Mwezi gwa 1

Omulume n’omukazi banashagaluke bwenene erhi baburha omwana. Cikone, ciru akaba ababusi banashagalukire akabonjo kabo, barhaba balonzize kagendekere kabêra kabonjo ensiku zoshi. Kobinali, banayoboha bwenene erhi kakabula bwakula. Ko n’oko, ciru akaba Yehova anashagaluke bwenene erhi rhurhondera rhwayiga okubimuyerekire, arhaba alonzize rhugendekere rhwabêra bana kiroho. (1 Kr. 3:1) Lubero n’oko, arhuhûnyire rhube Bakristu ‘bakuzire.’ Omu Bibliya, oluderho lw’Ecigiriki lwahindwirwe “okuzire” lwanacib’ihugûla “mwimana” na “oyenire.” (1 Kr. 2:6) Nka kula omwana agendekera akula, kuhika abe muntu mukulu, ko na nirhu rhushinganine rhugendekere rhwakuza obwîra bwirhu haguma na Yehova. Omu kujira ntyo, rhwanaba Bakristu bakuzire kiroho. Kobinali, ciru n’enyuma z’okuba Bakristu bakuzire kiroho, rhushinganine rhugendekere rhwajira amajambere.​—1 Tm. 4:15. w24.04 buk. 2 cif. 1, 3

Yehova aba ndi omu kalamo kawe? Wanashuza erhi, ‘Yehova aba Larha, aba Mungu wani, na Mwîra wani.’ Nkaba hali ezindi nderho, erhi agandi mazino g’ecikono wakakolesa ly’oyerekana Yehova aba ndi kuli we. Cikone, ka wanabona Yehova nka muntu okuyegerezize omw’ihema lyage? Mwami Daudi ashushanyize obwîra Yehova ajira haguma n’abakozi bage bishwekerezi n’obwîra buba ho egarhi k’omuntu oyegerezize ebigolo n’ebigolo byage. Adosa ntya: “Yagirwa Nyakasane [Yehova, NWT], ndi wankabêra omu bwami bwawe [omw’ihema lyawe, NWT]; ndi wankatwa ecirâlo oku ntondo yawe ntagatifu?” (Enna. 15:1) Kugerera ezo nderho zalongozibagwa n’iroho litagatifu, rhuciyigirizize oku rhwanaba bigolo bya Yehova, ko kuderha bîra bage. Yehova ali yene embere arhondere okulema. Cikone kasanzi kalebe enyuma z’aho alema enfûla yage. Yehova aba nka muntu oyegerezize ecigolo cage cirhangiriza omw’ihema lyage ly’olwiganyo, anashagalukira bwenene okujira ntyo. Ebibliya eyerekine oku Yehova ‘asima’ oyo Mugala. Eco cigolo cage cirhanzi naco, ‘cakâcanacana [erhi kucishinga] emalanga gage ensiku zoshi.’​—Mig. 8:30, Mashi Bible. w24.06 buk. 2 cif. 1-3

Obone aka kanga omu bwenge bwawe. Bantu balushire 340 000 barhimanine haguma lyo bajira Daudi abe mwami w’ishanja lyoshi ly’Abaisraheli. Omu nsiku isharhu, abo bantu babêzire omu rhurhondo rhw’amabuye-mabuye hofi n’e Hebroni, bakag’ishambala n’okuyimba enyimbo z’omwishingo z’okukuza Yehova. (1 Nga. 12:39) Mw’abo bantu, mwali omwana w’omusole wakag’ihamagalwa Sadoki, cikone bantu banji barhakamubwine. Cikoki, Yehova abwine Sadoki analonzize nirhu rhumanye oku Sadoki ali ho. (1 Nga. 12:22, 26-28) Sadoki ali kuhani wakag’ikola bwenene haguma na Kuhani Mukulu Abiyatari. Kandi Mungu ahîre Sadoki obwenge bunji n’obuhashe bw’okuhugûkwa obulonza bwage. (2 Sam. 15:27) Ali mulume w’oburhwali. Muli zino nsiku nzinda, Shetani ali acihangana bwenene okushereza obuyemere bw’abantu ba Mungu kulusha agandi mango goshi. (1 Pt. 5:8) Rhushinganine rhube ba burhwali amango rhuli rhwalinda oku Yehova ashereza Shetani n’igulu lyage libi. (Enna. 31:24) Omu kujira ntyo, rhwanayiga oburhwali bwa Sadoki. w24.07 buk. 2 cif. 1-3

Erhi Yehova alema omulume murhanzi n’omukazi murhanzi, al’ilonzize babe n’omwishingo. Abaha ahantu hinja bwenene h’okulama, engalo y’obuhya, n’omukolo mwinja gw’okujira. Bal’igwasirwe baburhe abana, babumbe igulu lyoshi, n’okulijira libe paradizo ak’ishwa ly’e Edeni. Irhegeko liguma lyone al’ibahire, lirhanali lizibu okurhumikira. Kandi abarhonda oku erhi bakavunyire ery’irhegeko, kwakabire kumugomera n’obulonza n’oku eco caha cabo cakabadwirhire olufû. Rhumanyire ebyabire. Malahika muguma orhal’igwerhe buzigire kuli Mungu erhi kuli bo, acihira eluhya anabashumika okujira ecaha. Adamu na Eva bayemera ago mashumi mabi. Bayabirwa okulangalira Ishe wabo w’obuzigire, na muli ntyo bajira ecaha. Nk’oku rhunamanyire, enderho za Yehova zabonekine oku zali z’okuli. Kurhenga ago mango na kugendekera, barhondera okuhikirwa n’amalehe mabi g’eco caha: barhondera bashosihala na buzinda bafâ.​—Murh. 1:28, 29; 2:8, 9, 16-18; 3:1-6, 17-19, 24. w24.08 buk. 3 cif. 3

