Umambo Wa Mulungu Ndi Ninji?

 1. Ndi phembero ipi yambiri inafuna dingwa cincino?

ANTHU azinji pa dziko yonsene asadziwa phembero yakuti azinji asaicemera Baba Wathu, peno Phembero ya Mbuya. Mafala mawiri awa asalonga pya phembero yambiri idapangiza Yezu Kristu ninga citsandzo. Phembero ineyi iri na mabvekero mazinji kakamwe. Kudinga maphembo matatu akutoma kunadzakuphedzani kudziwa pizinji pinapfundzisadi Bhibhlya.

 2. Kodi Yezu apfundzisa anyakupfundzace toera kuphemba pinthu pipi pitatu mu phembero?

² Kutoma kwa phembero ineyi yacitsandzo, Yezu apfundzisa anyakupfundzace: ‘Imwe longani maphembero ninga tenepa: Baba wathu muli kudzulu, dzina yanu ikhale na mbiri. Umambo wanu mbudze kuna ife. Pinafuna imwe mbapicitwe pantsi pano ninga kudzulu.’ (Mateo 6:9-13) Kodi maphembo matatu awa asabvekanji?

 3. Ndi ninji pinafuna ife kudziwa thangwi ya Umambo wa Mulungu?

³ Tapfundza pizinji pya dzina ya Mulungu, Yahova. Pontho tadinga cifuniro ca Mulungu, pidacita iye na pinafuna kudzacitira iye anthu. Mphapo, Yezu akhafuna kulonganji mudatipanga iye kuphembera kuti Umambo wa Mulungu udze? Umambo wa Mulungu ndi ninji? Kodi kudza kwawo kunadzacenesa tani dzina ya Mulungu? Kodi kudza kwa Umambo kusabverana tani na kucitika kwa cifuniro ca Mulungu?

 4. Umambo wa Mulungu ndi ninji, na Mambo wace mbani?

⁴ Umambo wa Mulungu ndi utongi wakukhazikiswa na Yahova Mulungu, pontho Mambo wace asankhulwa na Mulungu. Mbani Mambo wa Umambo wa Mulungu? Yezu Kristu. Yezu ninga Mambo ndi wankulu kupiringana atongi onsene a anthu na asacemerwa “Mambo wa amambo onsene, Mbuya wa ambuya onsene.” (1 Timoti 6:15) Iye ali na mphambvu yakucita udidi ukulu kupiringana atongi onsene a anthu, ngakhale wadidi pakati pawo.

 5. Umambo wa Mulungu unadzatonga kubulukira kupi, na unadzatonganji?

⁵ Umambo wa Mulungu unadzatonga kubulukira kupi? Kodi Yezu ali kupi cincino? Musakumbuka kuti mwapfundza kuti iye aphiwa pa muti wakusikimiza, na alamuswa muli akufa. Mwakukhonda dembuka iye aenda kudzulu. (Machitiro 2:33) Inde, Umambo wa Mulungu uli kudzulu. Ndi thangwi ineyi Bhibhlya isaucemera ‘Umambo wa kudzulu.’ (2 Timoti 4:18) Maseze Umambo wa Mulungu uli kudzulu, unadzatonga dziko yapantsi.​—Lerini Apokalipse 11:15.

6, 7. Ndi ninji cinacitisa Yezu kukhala Mambo wadidi kakamwe?

⁶ Ndi ninji cinacitisa Yezu kukhala Mambo wadidi kakamwe? Thangwi ibodzi ndi yakuti iye cipo anadzafa. Mu kulandanisa Yezu na amambo a anthu, Bhibhlya isalonga kuti iye ekha ndi ‘wakukhala na moyo wakukhonda mala, wakukhalambo mu ceza cakukhonda pitika.’ (1 Timoti 6:16) Pyenepi pisabveka kuti pinthu pyonsene pyadidi pinacita Yezu pinadzakhala kwenda na kwenda. Na iye anadzacita pinthu pyakuphindulisa anthu.

