Mudabuluswa Matawiro a Umaso Wathu Wacikristu na Utumiki

SUMANA 2-8 YA SETEMBRO

MPFUMA ZA MAFALA A MULUNGU | AHEBHERI 7-8

“Nyantsembe Wakwenda na Kwenda Ninga Melekizedheki”

(Ahebheri 7:​1, 2) Thangwi Melekizedheki unoyu, mambo wa ku Salemu, nyantsembe wa Mulungu Wakudzulu Kakamwe, aenda kagumanikana na Abhrahamu wakuti akhabwerera buluka kakunda amambo, mbampasa nkhombo, ² Abhrahamu ampasa phindi yacikhumi ya pinthu pyonsene pidatapata iye. Pakutoma dzina yace isabveka “Mambo Waulungami,” kusiyapo pyenepi, iye ndi mambo wa ku Salemu, pisabveka, “Mambo Wantendere.”

Perspicaz vol. 2 tsa. 798 ndima 11-12

Melekizedheki

Mambo wa ku Salemu wakale na ‘nyantsembe wa Mulungu Wankulu Kakamwe,’ Yahova. (Gen. 14:18, 22) Iye ndi nyantsembe wakutoma analongwa m’Bhibhlya, pontho iye acita basa ineyi pyaka pingasi mbicidzati kufika caka 1933 Kristu Mbadzati Kubalwa. Ninga mambo wa ku Salemu, yakuti isabveka “Ntendere,” Melekizedheki acemerwa na mpostolo Paulu ninga “Mambo Wantendere,” pontho dzina yace isabveka “Mambo Waulungami.” (Aheb. 7:1, 2) Pisaoneka kuti Salemu wakale ikhali mbuto yakuti mukupita kwa ndzidzi yadzakhala nzinda wa Yerusalemu, dzina ineyi yadzaphatanizwa pa dzina ya Yerusalemu yakuti midzidzi inango isacemerwa “Salemu.”​—Masal. 76:2.

Pidamala Abhramu (Abhrahamu) kukunda Kedhorlaomeri na amambo andzace, Abhramu aenda ku Gowa ya Save peno ‘Gowa ya mambo.’ Penepo Melekizedheki ‘abweresa nkate na vinyu,’ ampasa nkhombo, mbalonga: ‘Abhramu mbapaswe nkhombo na Mulungu Wankulu Kakamwe, Ule adacita kudzulu na dziko yapantsi; pontho mbasimbwe Mulungu Wankulu Kakamwe, adapereka anyamalwa ako m’manja mwako!’ Abhrahamu apasa mambo wakuti ndi nyantsembe ‘khundu yacikhumi ya pinthu pyonsene,’ pyakuti ndi “pinthu pyadidi pidatapata iye” kunkhondo idawina iye pakumenyana na anyamalwace.​—Gen. 14:17-​20; Aheb. 7:4.

(Ahebheri 7:3) Nkhabepo padalembwa dzina ya babace, nee ya mai wace, nkhabe dziwika dzindza yace, nkhabe dziwika ntsiku idabalwa iye, nee idafa iye, mbwenye nakuti acitwa mwakulandana na Mwana wa Mulungu, iye asapitiriza ninga nyantsembe kwenda na kwenda.

Perspicaz vol. 2 tsa. 799 ndima 3

Melekizedheki

Ndi munjira ipi Melekizedheki “nkhabe dziwika ntsiku idabalwa iye, nee idafa iye”?

Paulu agomezera cinthu cakufunika kakamwe thangwi ya Melekizedheki pidalonga iye kuti: “Nkhabepo padalembwa dzina ya babace, nee ya mai wace, nkhabe dziwika dzindza yace, nkhabe dziwika ntsiku idabalwa iye, nee idafa iye, mbwenye nakuti acitwa mwakulandana na Mwana wa Mulungu, iye asapitiriza ninga nyantsembe kwenda na kwenda.” (Aheb. 7:3) Ninga anthu anango, Melekizedheki abalwa, pontho afa. Mbwenye nkhabe dziwika dzina ya babace, ya mai wace na ya ambuyace, pontho Malemba nkhabe kulonga thangwi yakubalwa kwace na kufa kwace. Munjira ineyi, Melekizedheki mbadaphiphirisa mwakukwana Yezu Kristu wakuti ndi nyantsembe wakwenda na kwenda. Natenepa nakuti Melekizedheki nkhabe dziwika dzindza yace, pontho nkhabe adampitira mbuto ya unyantsembe, munjira ibodzi ene Kristu nee apitira mbuto nyantsembe unango wakulandana na iye, pontho Bhibhlya isapangiza kuti nee munthu m’bodzi anadzampitira mbuto. Kusiyapo pyenepi, ngakhale Yezu abalwa mu dzindza ya Yuda na mu nzera wa mambo Dhavidhi, unyantsembe wace nee pikhanyindira kubalwa mu dzindza ya anthu, pontho Yezu asankhulwa toera kukhala mambo na nyantsembe, tayu thangwi ya dzindza yace. Pyenepi pyacitika thangwi Yahova akhadapikira kale pyenepi kwa iye.

(Ahebheri 7:​17) Thangwi ya iye waperekwa umboni kuti: “Iwe ndiwe nyantsembe wakwenda na kwenda ninga Melekizedheki.”

Perspicaz vol. 2 tsa. 798 ndima 13

Melekizedheki

Kuphiphiriswa Kwa Unyantsembe wa Kristu. Mu profesiya yakudziwika kakamwe inalonga pya Mesiya, Yahova apikira kuna “Mbuya” wa Dhavidhi kuti: ‘Iwe ndiwe nyantsembe wakwenda na kwenda ninga Melekizedheki!’ (Masal. 110:​1, 4) Mafala anewa a masalmo acitisa Ahebheri kunyindira kuti Mesiya wakupikirwa ndiye anafuna kukhala mambo na nyantsembe. Pa tsamba yace kwa Ahebheri, mpostolo Paulu amalisa kupenula kwawo thangwi yakudzindikirwa kwa ule adapikirwa, pidalonga iye kuti Yezu “adzakhala nyantsembe wankulu wakwenda na kwenda ninga Melekizedheki.”​—Aheb. 6:​20; 5:​10; onani PACTO.

