Khalani Akukhunganyika Ntsiku ya Yahova Mbidzati Kufika

 1. Tisafunika kucitanji toera tidzapulumuke pa ntsiku ya Yahova?

BHIBHLYA ingalonga pya “ntsiku ya Yahova” isalonga pya ndzidzi wakuti Yahova anadzafudza anyamalwa ace mbapulumusa atumiki ace. Kale, Yahova afudza madzindza anango akuti akhali anyamalwa ace. (Iza. 13:1, 6; Ezek. 13:5; Sof. 1:8) Ntsogolo, “ntsiku ya Yahova” inadzatoma mu ndzidzi wakuti atsogoleri a dziko anadzafudza Bhabhilonya Wankulu, buluka penepo mbitoma nkhondo ya Armajedhoni. Toera kudzapulumuka pa “ntsiku” ineyi, ife tisafunika kukhunganyika cincino. Yezu apfundzisa kuti nee tisafunika basi ene kukhunganyika “nyatwa ikulu” mbidzati kufika, mbwenye tisafunikambo “kukhala akukhunganyika.”—Mat. 24:21; Luka 12:40.

 2. Thangwi yanji mafala adalonga mpostolo Paulu pa 1 Atesalonika ndi akufunika kuna ife?

² Mu tsamba yakutoma idalembera iye Akristu a ku Tesalonika, mpostolo Paulu aphatisira pitsandzo pizinji toera kuphedza Akristu kuti apitirize kukhala akukhunganyika ntsiku ikulu ya Yahova mbidzati kufika. Paulu akhadziwa kuti ntsiku ya Yahova nee mbidafika pa ndzidzi unoyu. (2 Ates. 2:1-3) Ngakhale tenepo, iye akulumiza abale na alongo ace toera akhunganyike ntsiku ineyi ninga kuti mbidafika mangwana. Ife tisafunikambo kuphatisira uphungu unoyu. Natenepa tendeni titawire mibvundzo iyi: (1) Ntsiku ya Yahova inafika tani? (2) Mbani anafuna kudzafudzwa pa ntsiku ineyi? (3) Tinakhunganyika tani toera kudzapulumuka?

 3. Ntsiku ya Yahova inafika tani ninga mbava namasiku? (Onanimbo foto.)

³ “Ninga mbava namasiku.” (1 Ates. 5:2) Ceneci ndi citsandzo cakutoma mwa pitsandzo pitatu pidaphatisira Paulu toera kulonga pya kufika kwa ntsiku ya Yahova. Mambava kazinji kene asacita pinthu mwakucimbiza, pontho asafika namasiku mu ndzidzi wakuti anthu nee akhaadikhira. Ntsiku ya Yahova inafikambo mwakututumusa kuna anthu azinji. Ngakhale Akristu andimomwene, panango anadzumatirwambo angaona pinthu mbapicitika mwakucimbiza kakamwe. Mbwenye mwakusiyana na anthu akuipa, ife nee tinafudzwa.

 4. Ndi munjira ipi ntsiku ya Yahova yakhala ninga kubva kupha kunakhala na nkazi pakubala?

⁴ “Ninga kubva kupha kunakhala na nkazi pakubala.” (1 Ates. 5:3) Nkazi ali na mimba nee asadziwa ndzidzi unafuna iye kubala. Ngakhale tenepo, iye asakhala na cinyindiro cakuti anabala. Ntsiku ineyi ingafika, iye asabva kupha kakamwe mwakukhonda dikhira mpaka kubala kwace. Munjira ibodzi ene, ife nee tisadziwa ntsiku na ndzidzi unafuna kufika ntsiku ya Yahova. Mbwenye tiri na cinyindiro cakuti ntsiku ineyi inafuna kufudza Mulungu anthu akuipa inafika, pontho anthu akuipa nee anakwanisa kuthawa.