⁷ Onani profesiya iyi ya Bhibhlya inalonga pya Yezu: ‘Nzimu wa Yahova unampasa luso; unampasambo udziwisi na ndzeru zakutonga mbumba yace. Iye anadziwa pinafuna Yahova, anansimba, mbakomerwa na kucita pinampanga Iye. Miseru ya anyakutcerenga, anaitonga pyadidi pyene mbapasa akusowa mphambvu pyawo pyonsene.’ (Izaiya 11:2-4) Mafala awa asapangiza kuti Yezu anadzakhala Mambo wakulungama na wakubvera ntsisi anthu pa dziko yapantsi. Kodi nee musafuna kukhala na ntongi ninga unoyu?

 8. Mbani anadzatonga na Yezu?

⁸ Pana undimomwene unango unalonga pya Umambo wa Mulungu: Yezu nee anadzatonga ekha. Anadzakhala na atongi andzace. Mwacitsandzo, mpostolo Paulu apanga Timoti: “Tingapirira mpaka pa nkhomo, tinadzatongambo anthu onsene pabodzi na iye.” (2 Timoti 2:12) Inde, Paulu, Timoti na anthu anango akukhulupirika adasankhulwa na Mulungu anadzatonga pabodzi na Yezu mu Umambo wakudzulu. Mbangasi anafuna kudzakhala na mwai unoyu?

 9. Mbangasi anadzatonga na Yezu, na Mulungu atoma lini kuasankhula?

⁹ Ninga pyapangizwa mu Nsolo 7 wa bukhu ino, mpostolo Jwau aona m’masomphenya ‘Mwanabira, Yezu Kristu, wakulimira padzulu pa Phiri ya Sioni, mbuto yace yaumambo kudzulu. Pabodzi na iye akhali anthu 144.000, akukhala na dzina yace na dzinambo ya babace, adalembiwa pa nkhope pawo.’ Anthu anewa akukwana 144.000 mbani? Jwau asatipanga: ‘Ndi ale anatowera Mwanabira konsene kunaenda iye. Iwo aomboliwa pa anthu toera akhale akutoma a Mulungu na a Mwanabira.’ (Apokalipse 14:1, 4) Inde, anewa ndi atowereri akukhulupirika a Yezu Kristu adasankhulwa toera kutonga kudzulu na iye. Angamala kulamuswa muli akufa mbaenda kudzulu, iwo ‘anadzakhalambo anyakutonga a pantsi pano’ pabodzi na Yezu. (Apokalipse 5:10) Kubulukira mu ntsiku za apostolo, Mulungu atoma kusankhula Akristu akukhulupirika toera akwanirise numero ya 144.000.

10. Thangwi yanji ndi masasanyiro aufuni kuti Yezu na 144.000 atonge anthu?

¹⁰ Masasanyiro akuti Yezu na 144.000 atonge anthu ndi aufuni kakamwe. Thangwi ibodzi ndi yakuti Yezu asadziwa kuti ndi ninji kukhala munthu waunyama na kunentseka. Mukulonga pya Yezu, Paulu alonga: ‘Nyantsembe wathu wankulu si wakukhonda kubvera ntsisi anthu akufewa tayu; mbwenye iye ene ayeserwa mu pyonsene sawasawa ninga ife pano; mbwenye madawo, iye hadaacita tayu.’ (Ahebere 4:15; 5:8) Anyakutonga andzace anentsekambo mbapirira ninga anthu. Mwakuthimizira, iwo athimbana na kusowa ungwiro, pontho na mautenda akusiyana-siyana. Mwandimomwene, iwo anadzabvesesa nyatwa zinatamba anthu!