Kusaka Mpfuma Zauzimu

(Ahebheri 8:3) Thangwi nyantsembe wankulu onsene asakhazikiswa toera kupereka miyoni na ntsembe; natenepa, iye akhafunikambo kukhala na cinthu toera kupereka.

Sentinela 15/08/00 tsa. 14 ndima 11

Ntsembe Zidakomeresa Mulungu

¹¹ Mpostolo Paulu alonga: “Nyantsembe wankulu onsene asakhazikiswa toera kupereka miyoni na ntsembe.” (Ahebheri 8:3) Onani kuti Paulu asiyanisa ntsembe zikhapereka nyantsembe wankulu mu Izraeli wakale m’makhundu mawiri, “miyoni” na “ntsembe,” peno “ntsembe thangwi ya madawo.” (Ahebheri 5:1) Kazinji kene, anthu asapereka miyoni toera kupangiza ufuni na kupereka takhuta, kuphatanizambo kukulisa uxamwali na kukhala akutawirika. (Genesi 32:20; Misangani 18:16) Munjira ibodzi ene, miyoni mizinji ikhaperekwa mwakubverana na Mwambo ikhaoniwa ninga “miyoni” ikhapaswa Mulungu toera akhale akutawirika kuna iye. Munthu angaswa Mwambo akhafunika kutcunyuka, buluka penepo mbapereka “ntsembe thangwi ya madawo.” Pentanteuko, makamaka bukhu ya Eksodo, Levitiko na Numero isatipangiza mphangwa zakusiyana-siyana thangwi yakupereka ntsembe na miyoni. Ngakhale pinanentsa kwa ife kukumbuka ntsonga zonsene, mbwenye mphangwa zinango zinalonga thangwi yakupereka ntsembe zakusiyana-siyana ndi zakufunika kakamwe kwa ife.

(Ahebheri 8:​13) Pidalonga iye “cibverano cipswa,” iye acitisa kuti cakutoma cikhale cakusowa mphambvu. Mphapo khala ndi cakusowa mphambvu, pontho ciri kukhala cakale, ciri cifupi toera kufudzika.

Perspicaz vol. 3 tsa. 156 ndima 5

Cibverano

Cibverano ca Mwambo cadzakhala tani “cakusowa mphambvu”?

Cibverano ca Mwambo cadzakhala “cakusowa mphambvu” mu ndzidzi udadziwisa Mulungu kubulukira kwa mprofeta Yeremiya kuti anadzacita cibverano cipswa. (Yer. 31:31-​34; Aheb. 8:​13) Mu caka 33 Kristu Mbadamala Kale Kubalwa, cibverano ca mwambo casiya kuphata basa kubulukira mu kufa kwa Kristu pamuti wakusikimizira (Akol. 2:​14), mbacipitirwa mbuto na cibverano cipswa.​—Aheb. 7:​12; 9:​15; Mabasa 2:​1-4.

SUMANA 9-​15 YA SETEMBRO

MPFUMA ZA MAFALA A MULUNGU | AHEBHERI 9-​10

“Cipangizo ca Pinthu Pyadidi Pinafuna Kudza”

(Ahebheri 9:12-14) Iye apita m’mbuto yakucena na ciropa cace, tayu na ciropa ca mabokho peno ca anang’ombe acimuna; iye apitamo kabodzi basi, mbatiombola kwenda na kwenda. ¹³ Khala ciropa ca mabokho na ca ng’ombe, pabodzi na madotha a mwanang’ombe wacikazi akhawazirwa ale akuti akhali na midonthi, pikhacenesa manungo awo, ¹⁴ ndiye tani ciropa ca Kristu, wakuti atsogolerwa na nzimu wakucena wakwenda na kwenda mbaperekeka ekhene kuna Mulungu ninga munthu wakusowa midonthi? Ciropa cace cisacenesa pikumbuntima pyathu ku mabasa akufa toera tikwanise kulambira Mulungu wamaso.

Perspicaz vol. 3 tsa. 242 ndima 10

Kulekerera

Mwakubverana na mwambo udapereka Mulungu kuna dzindza ya Izraeli, munthu angadawira Mulungu na ndzace mbalekererwa madawo ace, iye akhafunika kusasanyira madodo adacita iye mwakubverana na pinaphembwa na mwambo, kazinji kene akhafunika kupereka ntsembe ya ciropa kuna Yahova. (Lev. 5:5–​6:7) Na thangwi ineyi, Paulu alonga mafala awa: “Inde, mwakubverana na Mwambo, pinthu pizinji kakamwe pisaceneswa na ciropa, pontho pangakhonda kucuciswa ciropa, anthu nkhabe kulekererwa madawo awo.” (Aheb. 9:​22) Mwandimomwene, ciropa ca ntsembe za pinyama nee mbacidakwanisa kulekerera madawo a munthu mbakhala na cikumbuntima caungwiro na cakucena. (Aheb. 10:​1-4; 9:​9, 13, 14) Mwakusiyana na pyenepi, cibverano cipswa cidalongwa mwanyapantsi, cacitisa kuti kuoneke kulekererwa kwandimomwene kubulukira mu ntsembe yaciomboli ya Yezu Kristu. (Yer. 31:33, 34; Mat. 26:28; 1 Akor. 11:25; Aef. 1:7) Pikhali iye pa dziko yapantsi, Yezu apangiza kuti ali na mphambvu yakulekerera madawo pidawangisa iye nyampfutete.​—Mat. 9:​2-7.

(Ahebheri 9:​24-​26) Thangwi Kristu nee apita m’mbuto yakucena idacitwa na manja a anthu, yakuti ndi cipangizo ca mbuto yandimomwene, mbwenye iye apita kudzulu, cincino iye asaonekera pamaso pa Mulungu thangwi ya ife. ²⁵ Pyenepi nee pyacitwa toera iye aperekeke kazinji kene, ninga pikhacita nyantsembe wankulu pacaka mu ndzidzi ukhapita iye m’mbuto yakucena na ciropa cakuti nee ndi cace. ²⁶ Mbapidakhala tenepo, iye akhafunika kuona nyatwa kazinji kene kubulukira pa ndzidzi udacitwa dziko. Mbwenye cincino, kunkhomo kwa midzidzi ino, iye aonekera kabodzi basi, toera afudze madawo kubulukira mu kuperekeka kwace ninga ntsembe.