 5. Ndi munjira ipi nyatwa ikulu yakhala ninga kutoma kwa ceza camacibese?

⁵ Ninga kutoma kwa ceza camacibese. Citsandzo cacitatu ca Paulu cisalonga pontho pya mambava anaba namasiku. Mbwenye paulendo unoyu, Paulu alandanisa ntsiku ya Yahova na kutoma kwa ceza camacibese. (1 Ates. 5:4) Mambava anaba namasiku asadzudzumika kakamwe mbacimwana kuona kupita kwa ndzidzi. Panango ceza camacibese cinatoma iwo mbaoniwa. Munjira ibodzi ene, nyatwa ikulu inapangiza pakweca anthu akuti ninga mambava asakhala ncidima mbapitiriza kucita pinthu pyakuti nee pisakomeresa Mulungu. Mwakusiyana na anthu anewa, ife tinakwanisa kukhala akukhunganyika tingacalira kucita pinthu pyakuti nee pisakomeresa Yahova mbaticita “ntundu onsene wa udidi, ulungami na undimomwene.” (Aef. 5:8-12) Buluka penepo, Paulu aphatisira pitsandzo pinango piwiri toera kulonga pya anthu akuti nee anadzapulumuka.

 6. Ndi munjira ipi anthu azinji ali kugona? (1 Atesalonika 5:6, 7)

⁶ “Ale anagona.” (Lerini 1 Atesalonika 5:6, 7.) Paulu alandanisa anthu anafuna kudzafudzwa pa ntsiku ya Yahova na ale anagona. Iwo nee asadziwa pinthu pinacitika, pontho nee asadziwa kuti ndzidzi uli kupita. Natenepa iwo nee asadziwa ndzidzi unafuna kucitika cinthu cakufunika kakamwe, pontho nee anakwanisa kucita cinthu pa ndzidzi unoyu. Anthu azinji lero ali kugona n’citulo cauzimu. (Aroma 11:8) Iwo nee asakhulupira kuti tiri kukhala “mu ntsiku zakumalisa,” pontho kuti nyatwa ikulu inafika mwakukhonda dembuka. Macinjo makulu anacitika n’dziko, panango anacitisa anthu anango kutoma kukhala na cifuno cakubvesera mphangwa za Umambo. Mbwenye anthu azinji asagona mwauzimu m’mbuto mwakukhala m’maso. Ngakhale anthu anango anakhulupira kuti ntsiku ya Yahova inafika asanyerezera kuti iri kutali kakamwe. (2 Ped. 3:3, 4) Mbwenye ife tisadziwa kuti uphungu unoyu wakupitiriza kukhala m’maso ndi wakufunika kakamwe.

 7. Ale anafuna kufudzwa na Mulungu alandana tani na anthu akuledzera?

⁷ “Ale analedzera.” Mpostolo Paulu alandanisa anthu anafuna kudzafudzwa na Mulungu na ale analedzera. Anthu akuledzera nee asadzindikira pinthu pinacitika kuna iwo, pontho nee asacita pisankhulo pyadidi. Munjira ibodzi ene, anthu akuipa nee asabvera macenjezo a Mulungu. Iwo asasankhula kucita pinthu pyakuti pinaatsogolera toera kufudzwa. Mbwenye Akristu asapfundziswa toera apitirize kukhala na manyerezero adidi. (1 Ates. 5:6) Nyakufufudza pya m’Bhibhlya m’bodzi alonga kuti munthu anapitiriza na manyerezero adidi “asakhala wakukhurudzika, nee asagopa, pontho asanyerezera mwadidi mbacita pisankhulo pyadidi.” Thangwi yanji tisafunika kukhala akukhurudzika? Tingakhala akukhurudzika nee tinacita khundu mu ndale za dziko. Mu ndzidzi unafendedzera ife cifupi ntsiku ya Yahova, tinakakamizwa kakamwe toera kucita khundu mu ndale za dziko. Ngakhale tenepo, nee tisafunika kudzudzumika na pinthu pinafuna ife kulonga. Nzimu wa Mulungu unatiphedza toera kukhala akukhurudzika, kukhala na manyerezero adidi mbaticita pisankhulo pyadidi.—Luka 12:11, 12.

