Mwezi gwa 9

Rhugwasirwe rhucihangane bwenene lyo rhukula kiroho n’okugendekera rhwabêra Bakristu bakuzire kiroho. Co cirhumire rhushinganine rhube masu lyo rhurharhanyagya oku rhwakuzire kiroho n’oku nta kantu rhucishinganine rhujire. (1 Kr. 10:12) Rhushinganine ‘rhukacirhangula rhwenene’ lyo rhumanya erhi rhugendekire rhwajira amajambere. Omu maruba yayandikiraga Abakolosi, entumwa Paolo yacib’isegeza obulagirire bw’okugendekera babêra bakuzire kiroho. Ciru akaba bal’ikola Bakristu bakuzire kiroho, Paolo abarhonda oku babe masu lyo barhayahukiragwa n’entanya z’er’igulu. (Kl. 2:6-10) Na Epafra wal’imanyire bwinja Abakristu b’eco cigamba, agendekire abasengerera lyo ‘bazibuha,’ erhi kukula kiroho. (Kl. 4:12) Bici oko kurhuyigirizize? Paolo na Epafra bombi bal’ihugûsirwe oku ly’omuntu agendekera aba akuzire kiroho, agwasirwe acihangane yene n’okuhûna Yehova oburhabale. Bal’ilonzize Abakolosi bagendekere baba Bakristu bakuzire kiroho, ciru akaba bakag’ilwisa amazibu. w24.04 buk. 6-7 cif. 16-17

Erhi rhwakayoboha Yehova omu njira eshinganine, rhwanamuzigira bwenene na ntyo nta mango rhwakajira akantu koshi-koshi kakamugayisa. Rhunabe babidu okumanya olubero egarhi k’ebinja n’ebibi, egarhi k’okuli n’obunywesi, lyo rhuyemerwa na Yehova. (Mig. 2:3-6; Hb. 5:14) Erhi rhwakayoboha bene bantu kulusha oku rhuyoboha Mungu, rhwanaciyegula n’okuli bunyi-bunyi. Rhuganirire olwiganyo lwa bakulu 12 b’emilala bajag’iyenja ecihugo Yehova al’ilaganyize okuha Abaisraheli. Bantu ikumi egarhi k’abo bakulu bajag’ilolereza eco cihugo, bayoboha Abakanani bwenene kulusha oku bal’izigire Yehova. Babwira ababo Baisraheli ntya: “Rhurhankahasha okusôka mpu rhujilwisa olwola lubaga, luli ludarhi kurhulusha.” (Mib. 13:27-31) Omu masu ga bene bantu, Abakanani bali badarhi erhi ba misi bwenene. Na ntyo ko byali. Cikone okuderha oku Abaisraheli barhakahashire okuhima abashombanyi babo, kwali kuyibagira Yehova. w24.07 buk. 9 cif. 5-6

Ka rhwanayemera n’obwalagale oku erhi Yehova atwira abantu olubanja, ensiku zoshi anarhôle omuhigo mwinja? Neci! Nk’oku Abrahamu al’ihugûsirwe bwinja, Yehova ye ‘muzuzi w’er’igulu lyoshi’ mwimana, wa bwenge bwenene na wa lukogo bwenene. Akomerezize Omugala anamuha omukolo gw’okutwira abantu boshi olubanja. (Yn. 5:22) Ye n’Omugala banasoma ebiri omu murhima gwa ngasi muntu. (Mt. 9:4) Omu kanga ka ngasi muntu, bakolesa “obushinganyanya”! Lekagi rhuhige okulangalira Yehova n’emihigo yage yoshi. Rhuba rhumanyire oku rhurhagwerhi obuhashe bw’okutwa olubanja, cikone yehe abugwerhe! (Iz. 55:8, 9) Co cirhumire rhunaleke omukolo gw’okutwa emanja zoshi omu maboko gage ye n’Omugala, Mwami oyerekana kwa bwimana obushinganyanya n’olukogo lw’Ishe.​—Iz. 11:3, 4. w24.05 buk. 7 cif. 18-19