11. Thangwi yanji Yezu apanga anyakupfundzace toera kuphembera kuti cifuniro ca Mulungu cicitike kudzulu?

¹¹ Mudalonga Yezu kuti anyakupfundzace asafunika kuphembera kuti Umambo wa Mulungu udze, iye alongambo kuti asafunika kuphembera kuti cifuno ca Mulungu cicitike “pantsi pano.” Mulungu ali kudzulu, na cifuno cace ciri kucitwa kweneko ndzidzi onsene na aanju akukhulupirika. Mbwenye mu Nsolo 3 wa bukhu ino, tapfundza kuti anju wakuipa asiya kucita cifuno ca Mulungu na acitisa kuti Adhamu na Eva adawe. Mu nsolo 10, tinadzadinga pinapfundzisa Bhibhlya thangwi ya anju unoyu wakuipa anadziwika ninga Sathani Dyabo. Sathani na aanju adasankhula kuntowerera​—anacemerwa mademonyo, alekererwa kukhala kudzulu mu ndzidzi wakucepa. Natenepa si onsene tayu akakhala kudzulu akhacita cifuno ca Mulungu. Pyenepi mbipidacinja na kutoma kutonga kwa Umambo wa Mulungu. Mambo wakukhazikiswa kwene, Yezu Kristu, mbadacita nkhondo na Sathani.​—Lerini Apokalipse 12:7-9.

12. Ndi pyakucitika pipi piwiri pinafokotozwa pa Apokalipse 12:10?

¹² Mafala akutowera a profesiya asafokotoza pikhafuna kudzacitika: ‘Ndabva mafala makulu a kudzulu, akubveka kuti: Cincino cabwera cipulumuso na mphambvu za Umambo wa Mulungu wathu, na za Kristu wace toera adzatonge. Thangwi amala kuponyiwa uyu akhasumira abale athu, Sathani, masikati na masiku kuli Mulungu.’ (Apokalipse 12:10) Kodi mwaona pyakucitika piwiri pyakufunika kakamwe pinafokotozwa mu vesi iyi ya m’Bhibhlya? Cakutoma, Umambo wa Mulungu wakutongwa na Yezu Kristu watoma kutonga. Caciwiri, Sathani athamangiswa kudzulu mbaponywa pa dziko yapantsi.

13. Ndi api maphindu adaoneka thangwi ya kuthamangiswa kwa Sathani kudzulu?

¹³ Kodi pyakucitika pyenepi piwiri pikhali na mamalisiro api? Bhibhlya isalonga: ‘Mphapo, komerwani, imwe a kudzulu na imwe monsene munakhalako.’ (Apokalipse 12:12) Inde, aanju akukhulupirika kudzulu asakomerwa thangwi, na kuthamangiswa kwa Sathani na mademonyo ace, onsene kudzulu ndi akukhulupirika kwa Yahova Mulungu. Kuli na ntendere na kubverana kwakukwana na kwakukhonda fudzika. Cifuniro ca Mulungu ciri kucitwa kudzulu.

14. Ndi ninji pinacitika thangwi ya kuponywa kwa Sathani pa dziko yapantsi?

¹⁴ Ndiye tani mphapo pya dziko yapantsi? Bhibhlya isalonga: ‘Dzedze yafika pantsi pano na ku bara thangwi Dyabo atcitha kuli imwe mbakhala na ukali wakugopswa, mbadziwambo kuti ndzidzi wace ndi ung’ono basi.’ (Apokalipse 12:12) Sathani ali wakuipirwa thangwi yakuthamangiswa kudzulu, pontho thangwi asala na ndzidzi wakucepa. Mu ukali wace iye asacitisa nyatwa, peno “dzedze,” pa dziko yapantsi. Tinadzapfundza pizinji pya “dzedze” ineyi mu nsolo unatowera. Na kuponywa kwa Sathani, panango tinabvundzika: Kodi Umambo unacitisa tani kuti cifuniro ca Mulungu cicitike pa dziko yapantsi?

15. Ndi cipi cifuniro ca Mulungu na dziko yapantsi?

¹⁵ Inde, kumbukani cifuniro ca Mulungu na dziko yapantsi. Imwe mwapfundza pyenepi mu Nsolo 3. Mu Edeni, Mulungu apangiza kuti cifuniro cace ndi cakuti dziko yapantsi ikhale paradizu yakudzala na anthu akulungama, na umaso wakukhonda mala. Sathani acitisa Adhamu na Eva kudawa, na pyenepi pyakhuya kukwanirisika kwa cifuniro ca Mulungu na dziko yapantsi, mbwenye ico nee cacinja. Cifuniro ca Yahova ndi cakuti ‘anyakulungama atambire dziko, mbakhala mwenemo kwenda na kwenda.’ (Masalmo 37:29) Umambo wa Mulungu unadzakwanirisa pyenepi. Munjira ipi?