 8. Mwakubverana na 1 Atesalonika 5:8, ndi pinthu pipi pyakuti pinatiphedza toera kukhala m’maso na manyerezero adidi? (Onanimbo foto.)

⁸ ‘Tibvale cakutsidzikiza naco diti na capeu ca utale.’ Paulu atilandanisa na anyankhondo akuti akhunganyika toera kuenda kamenya nkhondo. (Lerini 1 Atesalonika 5:8.) Nyankhondo asadikhirwa kuti ndzidzi onsene akhale wakukhunganyika toera kumenya nkhondo. Munjira ibodzi ene, ife tisafunikambo kukhala akukhunganyika. Ife tinakhala akukhunganyika ntsiku ya Yahova mbidzati kufika tingabvala cakutsidzikiza naco diti ca cikhulupiro, ufuni na capeu ca utale ca cidikhiro. Pinthu pyenepi pinatiphedza kakamwe.

 9. Cikhulupiro cathu cisatitsidzikiza tani?

⁹ Cakutsidzikiza naco diti cikhatsidzikiza ntima wa nyankhondo. Cikhulupiro na ufuni pisatsidzikizambo ntima wathu wakuphiphirisa. Ipyo pisatiphedza toera kupitiriza kutumikira Mulungu na kutowezera Yezu. Cikhulupiro cisatipasa cinyindiro cakuti Yahova anadzatipasa nkhombo thangwi ya kunsaka kwathu na ntima onsene. (Aheb. 11:6) Ico cisatiphedzambo toera kupitiriza kukhala akukhulupirika kuna Ntsogoleri wathu Yezu, maseze tithimbane na nyatwa. Ife tinakwanisa kuwangisa cikhulupiro cathu toera tikwanise kupirira nyatwa. Tinakwanisa kucita pyenepi tingapfundza pitsandzo pya atumiki a Yahova a mu ntsiku zino akuti apitiriza kukhala akukhulupirika mwakukhonda tsalakana kutcingwa peno nyatwa yakusowa kobiri. Pontho tinacalira ngozwi yakufuna kobiri na kukhala na pinthu pizinji tingatowezera pitsandzo pya ale adalulupisa umaso wawo toera kuikha Umambo wa Mulungu pa mbuto yakutoma.b

10. Kufuna Mulungu na anthu kusatiphedza tani toera kupirira?

¹⁰ Ufuni ndi wakufunikambo toera tipitirize kukhala m’maso na manyerezero adidi. (Mat. 22:37-39) Kufuna Mulungu kunatiphedza toera kupitiriza kumwaza mphangwa mwakukhonda tsalakana pinentso pinafuna kuthimbana na ife. (2 Tim. 1:7, 8) Nakuti tisafunambo anthu akuti nee asatumikira Yahova, ife tisapitiriza kumwaza mphangwa mu cisa cathu ngakhale mukuphatisira ntokodzi na matsamba. Ife nee tisaluza cidikhiro cakuti na ntsiku yace anthu anacinja mbatoma kucita pinthu pyadidi.—Ezek. 18:27, 28.