Bwera Dzanditowera tsa. 183 ndima 4

‘Pitiriza na Kunditowera’

⁴ Mukulonga pya kufika kwa Yezu kudzulu, kutambirwa kwace na kukomerwa kwace mukugumanyikana pontho na Babace, Malemba nkhabe kutipanga. Mbwenye, Bhibhlya yapangiza mwanyapantsi pinthu pyakuti mbipidacitika mwakukhonda dembuka kudzulu pakumala Yezu kubwerera kweneku. Mu pyaka pyakupiringana madzana 15, anthu Aciyuda mwakukhonda phonya akhapereka umboni wa cakucitika cakupambulika. Ntsiku ibodzi pa caka, nyantsembe wankulu akhapita mu Mbuto Yakucena ya templo towera kumwaza ciropa ca ntsembe ya Ntsiku Yakuphimbira Madawo pa bokosi ya cibverano. Pa ntsiku ineyi, nyantsembe wankulu akhaphiphirisira Mesiya. Yezu akwanirisa mabvekero aciprofesiya a cakucitika ceneci kabodzi basi towera ciphate basa m’midzidzi yonsene pakumala kubwerera kwace kudzulu. Iye afika pa mbuto yacilemedzo ya Yahova kudzulu—mbuto yakucena kakamwe ya kudzulu na pantsi—na apereka kwa Babace ntengo wa ntsembe yace yaciomboli. (Ahebheri 9:​11, 12, 24) Kodi Yahova aitawira?

(Ahebheri 10:​1-4) Mwambo ndi cipangizo ca pinthu pyadidi pinafuna kudza, tayu maonekero andimomwene a pinthu pyenepi. Natenepa, Mwambo na ntsembe zibodzi zene zinapitiriza iwo kupereka caka na caka, cipo pinakwanisa kulungamisa ale anafendedzera Mulungu toera kumulambira. ² Khala ntsembe mbazidakwanisa kualungamisa, kodi iwo nee mbadasiya kuzipereka? Thangwi ale anabweresa ntsembe, pakumala kuceneswa, nee mbadapasika pontho mulando thangwi ya madawo awo. ³ Mbwenye ntsembe zenezi zisaperekwa caka na caka toera kuakumbusa madawo awo, ⁴ thangwi nkhabe kwanisika kuti ciropa ca ng’ombe na ca mabokho cibuluse madawo.

Perspicaz vol. 3 tsa. 245 ndima 7

Ungwiro

Kulungama Kwa Mwambo wa Mose. Mwambo udapereka Mose kuna Aizraeli ukhaphataniza masasanyiro a unyantsembe na ntsembe za pinyama pyakusiyana-siyana. Nakuti mwambo wabuluka kuna Mulungu, iwo ukhali waungwiro, mbwenye mwambo, unyantsembe, ntsembe zikhaperekwa pantsi pa Mwambo, nee pikhacitisa Aizraeli kukhala aungwiro, ninga pidalonga mpostolo wakupumirwa. (Aheb. 7:​11, 19; 10:1) M’mbuto mwa kuasudzula ku madawo na kufa, mwambo ukhapangiza pakweca kuti iwo ndi anyakudawa. (Aroma 3:​20; 7:​7-​13) Masasanyiro anewa onsene a Mulungu akhali na cifuniro; Mwambo ukhali ninga “ntsogoleri” toera anthu afike kuna Kristu, mbukhala “cipangizo ca pinthu pyadidi pinafuna kudza.” (Agal. 3:​19-​25; Aheb. 10:1) Natenepa, pidalonga Paulu kuti “pinthu pikhacimwana Mwambo kucita thangwi yakufewa kwa manungo,” (Aroma 8:3) iye akhalonga pikhacimwana kucita nyantsembe wankulu Waciyuda (wakuti akhadakhazikiswa na Mwambo toera kutsogolera masasanyiro akupereka ntsembe, pontho iye akhapita pa Mbuto Yakucena Kakamwe pa Ntsiku Yakulekerera Madawo na ciropa cakupereka naco ntsembe) toera “kupulumusa mwakukwana” ale akhatumikira iye, ninga pinafokotoza Ahebheri 7:​11, 18-​28. Ngakhale ntsembe zikhapereka dzindza ya Aroni zikhacitisa mbumba kukhala yakutawirika kuna Mulungu, nee zikhaasudzula m’madawo mbakhala na cikumbuntima cakucena. Mpostolo alonga kuti ntsembe zakulekerera madawo ‘cipo mbizidakwanisa kulungamisa ale anafendedzera Mulungu’ mwakubverana na cikumbuntima cawo. (Aheb. 10:​1-4; landanisani na Aheb. 9:9.) Nyantsembe wankulu nee mbadakwanisa kulipa mwakukwana ciomboli toera kulekerera madawo. Basi ene basa ya unyantsembe ya kwenda na kwenda na ntsembe ya umaso wa Kristu ndipyo pinakwanisa kulekerera madawo.​—Aheb. 9:​14; 10:12-​22.

Kusaka Mpfuma Zauzimu

(Ahebheri 9:​16, 17) Thangwi pangakhazikiswa cibverano na Mulungu, pisafunika kuti munthu adaimirira cibverano ceneci afe, ¹⁷ thangwi cibverano cisaphata basa munthu angafa, ico nkhabe kuphata basa khala munthu adaciimirira aciri maso.