Yehova n’Omugala muzigirwa baba balonzize rhube n’omwishingo. Omwandisi w’Ennanga 119:2, NWT, adesire ntya: “Ab’omwishingo bali balya bashimba ebi abakengeza, balya bamulongereza n’omurhima gwabo goshi.” Yezu naye adesire n’obwalagale ntya: “Ab’omwishingo bali balya bayumvirhiza Akanwa ka Mungu n’okukashimba!” (Lk. 11:28, NWT) Rhuli bakozi ba Yehova, rhunabe bantu ba mwishingo erhi rhusoma Akanwa ka Mungu ngasi lusiku n’okucihangana okukolesa ebi rhuyiga. (Yk. 1:22-25) Okujira ntyo kunamushagaluse. (Muh. 12:13) Erhi rhukolesa ebi rhusoma omu Kanwa ka Mungu kalongozibagwa n’iroho lyage, rhunajire akalamo k’omulala gwirhu kabe kinja n’okuba n’obwîra busezire haguma n’abirhu bemezi. Kandi, rhunayake mazibu manji omu mazibu gahikira abarhakulikira enjira za Yehova. Kobinali, rhuyemire ebi Mwami Daudi aderhaga. Enyuma z’okuganirira omu lwimbo irhegeko, oburhonde, n’enjira za Yehova z’okutwa emanja, ashwinja ntya: ‘Ogakenga gali mw’obunguke.’​—Enna. 19:7-11, Mashi Bible. w24.09 buk. 2 cif. 1-3

Bici Yehova abona erhi alaba oku bakozi bage hanw’igulu? Anabone amango rhushagalusire n’amango rhubabire. (Enna. 37:18) Anashagaluke bwenene erhi abona rhuli rhwamukolera n’obuhashe bwirhu boshi ciru akaba rhuli rhwalibuzibwa ekandalala! Kulusha oko, aba mubidu okurhurhabala n’okurhurhuliriza. Olwandiko lw’Ennanga 147:3 ludesire oku, Yehova “anabuke ebibande” by’abavunisire omurhima. Mw’olo lwandiko, Yehova aganirirwe nk’oli washibirira omu njira y’obuzigire abantu bagwerhe ebihulu by’ekandalala. Bici rhugwasirwe rhujire lyo Yehova arhushibirira? Rhuganirire olwiganyo. Doktere ogwerhe obulenga anajira binji ly’arhabala omuntu wayagalisire afume. Cikone, ly’oyo muntu afuma, agwasirwe akulikire bwinja-bwinja amahano g’oyo doktere. Kugerera Akanwa kage, Yehova anaganize abali balibuzibwa n’ebihulu by’ekandalala ananabahe amahano g’obuzigire. w24.10 buk. 6 cif. 1-2

Omu mango gageraga, ebicapo birhu byaganirire ebihikira aba Yehova atwira olubanja oku barhali bashinganyanya. Rhwadesire oku abantu ba ntyo basherezibwe na Yehova barhagwerhi bulangalire bw’obufûke. Myanzi milebe y’Ebibliya eba eganirire emanja Yehova atwiraga abantu barhali bashinganyanya, nk’omubalè gurhamanyikini gw’abantu bafâga amango g’Ecihonzi, erhi amashanja nda g’omu Cihugo c’Amalaganyo Yehova ahûnaga abantu bage oku bashereze, erhi abasoda Baasiriya 185 000 malahika anigaga omu budufu buguma bone. (Lush. 7:1-3; Iz. 37:36, 37) Lugenda eyo myanzi, k’Ebibliya erhuhîre mahugûlo manji gakarhuma rhwaderha oku Yehova atwirire abo bantu boshi olubanja lw’obuhererekeze bw’ensiku n’amango, buzira bulangalire bw’obufûke? Nanga, Ebibliya erhahânyiri mahugûlo manji. Rhurhamanyiri gurhi Yehova atwirire ngasi muntu olubanja; rhurhanamanyiri erhi abo bantu banigagwa babire n’obulyo bw’okuyiga lugenda Yehova n’okuciyunjuza. w24.05 buk. 3 cif. 5-7

Yezu aganirire olwiganyo lugenda omukana wagendekeraga ahûna omuzuzi amutwire olubanja omu njira y’obushinganyanya. Buzira karhinda, banji b’omu banafunzi ba Yezu bahugûsirwe bwinja ogo mwanzi, bulya mw’ago mango abantu barhalengeriri kanji-kanji bakag’ijirirwa omu njira erhali ya bushinganyanya. (Lk. 18:1-5) Nirhu rhwanahugûkwa bwinja oku oyo mukana aciyumvagya bulya rhweshi rhwajirirwe omu njira erhali ya bushinganyanya mango malebe. Bantu banji mw’er’igulu ly’ene baba ba kabôlo, barhajira lukogo banajira irala linji ly’eby’en’igulu. Enyanya z’oko, rhumanyire oku rhwanajirirwa omu njira erhali ya bushinganyanya. (Muh. 5:8) Cikone, rhwanavunika omurhima bwenene erhi mwene wirhu erhi mwali wirhu akarhujirira kubi. Kobinali, bene wirhu na bali birhu barhaba bashombanyi b’okuli. Barhaba kone bimana. Rhwanaciyigiriza binji kugerera oku Yezu alemberagamwo obubule b’obushinganyanya ajiriragwa n’abantu bakag’imuhagalika. Erhi akaba rhwanalembera abashombanyi birhu barhujirira omu njira erhali ya bushinganyanya, oko kuyerekine oku rhwanalembera ciru bwenene abirhu bemezi! w24.11 buk. 2 cif. 1-2