Kuli kwa bulagirire bwenene okuba muntu oderha eby’okuli nk’oku binali omu murhima gwage. Rhwanabona ntyo kugerera ebyabaga erhi Filipo ahûna omwîra wage Natanaeli agend’irhimanana na Yezu. Ciru akaba Yezu arhalisag’irhimanana bundi na Natanaeli, aderha ntya: “Y’oyu ye Mwisraeli w’okuli, orhabamwo bulenzi.” (Yn. 1:47) Yezu abonamwo Natanaeli obwikubagirwa bwago-bwago. Akirhu, Natanaeli ali muntu orhali mwimâna. Cikone arhalimwo kantu koshi-koshi ka kucijirisa erhi bulyalya. Yezu ashagalukira oko anavuga Natanaeli omunkwa enyanya z’oko. Binji by’omu bintu rhuhûnyirwe okujira lyo rhushagalusa Yehova biganirirwe omu Lulanga lwa 15 biyerekire oku rhujirira abandi. Olwandiko lw’Ennanga 15:3 ludesire oku, ecigolo omw’ihema lya Yehova ali muntu “orhagamba ndi omu lulimi lwage, orhajirira wabo kubi, arhanajacira mulungu wage [orhahegeza mulungu wage irenge, NWT].” Okukolesa olulimi lwirhu kubi mw’ezo njira kwanalerherha abandi amazibu.​—Yk. 1:26. w24.06 buk. 10 cif. 7; buk. 11 cif. 9-10

Erhi wakacirheganya bwinja embere oje omu mahubiri, orhakaciyumva oyobohire bwenene okuganira n’abandi. Yezu arhabire abanafunzi bage bacirheganye embere baje omu mukolo gw’amahubiri. (Lk. 10:1-11) Bulya abanafunzi bakolesize ebi Yezu abayigirizagya, babire n’obuhashe bw’okuhikiriza binji omu mukolo gw’amahubiri n’oko kwabalerhera mwishingo munji. Gurhi rhwakacirheganyamwo embere rhuje omu mukolo gw’amahubiri? Rhushinganine rhurhanye lugenda gurhi rhwakaganirira abandi okuli omu nderho zirhu rhwene. Kandi, kwanaba kwinja rhurhanye oku mazibu malebe rhulug’irhimanana nago omu eneo yirhu n’okurhanya gurhi rhwakalwisa ngasi mazibu erhi rhwakarhimanana nago. Buzinda amango rhukola rhwaganiza abantu, rhwanacihangana rhube ba kurhulirira, ba kumwemwerhwa, na ba kujira obwîra. w24.04 buk. 16 cif. 6-7

Ecirhumire c’obulagirire cirhushumya okuhubiri kuli kuba rhuba rhuzigire Yehova Nnâmahanga n’izino lyage litagatifu. Rhunabone omukolo gwirhu gw’amahubiri nka njira y’okukuza Nnâmahanga rhuzigira. Rhuyemire n’omurhima goshi oku Yehova Nnâmahanga ashinganine obukuze, irenge, n’obuhashe kurhenga oku bakozi bage bishwekerezi. Rhunamuhe irenge n’obukuze erhi rhuganirira abandi ebirhuyemezize n’obwalagale oku ye “walemaga ebintu byoshi” n’oku rhuzine bulya arhuhîre obuzine. Rhunamuhe obuhashe, ko kuderha obuhashe bwirhu erhi rhukolesa akasanzi kirhu, emisi yirhu, n’ebirugu birhu lyo rhushangira omu mukolo gw’amahubiri nk’oku rhwakanahasha, kushimbana n’akanga kirhu. (Mt. 6:33; Lk. 13:24; Kl. 3:23) Kwa bofofi, rhunashagalukire okuganira lugenda Nnâmahanga wirhu rhuba rhuzigire. Kandi rhunaciyumve rhushagalukire okuganirira abandi lugenda izino lyage n’amorhere gage. w24.05 buk. 17 cif. 11

