“Khalani Maso Mbamukhonda Kupwaza Kuphembera”

“Khalani andzeru, pontho khalani maso mbamukhonda kupwaza kuphembera.”​—1 PED. 4:7, Tradução do Novo Mundo.

MUNATAWIRA TANI?

Kodi ndi mitundu ipi inango ya maphembero isafunika imwe kucita kazinji kene?

Thangwi yanji Akristu andimomwene asafunika kuphembera ndzidzi onsene?

Mbani anaphindula mungaphemberera anango?

1, 2. (a) Thangwi yanji ndi kwakufunika ‘kukhala maso mbatikhonda kupwaza kuphembera’? (b) Kodi ndi mibvundzo ipi inalonga pya phembero yakuti tisafunika kubvundzika?

MAMUNA m’bodzi wakuti akhaphata basa na masiku alonga, “Ndzidzi wakunentsa kakamwe na masiku toera kukhala maso ndi ndzidzi wa m’bambakuca.” Anango akuti nee asafunika kugona na masiku mbadatawira. Akristu alero asathimbana na mipingizo ibodzi ene thangwi ya ntsiku ya makhaliro a pinthu pya dziko ino yakuipa ya Sathani, cincino ntsiku ineyi iri n’cidima kakamwe m’mbiri yace. (Arom. 13:12) Mbipidakhala pyakugopswa tani kwa ife kugona mu ndzidzi uno wakumalisa! Mphyakufunika kwa ife ‘kukhala andzeru’ na kubvesera cenjezo ya Bhibhlya, “khalani maso mbamukhonda kupwaza kuphembera.”​—1 Ped. 4:7, NM.

² Thangwi ya ndzidzi unakhala ife, mphyandzeru kubvundzika tekhene: ‘Kodi ndisakhala maso mbandikhonda kupwaza kuphembera? Kodi ndisacita ntundu onsene wa maphembero, na ndisaphembera ndzidzi onsene? Ndiri na nsambo wakuphemberera anango, peno maphembero anga ndisalonga basi ene pinthu pinafuna ine? Kodi ndi kwakufunika tani kuphembera thangwi ya cipulumuso canga?’

PITIRIZANI KUCITA NTUNDU ONSENE WA MAPHEMBERO

 3. Kodi ndi mitundu ipi inango ya maphembero?

³ Mu tsamba yace idalembera iye Aefesi, mpostolo Paulu alonga pya ‘ntundu onsene wa maphembero.’ (Aef. 6:18) Kazinji kene m’maphembero athu, tisafunika kudembetera Yahova toera atiphedze kukwanirisa pifuno pyathu na kukunda mipingizo. Yahova, “Wakubvera maphembero” mwaufuni asabvesera maphembo athu toera kuphedza. (Sal. 65:2) Natenepa, tisafunika kuwangisira toera kucita mitundu inango ya maphembero. Pyenepi pisaphataniza maphembero akusimba, akupereka takhuta, na akudembetera.

 4. Thangwi yanji tisafunika kazinji kene kusimba Yahova m’maphembero athu?

⁴ Pana mathangwi mazinji akuti maphembero athu kwa Yahova asafunika kuphataniza mafala akusimba. Mwacitsandzo, tisakulumizwa kunsimba munanyerezera ife “mabasa ache makulu” na “ukulu wache kakamwe.” (Lerini Masalmo 150:1-6.) Thangwi yace mavesi matanthatu a Masalmo kapitulu 150 asaticenjeza m’maulendo 13 toera kusimba Yahova! Na kulemedza kakamwe Mulungu, nyakulemba unango wa Masalmo alonga: “Ntsiku na ntsiku ndinakusimbani kanomwe, thangwi ya ulinganiri unatonga na Imwe.” (Sal. 119:164) Mwandimomwene Yahova athema toera kusimbwa. Natenepa, kodi tisafunika kunsimba ‘kanomwe pa ntsiku’ m’maphembero athu? Na tisacita pyenepi kazinji kene?

