Pfunzisani Mwananu Kutomera Pa Uwana Wace

1, 2. Kodi anyakubala asafunika kuphemba kupi ciphedzo towera kukuza anawo?

M’PIAKA pyakupiringana 3.000 ndulimu, nyakubala unango wakupereka takhuta alonga: “Ana ndi miyoni ya Mbuya.” (Masalmo 127:4 ) Inde, kukomerwa thangwi yakukhala nyakubala ndi nkhombo yakubuluka kwa Mulungu, yakuti anyakumanga banja azinji ali nayo. Mbwenye, ale akuti ali na ana mwakukhonda dembuka asadziwa kuti kukhala nyakubala kusabweresa citsanzayo na mabasa mazinji.

² Makamaka lero, kukuza ana ndi basa ikulu kakamwe. Ngakhale tenepa, azinji asacita pyenepi mwakupembera, na nyamasalmo wakupumirwa asapangiza njira yakupembera mu kulonga tenepa: “Mbuya angakhonda kumanga nyumba, basa ya anyakumanga njapezi.” (Masalmo 127:1) Imwe munadzakhala nyakubala wadidi, mungatowezera mwapaduzi kakamwe pipfunziso pya Yahova. Biblya isalonga: “Khulupira Mulungu na ntima wako wonsene mbuleka kukhulupira nzeru zako.” (Misangani 3:5) Kodi imwe muli wakufunisisa kubvesera uphungu wa Yahova mu basa ya piaka 20 ya kukuza mwana?

 3. Kodi baba ali na basa yanji mu kukuza ana?

³ Mu zinyumba zizinji kuzungulira dziko yonsene yapantsi, amuna asaona basa ya kupfunzisa mwana ninga ya akazi. Mwandimomwene, Mafala a Mulungu asalonga kuti basa ikulu ya baba ndi kutsalakana banja. Iwo asalongambo kuti mamuna ali na basa panyumba. Biblya isalonga: “Chita malonda ako mu ndzinda mbusasanya pyonsene pa munda pako, pa kumalisa usasanye nyumba yako.” (Misangani 24:27) Mu maonero a Mulungu, ababa na amama ali na basa ya kupfunzisa mwana.​—Misangani 1:8, 9.

 4. Thangwi yanji nkhabe funika kuona ana acimuna kukhala akufunika maningi kupiringana ana acikazi?

⁴ Kodi musaona tani ananu? Malipoti asapangiza kuti ku Ásia “anyakubala kazinji kene nkhabe komerwa na kubalwa kwa khombwani wacikazi.” Tsankhu ya atsikana iciripo basi ku América Latina, ngakhale pakati pa “mabanja akupfunza mwadidi.” Mbwenye, undimomwene ndi wakuti atsikana ndi ana akufunika. Yakobe, baba wakudziwika kakamwe wa ndzidzi wakale, alonga kwa mbeu yace yonsene, kuphataniza ana acikazi anabalwa mu ndzidzi uno, ninga “ana adandipasa Mulungu.” (Genesi 33:1-5; 37:35) Mwakulandana, Yezu apasa nkhombo “ana” onsene (acimuna na acikazi) akhabwera kuna iye. (Mateo 19:13-15) Tinakwanisa kukhala na cinyindiro cakuti iye akhapangiza maonero a Yahova.​—Deuteronomyo 16:14.