Yehova anarhuhe omurhûla n’okurhimukwa ene, anayish’irhuha obuzine bw’ensiku n’amango omu mango gayisha. Rhwanalangalira Yehova n’okuyemera n’obwalagale oku ajira irala n’obuhashe bw’okurhuhemba. N’okuyemera ntyo n’obwalagale kwanarhushumya rhugendekere rhwajira binji omu nterekêro yirhu, nk’oku abakozi bishwekerezi ba Mungu b’omu mango ga mîra bashumibwe okujira. Ntyo ko Timoteyo ajijire omu myaka igana mirhanzi. (Hb. 6:10-12) Timoteyo al’ihizire obulangalire bwage muli Nyamuzinda ozine. (1 Tm. 4:10) Muli ntyo, al’igwerhe ecirhumire cinja c’okukolera Yehova n’obushiru n’okukolera abandi. Omu njira zihi ajijiremwo ntyo? Entumwa Paolo yamuhîre omurhima ajire amajambere ly’aba mwalimu mwinja omu cigamba n’ omu mukolo gw’amahubiri. Kandi Timoteyo al’igwasirwe abe lwiganyo lwinja oku babo bemezi, babe misole erhi abakola bakuzire. Na kandi al’ihâbirwe mikolo milebe mizibu, yal’ihiziremwo okuhâna amahano buzibu-zibu cikone omu njira y’obuzigire oku bantu bal’igalagirireko. (1 Tm. 4:11-16; 2 Tm. 4:1-5) Timoteyo akayemire n’obwalagale oku Yehova yehe akamuhembire.​—Rm. 2:6, 7. w24.06 buk. 22-23 cif. 10-11

Yehova akolesize kanji-kanji abalebi lyo barhonda n’okuhanûla abantu bage bakag’imugomera. Kwa lwiganyo, kugerera Yeremiya, Mungu aderha ntya: “Galuka wani Israheli w’omugoma, . . . Ntakacikulola n’obusu bukali, bulya ndi wa lukogo, . . . Ntabîka mungo gwa nsiku n’amango. Oyemêre kwone obubi bwawe: wagomîre Nyakasane Nyamuzinda wawe.” (Yer. 3:12, 13) Kugerera Yoweli, Yehova aderha ntya: “Ngalukiri n’omurhima gwinyu gwoshi.” (Yow. 2:12, 13, Mashi Bible) Adesire ntya kugerera Izaya: “Mucicêse! Murhenze obubi bw’ebijiro binyu omu masu gani! Muleke okukâkola amabi.” (Iz. 1:16-19) Na kugerera Ezekiyeli, Yehova aderha ntya: “Ka nakasima omubi afe, . . . kali nsima aleke olugendo lwage lubi, alame. Ntakwirirwa olufu lw’omuntu, . . . Mugomoke, mwalama.” (Eze. 18:23, 32) Yehova anashagaluke erhi abona abantu baciyunjuza bulya aba alonzize balame ensiku n’amango! w24.08 buk. 9 cif. 5-6

Abakozi ba Yehova boshi banahâbwe ebiryo by’ekiroho, obulongozi, n’obulanzi balagirireko. Olwiganyo luyerekine oku Yehova arhajira kabôlo oku bigolo byage byoshi, kuli kubona oku ajijire abantu boshi omw’igulu ene babe n’obulyo bw’okusoma Ebibliya. Amandiko matagatifu gayandisirwe burhangiriza omu ndimi isharhu: Ecihabraniya, Eciharamiya, n’Ecigiriki. K’abantu bakahasha okusoma endimi ntangiriza z’Ebibliya bajira obwîra bwa hofi-hofi haguma na Yehova kulusha abarhakahasha okujira ntyo? Nanga ciru n’ehitya. (Mt. 11:25) Yehova arhakarhulalika oku rhube bigolo byage mpu bulya kone rhwasomire bwenene erhi bulya rhumanyire endimi ntangiriza Ebibliya yayandikagwamwo. Ahali h’okuha obwenge bwage abantu basomire bwenene bone, Yehova anabuhe abantu boshi okw’igulu, babe basomire bwenene erhi nanga. Ebibliya, Kanwa kage kalongozibagwa n’iroho litagatifu, yahindwirwe omu bihumbi by’endimi; muli ntyo, abantu omw’igulu lyoshi banayunguka n’enyigirizo zayo n’okuyiga gurhi bakabamwo bîra bage.​—2 Tm. 3:16, 17. w24.06 buk. 6-7 cif. 13-15

