Iye athimiza: “Ndisacita phembero toera kupereka takhuta kuna Mulungu thangwi ya ciphedzo cinatambira ine kuna axamwali anga. Lero ine ndiri wakutsandzaya kakamwe kupiringana kale.”
Jenny wakuti akhaona kuti nee athema kubveserwa na Mulungu alonga: “Mu ndzidzi ukhanyerezera ine kuti ndine wakusowa basa, ine ndikhadembetera kuna Mulungu toera andiphedze kubvesesa kuti thangwi yanji ndikhali na mabvero anewa.” Kodi phembero yam’phedza tani? Iye alonga: “Kucita phembero kwandiphedza toera kuoneka ndekhene ninga munandionera Mulungu, kubvesesa kuti maseze ntima wanga undisandike, Mulungu nee asandisandika. Kucita phembero kwandiphedzambo toera ndikhonde bwerera nduli.” Ndi nkhombo zipi zidakhala na iye? Iye alonga: “Kucita phembero kwandiphedza toera kuona Yahova ninga Baba na Mulungu waufuni, ninga xamwali wandimomwene wakuti asanditsalakana. Ndingawangisira toera kunkomeresa, ndzidzi onsene iye anandiphedza.”
Isabel alonga: “Ndingaona mwananga mbakatsandzaya mwakukhonda tsalakana kulamala kwace, ine ndisaona kuti iye ndi ntawiro wa maphembero anga.”
Onanimbo citsandzo ca Isabel. Pidakhala iye na mimba, madotoro ampanga kuti mwanace mbadabalwa wakulamala. Iye atsukwala kakamwe. Anango ampanga kuti ataye mimba. Isabel alonga: “Ine ndikhanyerezera kuti mbidafa thangwi ya kutsukwala.” Mphapo iye acitanji? “Ine ndacita kakamwe phembero mbandikaphemba ciphedzo ca Mulungu.” Mukupita kwa ndzidzi, ine ndabala mwananga Gerard, wakuti akhali wakulamala. Kodi Isabel aona kuti Mulungu atawira maphembero ace? Inde. Munjira ipi? Iye alonga: “Ndingaona mwananga wakuti cincino ali na pyaka 14 pyakubalwa mbakatsandzaya mwakukhonda tsalakana kulamala kwace, ine ndisaona kuti iye ndi ntawiro wa maphembero anga, pontho ndi nkhombo ikulu idandipasa Yahova.”
Mafala anewa akubuluka muntima asatikumbusa mafala adalonga nyamasalmo kuti: “Mbwenye imwe Yahova, munadzabva phembo ya anthu akucepeseka. Imwe munadzakhunganya mitima yawo, pontho munadzaatsalakana mwadidi.” (Masalmo 10:17) Mwandimomwene, tiri na mathangwi mazinji toera kupitiriza kucita phembero.
M’Bhibhlya ife tisagumana maphembero mazinji adacita Yezu. Phembero yakudziwika kakamwe, ndi ire idapfundzisa iye anyakupfundzace. Kodi ife tinapfundzanji na phembero ineyi?