 5. Kodi anyakumanga banja asafunika kutsalakana pipi pakutonga kukula kwa banja yawo?

⁵ Kodi mphyakudzolowereka pa cisa canu akazi kukhala na ana azinji ninga munakwanisikira ipyo? Mwandimomwene, kuinjipa kwa ana kusanyindira cisankhulo ca anyakumanga banja. Kodi ndiye tani khala anyakubala nkhabe njira ya kudyesa anawo akuinjipa, kuabvazika na kuaendesa kuxikola? Mwandimomwene, anyakumanga banja asafunika kudinga pyenepi munatonga iwo kukula kwa banja yawo. Mabanja anango akuti asacimwana kutsalakana anawo onsene, asanyindira acibale kuti aakuzire anawo anango. Kodi macitiro anewa ndi adidi? Mwandimomwene nkhabe. Na pyenepi nkhabe kubulusa pyakutawirira pya anyakubala kwa anawo. Biblya isalonga: “Munthu anakhonda kutsalakana anthu ache, makamaka ale a ku nyumba kwache, uyu aleka kutawira kwache, iye ndi wakuipa kupita njentiyu.” (1 Timoti 5:8) Anyakumanga banja anzeru asayesera kunyerezera kukula kwa ‘anthu a pa nyumba pawo’ mbakwanisa natenepa ‘kutsalakana anthu awo.’ Kodi iwo asafunika kuphatisira njira zinakhondesa kubala towera kucita pyenepi? Pontho ineyi ndi nkhani ya cisankhulo cawo, khala anyakumanga banja asankhula kucita pyenepi, njira inafuna iwo kuphatisira ndi nkhani ya cisankhulo cawo okhene. ‘Munthu m’bodzi na m’bodzi anadzathukula ntolo wace.’ (Agalata 6:5, NM) Natenepa, njira yakukhondesa kubala inaphataniza macitiro onsene a kutaya mimba isaphonyana na midida ya Biblya. Yahova Mulungu ndi “ntchitchi wa moyo wonsene.” (Masalmo 36:9) Natenepa, kufudza umaso pakumala kumita mimba kusapangiza kusowa cilemedzo cikulu kuna Yahova na ndi sawasawa na uphanga.​—Eksodo 21:22, 23; Masalmo 139:16; Yeremiya 1:5.

 6. Kodi kupfunzisa mwana kusafunika kutoma lini?

⁶ Misangani 22:6 isalonga: “Pfundzisa munthu njira zadidi mbali mwana.” Kupfunzisa ana ndi basa inango yakufunika kakamwe kwa anyakubala. Kodi kupfunzisa kweneku kusafunika kutoma lini? Nakweru kakamwe. Mpostolo Paulu adzindikira kuti Timoti akhadapfunziswa “kutomera uwana.” (2 Timoti 3:15) Fala Yacigerego idaphatisirwa apa isabveka khombwani peno mwana wakuti adzati kubalwa. (Luka 1:41, 44; Machitiro 7:18-20) Natenepa, Timoti apfunziswa mukhakhala iye wang’ono kakamwe​—na pyenepi pikhali pyakufunika. Uwana ndi ndzidzi wakufunika kakamwe towera kutoma kupfunzisa mwana. Ngakhale khombwani ana njala ya cidziwiso.

 7. (a) Thangwi yanji ndi pyakufunika kwa anyakubala kukulisa uxamwali wadidi kakamwe na khombwani wawo? (b) Kodi ndi uxamwali upi ukhagumanika pakati pa Yahova na Mwanace m’bodzi ekha?

⁷ Mama m’bodzi alonga: “Mudaona ine pakutoma khombwani wanga, ndakhala wakunfuna kakamwe.” Pyenepi pisacitika na amama azinji. Kufunana kukulu kweneku pakati pa mama na khombwani kusakula mu ndzidzi unakhala iwo pabodzi pakumala kubalwa. Kuyamwisa kusathimizirambo kufunana kweneku. (Landanisani 1 Atesalonika 2:7.) Citsalakano ca mama pabodzi na kucedza na khombwani wace ndi kwakufunika kakamwe towera kukwanirisa pifuno pya manyerezero a khombwani. (Landanisani Izaiya 66:12.) Kodi ndiye tani kwa baba? Iye asafunikambo kukhala wakudzolowerana na mwanace. Yahova ekhene ndi citsanzo ca pyenepi. Mu bukhu ya Misangani, tisapfunza uxamwali wa Yahova na Mwanace m’bodzi ekha, ule analongwa kuti: “Mbuya atoma kundichita ine pano kalene maningi . . . Ine ndikhali pa khundu pa Mulungu mbandimphedza muli pyonsene,” mbandidzakhala wakufuniwa kakamwe na Mulungu ntsiku na ntsiku. (Misangani 8:22, 30; Jwau 1:14) Mwakulandana, baba wadidi asakulisa uxamwali wadidi, kubverana na mwanace kutomera mu umaso wa uwana. Nyakubala m’bodzi alonga: “Pangizani kufuna kwanu kakamwe, cipo nkhabepo mwana adafa na kukhumbatirwa na kumpswompswonwa.”