Okusherezibwa kwa Yeruzalemu Yezu alebaga kwali hofi. Abakristu bal’ishinganine bakolese akasanzi kal’isigire lyo bacirheganya, omu kuba n’amorhere nk’obuyemere n’obulembedu. (Hb. 10:25; 12:1, 2) Rhuli hofi rhuhikirwe n’amalibuko madarhi bwenene kulusha agahikiraga Abakristu Bahabraniya. (Mt. 24:21; Maf. 16:14, 16) Rhuganirire mahano maguma na maguma Yehova ahaga abo Bakristu gakarhulerhera nirhu obunguke ene. Omu maruba entumwa Paolo yayandikiraga Abahabraniya, yabaha omurhima bakahumbirira omu Kanwa ka Nnâmahanga. (Hb. 5:14–6:1, Mashi Bible) Omu kukolesa Amandiko g’Ecihabraniya, Paolo arhabala abo bene wabo bahugûkwe oku enjira y’okuharamya y’Ecikristu yal’ilushire bwenene ey’Eciyahudi. Paolo aha Abakristu omurhima bamanye n’okuhugûkwa bwinja okuli kurhenga omu Mandiko lyo bakamanya enyigirizo z’obunywesi n’okuziyaka. w24.09 buk. 8-9 cif. 2-3; buk. 10 cif. 6

Abanafunzi ba Yezu bal’ilagirire oku kuhâbwa omurhima. Bulya gurhi? Baguma na baguma muli bo balesire enyumpa zabo, emilala yabo, n’emikolo yabo lyo bashimba Yezu akasanzi koshi. (Mt. 19:27) Abandi bakag’ijirirwa kubi bulya babire banafunzi bage. (Yn. 9:22) Baciyimire ebyo byoshi bulya bal’iyemire oku Yezu ye Masiya walaganyizibagwa. (Mt. 16:16) Cikone, erhi Yezu anigwa bavunika omurhima bulya barhanyize oku ebi bal’ilangalire birhacihikirire. Buzira karhinda, Yezu abwine oku oburhe abanafunzi bage bali burhayerekanaga oku bal’igwerhe obuzamba bw’ekiroho, cikone abwine oku bal’ishinganine baciyumve ntyo enyanya z’okufâ kwage. Co cirhumire omu lusiku lo n’olo afûkaga, arhondera okuha abo bîra bage omurhima. Kwa lwiganyo, Yezu abonekire Mariya Magdalena erhi aba ali alakira aha bwa nshinda yage. (Yn. 20:11, 16) Kandi abonekire abanafunzi babirhi e Emausi. Kandi abonekire entumwa Petro. w24.10 buk. 13 cif. 5-6

Mwe babusi, murhabale omwana winyu ly’akahalira obwemere bwage omu Omulemi. Nkaba wanabona oku okusoma haguma emyanzi eri oku jw.org eganirire obulemi n’amageuzi kwanakurhabala. Enyuma z’aho, muganirire entanya omwana wawe abwine oku zanarhabala bwenene okuyemeza abandi bahugûkwe okuli lugenda Omulemi. Omuhe omurhima akolese entanya nembu zipatine n’obwenge erhi akaba hali abalonzize okumuyumvirhiza. Kwa lwiganyo, owabo mwanafunzi anaderha ntya: “Ebi mbona byone mba nyemire, na nta mango nsag’ibona Mungu.” Omusole Mukristu anashuza ntya: “Orhanye obe oli walambagira kulî bwenene omu muzirhu aharhaba bantu onarhimane iriba ly’amishi liyubasirwe bwinja. Gurhi wakarhanya? Erhi akaba okubaho kw’ery’iriba kukuyemezize n’obwalagale oku hali omuntu mwenge waliyubakaga, k’okubaho kw’amalunga n’igulu kurhakuyemezizi ciru bwenene oku hali omuntu ojira obwenge wabilemaga!” w24.12 buk. 18 cif. 16

Lyo rhurhôla emihigo y’obulagirire omu kalamo, rhweshi rhuba rhulagirire oku bulongozi. Abagula n’abandi Bakristu bakuzire kiroho banarhuha bulongozi bunji. Ciru akaba bali bakulu bwenene kurhulusha, rhurhashinganini rhulahire ho n’aho amahano gabo omu kurhanya oku gali ga mîra. Yehova aba alonzize rhuciyigirize kugerera abakola bakulu. Bulya balamire myaka minji kurhulusha, bakola bamanyire binji lugenda akalamo, banakola bagwerhe obwenge. Omu mango ga mîra, Yehova akolesize abantu bishwekerezi bal’ikola bashosi lyo balongoza abantu bage n’okubaha omurhima. Kwa lwiganyo, rhuganirire Musa, Daudi, n’entumwa Yowane. Balamire omu kasanzi kali lubero n’akanga kabo kali lubero bwenene. Oku buzinda bw’akalamo kabo, bahîre abaciri misole amahano g’obwenge. Ngasi muguma wa mw’abo bantu bal’ikola bashosi asegize obulagirire bw’okuba wa kurhumikira Mungu. Yehova ayandikisize enderho zabo omu Bibliya lyo zirhuyigiriza. Rhube rhuciri misole erhi rhukola bashosi, rhwanayunguka n’amahano gabo.​—Rm. 15:4; 2 Tm. 3:16. w24.11 buk. 8 cif. 1-2