Sentinela 01/03/92 tsa. 31 ndima 4-6

Mibvundzo Inacitwa na Anyakuleri

Paulu alonga kuti kufa kukhafunika toera cibverano ciphate basa pakati pa Mulungu na anthu. Cibverano ca Mwambo ndi citsandzo ca pyenepi. Mose akhali muimiriri wakuti ndiye adacitisa cibverano ciphate basa pakati pa Mulungu na Aizraeli. Mose acita basa yakufunika kakamwe, ndiye adacitisa kuti Aizraeli acite khundu mu cibverano. Natenepa Mose mbadakhala mbveranisi wa cibverano ca Mwambo, cakuti cabuluka kuna Yahova. Kodi Mose akhafunika kucucisa ciropa cace toera cibverano ceneci citome kuphata basa? Nkhabe. M’mbuto mwace ciropa ca Mose capitirwa mbuto na ciropa ca pinyama.​—Ahebheri 9:​18-​22.

Ndiye tani cibverano cipswa pakati pa Yahova na Izraeli wauzimu? Yezu acita basa ninga Muimiriri pakati pa Yahova na Izraeli wauzimu. Ngakhale ndi Yahova adakhazikisa cibverano ceneci, mbwenye iye akhaikha manyerezero ace kuna Yezu Kristu. Kusiyapo kukhala Mbveranisi, Yezu akhala pabodzi na ale akuti mbadakhala akutoma kucita khundu mu cibverano ceneci. (Luka 22:20, 28, 29) Pontho iye akhali wakuthema toera kupereka ntsembe yakufunika toera cibverano ceneci ciphate basa. Ntsembe ineyi nee ikhali ya pinyama, mbwenye ikhali ya umaso wa munthu waungwiro. Na thangwi ineyi Paulu alonga Kristu ninga mbveranisi wa cibverano cipswa. Pidamala ‘Kristu . . . kupita kudzulu, cincino iye mbaonekera pamaso pa Mulungu thangwi ya ife,’ cibverano cipswa catoma kuphata basa.​—Ahebheri 9:​12-​14, 24.

Pikhalonga iye thangwi ya Mose na Yezu ninga abveranisi, Paulu nee akhalonga kuti iwo ndi adatomesa pibverano, mbwenye pyacitwa na Mulungu. Mbwenye uwiri wawo acita khundu yakufunika kakamwe ninga aimiriri toera kukwanirisa pibverano pyenepi. Mu pibverano piwiri pyene pakhafunika kucuciswa ciropa: Ca pinyama toera kupitira mbuto Mose, kwa Yezu pakhafunika ciropa cace kwa ale akhafuna kupita mu cibverano cipswa.

(Ahebheri 10:​5-7) Na thangwi ineyi, pidabwera Kristu pa dziko, alonga: “ ‘Imwe nee mwafuna ntsembe na miyoni, mbwenye mwandikhunganyira manungo. ⁶ Imwe nee mwakomerwa na ntsembe zakupiswa, nee na ntsembe zinaperekwa thangwi ya madawo.’ ⁷ Buluka penepo, ine ndalonga: ‘Onani! Ine ndabwera, (m’bukhu pyalembwa thangwi ya ine) toera kucita pinafuna imwe, Mulungu wanga.’ ”

Perspicaz vol. 1 tsa. 315 ndima 6

Ubatizo

Luka alonga kuti Yezu akhacita phembero mu ndzidzi udabatizwa iye. (Luka 3:​21) Nyakulemba tsamba kwa Ahebheri alonga kuti pidabwera Yezu pa ‘dziko yapantsi’ (pyenepi nee pisabveka ndzidzi udabalwa iye thangwi nee mbadakwanisa kuleri mafala anewa na kualonga, mbwenye mu ndzidzi udabatizwa iye mbatoma utumiki wace) iye alonga mwakubverana na Masalmo 40:​6-8 (LXX): ‘Imwe nee mwafuna ntsembe na miyoni, mbwenye mwandikhunganyira manungo. . . . Onani! Ine ndabwera, (m’bukhu pyalembwa thangwi ya ine) toera kucita pinafuna imwe, Mulungu wanga.’ (Aheb. 10:​5-9) Yezu abalwa mu dzindza ya Yuda, yakuti ndi dzindza idacita cibverano ca Mwambo na Mulungu. (Eks. 19:​5-8; Agal. 4:4) Na thangwi ineyi, Yezu akhali kale mu cibverano na Yahova Mulungu pa ndzidzi udaenda iye kuna Juwau toera kubatizwa. Penepo Yezu akhacita pizinji kupiringana pire pikhaphembwa na Mwambo. Iye akhaperekeka kuna Babace, toera kucita cifuno Cace toera kupereka manungo ace adakhunganywa ninga ntsembe toera kumalisa ntsembe za pinyama zikhaperekwa mwakubverana na Mwambo. Mpostolo Paulu alonga: “Mwakubverana na “pinafuna” iye, ife taceneswa mukuphatisira manungo a Yezu Kristu adaperekwa ninga ntsembe kabodzi basi.” (Aheb. 10:10) Cifuniro ca Mulungu kuna Yezu cikhaphatanizambo basa ya Umambo, pontho Yezu aperekeka toera kucita basa ineyi. (Luka 4:​43; 17:20, 21) Yahova atawira mbadzindikira kuperekeka kwa mwanace mbandzodza na nzimu wakucena, mbalonga: “Iwe ndiwe Mwananga wakufunika; ine ndisakomerwa na iwe.”​—Mark. 1:​9-​11; Luka 3:​21-​23; Mat. 3:​13-​17.

SUMANA 16-​22 YA SETEMBRO

MPFUMA ZA MAFALA A MULUNGU | AHEBHERI 11

“Thangwi Yanji Cikhulupiro Ndi Cakufunika?”

(Ahebheri 11:1) Cikhulupiro ndi cidikhiro cakunyindirika ca pinthu pinadikhirwa, cipangizo cakuti pinthu pinakhonda kuoneka na maso mwandimomwene piripo.