 8. Kodi ndi ciwangiso cipi ca manyerezero cakuti anyakubala asafunika kucipereka kwa akhombwani awo mwakucimbiza kakamwe?

⁸ Mbwenye akhombwani asafunika pizinji. Kutomera pa kubalwa, ongo wa akhombwani uli wakukhunganyika towera kutambira na kukoya mphangwa, na anyakubala ndiwo anafunika kakamwe kucita pyenepi. Onani kuti cilongero ndi citsanzo ca pyenepi. Anyakufufudza asalonga kuti luso ya mwana ya kupfunza kulonga na kulemba “isanyindira makamaka pinacita anyakubala kwa mwana unoyu pa uwana wace.” Longani na lerini kwa mwananu kutomera pa uwana wace. Mu ndzidzi wakucepa iye anadzafuna kukusangizirani, na mwakukhonda pita ndzidzi uzinji munadzampfunzisa kuleri. Panango, iye anadzadziwa kuleri mbadzati kuenda ku xikola. Pyenepi pinadzakhala pyakuphedza kakamwe, khala musakhala pa cisa cakuti apfunzisi ndi akucepa na maxikola ndi akudzala na afunzi.

 9. Kodi ndi pinthu pipi pyakufunika kakamwe pyakuti anyakubala asafunika kupikumbuka?

⁹ Cakufunika kakamwe kwa anyakubala Acikristu ndi kukwanirisa pifuno pyauzimu pya mwana wawo. (Onani Deuteronomyo 8:3.) Kodi pana phindu yanji? Towera kuphedza mwana wawo kuti akulise uunthu Wacikristu, peno kuti abvale ‘uunthu upswa.’ (Aefesi 4:24) Towera kucita pyenepi, iwo asafunika kudinga pinthu pyakumanga napyo pyakuthema na mamangiro akuthema.

10. Kodi ndi makhaliro api ana asafunika kukulisa?

¹⁰ Kuwanga kwa nyumba kusanyindira makamaka pinthu pidaphatisirwa pa kuimanga. Mpostolo Paulu alonga kuti pinthu pyadidi kakamwe pyakumanga napyo uunthu Wacikristu, ndi ‘ndalama, prata, myala yakukoma.’ (1 Akorinto 3:10-12) Pyenepi pisapangiza makhaliro ninga cikhulupiro, udziwisi, nzeru, cinyindiro, cilemedzo na kupereka takhuta kuna Yahova na miyambo yace. (Masalmo 19:7-11; Misangani 2:1-6; 3:13, 14) Kodi anyakubala anakwanisa tani kuphedza anawo kutomera uwana towera kukulisa makhaliro anewa? Angatowezera midida idaikhwa kalene kakamwe.

11. Kodi anyakubala Aciisraele aphedza tani anawo kukulisa makhaliro aumulungu?

¹¹ Mu ndzidzi wakucepa, mbumba ya Israele mbidzati kupita mu Dziko Yakupikirwa, Yahova apanga anyakubala Aciisraele: “Matongero awa anakupasani ine lero aakoyeni mu ntima mwanu. Munadzaapfundzisa [‘munadzaakhomera,’ NM] ana anu mbamuanyerezera mungakhala m’nyumba mwanu peno pa ulendo, peno pa kugona, peno pa kulamuka.” (Deuteronomyo 6:6, 7) Inde, anyakubala asafunika kukhala citsanzo, axamwali, anyakucedza na apfunzisi.