16, 17. Danyele 2:44 isatipanganji thangwi ya Umambo wa Mulungu?

¹⁶ Dingani profesiya inagumanika pa Danyele 2:44. Tisaleri: ‘Mu ntsiku za mautongi anewa akumalisa, Mulungu anadzalamusa utongi unango wakukhonda kufudzika, na wakukhondambo kungonjeswa. Utongi uyu, unadzakunda mbupasa manyadzo utongi unango, iwo mbukhala pyawo mwakuwanga mwene.’ Kodi pyenepi pisatipanganji thangwi ya Umambo wa Mulungu?

¹⁷ Cakutoma, pisatipanga kuti Umambo wa Mulungu unadzakhadzikiswa ‘mu ntsiku za mautongi anewa akumalisa,’ peno maumambo anango mbaciripo. Caciwiri, pisatipanga kuti Umambo unadzakhala kwenda na kwenda. Iwo nkhabe kudzakundwa na kupitirwa mbuto na utongi unango. Cacitatu, tisaona kuti panadzakhala nkhondo pakati pa Umambo wa Mulungu na maumambo a dziko ino. Umambo wa Mulungu unadzawina. Pakumalisira, unadzakhala utongi ubodzi basi kwa anthu. Buluka penepo anthu anadzatsandzaya na utongi wadidi kakamwe wakuti cipo udzati kuoneka.

18. Kodi kumenyana kwakumalisa pakati pa Umambo wa Mulungu na mautongi a dziko ino kusacemerwa tani?

¹⁸ Bhibhlya isalonga pizinji thangwi ya nkhondo ineyi yakumalisa pakati pa Umambo wa Mulungu na mautongi a dziko ino. Mwacitsandzo, isapfundzisa kuti na kufendedzera kumala kwa makhaliro ano a pinthu, mizimu yakuipa inadzamwaza uthambi toera kunyengeta “amambo a pantsi pano ponsene.” Na cifuniro cipi? ‘Toera agumanyize amambo kuti acite nkhondo pa ntsiku ikulu ya Mulungu wakukhala na mphambvu zonsene.’ Amambo a dziko yapantsi anadzagumanyizwa pabodzi ‘ku mbuto ibodzi ene, inathulwa n’Cihebheri Armagedhoni.’ (Apokalipse 16:14, 16) Na thangwi ya pinalongwa m’mavesi awa mawiri, kumenyana kwakumalisa pakati pa mautongi a anthu na Umambo wa Mulungu kusacemerwa nkhondo ya Armagedhoni.

19, 20. Ndi ninji pinacimwanisa cifuniro ca Mulungu kucitika pa dziko yapantsi cincino?

¹⁹ Kodi Umambo wa Mulungu unadzakwanirisanji na nkhondo ya Armagedhoni? Nyerezerani pontho cifuniro ca Mulungu na dziko yapantsi. Cifuniro ca Yahova Mulungu ndi cakuti dziko yapantsi idzale na anthu aungwiro na akulungama mbantumikira mu Paradizu. Ndi ninji pinacimwanisa pyenepi kucitika cincino? Cakutoma, tisadawa, tisaduwala na kufa. Mbwenye mu Nsolo 5 tapfundza kuti Yezu atifera toera tikwanise kukhala maso kwenda na kwenda. Panango musakumbuka mafala anagumanika m’Mphangwa Zadidi za Jwau: ‘Mulungu afuna anthu a pantsi pano pikulu pyene, mphapo apereka Mwana wace m’bodzi ekha toera munthu munthu anankhulupira, aleke kutayika, mbwenye aone moyo wakukhaliratu.’​—Jwau 3:16.