Ncenjezi 10/16 tsa. 22 ndima 6

Pangizani Kuti Musakhulupira Mapikiro a Yahova

⁶ Bhibhlya isafokotoza mabvekero a cikhulupiro pa Ahebheri 11:1. (Lerini.) (1) Cikhulupiro ndi “cidikhiro candimomwene ca pinthu pinadikhirwa.” Pinthu ‘pinadikhira’ ife pisaphataniza mapikiro a Mulungu thangwi ya tsogolo. Mwacitsandzo, ife tiri na cinyindiro consene cakuti uipi unadzamala, pontho tinadzakhala mu dziko ipswa. (2) Cikhulupiro ndi “cipangizo ca undimomwene” peno umboni wakutawirika “wa pinthu pyakukhonda kuoneka.” Maseze ife nkhabe kwanisa kuona na maso athu, mbwenye tisadziwa kuti kudzulu kuna Yahova Mulungu, Yezu Kristu, aanju na Umambo wa Mulungu. (Ahebheri 11:3) Tinapangiza tani kuti tisakhulupira mapikiro a Mulungu na pinthu pyakuti ife nkhabe kwanisa kupiona? Tisapangiza pyenepi kubulukira munjira inaphatisira ife umaso wathu, pinthu pinalonga ife na pinacita ife.

(Ahebheri 11:6) Kusiyapo pyenepi, mwakusowa cikhulupiro nkhabe kwanisika kukomeresa Mulungu, thangwi munthu anafendedzera Mulungu asafunika kukhulupira kuti iye alipo, pontho asapasa nkhombo ale anansaka na ntima onsene.

Sentinela 01/11/13 tsa. 11 ndima 2-5

“Asapasa Nkhombo Ale Anansaka na Ntima Onsene”

Tisafunika kucitanji toera kukomeresa Yahova? Paulu alemba: “Mwakusowa cikhulupiro nkhabe kwanisika kukomeresa Mulungu.” Onani kuti Paulu nee alonga kuti mwakusowa cikhulupiro ndi pyakunentsa kukomeresa Mulungu, mbwenye alonga kuti nkhabe kwanisika. M’mafala anango, toera kukomeresa Mulungu tisafunika kukhala na cikhulupiro.

Ndi ntundu wanji wa cikhulupiro cinakomeresa Yahova? Cikhulupiro cathu kuna Mulungu cisaphataniza pinthu piwiri. Cakutoma, tisafunika “kukhulupira kuti iye alipo.” Mabhibhlya anango asalonga ‘kukhulupira kuti iye ndi wandimomwene’ pontho ‘kukhulupira kuti iye alipo.’ Tinakomeresa tani Mulungu khala tisapenula kuti iye alipo? Cikhulupiro candimomwene cisaphataniza pizinji kupiringana kutawira kuti Mulungu alipo, thangwi madimonyo asakhulupirambo kuti Yahova alipo. (Tiyago 2:​19) Tisafunika kupangiza cikhulupiro kuna Mulungu mukukhala maso mwakubverana na pire pinankomeresa.​—Tiyago 2:​20, 26.

Caciwiri, tisafunika ‘kukhulupira kuti’ Mulungu ndi ‘nyakupasa nkhombo.’ Munthu wa cikhulupiro candimomwene asakhala na cinyindiro consene cakuti kuwangisira kwace toera kukomeresa Mulungu nee ndi kwakusowa basa. (1 Akorinto 15:58) Tinakomeresa tani Yahova khala tisapenula mphambvu na kufuna kwace kutipasa nkhombo? (Tiyago 1:​17; 1 Pedhru 5:7) Munthu ananyerezera kuti Mulungu ndi wakusowa citsalakano, wakuuma ntima na wakukhonda pereka takhuta, munthu unoyu nee asadziwa Mulungu analongwa m’Bhibhlya.

Mbani anapaswa nkhombo na Yahova? Paulu alonga kuti ndi “ale anansaka na ntima onsene.” Bukhu ibodzi yalonga kuti fala idathumburuzwa mu cigerego kuti ‘kunsaka na ntima onsene’ nee isabveka kuyesera kupfundza thangwi ya Mulungu, mbwenye ndi kuwangisira toera kuntumikira. Bukhu inango yalonga kuti fala ineyi Yacigerego isafokotoza kuwangisira mwakukwana. Mwandimomwene, Yahova asapasa nkhombo ale akuti mwacikhulupiro asamulambira mwaufuni, pontho mwaphinga.​—Mateu 22:37.

(Ahebheri 11:33-​38) Thangwi ya cikhulupiro, iwo akunda maumambo, akhazikisa ulungami, atambira mapikiro, afunga milomo ya nkhalamu, ³⁴ athimisa mphambvu ya moto, apulumuka pikhafuna iwo kuphiwa na supada, maseze iwo akhali akufewa apaswa mphambvu, akhala amphambvu kunkhondo, mbathamangisa anyankhondo adabwera dzamenyana na dziko yawo. ³⁵ Akazi atambira anyakufunika awo adalamuswa muli akufa, mbwenye anthu anango athabuswa thangwi akhonda kusiya cikhulupiro cawo basi ene toera kusudzulwa, iwo acita pyenepi toera agumane ntundu wadidi kakamwe wa kulamuswa muli akufa. ³⁶ Inde, anango aona nyatwa thangwi ya kusekwa, kukwapulwa, kusiyapo pyenepi, amangwa na maunyolo mbafungirwa nkaidi. ³⁷ Iwo aponyerwa miyala, ayeserwa, apandulwa pakati-nakati, aphiwa na supada, akhabvala nthembe za mabira na za mbuzi, akhasowa pinthu, aona nyatwa, pontho iwo akhathabuswa; ³⁸ dziko nee ikhali mbuto yakuthema kwa iwo toera kukhala. Iwo akhaenda mbandzendza-ndzendza m’mathando, m’mapiri, mu mphako za miyala na m’madzimba.