12. Thangwi yanji ndi pyakufunika kuti anyakubala akhale citsanzo cadidi?

¹² Khalani citsanzo. Cakutoma, Yahova alonga: “Matongero awa . . . aakoyeni mu ntima mwanu.” Buluka penepo, iye athimizira: Munadzaakhomera “ana anu.” Natenepa, makhaliro aumulungu asafunika pakutoma kukhala m’mitima ya anyakubala. Nyakubala asafunika kufuna undimomwene na kukhala mwakubverana na iwo. Basi ene mu njira ineyi anakwanisa kukhuya ntima wa mwana. (Misangani 20:7) Thangwi yanji? Thangwi yakuti ana asakhuyiwa kakamwe na pinaona iwo kupiringana pire pinabva iwo.​—Luka 6:40; 1 Akorinto 11:1.

13. Pakupereka citsalakano kwa ana, kodi anyakubala Acikristu anakwanisa tani kusangizira citsanzo ca Yezu?

¹³ Khalani xamwali. Yahova apanga anyakubala a ku Israele kuti alonge na anawo ‘angakhala n’nyumba mwawo peno pa ulendo.’ Pyenepi pisaphemba kukoya ndzidzi wa kukhala pabodzi na ana mwakukhonda tsalakana kuinjipirwa na basa kwa anyakubala. Mwandimomwene Yezu akhaona kuti ana akhafunika ndzidzi wawo. Mu ntsiku zakumalisa za utumiki wace, “anthu abwerambo kuna Yezu na ana ang’ono, towera aakhuye.” Kodi Yezu acita tani? “[Aakhumbatira] mbaapasa chidzo na kuasandzikira manja ache.” (Marko 10:13, 16) Nyerezerani, ndzidzi wa kufa kwa Yezu ukhali cifupi kakamwe. Ngakhale tenepa, iye akoya ndzidzi na apereka citsalakano kwa ana ang’ono anewa. Ndi pfunziro tani yadidi!

14. Thangwi yanji ndi pyakuphindulisa kwa anyakubala kubvunga ndzidzi na mwana wawo?

¹⁴ Khalani nyakucedza. Kukoya ndzidzi wa kukhala pabodzi na mwananu kunadzakuphedzani towera kucedza naye. Mungacedza kazinji kene, munadzadziwa mwadidi makhaliro a uunthu a mwananu. Natenepa, kumbukani kuti kucedza ndi kwadidi kupiringana kulonga. Mama m’bodzi ku Brazil alonga: “Ndisakulisa luso yakubvesera, kubvesera na ntima wanga.” Kupirira kwace kwabala misapo mu ndzidzi udatoma mwanace wamamuna kulonga pya mu ntima mwace kwa iye.

15. Kodi ndi pifuno pipi pinafunika kunyerezerwa pa ubalangazi?

¹⁵ Ana asafuna “ndzidzi wakuseka . . . na ndzidzi wakubvina,” pontho na ndzidzi wa ubalangazi. (Koelete 3:1, 4; Zakariya 8:5) Ubalangazi ndi wakuphindulisa kakamwe, anyakubala na anawo angaucita pabodzi. Mphyakutsukwalisa kulonga kuti m’mabanja mazinji ubalangazi wawo ndi kuona televizau. Maseze maprogramu anango a televizau ndi akutsanzayisa, maprogramu mazinji asafudza makhaliro adidi, pontho kuona televizau kusacitisa kukhonda kucedza pa banja. Natenepa, thangwi yanji nkhabe kucita cinthu cinango cakuphedza pabodzi na ananu? Ninga kuimba, kusenzeka, kugumanyikana na axamwali, kuenda kaona mbuto zinango zakubalika. Mabasa anewa asakulumiza kucedza.