Kurhenga omu mango ga Nuhu, Mungu ahanza bene bantu okulya omuko. (Murh. 9:3, 4) Enyuma z’aho, Mungu agalukira oko ahanzagya omu Marhegeko ahâga Abaisraheli. Ngasi muntu wakalire omuko al’igwasirwe “akagwe,” erhi kunigwa. (Lev. 7:27) Yezu ayigirizize Abayahudi okurhumikira amarhegeko ga Nnâmahanga goshi. (Mt. 5:17-19) Co cirhumire birhapatini n’obwenge oku akabwizire Abayahudi balye omubiri gwage gw’enyama n’okunywa omuko gwage. Yezu akag’iderha omu njira y’olwiganyo, nk’oku anajiraga embere erhi abwira omukazi Musamariya ntya: ‘Amishi nahâna . . . gakahulula . . . obuzine bw’ensiku n’amango.’ (Yn. 4:7, 14) Yezu arhakag’iderha oku omukazi Musamariya akabire n’obuzine bw’ensiku n’amango omu kunywa kone mishi malebe g’okunali. Ko n’oko, arhabwiraga ehitu hy’abantu aganizagya e Kapernaumu oku bakabire n’obuzine bw’ensiku n’amango erhi bakalire omubiri gwage gw’enyama n’okunywa omuko gwage. w24.12 buk. 9 cif. 4-6

Abalume Bakristu bashinganine bacilange lyo barhag’iba n’entanya mbi lugenda abakazi. Bulya gurhi? Cirhumire ciguma kuli kuba, kanji-kanji entanya omuntu agwerhe zo zimushumya okujira bintu bilebe. Entumwa Paolo yarhonzire Abakristu bashîge amavurha b’e Roma, omu kuderha ntya: “Mumanye mwakacigererakwo er’igulu [mwankabumbwa n’er’igulu, NWT].” (Rm. 12:1, 2) Erhi Paolo ayandikira Abaroma, bibonekine oku eco cigamba cal’ikola cigwerhe kasanzi kalebe ciri ho. Ciru akaba ntyo, enderho za Paolo ziyerekine oku bantu baguma na baguma ba mw’eco cigamba, bacir’igendekire bashumibwa n’enkomedu n’entanya z’igulu. Co carhumaga abahanûla bashanje entanya zabo n’olugenzi lwabo. Kobinali ery’ihano liyerekire abalume Bakristu ene. Eby’okugayisa, kuli kubona oku balume baguma na baguma bashumibwe n’entanya z’er’igulu na ciru bajirire bakabo kubi. w25.01 buk. 9 cif. 4

Ene, abagula baba balume bajira mikolo minji. Baba baeneza-injili. (2 Tm. 4: 5) Banayerekane olwiganyo lwinja omu kuhubiri n’obushiru, banapange omukolo gw’amahubiri omu eneo y’ecigamba, n’okurhukomereza okuhubiri n’okuyigiriza bwinja. Kandi banakole nka batwi b’emanja b’olukogo barhajira kabôlo. Erhi Omukristu akajira ecaha cizibu, abagula banacihangane okumurhabala ly’acib’iba n’obwîra bwinja haguma na Yehova. Mw’ago mango go n’ago, banabe masu ly’ecigamba cigendekera cabêra cicîre. (1 Kr. 5:12, 13; Gl. 6:1) Burhangiriza, abagula baba bamanyikine oku baba balungere. (1 Pt. 5:1-3) Banacirheganye bwinja lyo bageza ehotuba ziyimangire oku Mandiko, banacihangane lyo bamanya ngasi muntu omu cigamba, n’okujira omukolo gw’okulambagirira ebibuzi lyo babiha omurhima. Ahanyuma n’eyindi mikolo bajira, kandi bagula baguma na baguma banarhabale oku mukolo gw’okuyubaka n’okushibirira Enyumpa z’Obwami, okupanga entimanano nkulu, banakole haguma n’Ekomite Zijira Olushangi Haguma n’Ehopitali n’omu Bikundi by’Okulambagirira Abalwala. Abagula banakole bwenene erhi rhwe rhurhuma! w24.10 buk. 20 cif. 9

