Ndi Cipi Cifuniro Ca Mulungu Na Dziko Yapantsi?

 1. Ndi cipi cifuniro ca Mulungu na dziko yapantsi?

CIFUNIRO ca Mulungu na dziko yapantsi ndi cakudzumatirisadi. Yahova asafuna kuti dziko yapantsi idzale na anthu akutsandzaya na aungumi wadidi. Bhibhlya isalonga kuti ‘Yahova Mulungu adzwala munda mu Edeni’ buluka penepo iye ‘ameresa mitundu yonsene ya miti yadidi toera kudya.’ Pakumala Mulungu kucita mamuna na nkazi wakutoma, Adhamu na Eva, Iye aaikha m’mudzi wakubalika mbaapanga: “Balanani mbamuinjipa, dzadzani dziko yapantsi mbamuitonga.” (Genesi 1:28; 2:8, 9, 15) Natenepa, cikhali cifuniro ca Mulungu kuti anthu akhale na ana, afuthule madire a paradizu pa dziko yonsene yapantsi, na kutsalakana pinyama.

 2. (a) Tisadziwa tani kuti cifuniro ca Mulungu na dziko yapantsi cinadzakwanirisika? (b) Bhibhlya isalonganji thangwi ya anthu kukhala kwenda na kwenda?

² Kodi musanyerezera kuti cifuniro ca Yahova Mulungu cakuti anthu akhale mu paradizu pa dziko yapantsi cinadzacitika? Mulungu alonga: ‘Ine ndapilonga, ndinadzapicita.’ (Izaiya 46:9-11; 55:11) Inde, Mulungu anadzacitadi pinafuna iye! Iye asalonga kuti ‘hadapacita pantsi ninga mbuto yapezi, mbwenye apakhalisa nyumba ya anthu.’ (Izaiya 45:18) Ndi anthu a ntundu wanji anafuna Mulungu kuti akhale pa dziko yapantsi? Pontho, iye akhafuna kuti iwo akhalepo mu ndzidzi ungasi? Bhibhlya isatawira: ‘Anyakulungama anatambira dziko, mbakhala mwenemo kwenda na kwenda.’​—Masalmo 37:29; Apokalipse 21:3, 4.

 3. Ndi makhaliro api akutsukwalisa ali pa dziko yapantsi cincino, na pyenepi pisasosa mibvundzo ipi?

³ Mwandimomwene, pyenepi pidzati citika. Cincino, anthu asaduwala na kufa; asamenyana na kuphana. Ciripo cidadodomeka. Mwandimomwene, Mulungu nee akhafuna kuti dziko yapantsi ikhale ninga munaionera ife lero! Ndi ninji cidacitika? Thangwi yanji cifuniro ca Mulungu cidzati kwanirisika? Nkhabepo bukhu ya mbiri yakulembwa na anthu inakwanisa kutipanga pyenepi, thangwi nyatwa yatoma kudzulu.

4, 5. (a) Mbani adalonga na Eva mukuphatisira nyoka? (b) Pinakwanisika tani kuti munthu wadidi na wakuona ntima akhale mbava?

⁴ Bukhu yakutoma ya Bhibhlya isalonga pya mpingizi wa Mulungu adaonekera m’munda wa Edeni. Iye asafokotozwa ninga “nyoka,” mbwenye mpingizi unoyu nee akhali cinyama. M’bukhu yakumalisa ya Bhibhlya ‘asathulwa Dyabo na Sathani, ananyengeta anthu onsene a pantsi pano.’ Iye asacemerwambo ‘nyoka yakale.’ (Genesi 3:1; Apokalipse 12:9) Anju unoyu wamphambvu, aphatisira nyoka toera kulonga na Eva, ninga munthu waluso anakwanisa kucitisa fala yace ninga yakubuluka mu dzimunthu peno bhoneka. Pisaoneka kuti munthu unoyu wauzimu akhalipo mudacita Mulungu anthu pa dziko yapantsi.​—Yobe 38:4, 7.