11. Kodi kufuna abale na alongo athu kunatiphedza tani? (1 Atesalonika 5:11)

¹¹ Ife tisafunambo abale na alongo athu. Tinapangiza ufuni unoyu ‘tingabalangazana na kuwangisana unango na ndzace.’ (Lerini 1 Atesalonika 5:11.) Ninga anyankhondo akuti asamenya nkhondo pabodzi, ife tisawangisana unango na ndzace. Ndimomwene kuti nyankhondo panango anaphekesa nyankhondo ndzace mu ndzidzi unamenya iwo nkhondo, mbwenye iye nee asacita pyenepi mwakufuna. Munjira ibodzi ene, ife nee tisafunika kuphekesa abale na alongo athu peno kubwezera cakuipa na cakuipa. (1 Ates. 5:13, 15) Ife tinapangizambo ufuni wathu tingalemedza abale anatsogolera mu mpingo. (1 Ates. 5:12) Pidalemba Paulu tsamba ineyi kuna Akristu a ku Tesalonika, mpingo unoyu ukhadamala kwene kukhazikiswa. Abale akhatsogolera mu mpingo unoyu panango nee akhali na maluso, pontho panango akhacita madodo. Ngakhale tenepo iwo akhafunika kulemedzwa. Mu ndzidzi unafendedzera ife cifupi na nyatwa ikulu, panango tinafuna kakamwe citsogolero ca akulu a mpingo kupiringana cincino. Pa ndzidzi unoyu, panango nee tinakwanisa kutambira pitsogolero pya abale a ku ofesi ikulu ya Mboni za Yahova na ofesi ya dziko yathu; natenepa ndi pyakufunika kakamwe kutoma cincino kufuna na kulemedza akulu a mpingo wathu. Mwakukhonda tsalakana pinafuna kucitika, tendeni tipitirize kukhala na manyerezero adidi, tayu kuona madodo awo, mbwenye tisafunika kuona kuti amuna anewa akukhulupirika asatsogolerwa na Yahova mukuphatisira Kristu.

12. Cidikhiro cathu cisatsidzikiza tani manyerezero athu?

¹² Ninga capeu ca utale cakuti cikhatsidzikiza nsolo wa nyankhondo, cidikhiro cathu cisatsidzikiza manyerezero athu. Tingakhala na cidikhiro cakuwanga, tisadzindikira kuti pinthu pya dziko ino ndi pyakusowa basa. (Afil. 3:8) Cidikhiro cathu cisatiphedza toera kukhala akukhurudzika. Ndi pyenepi pidacitika kuna m’bale Wallace na mulongo Laurinda anatumikira mu Afrika. Nkati mwa masumana matatu m’bodzi wa iwo aferwa na pai wace, unango na mai wace. Thangwi ya utenda wa COVID-19, iwo nee akwanisa kubwerera kunyumba kwawo toera kukhala pabodzi na acibale awo mu ndzidzi unoyu wa nyatwa. M’bale Wallace alemba: “Cidikhiro cakulamuswa kwa anthu muli akufa candiphedza toera kunyerezera kuti ntsiku zakutoma za umaso wawo mu dziko ipswa zinakhala tani, m’mbuto mwakunyerezera kuti ntsiku zakumalisa za umaso wawo mu dziko ino zakhala tani. Cidikhiro ceneci cisandiphedza toera kukhala wakukhurudzika ndingatsukwala thangwi yakuferwa kweneku.”

13. Tisafunika kucitanji toera tikhale na nzimu wakucena?

¹³ “Lekani kuthimisa moto wa nzimu wakucena.” (1 Ates. 5:19) Paulu alandanisa nzimu wakucena na moto unagaka muna ife. Tingakhala na nzimu wa Mulungu, tisaphata mabasa a Yahova mwaphinga na mwakugalamuka. (Aroma 12:11) Mphapo tisafunika kucitanji toera tikhale na nzimu wakucena? Tisafunika kuuphemba, kupfundza Mafala a Mulungu na kusonkhana na abale na alongo mu gulu ya Yahova yakuti isatsogolerwa na nzimu wace. Kucita pyenepi kunatiphedza toera kukulisa “misapo ya nzimu wakucena.”—Agal. 5:22, 23.