Omu Bibliya, oluderho “bucunguke” luhugwîre okulikulwa, erhi kurhenzibwa omu buhane enyanya z’okulyulwa kw’engombôlo. Lugenda oko, entumwa Petro yadesire ntya: “Mumanye oku murhakulagwa [luderho oku lundi, “murhagombôlagwa; murhacungulagwa”] omu bworhere bw’obuja basho bamuyahukizagya n’ebirugu byankasherera, nk’amasholo erhi ensaranga, ci n’omuko gw’ecitwiro cidarhi gwa Kristu, ye Mwana-buzi mwêru-kwêru orhalikwo izabyo.” (1 Pt. 1:18, 19) Enyanya z’enterekêro y’engombôlo, rhwanarhenzibwa omu bujà bw’ecaha n’olufû. (Rm. 5:21) Rhuvuzire Yehova na Yezu omunkwa bwenene okubona rhwacungwirwe kugerera omuko gw’engulo ndarhi bwenene gwa Yezu. w25.02 buk. 5 cif. 15-16

Gurhi rhwakacilangamwo? Rhuganirire ebi rhwakaciyigiriza kugerera omusole guganirirwe omu citabu c’Emigani cigabi ca 7. Ajira ecijiro c’eby’enshonyi n’omukazi w’embaraga. Omulongo gwa 22, Mashi Bible, gurhubwizire oku ogo musole gwamushimba “ho n’aho.” Cikone emilongo eshokwire eyerekine oku ajijire bintu bilele embere z’aho byamulongozagya bunyi-bunyi ahikire okujira ecaha. Bici ajijire byamulongozagya okujira ecaha? Burhangiriza, bijingo, “agera omu njira nnene eri hofi n’aha mw’omukazi w’omugonyi.” Enyuma z’aho, alambagira kuyerekera ebwa nyumpa y’oyo mukazi. (Mig. 7:8, 9, Mashi Bible) Buzinda, erhi abona nyamukazi, arhagalukaga. Ahali h’okujira ntyo, ayemera ehinunugurho hya nyamukazi anamuyumvirhiza erhi amubwîra lugenda enterekêro z’omurhûla ali amahâna, nkabaga ajiraga ntyo ly’ogo musole gurhanya oku arhali muntu mubi. (Mig. 7:13, 14, 21) Ogo musole guciyakage emirhego yagulongozagya okujira ecaha, gwakacilanzire oku mashumi gurhakanajijire ecaha. w24.07 buk. 16 cif. 8-9; buk. 19 cif. 19

Yehova arhalekerera ecaha cizibu egarhi k’abantu bage. Baguma na baguma banarhanya oku bulya Yehova aba wa bwonjo, analeka omuntu orhaciyunjuzizi abêre omu cigamba, cikone arhali ntyo ko Yehova ayerekanamwo obwonjo bwage. Yehova aba wa bwonjo, cikone arhalekerera olugenzi lubi; amakanuni gage lugenda aminja n’amabi garhashanja. (Yd. 4) Kobinali, okulekerera olugenzi lubi kurhakaba kuyerekana obwonjo ciru n’ehitya, bulya kwanalerhera ecigamba coshi amazibu. (Mig. 13:20; 1 Kr. 15:33) Ciru akaba ntyo, rhuyizire oku Yehova arhalonza omuntu ciru n’omuguma asherezibwe. Aba alonzize acungule abantu amango bihashikine. Abantu bahindula omurhima gwabo banalonza okushub’iba n’obwîra bwinja haguma naye, Yehova anabayerese obwonjo. (Eze. 33:11; 2 Pt. 3:9) Co cirhumire, erhi oyo mulume w’omu Korinti aciyunjuza n’okuleka olugenzi lwage lubi, Yehova akolesa entumwa Paolo ly’ehugûlira ecigamba oku oyo mulume al’ishinganine ababalirwe n’okuyegerezibwa. w24.08 buk. 17 cif. 7; buk. 18-19 cif. 14-15

