Munakhala Tani Akutsandzaya M’banja Yanu?

 1. Maseze kazinji kene banja isatoma mwakutsandzayisa, kodi ale anamanga banja asadikhira kuthimbana nanji? (Onani cithundzithundzi cakutoma.)

MAMUNA angaona mankhadzi wace wakubalika pa ntsiku yawo yakumanga banja, uwiri wawo asakhala akutsandzaya kakamwe. Mu ndzidzi ukhabanyirana iwo, ufuni wawo kwa unango na ndzace wakula kakamwe. Cincino, iwo ali dzololo toera kupikira kuti anakhala akukhulupirika kwa unango na ndzace mu umaso wawo onsene. Pakumala kumanga banja, munatoma iwo kukhala pabodzi, asafunika kucita macinjo toera apitirize kukhala akuphatana. Ninga Nciti wa banja, Yahova asafuna kuti banja ibodzi na ibodzi ikhale yakutsandzaya na umaso wadidi kakamwe. Natenepa, iye asapereka uphungu wadidi kakamwe m’Mafalace, Bhibhlya. (Misangani 18:22) Ngakhale tenepo, Bhibhlya isatipanga kuti anthu akusowa ungwiro anamanga banja anadzathimbana na ‘nyatwa m’manungo mwawo.’ (1 Akorinto 7:28) Kodi anyakumanga banja anakwanisa tani kupungula nyatwa zenezi? Pontho Akristu anacitanji toera banja yawo ikhale yakutsandzaya?

 2. Ndi mitundu ipi ya ufuni yakuti anyakumanga banja asafunika kuipangiza?

² Bhibhlya isapfundzisa kuti ufuni ndi n’khaliro wakufunika kakamwe. Mbwenye pana mitundu yakusiyana-siyana ya ufuni yakuti anyakumanga banja asafunika kuipangiza pabanja. Mwacitsandzo, iwo asafunika kupangiza kukoma ntima na ufuni unapangiza mabvero a mamuna na nkazi kuna unango na ndzace. Angakhala na ana, kupangiza ufuni kwa anthu a m’banja kusakhala kwakufunika kakamwe. Mbwenye toera banja ifambe mwadidi, pisaphemba kupangiza ufuni wakutsogolerwa na midida. Mpostolo Paulu afokotoza ufuni unoyu pidalonga iye kuti: ‘M’bodzi na m’bodzi wa imwe asafunika kufuna nkazace ninga iye ene; munjira inango, nkazi asafunika kulemedza kakamwe mamunace.’​—Aefesi 5:33.

 3. Kodi ufuni usafunika kukhala wakuwanga mpaka papi m’banja?

³ Paulu alemba: ‘Imwe amuna, funani akazanu sawasawa ninga mudafunira Kristu anthu a m’mpingo, mbaperekeka thangwi ya mpingo.’ (Aefesi 5:25) Lero, Akristu asatowezera citsandzo ca Yezu mu kupangiza ufuni kuna unango na ndzace ninga munafunira Yezu anyakupfundzace. (Lerini Jwau 13:34, 35; 15:12, 13.) Mamuna peno Nkazi Wacikristu wakumanga banja asafunika kufunana kakamwe unango na ndzace mpaka kukulumizika toera kufera ndzace. Mbwenye khala pabanja pana nyatwa zakunentsa kakamwe, anango anabva kuti ufuni wawo wafewa kakamwe. Ninji cinafuna kuaphedza? Ndi ufuni wakutsogolerwa na midida wakuti ‘usapirira pinthu pyonsene, usakhulupira pinthu pyonsene, usadikhira pinthu pyonsene.’ Ntundu unoyu wa ufuni ‘nkhabe kumala.’ (1 Akorinto 13:7, 8) Anyakumanga banja asafunika kukumbuka kudumbira kudacita iwo. Iwo apikira kuti anadzafunana unango na ndzace, mbakhala akukhulupirika kuna unango na ndzace. Kukumbuka pyenepi pinaphedza Akristu akumanga banja toera kusaka ciphedzo ca Yahova mbawangisira pabodzi pene toera kumalisa nyatwa zawo.