 5. Kodi nzimu wakupereka takhuta pakucita phembero usatsidzikiza tani?

⁵ Kupereka takhuta ndi ntundu unango wakufunika wa phembero. Paulu acenjeza Akristu a nzinda wa Filipi: ‘Lekani kutsamala nee na cinthu cibodzi tayu, mbwenye pa kulonga maphembero, pa kudembetera, pa kuperekambo takhuta mudziwise Mulungu pinthu pyanu pyonsene.’ (Afil. 4:6) Pasagumanika citsidzikizo mu kupereka takhuta kubulukira mu ntima mu phembero kwa Yahova. Makamaka ndi thangwi yakuti tisakhala mu ntsiku zakumalisa zakuti anthu ndi ‘akukhonda kupereka takhuta.’ (2 Tim. 3:1, 2, Mphangwa Zadidi) Dziko yadzala na nzimu wakukhonda kupereka takhuta. Tingakhonda kucita mphole-mphole, nzimu unoyu unatikhuya mwakukhonda nentsa. Kupereka takhuta kwa Mulungu mu phembero kusaticitisa kukhala akutsandzaya na kusatitsidzikiza toera kukhonda ‘kudungunya na pinthu pya umaso.’ (Yuda 16) Kusiyapo pyenepi, misolo ya banja ingaphataniza kupereka takhuta m’maphembero anacita iwo pabodzi na anyakufunika awo, iwo asawangisa nzimu wakupereka takhuta kwa akazi awo na anawo.

6, 7. Ninji kudembetera, na ndi pinthu pipi pyakuti tinakwanisa kudembetera Yahova?

⁶ Kudembetera ndi phembero ya mphambvu na isaphatanizwa na mabvero akuwanga. Kodi ndi pinthu pipi pyakuti tinakwanisa kudembetera Yahova? Tinakwanisa kucita pyenepi tingatcingwa peno tingagwerwa na utenda wakugopswa. Pa midzidzi ineyi, maphembero athu toera kuphedzwa na Mulungu asakhala madembetero. Kodi ndi m’midzidzi ineyi basi yakuti tinakwanisa kudembetera Yahova?

⁷ Dingani phembero yacipangizo ya Yezu, pontho onani pidalonga iye thangwi ya dzina ya Mulungu, Umambo wace, na Cifuno cace. (Lerini Mateo 6:9, 10.) Dziko ino yadzala na uipi, pontho mautongi a anthu nkhabe kwanisa kutsalakana pyakufunika pya anthu awo. Mwandimomwene, tisafunika kuphembera toera dzina ya Baba wathu wakudzulu iceneswe, pontho toera Umambo wace usudzule dziko m’manja mwa utongi wa Sathani. Uno ndi ndzidzi toera kudembetera Yahova kuti cifuno cace cicitike pantsi pano ninga kudzulu. Natenepa, tendeni tikhale maso mbaticita mitundu yonsene ya maphembero.

‘PHEMBERANI NDZIDZI ONSENE’

8, 9. Thangwi yanji tisafunika kucalira kusandika Pedhro na apostolo anango adagona m’munda wa Getsemani?

⁸ Ngakhale kuti mpostolo Pedhro acenjeza Akristu toera ‘kukhala maso mbakhonda kupwaza kuphembera,’ iye adodomeka kukhala maso pa ndzidzi unango. Iye akhali m’bodzi wa anyakupfundza akuti agona pa ndzidzi ukhaphembera Yezu m’munda wa Getsemani. Ngakhale pidamala Yezu kulonga na iwo toera ‘akhale maso, mbaphembera ndzidzi onsene,’ iwo nee acita pyenepi.​—Lerini Mateo 26:40-45.