Omugati kali kaguma k’omu biryo by’obulagirire abantu baganirirwe omu Bibliya bakag’ilya. (Murh. 14:18; Lk. 4:4) Kobinali gwali gwa bulagirire bwenene, co cirhumire hali amango oluderho lwahindwirwe “akalyo” omu Bibliya luba luhugwîre luderho oku lundi omugati. (Mt. 6:11; Ebj. 20:7) Kandi, omugati cali cigabi c’obulagirire omu bisomerine bibirhi bya Yezu bimanyikine bwenene. (Mt. 16:9, 10) Rhwanasoma cisomerine ciguma muli byo omu Yowane cigabi ca 6. Enyuma z’abanafunzi ba Yezu okurhenga omu mubalamo gw’amahubiri, Yezu abahêka omu bwarho bayikira Enyanja y’e Galilaya lyo baj’irhamuka. (Mk. 6:7, 30-32; Lk. 9:10) Bahika ahantu h’akahwenyenye omu eneo y’e Betsaida. Buzira kulegama, ebihumbi by’abantu byahika aho byanabazunguluka. Yezu arhajiraga nk’orhababwini. Omu njira y’olukogo aciha akasanzi ly’abayigiriza lugenda Obwami anafumya abalwala. Bulya bwal’ikola buli bwayira, abanafunzi bacidosa gurhi abo bantu boshi bapatamwo ebi balya. Nkaba baguma na baguma muli bo bal’igwerhe biryo bisungunu, cikone banji bal’ilagirire oku kuja omu bishagala n’okugula ebiryo.​—Mt. 14:15. w24.12 buk. 2 cif. 1-2

Adamu na Eva, babusi birhu barhangiriza, bali bimana banakag’ilama omu paradizo nyinja bwenene. (Murh. 1:27; 2:7-9) Bal’igwerhe obulangalire bw’okushagalukira akalamo kinja, karhagwerhi buzinda. Cikone enyuma z’aho haba akantu kabi bwenene, Adamu na Eva bajira ecaha. Baheza Eparadizo nyinja bal’ilamiremwo ciru n’obulangalire bwabo bw’okulama ensiku n’amango. Bwimo buhi bakalekire abana babo bakabusirwe enyuma z’aho? Ebibliya erhubwizire ntya: “Ecaha cadwirhwe en’igulu na muntu muguma [Adamu], naco ecaha caburha olufû, n’olufû lwayahukira abantu boshi, bulya boshi bajizire ecaha.” (Rm. 5:12) Obwimo Adamu arhusigire ciba caha, n’eco caha cinarhulerhere olufû. Eco caha rhwayimiremwo ciri nka mwenda munene bwenene, na ntaye muli rhwe wakahasha agulyula. (Enna. 49:8) Yezu ashushanyize ebyaha n’“emyenda.” (Mt. 6:12; Lk. 11:4) Erhi rhujira ecaha, rhunabe nka rhulire Yehova omwenda. Yehova akahûnyire rhulyule ibeyi ly’ecaha. Ogo mwenda gurhacilyulagwe, gwakazazibwe amango rhwamafâ gone, rhurhakanabire n’obulangalire bw’okucib’ilama.​—Rm. 6:7. w25.02 buk. 2-3 cif. 2-3

Rhunabone oku luli lukengwa lunene bwenene okuganirira abandi okuli lugenda Obwami bwa Nnâmahanga! Olo lukengwa lurhaba lwa ngasi muntu. Kwa lwiganyo, amango Yezu ali hanw’igulu, arhayemereraga abazimu bahâne obuhamirizi okubimuyerekire. (Lk. 4:41) Ene, embere omuntu arhondere okuhubiri haguma n’Abahamirizi ba Yehova, agwasirwe abe akola ali alama omu njira eshagalusize Yehova. Rhunayerekane kunganaci rhushagalukire olukengwa lw’okuhubiri omu kuhâna obuhamirizi ngasi hoshi na ngasi mango rhuhashire okujira ntyo. Aka Yezu, omuhigo gwirhu guba gwa kurhwera n’okudomera emburho z’okuli kw’Obwami omu mirhima y’abantu. (Mt. 13:3, 23; 1 Kr. 3:6) Omu kukulikira olwiganyo lwa Yezu, ikubuliro lya Yehova linajire ngasi kantu kanahashikine lyo lirhabala abandi bamanye izino lya Mungu. E Biblia​—Tafsiri ya Ulimwengu Mupya yajijire omukolo gw’obulagirire bwenene muli oko omu kugalula izino lya Mungu ngasi hoshi ly’al’ishinganine libe. Ene, eyo mpindulo y’Ebibliya ekola eri, yoshi ngumana erhi cigabi cayo, omu ndimi zilushire 270. w24.04 buk. 9 cif. 8-9