16. Kodi ndi ninji pinafunika anyakubala kupfunzisa kwa anawo thangwi ya Yahova, na asafunika kucita tani pyenepi?

¹⁶ Khalani mpfunzisi. Yahova alonga: Munadzaakhomera “[mafala awa] ana anu.” Mafala a n’khundu asakupangani kuti ndi pipi pinafunika kupfunziswa na munapipfunzisa tani. Cakutoma, “funani Mbuya, Mulungu wanu, na ntima wanu wonsene, na nzimu wanu wonsene, na mphambvu zanu zonsene.” (Deuteronomyo 6:5) Buluka penepo, “Matongero awa” muakhomere. Apfunziseni kukulisa kufuna na ntima onsene Yahova na miyambo yace. (Landanisani Ahebere 8:10.) Fala yakuti ‘kukhomera’ isabveka kupfunzisa mwakubwerezera-bwerezera. Natenepa, Yahova mwandimomwene akukupangani kuti njira yadidi kakamwe towera kuphedza ananu kukulisa uunthu waumulungu ndi kulonga pya iye mwakubwerezera-bwerezera. Pyenepi pisaphataniza kupfunza Biblya na ananu ndzidzi onsene.

17. Kodi anyakubala asafunika kukulisanji kwa mwanawo? Thangwi yanji?

¹⁷ Anyakubala azinji asadziwa kuti ndi pyakunensa kukhomera mphangwa mu ntima wa mwana. Mpostolo Pedro adembetera Akristu anango kuti: “Ninga ana adabalwa chinchino, musirire nkaka unakhutisa nzimu mbukhonda kudodomesa, towera mukule nawo mbamupulumuka.” (1 Pedro 2:2) Fala yakuti “musirire” isapangiza kuti azinji mwacibaliro nkhabe njala ya cakudya cauzimu. Panango ndi pyakufunika kuti anyakubala agumane njira zakucitisa mwanawo kukulisa kusirira kweneku.

18. Kodi ndi njira zipi zinango za mapfunzisiro a Yezu zakuti anyakubala asakulumizwa kuzitowezera?

¹⁸ Yezu akhakhuya mitima ya anthu mu kuphatisira misangani. (Marko 13:34; Luka 10:29-37) Njira ineyi yakupfunzisa ndi yakufunika makamaka kwa ana. Pfunzisani midida ya Biblya mbumuphatisira nkhani zakukhuya ntima na zakutsanzayisa, panango zire zinagumanika m’bukhu yakuti, Bukhu Yanga Ya Mbiri Za Bibilya.a Citani kuti ana acite khundu. Asiyeni kuti aphatisire luso yawo ya kulemba pithunzithunzi na kucita drama ya pyakucitika pya m’Biblya. Yezu akhaphatisirambo mabvunzo. (Mateo 17:24-27) Sangizirani macitiro ace pa pfunziro yanu ya banja. Mbuto mwakulonga basi ene mwambo wa Mulungu, citani mabvunzo ninga awa: Thangwi yanji Yahova atipasa mwambo unoyu? Kodi ndi ninji pinafuna kudzacitika tingaubvera? Kodi ndi ninji pinafuna kudzacitika tingakhonda kubvera mwambo unoyu? Mabvunzo anewa anaphedza mwana kunyerezera na kuona kuti miyambo ya Mulungu ndi yakuphata basa na ndi yadidi.​—Deuteronomyo 10:13.

19. Khala anyakubala asaphatisira midida ya Biblya pa kutsalakana anawo, kodi ndi maphindu api makulu akuti ana anadzatsanzaya nawo?

¹⁹ Mungakhala citsanzo, xamwali, nyakucedza na mpfunzisi, imwe munakwanisa kuphedza mwananu mu uwana wace towera kukhala na uxamwali ukulu kakamwe na Yahova Mulungu. Uxamwali unoyu unadzawangisa mwananu kukhala Nkristu wakutsanzaya. Iye anadzawangisira kukoya cikhulupiro cace ngakhale pakuthimbana na nyatwa pabodzi na mayesero a axamwali. Mphedzeni mu ndzidzi onsene towera kulemedza uxamwali unoyu.​—Misangani 27:11.