Ncenjezi 10/16 tsa. 17-18 ndima 10-11

Wangisani Cikhulupiro Canu ku Mapikiro a Mulungu

¹⁰ Pa Ahebheri kapitulu 11, mpostolo Paulu alonga: ‘Akazi anango atambira anyakufa awo, adalamuswa muli akufa. Anthu anango atawira kusanyiwa, mbakhonda kupulumuswa, toera aone kulamuka muli akufa kwa mbiri kakamwe.’ (Ahebheri 11:35) Anthu azinji apirira mayesero mbakhala akukhulupirika kuna Mulungu thangwi akhakhulupira kakamwe pikiro ya kulamuswa kwa anyakufa idacita Mulungu. Iwo akhadziwa kuti ntsogolo, Yahova anaalamusa muli akufa toera kukhala maso pa dziko yapantsi kwenda na kwenda. Nyerezerani pya Nabhoti na Zakariya. Thangwi yakubvera Mulungu iwo amenywa na miyala mpaka kufa. (1 Amambo 21:3, 15; 2 Pya dziko ya Israele 24:20, 21) Dhanyeli aponywa ndjenje ya nkhalamu zakuti zikhali na njala kakamwe, pontho axamwali ace aponywa ndjenje ya moto. Iwo akhadatonga kufa m’mbuto mwakukhonda kukhala akukhulupirika kuna Yahova. Amuna anewa akhakhulupira mwakukwana kuti Yahova mbadaapasa nzimu wakucena na kuaphedza toera kupirira nyatwa zenezi.​—Aheb. 11:33, 34; Dan. 3:​16-​18, 20, 28; 6:​13, 16, 21-​23.

¹¹ Aprofeta azinji, ninga Mikeya na Yeremiya akhasingirirwa peno kuikhwa nkaidi. Anango, ninga Eliya, ‘andzendza-ndzendza n’thando, m’mapiri, m’mphako na m’madjenje a miyala.’ Onsene apirira mayesero mbakhala akukhulupirika kwa Mulungu thangwi akhali na “cidikhiro candimomwene ca pinthu pinadikhirwa.”​—Aheb. 11:​1, 36-​38; 1 Ama. 18:13; 22:24-​27; Yer. 20:​1, 2; 28:10, 11; 32:2.

Kusaka Mpfuma Zauzimu

(Ahebheri 11:4) Thangwi ya cikhulupiro, Abheli apereka kuna Mulungu ntsembe ya ntengo ukulu kakamwe kupiringana ntsembe ya Kaini. Kubulukira mu cikhulupiro ceneci iye atambira umboni wakuti akhali wakulungama, thangwi Mulungu akomerwa na miyoni yace. Maseze iye afa, asapitiriza kulonga kubulukira mu cikhulupiro cace.

Perspicaz vol. 2 tsa. 109 ndima 3

Cikhulupiro

Pitsandzo Pya Cikhulupiro Pya Atumiki Akale. M’bodzi na m’bodzi wa ale anacita khundu ya “nsoka ukulu wa amboni” adalongwa na Paulu (Aheb. 12:1) akhali na mathangwi adidi akukhala na cikhulupiro. Mwacitsandzo, Abheli akhadziwa pikiro ya Mulungu inalonga pya “dzindza” yakuti mbidanyedza nsolo wa “nyoka.” Iye aona kukwanirisika kwa kutonga kudalonga Yahova kuna anyakubalace mu Edheni. Kunja kwa Edheni, Adhamu na banjace akhafunika kuphata basa yakuwanga toera kugumana cakudya thangwi mataka akhadapaswa dzedze, natenepa mataka akhamera minga na tsanga. Panango Abheli akhaona kuti Eva akhali na cifuno kakamwe kwa mamunace, pontho Adhamu akhatonga nkazace. Mwandimomwene, mai wace akhalonga thangwi ya kupha kukhabva iye angakhala na pathupi. Pontho njira yakupita m’munda wa Edheni ikhaonerwa na akerubhi na supada yakugaka moto. (Gen. 3:​14-​19, 24) Pyenepi pikhali “cipangizo” capakweca pyakuti pyapasa Abheli cinyindiro cakuti mbapadaoneka cisudzulo kuna anthu kubulukira kwa ‘mbeu idapikirwa.’ Natenepa, thangwi ya cikhulupiro, Abheli “apereka kuna Mulungu ntsembe” ya ntengo ukulu kakamwe kupiringana ntsembe ya Kaini.​—Aheb. 11:​1, 4.

(Ahebheri 11:5) Thangwi ya cikhulupiro, Enoki athukuswa na Mulungu toera akhonde kuthabuka mu ndzidzi udafa iye, pontho nkhabe kudaoneka iye, thangwi Mulungu akhadan’thukusa; thangwi mbadzati kuthukuswa iye atambira umboni wakuti akhadakomeresa Mulungu.

Sentinela 01/17 tsa. 12 ndima 5

‘Iye Akomeresa Mulungu’

Ndi munjira ipi Enoki ‘athukuswa’ toera akhonde ‘kuona kufa’? Panango Yahova abulusa umaso wa Enoki mwaufuni toera akhonde kuphiwa mwausumankha. Mbwenye pakutoma, Enoki “atambira umboni wakuti akhadakomeresa Mulungu.” Munjira ipi? Panango mbadzati kufa, Enoki aona masomphenya akubuluka kuna Mulungu, panango aoneswa dziko mbikhala paraizu. Na cipangizo ceneci cakuti Mulungu akhakomerwa na iye, Enoki adzafa. Thangwi ya Enoki na amuna na akazi akukhulupirika, mpostolo Paulu alonga: “Anthu anewa onsene afa mwakukhulupirika.” (Ahebheri 11:13) Panango anyamalwa a Enoki asaka manungo ace, mbwenye ‘nee aagumana.’ Yahova panango abisa manungo a Enoki toera manungo ace akhonde kutsalakanwa mwakuipa, peno kuphatisirwa mu uphemberi wauthambi.

