Yezu Asandika Afarisi

Pidalonga apfundzisi a mwambo na Afarisi kuti Yezu nee asabulusa madimonyo na mphambvu ya Mulungu, pisapangiza kuti iwo akhatikana nzimu wakucena. Kodi iwo akhali kukhundu ya ani—ya Mulungu peno ya Sathani? Yezu alonga: ‘Khala ndimwe muti wadidi, misapo yanu inadzakhala yadidi; mbwenye khala ndimwe muti wakuipa, misapo yanu inadzakhalambo yakuipa, thangwi muti usadziwika na misapo yace.’—Mateu 12:33.

Mphyakusowa ndzeru kulonga kuti Yezu asabulusa madimonyo na mphambvu ya Sathani. Ninga mudafokotoza Yezu pa Nkhani ya Paphiri, nsapo ungakhala wadidi, muti ndi wadidi, tayu wakubvunda. Kodi nsapo wa Afarisi na kupambizira kwawo Yezu kusapangizanji? Iwo ndi akuipa. Yezu aapanga: ‘Imwe ana a nyoka, nakuti ndimwe anthu akuipa, munakwanisa tani kulonga pinthu pyadidi? Thangwi mulomo usalonga pire pidadzala muntima.’—Mateu 7:16, 17; 12:34.

Inde, mafala athu ndiwo anapangiza makhaliro a ntima wathu, pontho tisatongwa thangwi ya pyenepi. Na thangwi ineyi, Yezu alonga: ‘Ine ndinakupangani kuti pa Ntsiku Yakutongwa, anthu anadzatawirira mulando wa mafala onsene akukhonda thema analonga iwo; khala mafala ako ndi adidi, unadzaoniwa kuti ndiwe wakulungama, mbwenye khala mafala ako ndi akuipa, unadzakhala na mulando.’—Mateu 12:36, 37.

Maseze Yezu akhadamala kale kucita pirengo, apfundzisi a mwambo na Afarisi akulumiza Yezu toera kucita pirengo pinango: ‘Mpfundzisi, ife tisafuna mutipangize cidzindikiro cibodzi.’ Mwakukhonda tsalakana khala iwo akhadaona Yezu mbakacita pirengo peno nkhabe, mbwenye anthu azinji akhadaona pirengo pyace. Natenepa Yezu apanga atsogoleri Aciyuda: ‘Imwe anthu akuipa na akukhonda bvera Mulungu, musapitiriza kusaka cidzindikiro, mbwenye nee cidzindikiro cibodzi cinafuna kupangizwa imwe, kusiyapo cidzindikiro ca mprofeta Yona.’—Mateu 12:38, 39.

Natenepa Yezu aafokotozera mabvekero a pyenepi: ‘Ninga Yona adamala ntsiku zitatu masiku na masikati m’mimba mwa ntsomba ikulu ya m’madzi, munjira ibodzi ene Mwana wa munthu anadzamala ntsiku zitatu masiku na masikati mu nthumbi.’ Yona amezwa na ntsomba ikulu, buluka penepo mbaphulwa ninga kulamuswa muli wakufa. Mu ndzidzi unoyu, Yezu akhalonga pya iye kuti anadzafa mbalamuswa muli akufa pa ntsiku yacitatu. Mudakwanirisika pyenepi, atsogoleri aciyuda akhonda ‘cidzindikiro ca Yona,’ pontho akhondambo kutcunyuka na kucinja. (Mateu 27:63-66; 28:12-15) Mbwenye ‘anthu a ku Ninive’ atcunyuka pidamwazirwa iwo mphangwa na Yona. Natenepa dzindza iyi inadzatongwa na iwo. Yezu alonga kuti citsandzo ca nyanyi wa ku Sebha cinadzaatongambo. Iye akhafuna kubva udziwisi wa Salomoni, pontho adzumatirwa na pyenepi. Na thangwi ineyi, Yezu aapanga kuti ‘anapiringana Salomoni ali pano.’—Mateu 12:40-42.

Yezu asalandanisa makhaliro a dzindza ineyi yakuipa na mamuna adabuluswa dimonyo. (Mateu 12:45) Nakuti mamuna unoyu nee asacalira manyerezero akuipa, dimonyo ineyi isabwerera na madimonyo anango manomwe akuipa kakamwe kupiringana iye, buluka penepo mbankunda. Munjira ibodzi ene, dzindza ya Izraeli yaceneswa ninga mamuna ule adabuluswa dimonyo. Mbwenye dzindza yakhonda aprofeta a Mulungu, mbamalisira na kutcinga Yezu, wakuti akhali na nzimu wa Mulungu. Pyenepi pisapangiza kuti makhaliro a dzindza ineyi adzatekera kakamwe kupiringana pakutoma.

Pikhalonga Yezu, mai wace na acibale ace abwera mbakhala cifupi na mwinji wa anthu. Anango adakhala cifupi na Yezu alonga: ‘Mai wanu na abale anu ali kunja, iwo asafuna kuonana na imwe.’ Toera kupangiza kuti iye asafuna kakamwe anyakupfundzace ninga acibale acimuna na acikazi, pontho ninga mai wandimomwene, iye athonya anyakupfundzace mbalonga: ‘Mai wanga na abale anga ndi awa anabvesera mafala a Mulungu mbaaphatisira.’ (Luka 8:20, 21) Natenepa, iye apangiza kuti, maseze acibale ace ndi akufunika, uxamwali na anyakupfundzace ndi wakufunika kakamwe. Ndi pyakutsandzayisa kakamwe kukhala na abale auzimu, makamaka khala anthu asapenula peno kusumula mabasa athu adidi!