20. Kodi cisandiko ndi ninji, na cisafunika kuperekwa tani?

²⁰ Cisandiko ndi cipfunziso cinalungamisa manyerezero na ntima. Ana asafunika cisandiko ndzidzi onsene. Paulu apereka uphungu kwa anyakubala kuti apitirize na ‘kuapfunzisa, kuakuza [anawo] ninga munafunira Mbuya.’ (Aefesi 6:4) Anyakubala asafunika kusandika na ufuni, ninga pinacita Yahova. (Ahebere 12:4-11) Cisandiko cakuperekwa na ufuni cisakhala cakubverana. Na thangwi ineyi, tisapangwa kuti ‘tibvere malangizo.’ (Misangani 8:33) Kodi cisandiko cisafunika kuperekwa tani?

21. Kodi ndi midida ipi anyakubala asafunika kukoya manyerezero pa kusandika anawo?

²¹ Anyakubala anango asanyerezera kuti kusandika anawo kusabveka kulonga nawo mwakuathusa, kuapwekera, peno kuatikana. Natenepa, pa nkhani ibodzi ene, Paulu acenjeza: “Imwembo ababa, lekani kunensa-nensa ananu.” (Aefesi 6:4) Akristu onsene asadembeterwa kuti ‘akhale akubverana na anthu onsene . . . asandike ale anaapokanya.’ (2 Timoti 2:24, 25) Anyakubala Acikristu, maseze mudziwe kufunika kwa kukhala akuwanga, wangisirani kukoya mafala awa m’manyerezero pa kusandika ananu. M’midzidzi inango, mafala basi nkhabe kwana, natenepa ntundu unango wa cisandiko unakwanisa kuphatisirwa.​—Misangani 22:15.

22. Khala mwana asafunika kutcinyuswa, kodi asafunika kuphedzwa kudziwanji?

²² Ana akusiyana-siyana asafunikambo cisandiko cakusiyana-siyana. Anango “hanasandikwa na mafala basi tayu.” Kwa anewa, kuatcinyusa m’midzidzi inango angakhonda bvera kungakhale kwakupulumusa umaso. (Misangani 17:10; 23:13, 14; 29:19) Mwana asafunika kudziwa kuti ndi thangwi yanji iye akutcinyuswa. ‘Kumenywa na kusandikwa kusabweresa udziwisi.’ (Misangani 29:15; Yobe 6:24) Kusiyapo pyenepi, kutcinyusa kunamadire. Yahova alonga kuna mbumba yace: “Maseze ine ndinadzakuonesani nyatwa, si nyatwa zakunyanyirathu tayu.” (Yeremiya 46:28b) Biblya nkhabe tawirisa na pang’ono pene kumenya mwaukali peno mwakupiringana midida, kwakuti mbukudadzadzada na kuphekesa mwana.​—Misangani 16:32.

23. Kodi mwana asafunika kudzindikiranji pakutcinyuswa na anyakubalace?

²³ Pa kucenjeza mbumba yace kuti anadzaisandika, Yahova pakutoma alonga: “Lekani kugopa . . . ine ndinadzakhala na imwe.” (Yeremiya 46:27, 28) Mwakulandana na pyenepi, cisandiko ca anyakubala, mu njira yonsene yakuthema inaperekwa ico, nkhabe funika kucitisa mwana kupibva ninga nkhabe kufunwa. (Akolose 3:21) Mbuto mwa pyenepi, mwana asafunika kudziwa kuti cisandiko cikuperekwa thangwi anyakubala ali ‘na iye’ ku khundu kwace.

24, 25. Kodi ana asafunika kutsidzikizwa ku nyatwa ipi inagumanika mu ntsiku zathu zino?

²⁴ Akulu azinji asayang’ana mu ndzidzi wa uwana wawo ninga ndzidzi wakutsanzayisa. Iwo asakumbuka kuti akhakhala akutsidzikizwa, na akufunwa na anyakubalawo, pabodzi na cinyindiro cakuti mbadatsidzikizwa m’makhaliro onsene. Anyakubala asafuna kuti anawo apibve mu njira ineyi, mbwenye lero mu dziko ino yakuipa, ndi pyakunensa kutsidzikiza ana.