SUMANA 23-​29 YA SETEMBRO

MPFUMA ZA MAFALA A MULUNGU | AHEBHERI 12-​13

“Kulanga Ndi Njira Inapangiza Yahova Ufuni Wace Kuna Ife”

(Ahebheri 12:5) Pontho mwaduwaliratu cenjezo inaperekwa kuna imwe ninga ana: “Mwananga, leka kupwaza kulanga kwa Yahova, pontho leka kufewa manungo iye angakusandika;

Sentinela 15/03/12 tsa. 29 ndima 18

Lekani Kuyang’ana ‘Pinthu Pya Nduli’

¹⁸ Uphungu Wakuti Usapha. Ndiye tani tingayeserwa kunyerezera mwakuipa uphungu wakuti tautambira? Pyenepi pisapha, pontho pinaticitisa “kufewa manungo.” (Aheb. 12:5) ‘Tingapwaza’ uphungu mu kuukhonda, peno kuutambira mbatikhonda kuuphatisira, mwandimomwene nee tinatawirisa kuti uphungu unoyu utiphindulise. Na thangwi ineyi, mphyadidi kakamwe kuphatisira uphungu wa Salomoni wakuti: ‘Phatisira uphungu, leka kuusiya. Ukoye thangwi iwo ndi umaso wako.’ (Mis. 4:​13) Ninga nyakutekenya motokala asabvera pidzindikiro pya mu nseu, tendeni titawire uphungu mbatiuphatisira.​—Mis. 4:​26, 27; lerini Ahebheri 12:12, 13.

(Ahebheri 12:​6, 7) thangwi Yahova asalanga ale akuti iye asaafuna, mwandimomwene, iye asakwapula munthu onsene anatambira iye ninga mwanace.” ⁷ Imwe musafunika kupirira, thangwi ineyi ndi njira ibodzi ya kulangwa kwanu. Mulungu asakutsalakanani ninga anace. Kodi ndi mwana upi wakuti nkhabe kulangwa na babace?

Sentinela 01/07/12 tsa. 21 ndima 3

“Ndzidzi Onsene Unacita Imwe Phembero Longani Tenepa: ‘Baba’ ”

Baba waufuni asalanga anace, thangwi asadzudzumika na tsogolo yawo. (Aefesi 6:4) Baba unoyu panango anapereka mwakuwanga uphungu, mbwenye tayu mwaukali. Munjira ibodzi ene, Babathu wakudzulu midzidzi inango anaona kuti ndi pyakuthema kutilanga. Ndzidzi onsene Mulungu asalanga mwaufuni, tayu mwaukali. Ninga Babace, Yezu nee akhali waukali, maseze anyakupfundzace akhadembuka kuphatisira uphungu wace.​—Mateu 20:20-​28; Luka 22:24-​30.

(Ahebheri 12:11) Mwandimomwene ife nee tisakomerwa mu ndzidzi unalangwa ife, mbwenye tisabva kupha; ngakhale tenepo, kuna ale anatawira kupfundziswa nako, mukupita kwa ndzidzi kulangwa kweneku kusabala nsapo wantendere mwakubverana na ulungami.

Ncenjezi 03/18 tsa. 32 ndima 18

‘Tawirani Kulangwa Toera Mukhale Andzeru’

¹⁸ Kulangwa kusapha, mbwenye kukhonda kulangwa na Mulungu kusapha kakamwe. (Ahebheri 12:11) Tinakwanisa kupfundza kubulukira mu citsandzo cakuipa ca Kaini na Mambo Zedhekiya. Pidaona Mulungu kuti Kaini akhaida m’bale wace mbafuna kumupha, iye ancenjeza: ‘Thangwi yanji waipirwa kakamwe? Ungacita pyadidi nee unadzabverwambo ntsisi? Ungacita pyakuipa, madawo ali cifupi na iwe, iwo anadzakukunda; kodi iwe unadzakwanisa kuakunda?’ (Genesi 4:​6, 7) Kaini akhonda kulangwa na Yahova, apha m’bale wace mbathabuka na nyatwa zizinji mu umaso wace. (Genesi 4:​11, 12) Kaini mbadabvera Mulungu, iye nee mbadathabuka na nyatwa zizinji.

Kusaka Mpfuma Zauzimu

(Ahebheri 12:1) Natenepa, nakuti tazungulirwa na nsoka ukulu wa amboni, tisafunikambo kusiya pinthu pyonsene pyakulemera na madawo akuti asatimanga mwakukhonda nentsa, pontho tendeni tithamange mwakupirira pa mapika adaikhwa patsogolo pathu;

Sentinela 15/09/11 tsa. 17-18 ndima 11

Thamangani Mwakupirira

¹¹ Ale akhacita khundu ya “nsoka ukulu wa amboni” nee akhali anthu akuti akhaona basi andzawo mbakathamanga peno kudikhira m’bodzi wa nsoka wawo kuwina. Mbuto mwace iwo akhacitambo mapika akuthamanga. Iwo athamanga mpaka kunkhomo. Maseze iwo afa, tinakwanisa kuakumbuka ninga anyakuthamanga a maluso akuti anakwanisa kuphedzambo anyakuthamanga apswa. Nyerezerani kuti nyakuthamanga mupswa anapibva tani angadziwa kuti akuoniwa na anyakuthamanga aluso. Kodi iye nee mbadakulumizika toera kucita pizinji peno kuwina? Amboni anewa a mu ndzidzi wakale apangiza kuti kuthamanga kweneku kwakuphiphirisa, ngakhale kunentse kunakwanisa kuwiniwa. Mukunyerezera citsandzo ca ‘nsoka wa amboni,’ Akristu Acihebheri a mu ndzidzi wa apostolo mbadakwanisa kukhala acipapo mbathamanga mwakupirira ninga pinacita ife lero.

(Ahebheri 13:9) Lekani kupeuswa na pipfundziso pyakusiyana-siyana pyakuti nkhabe kubverana na pidapfundziswa ife, thangwi mphyadidi kakamwe kuti ntima uwangiswe na kukoma ntima kukulu kwa Mulungu, kupiringana kuwangiswa na pyakudya, pyakuti nkhabe kuphedza ale anapitowezera.

Sentinela 15/12/89 tsa. 22 ndima 10

Perekani Ntsembe Zakuti Zisakomeresa Yahova

¹⁰ Ahebheri akhafunika kucalira “kupeuswa na pipfundziso pyakusiyana-siyana” pya Ayuda aupfakafaka. (Agalata 5:​1-6) Mitima yawo mbidakwanisa kukhala yakuwanga mu undimomwene, tayu thangwi ya pipfundziso pyenepi, mbwenye thangwi ya ‘kukoma ntima kukulu kwa Mulungu.’ Anango akhaketesana thangwi ya pyakudya na ntsembe, mbwenye Paulu alonga kuti ntima nkhabe kuwangiswa na “pyakudya, pyakuti nkhabe kuphedza ale anapitowezera.” Nkhombo zauzimu zinabwera thangwi yakulemedza Mulungu na kupereka takhuta ku ciomboli, tayu thangwi yakudzudzumika na pyakudya na kukumbuka ntsiku zakupambulika. (Aroma 14:​5-9) Natenepa, ntsembe ya Kristu yacitisa kuti ntsembe za Alevi zikhonde kuphata basa.​—Ahebheri 9:​9-​14; 10:​5-​10.