Bene wirhu baguma na baguma bajire omu buhya bagwerhe omwishingo, bajira enkomedu y’okujira kantu kalebe ngasi lusiku lyo bayeresa bakabo kunganaci baba babazigire. (1 Yn. 3:18) Omulume anayeresa mukage obuzigire omu kujira ebintu bilembu, nk’okumugwarha okuboko erhi okumuhobera n’obushagaluke. Anamuyandikira emesaje n’okumubwira ntya: “Ndi nakudula” erhi “Gurhi n’omulegerege?” Kasanzi oku kandi, anamuyeresa obuzigire omu kumuyandikira oku karatasi enderho acishozire bwinja ziyerekine kunganaci aba amuzigire. Erhi kandi anamulerhera ebiryo asima bwenene. Erhi omulume ajira ebyo bintu, anayerese mukage obukenge n’okuzibuhya obuhya bwabo. Omulume okenga mukage anamumanyise bulya gurhi aba wa ngulo ndarhi kuli ye, ananamujire akaciyumva bwinja. Njira nguma ajiramwo ntyo, kuba kukengera okumuyeresa oku amuvuzire omunkwa kw’ebi ali ajira byoshi ly’amulunga okuboko. (Kl. 3:15) Erhi omulume akunga mukage kurhenga oku murhima, omurhima gwa mukage gunashagaluke. Erhi omulume abwira mukage ebi aba amusimire, mukage anaciyumve ali omu bulanzi, azigirwe, anakenzirwe. w25.01 buk. 11 cif. 15; buk. 13 cif. 16

Olulanga lwa 15 luhwire n’eci ciragane: “Oyorha ntyo, nta mango ankahuligana.” Mw’olo lulanga, oyo muzihi w’ennanga ayerekine bulya gurhi Yehova arhuhûnyire rhujire ebyo bintu byoshi bidesirwemwo. Alonzize rhube n’omwishingo. Co cirhumire arhuhîre obulongozi bwarhuma arhugisha n’okurhulanga. Ebigolo biyemerirwe na Yehova byanaba n’obulangalire bw’amango minja bwenene gayisha. Abakristu bashîge amavurha bishwekerezi bayish’ija oku “ntebe” nyinji Yezu abarheganyize omu mpingu. (Yn. 14:2) Abagwerhe obulangalire bw’okulama okw’igulu bali balindirira ebiragane biri omu Amafulûlo 21:3. Kobinali, rhweshi rhunaciyumve oku rhugwerhe olukengwa lunene lw’okuhâbwa omulali mwinja g’okuba bîra ba Yehova, n’okuba bigolo ensiku n’amango omw’ihema lyage!​—Enna. 15:1-5. w24.06 buk. 13 cif. 19-20

Irenge byo bici? Omu Bibliya, oluderho “irenge” lwanaganirira ngasi kantu kakajira muntu mulebe abe alengerire. Kasanzi kasungunu enyuma z’ishanja ly’Israheli okurhenzibwa omu buja e Misri, Yehova ayerekana irenge lyage omu njira y’okusomeza. Obone omu bukengere bwawe ebi: Emiliyoni y’Abaisraheli barhimanine oku murhondero gw’Entondo Sinayi lyo barhimanana na Mungu wabo. Ecitû cinene bwenene cibwikire entondo. Ho n’aho, omusisi munene gw’idaho nkaba guli nk’ogulerhwa n’evolka guli gwadunda idaho aha bayimanzire, emilazo, emikungulo n’izu ly’emishekera lyakahusa amarhwiri liri lyayumvikana omu malunga. (Lub. 19:16-18; 24:17; Enna. 68:8) Orhanye kunganaci Abaisraheli basomirwe bwenene erhi Yehova ayerekana obo buhashe bw’irenge lyage. Ene, rhunahe Yehova irenge omu kubwira abandi lugenda obuhashe bwage bw’okusomeza n’amorhere gage minja bwenene. Kandi, rhunahe Mungu irenge erhi rhuyerekana oku ye shinganine ahâbwe obukuze enyanya z’ebintu rhwahikirizize oku buhashe bwage.​—Iz. 26:12. w25.01 buk. 2 cif. 2-3

Mango maguma erhi Abaisraheli bali omu mubalamo gw’okuja omu Cihugo c’Amalaganyo, balume balebe bal’imanyikine bahagalika Musa n’omukolo Yehova al’imuhîre. Baderha ntya: “Olubaga lwoshi [arhali Musa yene], abantu boshi bali bimâna [erhi batagatifu], na Nyamubâho ali ekarhî kabo.” (Mib. 16:1-3) Ciru akaba kobinali omu masu ga Mungu, “olubaga lwoshi” lwali lutagatifu, Yehova al’icishozire Musa ly’alongoza abantu bage. Omu kuderha Musa kubi, kobinali abo bagoma Yehova ye bakag’iderha kubi. Barhasegezagya obwenge bwabo kw’ebi Yehova al’ilonzize, cikone babusegeza kw’ebi bal’ilonzize, ko kuderha kuba n’obukulu n’okumanyikana. Mungu aniga abalerhaga obo bugoma n’ebihumbi by’abantu bacilungaga haguma nabo. (Mib. 16:30-35, 41, 49) Ene, rhwanayemera n’obwalagale oku Yehova aba ashombire abalahira okukenga obulongozi bw’ikubuliro lyage. w24.07 buk. 11 cif. 11