⁵ Nakuti pyonsene pidacita Yahova ndi pyaungwiro, mbani mphapo adacita “Dyabo,” “Sathani”? Munjira yakukhonda nentsa, m’bodzi wa ana amphambvu auzimu a Mulungu acitika ekhene Dyabo. Pyenepi pyakwanisika tani? Inde, munthu wakuti akhali wadidi na wakuona ntima anakwanisa kukhala mbava. Pyenepi pisacitika tani? Munthu unoyu angatawirisa kuti cifuno cakuipa cikule muntima mwace. Iye angapitiriza na manyerezero anewa, cifuno ceneci cakuipa cinakula kakamwe. Natenepa, angakhala na mwai, iye anacita pinthu mwakubverana na cifuno cakuipa cidanyerezera iye.​—Lerini Tyago 1:13-15.

 6. Pyacitika tani kuti mwana wamphambvu wauzimu wa Mulungu adzakhale Sathani Dyabo?

⁶ Pyenepi pyacitika kwa Sathani Dyabo. Panango iye abva Mulungu mbapanga Adhamu na Eva kuti akhale na ana mbadzadza dziko yapantsi na mbeu yawo. (Genesi 1:27, 28) Mwakukhonda penula, Sathani anyerezera: ‘Anthu onsene awa anakwanisa kundilambira mbuto mwa Mulungu!’ Natenepa akulisa cifuno cakuipa muntima mwace. Pakumalisira, iye atoma kupeusa Eva mukumpanga uthambi thangwi ya Mulungu. (Lerini Genesi 3:1-5.) Natenepa iye adzakhala “Dyabo,” pinabveka “Nyakupambazira.” Mu ndzidzi ubodzi ene, iye adzakhala “Sathani,” pinabveka “Mpingizi.”

 7. (a) Thangwi yanji Adhamu na Eva afa? (b) Thangwi yanji mbeu yonsene ya Adhamu isakalamba na kufa?

⁷ Mukuphatisira uthambi mwakucenjera, Sathani Dyabo acitisa Adhamu na Eva kukhonda bvera Mulungu. (Genesi 2:17; 3:6) Ninga pyakubwereswa, iwo adzafa, ninga mukhadaapanga Mulungu kuti mbadafa angakhonda bvera. (Genesi 3:17-19) Nakuti Adhamu adzakhala wakusowa ungwiro mudadawa iye, mbeu yace yonsene yatambira madawo ace. (Lerini Aroma 5:12.) Pyenepi pisalandaniswa na cikombole cakuumbira mabuloko. Khala cikombole cabofoka, ninji pinadzacitika na mabuloko onsene anacitwa mu cikombole ceneci? Mabuloko onsene anadzabofokambo. Sawasawa, anthu onsene atambira “kubofoka” kwa kusowa ungwiro kwa Adhamu. Na thangwi ineyi anthu onsene asakalamba na kufa.​—Aroma 3:23.

8, 9. (a) Ndi upomokeri wanji udacita Sathani? (b) Thangwi yanji Mulungu nee apha anyakupanduka mu ndzidzi ubodzi ene?

⁸ Mudacitisa Sathani kuti Adhamu na Eva adawire Mulungu, mwandimomwene iye akhatsogolera upanduki. Iye akhapomokera matongero a Yahova. Inde, Sathani akhalonga: ‘Mulungu ndi ntongi wakuipa. Iye asalonga uthambi na asakhondesa pinthu pyadidi kwa anthu ace. Anthu nkhabe funa kuti Mulungu aatonge. Iwo anakwanisa kusankhula okhene pyadidi na pyakuipa. Angatongwa na ine iwo anadzakhala mwadidi.’ Mulungu mbadacitanji na kuxolwa kweneku? Anango asanyerezera kuti Mulungu mbadapha kwene basi anyakupanduka aneale. Kodi pyenepi mbapidapangiza kuti Sathani ndi nyauthambi? Kodi mbapidapangiza kuti utongi wa Mulungu ndi wadidi?