14. Tisafunika kucaliranji toera tipitirize kukhala na nzimu wakucena? (Onanimbo foto.)

¹⁴ Mulungu angatipasa nzimu wace wakucena, tisafunika kucita mphole-mphole toera tikhonde “kuthimisa moto wa nzimu wakucena.” Mulungu asapereka nzimu wace wakucena kuna ale anapitiriza kukhala na manyerezero adidi na makhaliro adidi. Iye nee anapitiriza kutipasa nzimu wace wakucena khala ife tisanyerezera pinthu pyakuipa na kupicita. (1 Ates. 4:7, 8) Toera tipitirize kukhala na nzimu wakucena, tisafunikambo kucalira “kupwaza maprofesiya.” (1 Ates. 5:20) “Maprofesiya” analongwa pa vesi ineyi ndi mphangwa zinatipasa Yahova mukuphatisira nzimu wace wakucena ninga mphangwa zinalonga pya ntsiku ya Yahova na pinthu pinapangiza kuti ntsiku ineyi iri dhuzi. Ife nee tisafunika kunyerezera kuti ntsiku ya Yahova peno Armajedhoni nee inabwera mu ndzidzi wathu. M’mbuto mwace, tisafunika kupangiza kuti tisadikhira kuti ntsiku ineyi inafika mwakucimbiza peno kupitiriza kuinyerezera mukukhala na makhaliro adidi na ‘kucita pinthu pinapangiza kuti ndife anthu adaperekeka kuna Mulungu.’—2 Ped. 3:11, 12.

15. Tisafunika kucitanji toera tikhonde kupeuswa na mphangwa zauthambi za madimonyo? (1 Atesalonika 5:21)

¹⁵ Mwakukhonda dembuka, anyamalwa a Mulungu analonga kuti: “Ntendere na citsidzikizo!” (1 Ates. 5:3) Mphangwa za uthambi za madimonyo zinadzamwazika pa dziko yonsene, pontho zinadzapeusa anthu azinji. (Apok. 16:13, 14) Ndiye tanimbo ife? Nee tinadzapeuswa na uthambi unoyu khala ‘tisadinga pinthu pyonsene.’ (Lerini 1 Atesalonika 5:21.) Fala Yacigerego yakuti ‘kudinga’ ikhaphatisirwa toera kulonga pya njira ikhadinga anthu pinthu ninga ouro na parata toera kukhala na cinyindiro cakuti pinthu pyenepi ndi pyandimomwene. Natenepa, tisafunika kudinga pinthu pinabva ife na pinaleri ife toera tikhale na cinyindiro cakuti pinthu pyenepi ndi pyandimomwene. Pyenepi pikhali pyakufunika kuna Atesalonika, pontho ndi pyakufunikambo kakamwe kuna ife mu ndzidzi unafendedzera ife nyatwa ikulu. M’mbuto mwa kukhulupira pinthu pyonsene pinalonga anthu, tisafunika kuphatisira luso yathu yakunyerezera toera tikwanise kulandanisa pinthu pinaleri ife, pinabva ife na pire pinalonga Bhibhlya na gulu ya Yahova. Tingacita pyenepi, nee tinapeuswa na mphangwa zauthambi za madimonyo.—Mis. 14:15; 1 Tim. 4:1.

16. Ndi cidikhiro cipi ciri na ife, pontho tisafunika kupitiriza kucitanji?

¹⁶ Ife tisadziwa kuti atumiki a Yahova anadzapulumuka pa nyatwa ikulu. Mbwenye m’bodzi na m’bodzi wa ife nee asadziwa pinafuna kuncitikira mangwana. (Tiya. 4:14) Ngakhale tenepo, mwakukhonda tsalakana khala nyatwa ikulu inatigumana tiri m’maso peno tinafa mbidzati kufika, ife tinadzatambira umaso wakukhonda mala tingapitiriza kukhala akukhulupirika. Akristu akudzodzwa anadzakhala kudzulu pabodzi na Kristu, mbwenye mabira anango anadzakhala m’paraizu pa dziko yapantsi. Natenepa, mbatipitirizeni kunyerezera cidikhiro cathu cakutsandzayisa mbatikhala akukhunganyika ntsiku ya Yahova mbidzati kufika!