⁹ Mbuto mwakusandika Pedhro na apostolo anango thangwi ya kudodoma kwawo kukhala maso, natenepa, mbipidakhala mwadidi kwa ife kukumbuka kuti pa ntsiku ineyi manungo awo akhadaneta. Iwo akhadakhunganyika Paskwa mbaicita ncidodo ca ntsiku ineyi. Buluka penepo, Yezu atomesa Cakudya Cancidodo ca Mbuya, mbakhazikisa citsandzo toera kucita Cikumbuso ca kufa kwace ntsogolo. (1 Akor. 11:23-25) “Adzamale iwo aimba nyimbo zakusimba Mulungu, mbaenda ku Phiri ya Mirivera,” afamba nsindzo wakulapha pang’ono m’miseu ming’ono ya Yerusalemu. (Mat. 26:30, 36) Panango ukhadapita ndzidzi wa tcititciti. Khala ife tikhalimbo m’munda wa Getsemani masiku anewa, panango mbitidagonambo. Mbuto mwakusandika apostolo ace akuti akhali akuneta, mwaufuni, Yezu adzindikira kuti “nzimu ngwakufuna pyadidi, mbwenye manungo mbakufewa.”

10, 11. (a) Kodi Pedhro apfundzanji kubulukira mu pinthu pidancitikira m’munda wa Getsemani? (b) Kodi pidacitikira Pedhro pisakukhuyani tani?

¹⁰ Pidacitika m’munda wa Getsemani nee pikhali pyakukhonda kufunika kuna Pedhro. Iye apfundza mu njira yakunentsa kakamwe thangwi ya kukhonda kwace kukhala maso. Mwakukhonda dembuka, Yezu alonga: ‘Masiku ano monsene munadzandithawa.’ Mbwenye, Pedhro atawira: ‘Ngakhala onsene anadzakuthawani, ine pano cipo ndinadzakuthawani!’ Penepo Yezu apanga Pedhro kuti mbadankhonda katatu. Mwakukhonda dzudzumika, Pedhro alonga: ‘Pakufa kwene na imwe pabodzi, sinadzakukhondani tayu; cipo na cipo sinadzakukhondani tayu.’ (Mat. 26:31-35) Ngakhale tenepa, Pedhro ankhonda, ninga mukhadalongera Yezu. Na kutsukwala thangwi ya kukhonda kwace Yezu, Pedhro ‘alira misozi yakuwawa.’​—Luka 22:60-62.

¹¹ Mwandimomwene, Pedhro apfundza kubulukira ku cakucitika ceneci na akunda cipendamiro cakunyindirika ekhene. Mwapakweca, phembero yaphedza Pedhro mu cakucitika ceneci. Na thangwi ineyi, ndi wakufunika kakamwe uphungu unoyu udalonga Pedhro wakuti “khalani maso mbamukhonda kupwaza kuphembera.” Kodi tisabvera uphungu unoyu wakupumirwa? Kusiyapo pyenepi, kodi ‘tisaphembera ndzidzi onsene’ mbatipangiza kuti tisanyindira Yahova? (Sal. 85:8) Tendeni tikumbuke cenjezo ya mpostolo Paulu: ‘Munthu ananyerezera kuti alimira mwadidi, acite mphole gopa kugwa.’​—1 Akor. 10:12.

MAPHEMBERO A NEHEMIYA AKHATAWIRWA

12. Thangwi yanji Nehemiya ndi citsandzo cadidi kwa ife?

¹² Dingani pya Nehemiya wakuti akhali nyakupereka pyakumwa wa Mambo Artaksersi wa ku Persiya mu pyaka madzana maxanu M.N.W. Nehemiya akhazikisa citsandzo cadidi ca munthu anacita phembero mwaphinga. Mu ntsiku zace, iye akhacita “maphembero pa maso pa Mulungu” thangwi ya nyatwa za Ayuda mu Yerusalemu. (Neh. 1:4) Mudabvundzwa iye na Artaksersi kuti thangwi yanji akhali wakutsukwala, ‘penepale [Nehemiya] aphembera kwa Mulungu wa kudzulu.’ (Neh. 2:2-5) Kodi ninji pidacitika? Yahova atawira maphembero ace na atsalakana pinthu mu njira yakuphindulisa mbumba Yace. (Neh. 2:5, 6) Pyenepi pyawangisa kakamwe cikhulupiro ca Nehemiya!