Rhulamire omu kasanzi bantu banji bali balahira erhi ciru kugayaguza oburhonde Ebibliya ehânyire lugenda obuzinda bw’er’igulu libi. (2 Pt. 3:3, 4) Ciru akaba hali bintu binji rhurhamanyiri, rhushinganine rhube n’obuyemere busêzire oku obuzinda bw’er’igulu libi bwayisha omu kasanzi kashinganine n’oku Yehova ayish’irhushibirira. Kandi rhushinganine rhuseze obuyemere bwirhu omu njira Yehova ali akolesa ene ly’arhulongoza, ko kuderha “mushizi mwirhonzi na mwikubagirwa.” (Mt. 24:45, NWT) Hano amalibuko madarhi garhondera, nkaba rhwayish’ihâbwa obulongozi bw’obwalagale bw’okuyokola obuzine bwirhu. Buno ko kasanzi rhushinganine rhulangalire bwenene obulongozi rhuhâbwa n’abantu bali balongoza omu ikubuliro lya Yehova. Erhi akaba rhurhalangalira n’okurhumikira obulongozi bwabo ene, kwayish’iba kuzibu okurhumikira obulongozi rhwayish’ihâbwa omu mango g’amalibuko madarhi. w24.09 buk. 11 cif. 11-12

Ababusi Bakristu baba bahugûsirwe oku obuyemere muli Nnâmahanga karhali kantu omwana akayimamwo. Mango malebe omwana wawe anarhondera adosa amadoso gali nk’aga: ‘Gurhi nakamanyamwo oku ho Mungu aba? Ka kobinali nanayemera ebi Ebibliya edesire?’ Kobinali, Ebibliya erhuhîre omurhima rhukakolesa ‘obuhashe bwirhu bw’okurhanya’ n’‘okulola bwinja ngasi kantu.’ (Rm. 12:1, NWT; 1 Ts. 5:21) Gurhigi wakarhabalamwo omwana wawe ly’azibuhya obuyemere bwage? Ohe omwana wawe omurhima alongereze ebiyerekine oku ebi Ebibliya eyigirizize biba by’okuli. Amango omwana wawe ali adosa amadoso, okolese obo bulyo ly’omuyeresa gurhi akapatamwo amashuzo omu kukolesa ebikolanwa by’okujiriramwo obusagasi, nka e Index des Publications des Témoins de Jéhovah n’ecitabu Musaada wa Kutafuta Habari kwa Ajili ya Mashahidi wa Yehova. Kwa lwiganyo, wanamuha omurhima alonze amavideo n’emyanzi eyerekine oku Ebibliya cirhaba citabu kone cayandikagwa n’abantu. Lubero n’oko, luba “luderho lwa Nnâmahanga.”​—1 Ts. 2:13. w24.12 buk. 15 cif. 4-5

Gurhi abagula bakayigamwo olwiganyo lwa Yezu? Bagwasirwe bakomereze bene wirhu, ciru n’abaciri misole, lyo bajira mikolo minji omu cigamba. Abagula barhalongeza obwimana oku bantu bali bakomereza. Bashinganine bahe abo bene wirhu baciri misole amahano omu njira y’obuzigire lyo baba n’obulenga omu mukolo n’okubona bulya gurhi kuli kwa bulagirire okuba birhohye, bishwekerezi, na babidu okukolera abandi. (1 Tm. 3:1; 1 Pt. 5:5) Yezu ahîre abanafunzi bage omukolo, arhali gwa kuhubiri kone ci n’okuyigiriza. Nkaba abanafunzi baciyumvirhe nka barhagwerhi obuhashe bw’okujira ogo mukolo. Cikone, Yezu al’imanyire buzira karhinda oku bakagujijire, anababwira ntyo. Ly’ayerekana oku al’ibalangalire loshi-loshi, aderha ntya: “Nk’oku Larha antumaga, nani mmurhumire.”​—Yn. 20:21. w24.10 buk. 16 cif. 15; buk. 17 cif. 17

Daudi ali mwami w’olubaga lwa Yehova, anali mwishwekerezi kuli ye. Kandi ali muzihi w’omuziki, akag’iyandika e poème, ali mulwi w’ivita, na mulebi. Ahikirwe na mazibu manji. Alamire nka mubunga myaka milebe erhi ali ayaka mwami Sauli w’obumvu. Enyuma z’okuba mwami, kandi Daudi ayaka ly’aciza obuzine bwage erhi omugala Absalomu alonza okumunyaga obwami. Ciru akaba Daudi ahikirwe n’ago mazibu anajijire amagosa madarhi, agendekire abêra mwishwekerezi kuli Yehova kuhika oku buzinda bw’akalamo kage. Yehova adesire oku Daudi ali “muntu w’omurhima [gwage].” Co cirhumire rhushinganine rhuyumvirhize amahano ga Daudi g’obwenge! (1 Bam. 15:5) Kwa lwiganyo, orhanye oku mahano Daudi ahâga omugala Solomoni wayimaga omu byage. Yehova al’icishozire ogo musole lyo gugendekeza enterekêro ecîre n’okuyubaka ehekalu y’okumulerhera obukuze. (1 Nga. 22:5) Solomoni akalwisize mazibu manji ly’ahikiriza ogo mukolo. Bicigi Daudi akamubwizire? Daudi abwira omugala Solomoni oku akarhumikira Yehova, abêrwa omu kalamo.​—1 Bam. 2:2, 3. w24.11 buk. 10 cif. 9-11

