Mibvundzo Inacitwa Na Anyakuleri

▪ Nkhabe, nee Bhibhlya peno mabukhu anango asalonga kuti Akristu akhabatizwa thangwi ya anyakufa mu ndzidzi unoyu.

Munjira idathumburuzwa vesi ineyi m’Mabhibhlya mazinji isacitisa anthu anango kunyerezera kuti Akristu anango a mu ndzidzi wa Paulu akhabatizwa thangwi ya anyakufa. Mwacitsandzo, Mabhibhlya anango asalonga kuti: “Khala anthu nkhabe kulamuswa muli akufa, mphapo ale anabatizwa thangwi ya anyakufa anadzacitanji?”

Onani pidalonga anyakudziwisa pya Bhibhlya awiri. Mwacitsandzo, Dr.  Gregory Lockwood alonga kuti ubatizo ukhacitwa “thangwi ya anyakufa” ndi “ubatizo wakuti nee ukhagumanika m’mabukhu anango peno m’Bhibhlya.” Pontho mpfundzisi Gordon D. Fee alemba kuti: “Nkhabepo bukhu peno Bhibhlya inalonga thangwi ya ubatizo unoyu. Iye athimiza kuti Novo Testamento nee isalonga pyenepi, pontho nkhabepo umboni unapangiza kuti Akristu akutoma akhacita pyenepi nee magereja anango adaoneka mu ndzidzi udamala kufa apostolo.”

Bhibhlya isalonga kuti anyakupfundza a Yezu akhafunika ‘kucita anyakupfundza kuna anthu a madzindza onsene, mbaabatiza na kuapfundzisa toera abvere pinthu pyonsene’ pidaapanga iye. (Mat. 28:19, 20) Na thangwi ineyi, munthu mbadzati kubatizwa, akhafunika kupfundza, kukhulupira na kubvera Yahova pabodzi na Mwanace. Natenepa, munthu adafa peno ali m’masiye nee anakwanisa kucita pyenepi, ngakhale Nkristu ali m’maso nkhabe kwanisa kucita pyenepi kuna munthu adafa.—Koel. 9:5, 10; Juwau 4:1; 1 Akor. 1:14-16.

Mphapo Paulu akhafuna kulonganji?

Akristu anango a ku Korinto nee akhakhulupira pya kulamuswa muli akufa. (1 Akor. 15:12) Paulu apangiza kuti iwo akhali na maonero akuphonyeka. Munjira ipi? Thangwi iye alonga kuti ‘ntsiku zonsene akakhala pangozwi yakufa.’ Mbwenye iye akhali m’maso. Mwakukhonda tsalakana kuti iye ntsiku zonsene akhali pangozwi yakufa, mbwenye iye akhali na cinyindiro cakuti angafa mbadalamuswa mwauzimu toera kuenda kudzulu ninga pidacitika kuna Yezu.—1 Akor. 15:30-32, 42-44.

Akristu a ku Korinto akhafunika kudziwa kuti kukhala Nkristu wakudzodzwa pisabveka kuthimbana na nyatwa ntsiku zonsene, pontho iwo akhafunika kufa mbadzati kulamuswa muli akufa. Natenepa, mu ndzidzi ukhabatizwa iwo “mwa Kristu Yezu” iwo akhabatizwambo “mu kufa kwace.” (Aroma 6:3) Pyenepi pisabveka kuti ninga Yezu, iwo akhafunika kuthimbana na nyatwa mbafa, buluka penepo mbalamuswa muli akufa toera kuenda kudzulu.

Pidapita pyaka pyakupiringana piwiri Yezu mbadamala kale kubatizwa, iye apanga apostolo ace awiri kuti: ‘Imwe munadzabatizwa na ubatizo unabatizwa na ine.’ (Marko 10:38, 39) Na mafala anewa Yezu nee akulonga pya ubatizo wa m’madzi, mbwenye ali kulonga pya ‘ubatizo mu kufa.’ Natenepa, Yezu apangiza pakweca kuti kukhulupirika kwace kuna Yahova mbakudancitisa kuluza umaso. Pontho Paulu alemba kuti Akristu akudzodzwa ‘angatawira kuona nyatwa ninga Kristu, anadzapaswambo mbiri pabodzi na iye.’ (Aroma 8:16, 17; 2 Akor. 4:17) Natenepa anyakudzodzwa asafunika kufa buluka penepo mbalamuswa muli akufa toera kuenda kudzulu.

Mwakubverana na pyonsene pidadinga ife mu nsolo uno, ife tinakwanisa kubvesesa mafala a Paulu munjira iyi: “Khala anyakufa nee anadzalamuswa, mphapo thangwi yanji anango akubatizwa mu kufa? Khala anyakufa nee anadzalamuswa, mphapo thangwi yanji iwo asabatizwa na cifuno ceneci?”