4, 5. (a) Ndi basa ipi iri na mamuna ninga nsolo wa banja? (b) Kodi nkazi asafunika kuona tani citsogolero ca mamunace? (c) Ndi macinjo api akuti banja ya Fred na Kátia akhafunika kuacita?

⁴ Paulu afokotoza mabasa a m’bodzi na m’bodzi pabanja pidalonga iye kuti: ‘Akazi angonjere amuna awo ninga Mbuya. Thangwi mamuna ndi nsolo wa nkazace sawasawa ninga Kristu ndi nsolo wa mpingo.’ (Aefesi 5:22, 23) Pyenepi nee pisabveka kuti mamuna ndi wakufunika kakamwe kupiringana nkazace. Yahova apangiza basa yakufunika ya nkazi pidalonga iye kuti: ‘Si pyadidi tayu kuti mamuna apitirize kukhala ekhene. Ndinancitira ndzace toera kumphedza.’ (Genesi 2:18) Nkazi asafunika kuphedza mamunace toera akhale nsolo wadidi wa banja. Yezu Kristu ndi ‘nsolo wa mpingo,’ iye asapangiza ufuni kakamwe. Munjira ibodzi ene, mamuna wakumanga banja asafunika kukhala nsolo wa banja waufuni. Angacita pyenepi, nkazace anaona kuti ali wakutsidzikizika, pontho pisacitisa nkazi toera kungonjera, kulemedza na kuphedzera mamunace.

⁵ Kátia adamanga banja na Fred, alonga: “Mbandidzati kumanga banja, ndikhacita pikhafuna ine, mbanditsalakana ndekhene umaso wanga. Pidamanga ine banja, ndikhafunika kucita macinjo thangwi ndikhafunika kunyindira mamunanga. Mwandimomwene, midzidzi inango pisanentsa, mbwenye kucita pinthu ninga munafunira Yahova, pisatiphedza toera kukhala akuphatana kakamwe ninga banja.”^[1] (Onani cidzindikiro kunkhomo kwa nsolo uno.) Fred alonga: “Kucita pisankhulo mphyakunentsa kwa ine. Ungamanga banja, pinthu pisanentsa kakamwe thangwi usafunika kucita pisankhulo pya anthu awiri. Mbwenye kusaka citsogolero ca Yahova, kucita phembero na kubvesera maonero a nkazanga, pisandiphedza ntsiku zonsene. Ndisabva kuti mwandimomwene ndife a nsoka ubodzi ene!”

 6. Ufuni unakwanisa tani kucitisa mamuna na nkazi kukhala ninga “akumangiwa na nkhambala” angathimbana na nyatwa m’banja?

⁶ Mabanja anakhala akuwanga kakamwe khala amuna na akazi ‘asapitiriza kupirirana unango na ndzace mbalekererana na ntima onsene.’ Nakuti ndi akusowa ungwiro, uwiri wawo anapitiriza kucita madodo. Pyenepi pingacitika, iwo asafunika kupfundza kubulukira ku madodo awo, kupfundza kulekererana, mbapangiza ufuni wakutsogolerwa na midida ya Bhibhlya. Ufuni unoyu unaacitisa kukhala akuphatana ninga “akumangiwa na nkhambala.” (Akolose 3:13, 14) Anyakumanga banja anakwanisa kupangiza ufuni unoyu mukukhala wakupirira na wacitsalakano ‘mwakukhonda kukoya pinthu muntima.’ (1 Akorinto 13:4, 5) Pangaoneka kukhonda bverana, banja isafunika kuwangisira toera kumalisa nyatwa zenezi mwakukhonda dembuka, dzuwa mbidzati kudoka. (Aefesi 4:26, 27) Pisaphemba kucepeseka na cipapo toera kulonga kuti “munandilekerera thangwi ya kukutsukwalisani,” mbwenye kucita pyenepi kunaphedza toera kumalisa nyatwa, mbapicitisa anyakumanga banja kukhala akuphatana kakamwe.