SUMANA 30 YA SETEMBRO–6 YA OUTUBRO

MPFUMA ZA MAFALA A MULUNGU | TIYAGO 1-2

“Njira Inatsogolera ku Madawo na Kufa”

(Tiyago 1:​14) Mbwenye m’bodzi na m’bodzi asayeserwa thangwi yakukwatika mbapeuswa na kusirira kwace.

Despertai! 04/17 tsa. 14

Mayesero

Mayesero ndi kukulumizwa toera kucita cinthu, makamaka cakuipa. Mwacitsandzo, nyerezerani kuti muli mu loja mbamuona cinthu cakuti musacifuna kakamwe. Mu ndzidzi unoyu musanyerezera kuti ndi pyakukhonda nentsa kuba cinthu ceneci mbamukhonda kudzindikirwa. Mbwenye cikumbuntima canu cisakukhondesani! Natenepa musasiya kunyerezera pyenepi mbamupitiriza kufamba. Mu ndzidzi unoyu mayesero amala, pontho mwakwanisa kuakunda.

BHIBHLYA ISALONGANJI

Khala musanyerezera kucita pinthu pyakuipa nee pisabveka kuti ndimwe munthu wakuipa. Bhibhlya isalonga kuti ife tonsene tisayeserwa midzidzi inango. (1 Akorinto 10:13) Cakufunika kakamwe ndi pinafuna ife kucita tingathimbana na mayesero. Anango asapitiriza kunyerezera pinthu pyakuipa, mbwenye mwakukhonda dikhira asamalisira kupicita. Anango asamalisa manyerezero anewa mwakucimbiza.

“M’bodzi na m’bodzi asayeserwa thangwi yakukwatika mbapeuswa na kusirira kwace.”​—Tiyago 1:​14.

(Tiyago 1:​15) Natenepa, kusirira kungakula, kusabala madawo; madawo angamala kucitwa, asabweresa kufa.

Despertai! 04/17 tsa. 14

Mayesero

Bhibhlya isapangiza mathanyo anatsogolera munthu toera kucita pyakuipa. Tiyago 1:​15 isalonga: “Natenepa, kusirira kungakula, kusabala madawo; madawo angamala kucitwa, asabweresa kufa.” Nkazi angakhala na pathupi, mwandimomwene asadikhira kubala. Munjira ibodzi ene, tingapitiriza kunyerezera pinthu pyakuipa tinamalisira kupicita. Mbwenye nee tisafunika kutongwa na manyerezero akuipa. Ife tinakwanisa kuakunda.

Kusaka Mpfuma Zauzimu

(Tiyago 1:17) Muoni onsene wadidi na wakulungama usabuluka kudzulu, kuna Baba wa ceza, iye nkhabe kucinja ninga n’thundzi wakuti nkhabe kukhazikika.

Perspicaz vol. 2 tsa. 726 ndima 5

Ceza

Yahova ndi “Baba wa ceza” ca kudzulu. (Tiya. 1:​17) Iye nee asatipasa basi ene ‘ceza ca dzuwa, nyenyezi na mwezi toera kumwanikira na masiku’ (Yer. 31:35) mbwenye iye ndi Phata ya ceza cauzimu. (2 Akor. 4:6) Mwambo wanu, matongero anu na mafalanu ndi ceza kwa ale anatawira kutsogolerwa na iwo. (Masal. 43:3; 119:105; Mis. 6:​23; Iza. 51:4) Nyamasalmo alonga: ‘Na ceza cinabuluka kuna imwe tisakwanisa kuona ceza.’ (Masal. 36:9; landanisani na Masal. 27:1; 43:3.) Ninga ceza ca dzuwa cisapitiriza kuyetimira tomera macibese mpaka ‘masikati,’ natenepa njira ya anyakulungama isamwanikirwa na udziwisi wa Mulungu, mbupitiriza kumwanikira kakamwe. (Mis. 4:​18) Kutowezera matongero a Yahova pisabveka kufamba mu ceza Cace. (Iza. 2:​3-5) Munjira inango, munthu anaona pinthu munjira yakukhonda thema, peno na cifuno cakuipa, iye ali n’cidima cauzimu. Yezu alonga: “Khala diso yako ndi yakuipa, manungo ako onsene anakhala cidima. Khala ceza ciri muna iwe ndi cidima, cidima ceneci ndi cikulu kakamwe!”​—Mat. 6:​23; landanisani na Deut. 15:9; 28:54-​57; Mis. 28:22; 2 Ped. 2:​14.

(Tiyago 2:8) Khala imwe musabvera mwambo ukulu wa Mambo mwakubverana na pinalonga khundu inango ya Malemba kuti: “Funa ndzako ninga iwe ene,” mukucita mwadidi kakamwe.

Perspicaz vol. 2 tsa. 685 ndima 3

Mwambo

“Mwambo Ukulu wa Mambo.” “Mwambo ukulu wa Mambo” ndi wakufunika, pontho uli na cifuniro cibodzi cene na mitemo inango ya anthu. (Tiya. 2:8) Khundu yakufunika kakamwe ya cibverano ca Mwambo ikhali ufuni; pontho “funa ndzako ninga iwe ene” (mwambo ukulu wa mambo) akhali matongero aciwiri akuti ndi phata ya Mwambo onsene na mafala a aprofeta. (Mat. 22:37-​40) Maseze Akristu nee ali pantsi pa cibverano ca Mwambo, iwo ali pantsi pa mwambo wa Mambo, Yahova na Mwanace, Mambo Yezu Kristu, mwakubverana na cibverano cipswa.