Hali ebintu omulume ojirira mukage omu njira y’obuminya erhi omubwira enderho mbi ashinganine ajire ly’akubûla obwira bwage haguma na Yehova na haguma na mukage. Burhangiriza, ashinganine ahugûkwe oku ebi ali ajira biri bibi. Nta kantu kaba kafulisirwe omu masu ga Yehova. (Enna. 44:21; Muh. 12:14; Hb. 4:13) Bwa kabirhi, ashinganine aleke okujirira mukage kubi n’okushanja olugenzi lwage. (Mig. 28:13) Bwa kasharhu, anabwire mukage na Yehova kunganaci abagokize, ananabahûne obwonjo kurhenga oku murhima. (Ebj. 3:19) Ashinganine asemberere Yehova ly’aba n’obulonza bwinja bw’okushanja n’okumuhûna amurhabale ly’akacihasha omu ntanya, omu nderho n’omu bijiro byage. (Enna. 51:10-12; 2 Kr. 10:5; Fl. 2:13) Bwa kani, ashinganine ajire kushimbana n’amasala gage omu kuciyigiriza okushomba obuminya bwa ngasi lubero na ngasi nderho mbi. (Enna. 97:10) Bwa karhanu, ashinganine alonze buzira kulegama oburhabale bwa balungere bw’obuzigire b’omu cigamba. (Yk. 5:14-16) Bwa kalindarhu, ashinganine arhôle omupango gwamurhabala ly’ayaka okuba n’olugenzi lwa ntyo omu gandi mango. w25.01 buk. 10 cif. 14

K’oba ozigire Yehova Nnâmahanga wakuhâga ngasi ngalo nyinja, ciru n’obuzine? K’olonzize omuyerese oku omuzigire? Enjira nyinja bwenene wakajiramwo ntyo kuli kucihâna emwage, n’enyuma z’aho oyerekane ntyo omu kubatizibwa omu mishi. Okujira ntyo kunarhume waba muguma w’omu mulala gwa Yehova. Oko kwarhuma Yehova, Sho na Mwîra wawe, akakulongoza n’okukushibirira bulya waba wage. (Enna. 73:24; Iz. 43:1, 2) Okucihâna emwa Yehova n’okubatizibwa, kandi kwakuha obulangalire bw’okushagalukira obuzine bw’ensiku n’amango. (1 Pt. 3:21) Ka hali akantu kali karhuma warhindira okubatizibwa? Akaba ntyo, arhali we murhanzi. Hali emiliyoni y’abantu bal’igwasirwe bajire empindûlo omu lugenzi lwabo n’omu ntanya zabo lyo bahikiriza ebihûnyire lyo babatizibwa. Bunola bali bakolera Yehova n’omwishingo n’obushiru. w25.03 buk. 2 cif. 1-2

Omu Bibliya, kanji-kanji ebyaha binashushanyizibwe n’emizigo mizirho. Mwami Daudi aganirire ebyaha byage yene omu kuderha ntya: “Ebyaha ngwerhe byanzonzire, bikola binzidohîre bwenene.” (Enna. 38:4, Mashi Bible) Cikone Yehova anababalire ebyaha by’abanya-byaha baciyunjuzize. (Enna. 25:18; 32:5) Oluderho lw’Ecihabraniya lwahindwirwe “kubabalira,” burhangiriza luhugwîre “kulengeza” erhi “kubarhula.” Omu bwenge rhwanabona Yehova nka mulume wa misi olengezize omu njira y’olwiganyo omuzigo gw’ecaha n’okuguhêka kulî na nirhu. Hali olundi luderho lw’olwiganyo luyerekine gurhi Yehova ahêka ebyaha birhu kulî bwenene na nirhu. Olwandiko lw’Ennanga 103:12 lurhubwizire ntya: “Nka kulya ebushoshokero eri kulî n’ebuzikîro, kwo Nnâmahanga ahirika kulî ebyaha birhu.” Ebushoshokero eba kulî bwenene n’ebuzikîro. Nta lusiku ebushoshokero yakarhimanana n’ebuzikîro. Omu zindi nderho, Yehova anahêke ebyaha birhu kulî bwenene na nirhu kulusha oku rhwakahash’irhanya. Oko kurhuyemezize n’obwalagale oku Yehova anarhubabalire loshi-loshi! w25.02 buk. 9 cif. 5-6

Enyuma za Yezu okugaluka empingu, Petro ajira ecisomerine omu kufumya omulume wali cirema kurhenga okuburhwa kwage. (Ebj. 1:8, 9; 3:2, 6-8) Ehitu hy’abantu hyabona eco cisomerine hyanazunguluka Petro. (Ebj. 3:11) Ka Petro acikunzire kulya kuba akuliraga omw’ishanja abantu bakag’isegeza okumanyikana bwenene n’okuba n’ecikono? Nanga, bulya Petro ayerekine obwirhohye, arhalonzagya bamuhe irenge. Lubero n’oko, abwira abantu balihe Yehova na Yezu omu kuderha ntya: “Buli buhashe bw’izino lya Yezu omu kucîkubagira lyo, bwo bwahîre oyu muntu emisi, mumubwine munamumanyire.” (Ebj. 3:12-16, Mashi Bible) Rhwanakulikira olwiganyo lwa Petro omu kuciyigiriza okuba birhohye. Rhunajirire abandi ebintu binja bulya rhuba rhuzigire Yehova rhunaba rhuzigire abantu, ci arhali bulya rhulonzize okuhâbwa irenge. Rhunayerekane oku rhuli birhohye kobinali erhi akaba rhunakolere Yehova n’obushagaluke n’okukolera bene wirhu, ciru akaba abandi bantu barhabwine ebi rhwajijire.​—Mt. 6:1-4. w25.03 buk. 10 cif. 11-12