7, 8. (a) Kodi Bhibhlya isapereka uphungu upi thangwi yakupita m’mabonde m’banja? (b) Thangwi yanji anyakumanga banja asafunika kupangiza kukoma ntima?

⁷ Bhibhlya isapereka uphungu wadidi toera kuphedza anyakumanga banja toera kukhala na maonero akulinganira thangwi yakupita m’mabonde. (Lerini 1 Akorinto 7:3-5.) Nkazi na mamuna asafunika kutsalakana mabvero a unango na ndzace. Mamuna angakhonda kupangiza kukoma ntima kuna nkazace, panango nkazi nee anakhala na cifuno toera kupita m’mabonde na mamunace. Amuna asafunika kutsalakana akazawo ‘mwakubverana na cidziwiso.’ (1 Pedro 3:7) Kupita m’mabonde cipo kusafunika kucitwa mwakukakamizwa peno kukumbusa ninga ndi mangawa, m’mbuto mwace kusafunika kucitwa mwakufuna. Kazinji kene, mamuna nkhabe nentsa kukhala na cifuno, mbwenye ndzidzi wakupita m’mabonde usafunika kukhala wakuthema kwa uwiri wawo.

⁸ Bhibhlya nkhabe kupereka mitemo inafokotoza mitundu yakuthema ya macitiro akupangiza ufuni akuti mamuna na nkazace asafunika kuapangiza ninga khundu ya kupita kwawo m’mabonde. Mbwenye Bhibhlya isafokotoza pya macitiro akupangiza ufuni. (Nyimbo Ikulo 1:2; 2:6) Nkazi na mamuna akumanga banja asafunika kutsalakanana mwakukoma ntima unango na ndzace.

 9. Thangwi yanji mphyakuipa kupangiza cifuno cakupita m’mabonde na munthu wakuti nee ndi ndzathu wa m’banja?

⁹ Tingakhala na ufuni wakuwanga kuna Mulungu na andzathu, nee tinadzatawirisa kuti munthu unango peno cinthu cinango ciikhe pangozwi banja yathu. Anango aikha pangozwi peno afudza banja yawo thangwi ya nsambo wakuona ucipezipezi. Tisafunika kucalira cifuno consene cakuona ucipezipezi peno mitundu yonsene yakuipa ya pifuno pyakupita m’mabonde. Tisafunikambo kucalira macitiro onsene anapangiza kuti tisafuna munthu wakuti nee ndi ndzathu wa m’banja. Kucita pyenepi pinapangiza kusowa ufuni. Tisafunika kukumbuka kuti Yahova asadziwa manyerezero athu na macitiro athu onsene. Pyenepi pinadzatiphedza toera kuwangisa cifuno cathu cakukomeresa Yahova na kupitiriza kukhala akukhulupirika kuna ndzathu wa m’banja.​—Lerini Mateo 5:27, 28; Ahebere 4:13.

10, 11. (a) Kodi kukhondana kwathimizirika mpaka papi lero? (b) Kodi Bhibhlya isalonganji thangwi ya kumwazana? (c) Ninji cinafuna kuphedza anyakumanga banja toera kucalira kumwazana mwakucimbiza?

¹⁰ Nyatwa za m’banja zingapitiriza nee kutsalakanwa, anango asanyerezera kuti mphyadidi kumwazana peno kukhondana. M’madziko anango, hafu ya numero ya ale anamanga banja, asakhondana. Ndimomwene kuti pyenepi nee pisacitika kazinji kene m’mpingo Wacikristu. Mbwenye lero Akristu azinji akumanga banja asathimbana na nyatwa zakunentsa kakamwe m’banja.