13, 14. Tisafunika kucitanji toera tipitirize kukhala na cikhulupiro cakuwanga mbatikhonda kuwangisira kunacita Sathani toera kutifewesa?

¹³ Kuphembera ndzidzi onsene ninga pidacita Nehemiya kusatiphedza toera kukhala na cikhulupiro cakuwanga. Sathani ndi wakuipa, pontho kazinji kene asatiyesera m’makhundu akuti ndife akufewa. Mwacitsandzo, khala tikuthimbana na utenda peno kutsukwala, panango tinapibva kuti ndzidzi unaphatisira ife mu utumiki nthanda zonsene ndi wakucepa kakamwe kwa Mulungu. Panango, anango a ife anakwanisa kutsukwala thangwi ya pyakugumana napyo pyakale mu umaso wawo. Sathani asafuna kuti ife tinyerezere kuti ndife anthu akukhonda thema. Cifuno ca kutipomokera kwace, kazinji kene ndi toera kutifewesa na kufewesambo cikhulupiro cathu. Natenepa, tinakwanisa kukhala na cikhulupiro cakuwanga ‘tingakhala maso mbatikhonda kupwaza kuphembera.’ Mwandimomwene, kukhala na ‘cikhulupiro ninga cakugedera naco mapswimo cinatiphedza toera kuthimisa mapswimo akugaka moto akubulukira kuna Sathani.’​—Aef. 6:16, Chibverano Chachinchino.

¹⁴ Khala tiri ‘maso mbatikhonda kupwaza kuphembera,’ nee tinadzaphatwa na Sathani mwakututumusa, peno kuswa matongero a cikhulupiro cathu cingayeserwa mwakukhonda dikhira. Tingathimbana na mayesero na nyatwa, tisafunika kukumbuka citsandzo ca Nehemiya, mbaticita phembero kwa Mulungu pa ndzidzi unoyu. Basi ene na ciphedzo ca Yahova tinakwanisa kupembera pa kukhonda mayesero a Sathani na kupirira nyatwa zinayesera cikhulupiro cathu.

PHEMBERERANI ANANGO

15. Ndi mibvundzo ipi inafunika ife kubvundzika thangwi ya kuphemberera anango?

¹⁵ Yezu acita phembero yakudembetera thangwi ya Pedhro toera cikhulupiro cace cikhonde kufewa. (Luka 22:32) Epafra, Nkristu wakukhulupirika wa pyaka dzana yakutoma atowezera Yezu, mbawangisira ekhene mu kucitira phembero abale ace a ku Kolose. Paulu aalembera, “Iye aphembera mwaphinga kwa imwe ndzidzi onsene, kuti mukhale dzololo, akukhulupirika na akutonga kucita cifuno ca Mulungu.” (Akol. 4:12, The New English Bible) Mphyadidi kubvundzika tekhene: ‘Kodi ndisaphemberera mwaphinga abale anga a dziko yonsene ya pantsi? Kodi ndi kangasi m’maphembero anga ndisalonga pya abale anga Acikristu akuti akuthabuka thangwi ya pidengwa pyacibaliro? Kodi ndi lini mudakulumizika ine toera kuphemberera ale anaphata basa mwakuwanga mu gulu ya Yahova? Kodi cincino ndacitira phembero munthu wa m’mpingo wakuti akuthimbana na nyatwa?’