²⁰ Caciwiri, anthu azinji asacita pinthu pyakuipa. Iwo asalonga uthambi, kunyengeza anango na kucita ulukwali. Iwo nkhabe funa kucita pinafuna Mulungu. Anthu anacita pinthu pyakuipa anadzafudzwa pa nkhondo ya Mulungu ya Armagedhoni. (Lerini Masalmo 37:10.) Cinthu cinango cinacitisa kuti cifuniro ca Mulungu cikhonde kucitika pa dziko yapantsi ndi cakuti mautongi nee asawangisa anthu kucita pinafuna Mulungu. Mautongi mazinji ndi akufewa, ausumankha, peno akudyekerwa. Mwapakweca Bhibhlya isalonga: ‘Munthu asaponderera munthu ndzace mpaka kunfudza.’​—Koelete 8:9.

21. Umambo unadzacitisa tani kuti cifuniro ca Mulungu cicitike pa dziko yapantsi?

²¹ Armagedhoni angamala, anthu anadzakhala pantsi pa utongi ubodzi basi, Umambo wa Mulungu. Umambo unadzacita cifuno ca Mulungu na kubweresa nkhombo zakutsandzayisa. Mwacitsandzo, iwo unadzafudza Sathani na mademonyo ace. (Apokalipse 20:1-3) Mphambvu ya ntsembe ya Yezu inadzaphatisirwa toera anthu akukhulupirika akhonde kuduwala pontho peno kufa. M’mbuto mwa pyenepi, iwo anadzakhala maso kwenda na kwenda pantsi pa utongi wa Umambo. (Lerini Apokalipse 22:1-3.) Dziko yapantsi inadzakhala paradizu. Umambo unadzacitisa kuti cifuniro ca Mulungu cicitike pa dziko yapantsi na unadzacenesa dzina ya Mulungu. Pyenepi pisabvekanji? Pisabveka kuti pakumalisa, anthu onsene anadzapasa mbiri dzina ya Yahova pantsi pa Umambo wa Mulungu.

22. Tisadziwa tani kuti Umambo wa Mulungu nee wabwera mukhali Yezu pa dziko yapantsi peno mudalamuswa iye kwene muli akufa?

²² Mudapanga Yezu atowereri ace kuphembera, ‘Umambo wanu mbudze kuna ife,’ pikhaonesa pakweca kuti Umambo nee ukhadabwera mu ndzidzi unoyu. Kodi iwo wabwera mudaenda Yezu kudzulu? Nkhabe, thangwi Pedhro na Paulu alonga kuti mudalamuswa Yezu muli akufa, yakwanirisika kwa iye profesiya inagumanika pa Masalmo 110:1: ‘Yahova ati kuli mbuyanga: khala ku nkono wanga wa madyo! Ndinayikha anyamalwa ako pantsi pa manyalo pako.’ (Machitiro 2:32-35; Ahebere 10:12, 13) Akhafunika kudikhira.

23. (a) Kodi Umambo wa Mulungu watoma lini kutonga? (b) Nsolo unatowera unadzadinganji?

²³ Mbadadikhira mu ndzidzi ungasi? Nkati mwa pyaka dzana 19 mpaka dzana 20, anyakupfundza andimomwene a Bhibhlya adzindikira kuti ndzidzi wakudikhira mbudamala mu caka 1914. (Thangwi ya ndzidzi unoyu, onani N’thimiziro, “1914 Ndi Caka Cakufunika Mu Profesiya Ya Bhibhlya.”) Pyakucitika pya dziko pidatoma mu 1914 pisapangiza kuti kubvesesa kwa anyakupfundza andimomwene a Bhibhlya kukhali kwandimomwene. Kukwanirisika kwa maprofesiya a Bhibhlya kusapangiza kuti mu 1914, Kristu adzakhala Mambo na Umambo wakudzulu wa Mulungu watoma kutonga. Na thangwi ineyi, ife tikukhala ‘mu ndzidzi ung’ono basi’ udasala kwa Sathani. (Apokalipse 12:12; Masalmo 110:2) Tinakwanisa kulonga mwacinyindiro kuti mwakukhonda dembuka, Umambo wa Mulungu unadzacitisa kuti cifuno ca Mulungu cicitike pa dziko yapantsi. Kodi zenezi ndi mphangwa zadidi kwa imwe? Kodi musakhulupira kuti pyenepi ndimomwene? Nsolo unatowera unadzakuphedzani kuona kuti mwandimomwene Bhibhlya isapfundzisa pinthu pyenepi.