Rhwanashagalukira bwenene omukolo gw’amahubiri omu kukengera ensiku zoshi oku omukolo gw’amahubiri yo njira nyinja bwenene y’okuyerekana obuzigire bwirhu kuli Yehova n’oku mulungu wirhu. (Mt. 22:37-39) Orhanye kunganaci Yehova ashagaluka erhi abona rhuli rhwajira ogo mukolo na kunganaci abantu bashagaluka erhi barhondera okuyiga Ebibliya! Kandi, orhanye oku bucire abantu bayemera omwanzi gwirhu bayish’iba nabo. (Yn. 6:40) K’orhagwerhi obuhashe bw’okurhenga aha kâ enyanya za mazibu malebe? Akaba ntyo kobiri, osegeze obwenge kw’ebi wakajira ly’oyerekana obuzigire bwawe kuli Yehova n’oku mulungu wawe. Omu mango gw’obulwalwa bw’okuyahukira bw’e COVID-19, Samuel na mukage Dania barhagwerhe obuhashe bw’okurhenga aha mwababwe. Muli ago mango mazibu, bakahubiri ngasi mango kugerera etelefone, omu kuyandika amaruba, n’okulongoza amafunzo g’Ebibliya kugerera Zoom. Akanga ka Samuel na Dania karhumire barhajira binji omu mukolo gwabo, cikone bajira ebi bakanahashire banaba n’omwishingo omu kujira ntyo. w24.04 buk. 18-19 cif. 15-16

Ciru akaba obuhya burhali bwa bulagirire ly’omuntu aba n’omwishingo, Bakristu banji baciri balamba, babe baciri misole erhi bakola bakuzire, banalonze omulume erhi mukazi bakaja naye omu buhya. Kobinali, embere orhondere okusheba, oshinganine obe ocirheganyize okubiyerekire eby’ensaranga, omu hali y’ekiroho n’ey’ekandalala. (1 Kr. 7:36) Kuli kwinja orhang’imanya amorhere olonzize omuntu waja naye omu buhya abe nago embere orhondere okusheba. Erhi akaba orhajijiri ntyo, wanagayaguza omuntu wakarholine naye, erhi orhondere okusheba omuntu orhakushinganini bwinja. Okuderha okuli, omuntu yeshi-yeshi wakarhôlana naye ashinganine abe Mukristu obatizibwe. (1 Kr. 7:39) Cikone, arhali ngasi Mukristu obatizibwe wakaba mulume erhi mukazi mwinja kuli we. Co cirhumire oshinganine ocidose ntya: ‘Emihigo yani eri ehi omu kalamo? Morhere gahi nakalonza oku muntu nakaja naye omu buhya? Ka ndi nalonza ebintu birhalusire olugero?’ w24.05 buk. 20 cif. 1; buk. 21 cif. 3

Nka bantu babirhi bali bashebana, gurhi mwakayusamwo amazibu n’okurhayumvikana kwakamuhikira mango oku gandi? K’oko kwanayerekana oku murhapatini? Arhali bujayo; ngasi mulume n’omukazi hali amango babula okuyumvikana. Obuhya bwinja buba bujijirwe na bantu babirhi bakakola haguma lyo bayusa amazibu bagwerhe g’okurhayumvikana. Co cirhumire, oku muli mwayusamwo amazibu ene kwanayerekana erhi obuhya bwinyu bwayish’iba bwinja erhi nanga. Mwembi mucidose ntya: ‘Ka rhwanaganirira amazibu rhunarhulirire n’omu njira y’obukenge? Ka ngasi muguma aba mubidu okuyemera amagosa gage n’okucihangana okujira empindulo? Ka ngasi muguma wirhu aba mubidu okuyemera entanya z’owundi, okuhûna obwonjo n’okubabalira?’ (Ef. 4:31) Lubero n’oko, erhi mwakakabula okuyumvikana ngasi mango erhi kuja kadali amango muli mwashebana, nkaba oko kurhakashanja enyuma z’okuja omu buhya. Erhi wakahugûkwa oku omuntu muli mwashebana naye arhali ye kushinganine, okulekana gwanaba go muhigo mwinja bwenene kuli mwembi. w24.05 buk. 29 cif. 12

Erhi akaba rhunarhumikire Yehova omu bintu byoshi n’erhi akaba rhunarhôle emihigo eyimangire oku Bibliya, rhwanaba lwiganyo lwinja oku bandi. Amango rhuli rhwakula omu buyemere n’omu bumanye burhagwerhi magosa, rhunasimike bwenene omu okuli. Rhurhayabirwa okurhôla emihigo, rhurhadundagana, rhurhanayehulwa eyi n’eyi n’enyigirizo z’obunywesi n’entanya z’er’igulu. (Ef. 4:14; Yk. 1:6-8) Kandi rhuba babidu okurhabala abali balwisa amazibu. (1 Ts. 3:2, 3) Abagula bashinganine babe ba lugero omu nkomedu zabo, ba bukengere bwinja, ba burhimanya, barhashinganini babe ba kavulindi. Abo balume banashumye abandi omu njira nyinja omu ‘kucishwekera oku kanwa k’okuli.” (Tt. 1:9; 1 Tm. 3:1-3) Kugerera olwiganyo lwabo n’omukolo gw’okulanga ebibuzi, abagula banarhabale abahubiri bakaja oku ntimanano ngasi mango, omu mukolo gw’amahubiri, n’okujira ifunzo lyabo bone. Erhi bene wirhu na bali birhu bahikirwa n’amazibu gabababazize, abagula banabarhabala basegeze obwenge kuli Yehova n’ebiragane byage. w24.06 buk. 31 cif. 16-18