16. Kodi ndikwakufunika kakamwe kuphemberera anango? Fokotozani.

¹⁶ Maphembero athu kwa Yahova Mulungu thangwi ya anango, mwandimomwene anakwanisa kuaphedza. (Lerini 2 Akorinto 1:11.) Ngakhale kuti Yahova nee asakakamizika kutawira maphembo thangwi alambiri ace azinji asacita maphembero mwakubwereza-bwereza, iye asaona pifuno pyawo pyonsene, pontho asatsalakana pinthu pinaadzudzumisa mu ndzidzi unatawira iye maphembero awo. Mbwenye tisafunika kutsalakana mwadidi mwai wathu na basa yathu toera kuphemberera anango. Ninga Epafra, tisafunika kupangiza ufuni wathu wakubulukira mu ntima na kudzudzumika thangwi ya abale na alongo athu Acikristu mu kuwangisira kuaphemberera. Kucita pyenepi kunadzathimizira kutsandzaya kwathu, thangwi “kupasa kunakomeresa kupita kutambira.”​—Mach. 20:35.

‘CIPULUMUSO CATHU CIRI PADUZI’

17, 18. Kodi ‘kukhala maso mbatikhonda kupwaza kuphembera’ kunatiphedza tani?

¹⁷ Mbadzati kulonga kuti “masiku apita, masikati ali kufika,” Paulu alemba: ‘Mudzindikire mwadidi ndzidzi uno, mbamudziwa kuti ndzidzi wakulamuka n’citulo wafika. Cincino cipulumuso cathu ciri paduzi kupita ndzidzi ule udatoma ife kutawira.’ (Arom. 13:11, 12) Mulungu apikira kuti dziko ipswa iri cifupi, pontho kupulumuswa kwathu kuli cifupi kakamwe kupiringana munanyerezera ife. Nee tisafunika kugona mwauzimu, pontho nee tisafunika kutawira kudzudzumiswa na dziko toera kubvunga ndzidzi wathu wakuti mbitidauphatisira toera kucita phembero kwa Yahova. Mbuto mwace, tendeni ‘tikhale maso mbatikhonda kupwaza kuphembera.’ Kucita pyenepi kunadzatiphedza toera kucita ‘mabasa akucena a makhaliro na mabasa akuperekeka kwaumulungu’ mu ndzidzi unadikhira ife ntsiku ya Yahova. (2 Ped. 3:11, 12, NM) Makhaliro a umaso wathu anadzapangiza kuti tiri maso mwauzimu, pontho kuti tisakhulupiradi kuti kumala kwa makhaliro ano akuipa a pinthu kuli cifupi. Natenepa, tisafunika ‘kuphembera nee kupuma.’ (1 Ates. 5:17) Tendeni titowezerembo Yezu mu kusaka mbuto yadidi toera kucita phembero. Khala tisapitiriza kucita maphembero athu kwa Yahova, tinakwanisa kunfendedzera. (Tgo. 4:7, 8) Pontho pyenepi pinadzabweresa nkhombo kakamwe!

¹⁸ Bhibhlya isalonga: “Mukhakhala iye Kristu na manungo ache, apereka maphembero ache na kugaluza fala na kulirambo misozi, mbadembetera uyu akhakwanisa kumpulumusa pa kufa. Penepo abverwa thangwi iye akhalemedzadi Mulungu.” (Aheb. 5:7) Yezu acita maphembero akudembetera na kugaluza fala na kulira misozi mbapitiriza kukhala wakukhulupirika kwa Mulungu mpaka kufa kwace. Ninga maphindu, Yahova alamusa mwa akufa Mwanace wakufunika mbampasa umaso wauzimu kudzulu. Tinakwanisambo kukhala wakukhulupirika kwa Baba wathu wakudzulu mwakukhonda tsalakana mayesero na nyatwa zinafuna thimbana na ife ntsogolo. Mwandimomwene, tinakwanisa kukhala na umaso okhonda mala tingapitiriza ‘kukhala maso mbatikhonda kupwaza kuphembera.’

[Foto pa tsamba 7]

[Foto pa tsamba 9]

Ngakhale kuti Pedhro adodoma, iye apfundza ‘kukhala maso mbakhonda kupwaza kuphembera’ (Onani ndima 10, 11)

[Mafoto pa tsamba10]

‘Kukhala maso mbatikhonda kupwaza kuphembera’ kunatiphedza toera kuthimbana na mipingizo yakusiyana-siyana (Onani ndima 13, 14)