⁹ Kulungama kwa Yahova nee mbakudantawirisa kupha anyakupanduka mu ndzidzi ubodzi ene. Iye aona kuti pakhafunika ndzidzi toera kutawira upomokeri wa Sathani munjira yadidi na kupangiza kuti Dyabo ndi nyauthambi. Natenepa, Mulungu atawirisa anthu kutongeka okhene mu ndzidzi ungasi pantsi pa utongi wa Sathani. Mu Nsolo 11 wa bukhu ino, tinadzapfundza thangwi idacitisa Yahova kusiya ndzidzi wakulapha mbadzati kumalisa pinthu pyenepi. Cincino, mphyadidi kunyerezera ipi: Kodi Adhamu na Eva akhali na thangwi yadidi yakukhulupira Sathani, wakuti cipo aacitira pinthu pyadidi? Kodi pikhali pyadidi kukhulupira kuti Yahova, adaapasa pinthu pyonsene pikhali na iwo, ndi nyauthambi wausumankha? Kodi imwe mbamudacitanji?

10. Munaphedzera tani Yahova toera kutawira upomokeri wa Sathani?

¹⁰ Mphyadidi kunyerezera mibvundzo ineyi, thangwi m’bodzi na m’bodzi wa ife ali na khundu toera kutawira. Inde, imwe muli na mwai wakuphedzera Yahova mukutawira upomokeri wa Sathani. Munakwanisa kutawira Yahova ninga Ntongi wanu na kuphedza kupangiza kuti Sathani ndi nyauthambi. (Masalmo 73:28; lerini Misangani 27:11.) Mwakutsukwalisa, mwa anthu azinji mu dziko yonsene ndi akucepa basi asacita cisankhulo ceneci. Pyenepi pisasosa mbvundzo wakufunika: Kodi Bhibhlya isapfundzisadi kuti Sathani ndi ntongi wa dziko ino?

11, 12. (a) Kodi kuyeserwa kwa Yezu kusapangiza tani kuti Sathani ndi ntongi wa dziko ino? (b) Ndi ninji cinapangizambo kuti Sathani ndi ntongi wa dziko ino?

¹¹ Yezu cipo apenula kuti Sathani ndi ntongi wa dziko ino. Mwacirengo, Sathani apangiza Yezu “madziko onsene a pantsi pano na mbiri yawo.” Buluka penepo Sathani apikira kuna Yezu: “Ipi pyonsene ndinadzakupasa male ungandikotamira mbundilambira.” (Mateo 4:8, 9; Luka 4:5, 6) Nyerezerani pyenepi. Kodi muoni unoyu mbudakhala ciyesero kwa Yezu khala Sathani nee akhali ntongi wa madziko anewa? Yezu nee apokanya kuti mautongi onsene awa a dziko ndi a Sathani. Inde, Yezu mbadapokanya mbipidapangiza kuti mautongi anewa nee ndi a Sathani.

¹² Mwakukhonda penula, Yahova ndi Mulungu wamphambvu zonsene, Nciti wakudzulu na dziko yapantsi yakudzumatirisa. (Apokalipse 4:11) Inde, Bhibhlya nkhabe longa kuti Yahova Mulungu peno Yezu ndi atongi a dziko ino. Mwandimomwene, Yezu acemera Sathani ninga “nkadamu wa pantsi pano.” (Jwau 12:31; 14:30; 16:11) Bhibhlya isacemerambo Sathani Dyabo ninga “mulungu wakuipa wa pantsi pano.” (2 Akorinto 4:3, 4) Thangwi ya mpingizi unoyu, peno Sathani, mpostolo Wacikristu Jwau alemba: ‘Anthu onsene, anadzadza pantsi pano, ali m’manja mwa Nyakuipa.’​—1 Jwau 5:19.