²⁵ Nyatwa ikulu inathimizirika mu ndzidzi uno ndi kupita m’mabonde na anapiana. Ku Malásia, malipoti a ana anacitwa usumankha wa kupita m’mabonde athimizirika kanai mu ndzidzi wa piaka khumi. Ku Alemanha, ana akukwana 300,000 asathabuswa na usumankha wa kupita m’mabonde pa caka, pontho mu dziko inango ya ku Amerika wa Kubangwe, mwakubverana na kudinga kunango cilengeso cathimizirika pa caka kufika pa 9.000.000! Pyakutsukwalisa ndi pyakuti ana azinji anewa asacitwa usumankha unoyu wa kupita m’mabonde na anthu a pa nyumba pawo, ale anadziwa iwo na ananyindira iwo. Mbwenye ana asafunika kugumana citsidzikizo cakuwanga kakamwe kwa anyakubalawo. Kodi anyakubala anakwanisa tani kukhala atsidzikizi?

26. Kodi ndi zipi njira zinango zakuti ana anakwanisa kutsidzikizwa, na cidziwiso cinakwanisa tani kutsidzikiza mwana?

²⁶ Pyakucitika pisapangiza kuti ana ale anadziwa pang’ono pya nkhani ya kupita m’mabonde ndiwo ali pa ngozwi ikulu, njira yacitsidzikizo cikulu kakamwe ndi kupfunzisa mwana, ngakhale aciri wang’ono. Cidziwiso cinakwanisa kutsidzikiza munthu ku ‘njira zakuipa za munthu analonga pyakuipa.’ (Misangani 2:10-12) Kodi ndi cidziwiso cipi? Cidziwiso ca midida ya Biblya, ca makhaliro adidi na akuipa. Dziwani pontho kuti anthu athunga asacita pinthu pyakuipa, na thangwi ineyi ana nkhabe funika kubvera munthu anaapanga kucita pinthu pyakuipa. (Landanisani Danyele 1:4, 8; 3:16-18.) Pipfunziso pyenepi nkhabe funika kulongwa pa ndzidzi ubodzi basi tayu. Ana azinji asafunika kupfunziswa mwakubwerezera-bwerezera, mpaka iwo kukwanisa kupidziwa mwadidi. Munakula mwana, baba asafunika kupereka cilemedzo kwa mwanace wankazi na mama kwa mwanace wamamuna​—pyenepi pisawangisa manyerezero a mwana ku pinthu pyadidi. Natenepa, citsidzikizo cinango cadidi kakamwe pakuthimbana na usumankha wakupita m’mabonde ndi kuyang’anira mwapaduzi kwa mama na baba ninga anyakubala.

27, 28. Kodi mbani Ncera waciphedzo kwa anyakubala pakuthimbana na nyatwa ya kukuza mwana?

²⁷ Mwandimomwene, kupfunzisa mwana kutomera pa uwana wace ndi pyakunensa, mbwenye anyakubala akugopa Mulungu nkhabe kuthimbana na nyatwa ineyi okhene. Kalene mu ntsiku za Atongi, mudadziwa mamuna unango akhacemerwa Manowa kuti anadzakhala baba, iye aphemba citsogolero ca Yahova ca kukuza mwanace. Yahova atawira maphembero ace.—Atongi 13:8, 12, 24.

²⁸ Mu njira ibodzi ene lero, anyakubala akukhulupira pa kukuza ana, iwo asafunikambo kulonga na Yahova mu phembero. Kukhala baba peno mama ndi basa yakuwanga, mbwenye pana nkhombo zizinji. Banja Yacikristu ku Havaí yalonga: “Imwe muli na piaka 12 towera kucita basa ya kukuza mwana wanu mbudzati kufika ndzidzi wakunensa. Mbwenye, khala imwe musawangisira kuphatisira mwadidi midida ya Biblya, unoyu unadzakhala ndzidzi wa kukolola kutsanzaya na ntendere munatonga ana kutumikira Yahova bulukira mu ntima.” (Misangani 23:15, 16) Mwananu angacita cisankhulo ceneci, imwe munadzakulumizikambo kulonga: “Ana [acimuna peno acikazi] ndi miyoni ya Mbuya.”