¹¹ Bhibhlya isapereka uphungu uyu: ‘Nkazi akhonde kumwazana na mamunace. Mbwenye angamwazana, akhale tenepo nee kumanga banja, peno abwererane na mamunace. Mamunambo akhonde kusiya nkazace.’ (1 Akorinto 7:10, 11) Anango asaona kuti nyatwa zawo ndi zakunentsa kakamwe, natenepa, asanyerezera kuti mphyadidi kumwazana. Mbwenye Yezu apangiza kuti kumwazana ndi kwakuipa kakamwe pidabwerezera iye mafala adalonga Yahova thangwi ya banja, buluka penepo mbathimiza: ‘Pidagumanya Mulungu, munthu aleke kupimwaza.’ (Mateo 19:3-6; Genesi 2:24) Natenepa, Yahova asafuna kuti mamuna akhale pabodzi na nkazace. (1 Akorinto 7:39) Tonsene tisafunika kukumbuka kuti tinadzatawirira pamaso pa Yahova thangwi ya macitiro athu. Kudziwa pyenepi kunatiphedza toera kumalisa nyatwa zathu mwakucimbiza kakamwe mu ndzidzi wakuti zidzati kutekera.

12. Ninji pinacitisa anyakumanga banja kunyerezera pya kumwazana?

¹² Anyakumanga banja anango asanentseka kakamwe thangwi mbadzati kumanga banja akhali na pidikhiro pyakuphonyeka. Natenepa, angaona kuti banja yawo nee isabverana na pikhadikhira iwo, asanentseka kakamwe peno asatsumbikika mbaona ninga acita cisankhulo cakuphonyeka. Kazinji kene, nyatwa zisaoneka thangwi yakusiyana kwa njira idakuzirwa anthu peno mabvero anapangiza iwo. Kukhonda bverana na atebzwala, peno kuphonyana maonero thangwi ya njira yakuphatisira kobiri peno njira yakukuza ana pinakwanisa kubweresa nyatwa m’banja. Mbwenye mphyadidi kakamwe kuona kuti Akristu azinji akumanga banja asakwanisa kuthimbana mwadidi na nyatwa zawo thangwi iwo asatawira kutsogolerwa na Mulungu.

13. Ndi api mathangwi akuthema toera kumwazana?

¹³ Midzidzi inango anthu asakhala na mathangwi akulinganira toera kumwazana. Mwacitsandzo, khala mamuna asakhonda cakhomo kutsalakana banja, khala munthu asatsalakanwa mwakuipa kakamwe, pontho khala umaso wauzimu wa Nkristu uli pangozwi kakamwe. Akristu anathimbana na nyatwa zakunentsa ninga zenezi m’banja, asafunika kuphemba ciphedzo ca akulu a mpingo. Akulu a mpingo ali na maluso mazinji, pontho anakwanisa kuphedza anyakumanga banja toera kuphatisira uphungu wa Mulungu mu umaso wawo. Pontho, anyakumanga banja angaphemba ciphedzo ca nzimu wakucena wa Yahova, pinaaphedza toera kuphatisira midida ya Bhibhlya na kupangiza makhaliro Acikristu. (Agalata 5:22, 23)^[2]​—Onani cidzindikiro kunkhomo kwa nsolo uno.

14. Kodi Bhibhlya isalonganji kuna Akristu adamanga banja na munthu wakuti nee asatumikira Yahova?

¹⁴ Bhibhlya isapangiza mathangwi adidi toera anyakumanga banja apitirize kukhala pabodzi, maseze mamuna peno nkazi nee asalambira Yahova. (Lerini 1 Akorinto 7:12-14.) Mamuna peno nkazi wakukhonda khulupira ‘asaceneswa’ thangwi yakumanga banja na ntumiki wa Yahova. Ana ang’ono a banja ineyi asaoniwambo ninga “akucena,” natenepa ali pantsi pa citsidzikizo ca Mulungu. Paulu awangisa Akristu akumanga banja: ‘Nkazi, unadziwa tani kuti unadzapulumusa mamunako? Iwembo mamuna, unadziwa tani kuti unadzapulumusa nkazako?’ (1 Akorinto 7:16) M’mipingo yonsene muli na abale na alongo akumanga banja a citsandzo cadidi akuti akwanisa kuphedza amunawo peno akazawo toera kutumikira Yahova.