13. Thangwi yanji dziko ipswa isafunika?

¹³ Pacaka, dziko isathimizirika kukhala yakugopswa. Yadzala na anyankhondo, anyandale akukhonda kuona ntima, atsogoleri auphemberi aupfakafaka na maphanga. Dziko yonsene yanyanya kwakuti nkhabe kwanisika kuicinja. Bhibhlya isapangiza kuti mwakukhonda dembuka Mulungu anadzafudza dziko yakuipa pa nkhondo yace ya Armagedhoni. Dziko ino inadzapitirwa mbuto na dziko ipswa yakulungama.​—Apokalipse 16:14-16.

14. Mbani adasankhula Mulungu kukhala Ntongi wa Umambo Wace, na pyenepi pikhadalongerwatu tani?

¹⁴ Yahova Mulungu asankhula Yezu Kristu toera akhale Ntongi wa Umambo, peno utongi Wace wakudzulu. Kalene, Bhibhlya yalongeratu: ‘Thangwi mwabalirwa ife! Mwana wamamuna tampaswa! Anakhala nyakutonga wathu. Anacemerwa Ntongi wa ntendere. Mphambvu zace za umambo zinakula-kula; dziko yace inathimiza kukhala na ntendere.’ (Izaiya 9:6, 7) Yezu apfundzisa atowereri ace kuphembera pya utongi unoyu: ‘Umambo wanu mbudze kuna ife. Pinafuna imwe mbapicitwe pantsi pano ninga kudzulu.’ (Mateo 6:10) Ninga pinafuna kudzaona ife m’bukhu ino, mwakukhonda dembuka Umambo wa Mulungu unadzamalisa maumambo onsene a dziko ino, pontho iwo unadzapitira mbuto maumambo onsene. (Lerini Danyele 2:44.) Buluka penepo Umambo wa Mulungu unadzabweresa paradizu pa dziko yapantsi.

15. Kodi ‘pantsi pano papswa’ ndi ninji?

¹⁵ Bhibhlya isatipasa cinyindiro: ‘Mbwenye ife tinadikhira thambo ipswa na pantsi pano papswa, panakhala ulungami ninga mudapikirira iye Mulungu.’ (2 Pedro 3:13; Izaiya 65:17) Midzidzi inango Bhibhlya ingalonga “pantsi pano” pisabveka anthu anakhala pa dziko yapantsi. (Genesi 11:1) Natenepa ‘pantsi pano papswa’ pakulungama ndi anthu akutawirika kwa Mulungu.

16. Ndi muoni upi wakufunika kakamwe unafuna pasa Mulungu ale anatawirika kwa iye, na tisafunika kucitanji kuti tiutambire?

¹⁶ Yezu apikira kuti mu dziko ipswa, anthu anatawirika kwa Mulungu anadzatambira muoni wa ‘umaso wakukhonda mala.’ (Marko 10:30) Taphata miyendo fungulani Bhibhlya yanu pa Jwau 3:16 na 17:3, na lerini pidalonga Yezu kuti tisafunika kucitanji toera titambire umaso wakukhonda mala. Cincino, dingani m’Bhibhlya nkhombo zinafuna kudzatambirwa na ale anathema muoni unoyu wakudzumatirisa unabuluka kwa Mulungu mu Paradizu ya dziko yapantsi inafuna kudza.

17, 18. Kodi tinakhala tani na cinyindiro cakuti panadzakhala ntendere na citsidzikizo pa dziko yonsene yapantsi?

¹⁷ Uipi, nkhondo, upandu na uphanga pinadzamala. “Anyakuipa . . . hunaaonabve tayu. Mbwenye anyakupfulika anakhala na dziko.” (Masalmo 37:10, 11) Panadzakhala ntendere thangwi ‘Mulungu anadzamalisa nkhondo pantsi ponsene.’ (Masalmo 46:9; Izaiya 2:4) Buluka penepo, ‘panaoneka ulungami na ntendere midzidzi yonsene inapasa mwezi ceza cace’​—pyenepi pisabveka kwenda na kwenda!​—Masalmo 72:7.