Omu mukolo gwage gw’amahubiri, Yezu ayigirizize abumvirhiza bage lugenda obulonza bw’Ishe bw’okubabalira. Orhanye oku lwiganyo lw’omwana mulalahi. Ogo musole gwacishoga okulama akalamo k’okujira ebyaha omu mango malebe g’akalamo kago. Cikone enyuma za kasanzi kalebe, oyo murhabana “acijamwo [agalukirwa n’obukengere, NWT]” anagaluka emwabo. Gurhi ishe ajijire? Yezu adesire oku erhi oyo murhabana “aba aciri kuli, ishe amulangira . . . , anaciyisha ali bulibirha, amuyababira, amuhobera.” Oyo murhabana al’ilonzize okuhûna ishe amujire muguma w’omu bakozi bage, cikone ishe amuhamagala “oyu mwana wani” anashub’imugalula omu mulala. Ishe aderha erhi: “Âli ahezire, lero anabonesire!” (Lk. 15:11-32) Amango Yezu al’ilamire empingu embere ayishe hano igulu, kobinali acibwinire Ishe ali ayereka bantu banji baciyunjuzagya obwonjo bwa ntyo. Ogu mwanzi Yezu arhuganirire, kobinali guli gwa kurhuliriza gunayerekine kunganaci Larha wirhu, Yehova, aba wa bwonjo! w24.08 buk. 11 cif. 11-12

Omukristu ogwerhe obwenge bwinja anajire okwage koshi ly’arhôla emihigo minja eyerekine entanya za Yehova. Omukristu wa ntyo aba amanyire oku nta kantu kaba ka bulagirire bwenene omu kalamo kulusha obwîra bwage haguma na Yehova. Ajira entanya z’olugero okubimuyerekire yenene, bulya ayishi oku arhaba amanyire ngasi kantu. Ananayerekane oku aba ayegemire Mungu omu kumuyegera kanji-kanji kugerera isala ly’obwirhohye. Ciru rhwakaba rhugwerhe buhashe buhi bw’akaburhano, rhunahugûkwe oku rhulagirire oku kugendekera rhwasalira Yehova. Co cirhumire, rhunashenge Yehova obulongozi, ci bwenene amango rhugwerhe emihigo y’obulagirire y’okurhôla bulya rhumanyire oku ye manyire ebiri binja bwenene kuli rhwe. Rhuvuzire omunkwa bwenene okubona Yehova arhulemire n’obuhashe bw’okuyerekana amorhere gage. (Murh. 1:26) Kobinali, rhurhakahasha okuyiga Yehova omu njira y’obwimana.​—Iz. 55:9. w25.03 buk. 11 cif. 13; buk. 13 cif. 17-18

Oyake okurhanya oku abandi barhali ba kuvuga omunkwa. Erhi akaba abandi barhayerekini oku bavuzire omunkwa oku kantu kalebe rhwabahâga, rhwanacidosa ntya: ‘Ka kobinali barhali ba kuvuga omunkwa erhi bayibagire kone okuyerekana oku bavuzire omunkwa?’ Nkaba hanaba hali ebyarhumaga barharhuvuga omunkwa nk’oku rhwal’ilangalire. Baguma na baguma banaciyumva oku bavuzire omunkwa bwenene cikone babe n’amazibu g’okuderha ntyo. Nkaba banayumva enshonyi erhi akaba bahâbirwe oburhabale, ci bwenene erhi akaba omu mango gageraga bo bakag’irhabala abandi. Abe ntyo kobiri erhi nanga, obuzigire bw’Ecikristu bwarhushumya rhuyake okurhanyiza abirhu bemezi kubi n’okugendekera rhwaba n’omwishingo gurhenga omu kuhâna. (Ef. 4:2) Obe wa kulembera. Lugenda okuba bahânyi, Solomoni, mwami w’obwenge ayandisire ntya: “Kweba omugati gwawe oku mîshi, wazinda erhi washubigurhôla.” (Muh. 11:1) Ezo nderho zirhuyigirizize oku hali amango abantu bakarhuyeresa oku barhuvuzire omunkwa enyuma za kasanzi kanji. w24.09 buk. 30 cif. 18-19

Hali amango itangazo lijirwa omu cigamba oku omuntu akalihirwe. Omu kanga ka ntyo, rhwanagendekera rhwacilunga haguma naye, omu kumanya oku aciyunjuzize analesire olugenzi lwage lubi. Anabe aciri muguma w’omu cigamba, ananabe alagirire oku kuhâbwa omurhima n’ababo bemezi. (Hb. 10:24, 25) Cikone, akanga k’omuntu warhenzibwe omu cigamba kali lubero. Rhunaleke ‘okukomêra’ oyo muntu, ‘ciru rhurhanalîra haguma’ naye. (1 Kr. 5:11) K’oko kuhugwîre oku rhushinganine rhuleke loshi-loshi okumushibirira? Nanga. Kobinali, rhurhashinganini rhucilunge haguma naye. Cikone Abakristu banakolesa ezamiri yabo ekomerezibwe n’Ebibliya lyo bahiga erhi balalika oku ntimanano y’ecigamba omuntu warhenzibwe omu cigamba, nkaba oli w’omu mulala, erhi muntu mulebe wali mwîra wabo embere. w24.08 buk. 30 cif. 13-14