15, 16. (a) Kodi Bhibhlya isapereka uphungu upi kuna abale na alongo akuti andzawo a m’banja nee asatumikira Yahova? (b) Kodi Nkristu asafunika kucitanji khala ‘nyakukhonda khulupira asankhula kumwazana’?

¹⁵ Mpostolo Pedhru asapereka uphungu kuna akazi Acikristu toera kubvera amunawo, natenepa, ‘khala iwo nee asabvera mafala a Mulungu, akwewiwe na imwe akazawo, nee kupangwa mafala, thangwi yakuona makhaliro anu adidi na cilemedzo canu cikulu.’ M’mbuto mwakucedza pya cikhulupiro cace ndzidzi onsene, nkazi anakwanisa kuphedza kakamwe mamunace toera kutawira undimomwene khala iye asapangiza ‘nzimu wakukhurudzika na wakupfulika wakuti ndi wa ntengo ukulu kakamwe pamaso pa Mulungu.’​—1 Pedro 3:1-4.

¹⁶ Mbwenye ndiye tani khala nyakukhonda khulupira asankhula kusiya ndzace wa m’banja? Bhibhlya isalonga: ‘Nyakukhonda khulupira angafuna kuenda pyace, mbaende. Thangwi m’bale wathu wamamuna peno wankazi nee asakakamizwa kuphatana naye. Mbwenye Mulungu akucemerani toera mukhale na ntendere.’ (1 Akorinto 7:15) Maseze kumwazana kunabweresa ntendere pang’ono, mbwenye mwakubverana na Bhibhlya, Nkristu nee ali wakusudzuka toera kumanga banja na munthu unango. Ngakhale tenepo, Nkristu nee asafunika kukakamiza mamunace peno nkazace toera akhonde kubuluka. Mukupita kwa ndzidzi, panango nyakukhonda khulupira anasankhula kubwererana na mamunace peno nkazace. Panango, ntsogolo nyakukhonda khulupira anadzakhala ntumiki wa Yahova.

17. Ndi cinthu cipi cakuti Akristu akumanga banja asafunika kuciikha pa mbuto yakutoma?

¹⁷ Nakuti tiri kunkhomo kwa “ntsiku zakumalisa,” ife tisathimbana na ‘midzidzi yakunentsa kupirira.’ (2 Timoti 3:1-5) Natenepa, toera kutsidzikizika ku makhaliro akuipa a dziko, tisafunika kukhala na uxamwali wakuwanga na Yahova. Paulu alonga kuti ‘ndzidzi udasala ndi wakucepa. Natenepa, kubulukira pano kuenda ntsogolo, ale ali na akazi akhale ninga nee ali nawo, ale anaphatisira dziko akhale ninga nee akuiphatisira mwakukwana.’ (1 Akorinto 7:29-31) Paulu nee akhafuna kulonga kuti anyakumanga asafunika kupwaza andzawo a m’banja. Mbwenye nakuti tikukhala mu ntsiku zakumalisa, tisafunika kuikha ulambiri wathu kwa Yahova pa mbuto yakutoma.​—Mateo 6:33.

18. Kodi Akristu anakwanisa tani kukhala na banja yakutsandzaya?

¹⁸ M’midzidzi ino yakunentsa, tisaona mabanja mazinji mbakafudzika. Ngakhale tenepo, mphyakukwanisika kukhala na banja yakutsandzaya khala anyakumanga banja asakulisa uxamwali na Yahova pabodzi na atumiki ace, kuphatisira midida ya Bhibhlya na kutawira citsogolero ca nzimu wakucena wa Yahova. Munjira ineyi, iwo asatsidzikiza ‘pidagumanya Mulungu.’​—Marko 10:9.