¹⁸ Alambiri a Yahova anadzakhala mwakutsidzikizika. Aisraele mukhabvera iwo Mulungu, akhali akutsidzikizika. (Levitiko 25:18, 19) Pinadzatsandzayisa kakamwe kukhala na citsidzikizo cibodzi cene mu Paradizu!​—Lerini Izaiya 32:18; Mikeya 4:4.

19. Tisadziwa tani kuti mu dziko ipswa ya Mulungu munadzakhala pyakudya pyakuinjipa?

¹⁹ Nkhabe kudzasoweka pyakudya. Nyamasalmo aimba: ‘Dziko yonsene inadzakhala na utende wa mapira, pa mapiri panadzakhala na utende.’ (Masalmo 72:16) Yahova Mulungu anadzapasa nkhombo anyakulungama ace, na ‘Pantsi pano panadzabala misapo yace.’​—Masalmo 67:6.

20. Thangwi yanji tinakwanisa kunyindira kuti dziko yonsene yapantsi inadzakhala paradizu?

²⁰ Dziko yonsene yapantsi inadzakhala paradizu. Mbuto zidafudzwa na anthu akuipa zinadzamangwa nyumba zakubalika na minda. (Lerini Izaiya 65:21-24; Apokalipse 11:18) Mukupita kwa ndzidzi, mbuto zinakhala anthu pa dziko yapantsi zinadzafuthulwa mpaka dziko yonsene mbidzakhala yakubalika na yakubala misapo ninga munda wa Edeni. Cipo Mulungu anadzasiya ‘kufungula dzanja yace mbakhutisa na utende wace pyonsene pina moyo.’​—Masalmo 145:16.

21. Ndi ninji cinapangiza kuti panadzakhala ntendere pakati pa anthu na pinyama?

²¹ Panadzakhala ntendere pakati pa anthu na pinyama. Pinyama pya ntsanga na pya m’mudzi pinadzadya pabodzi. Ngakhale mwana ng’ono nkhabe kudzagopa pinyama pyakuti cincino ndi pyakugopswa.​—Lerini Izaiya 11:6-9; 65:25.

22. Ndi ninji pinadzacitika na utenda?

²² Utenda unadzamala. Ninga Ntongi wa Umambo wakudzulu wa Mulungu, Yezu anadzawangisa anthu munjira yakudzumatirisa kakamwe kupiringana mukakhala iye pa dziko yapantsi. (Mateo 9:35; Marko 1:40-42; Jwau 5:5-9) Buluka penepo ‘nee m’bodzi anakhala mu dziko yathu anadzadwala.’​—Izaiya 33:24; 35:5, 6.

23. Thangwi yanji kulamuswa kwa akufa kunadzatitsandzayisa?

²³ Akufunika athu adamala kufa anadzalamuswa na cidikhiro cakukhonda kufa pontho. Anthu onsene anagona mu kufa akuti ali m’manyerezero a Mulungu anadzakhala pontho maso. Andedi, “kunadzaoneka kulamuka muli akufa kwa anthu adidi na kwa akuipambo.”​—Machitiro 24:15; lerini Jwau 5:28, 29.

24. Musaona tani pya kukhala mu Paradizu pa dziko yapantsi?

²⁴ Ndi tsogolo yakutsandzayisa kakamwe inadikhira ale anasankhula kupfundza na kutumikira Nciti wathu Wakudzumatirisa, Yahova Mulungu! Yezu akhalonga pya Paradizu pa dziko yapantsi mudapikira iye phanga adafa kukhundu kwace: ‘Unadzakhala mu paradizu pabodzi na ine pano.’ (Luka 23:43) Mphyakufunika kupfundza pizinji pya Yezu Kristu, wakuti nkhombo zonsene zinadzakwanisika kubulukira mwa iye.