Omu lwiganyo luyerekire ebibuzi n’empene, Yezu aganirire okutwirwa olubanja kw’abantu bagwerhe obulyo bw’okulunga bene wabo bashîge amavurha okuboko. (Mt. 25:31-46) Yezu ayish’ibatwira olo lubanja omu mango g’‘amalibuko [madarhi],’ kasanzi kasungunu embere z’ivita lya Harmagedoni. (Mt. 24:21) Nka kula omungere aberula ebibuzi n’empene, Yezu ayish’iberula abantu balunga okuboko n’obwishwekerezi abanafunzi bage bashîge amavurha n’abarhabalunga okuboko. Obulebi bw’Ebibliya buyerekine oku Yezu, Mutwi w’Emanja Yehova ahizireho, ayish’itwira abantu olubanja omu njira y’obushinganyanya. (Iz. 11:3, 4, Mashi Bible) Ayish’ilolereza bwinja ebijiro by’abantu, entanya zabo, n’enderho zabo, kuhiramwo n’oku bajirira bene wabo bashîge amavurha. (Mt. 12:36, 37) Yezu ayish’imanya ba ndi balunzire bene wabo bashîge amavurha okuboko n’omukolo gwabo. Nguma y’omu njira z’obulagirire bwenene abantu bashushanyizibwe n’ebibuzi balungamwo bene wabo Kristu okuboko, kuli kubarhabala oku mukolo gw’amahubiri. w24.09 buk. 20-21 cif. 3-4

Rhwanalolereza erhi ebi rhuba rhuyemire biri by’okuli omu kubishushanya n’ebi Ebibliya edesire. Kwa lwiganyo, orhanyeko musole guli gwacidosa erhi kobinali Mungu anagushibirire. K’ashinganine arhanye oku bulya ali acidosa ntyo kuli kuderha oku Yehova arhamushibirira? Nanga, ashinganine ‘alole bwinja ngasi kantu’ omu kulonza entanya za Yehova lugenda oko. Amango rhuli rhwasoma Akanwa ka Mungu, “rhunayumve” Yehova ali arhuganiza. Cikone lyo rhumanya entanya zage lugenda idoso lilebe, biba bihûnyire rhujire obushiru. Rhushinganine rhulonze n’okuyiga Amandiko gakarhurhabala rhubone ishuzo okw’idoso lirhu. Rhwanajira obusagasi lugenda ogo mwanzi omu kukolesa ebikolanwa by’okujirira obusagasi ikubuliro lya Yehova lirhuha. (Mig. 2:3-6) Rhwanashenga Yehova arhulongoze omu busagasi bwirhu n’okurhurhabala rhubone entanya zage okw’idoso lirhu. Enyuma z’aho, rhwanalonza amakanuni g’Ebibliya n’emyanzi y’obulagirire epatine n’akanga kirhu. w24.10 buk. 25 cif. 4-5

Yehova arhakagisha obushiru bw’omuntu yeshi-yeshi oli washumibwa n’obucibone erhi olonzize okuhâbwa irenge. (1 Kr. 10:24, 33; 13:4) Hali amango irala libi lyashumize ciru n’abîra ba hofi-hofi ba Yezu balonze okuhâbwa lukengwa lulebe. Rhuganirire kanga kalebe kayerekire banafunzi babirhi ba Yezu. Yakobo na Yowane bahûna Yezu abahe ecikono cilengerire omu Bwami bwage. Yezu arhababwiraga oku kuli kwinja okuhûna ecikono ca ntyo. Lubero n’oko, ahugûlira entumwa 12 zoshi ntya: “Owalonz’iba mukulu muli mwe, acijire murhumisi winyu, na ngasi walonziba wa burhanzi muli mwe, acijire muja wa boshi.” (Mk. 10:35-37, 43, 44) Bene wirhu bagwerhe ebirhumire binja bibashumize, ko kuderha, irala ly’okukolera abandi gwaba mugisho oku cigamba.​—1 Ts. 2:8. w24.11 buk. 15-16 cif. 7-8

Amango rhuli rhwarhôla emihigo, obuzigire bwarhushumya rhukalonza obunguke bw’“abandi” n’okuba ba lugero. (1 Kr. 10:23, 24, 32; 1 Tm. 2:9, 10) Omu kujira ntyo, rhwanarhôla omuhigo guyerekine obuzigire bwirhu n’obukenge oku bandi. Amango oli warhôla omuhigo gw’obulagirire bwenene, orhanye oku bihûnyirwe ly’oguhikiriza. Yezu arhuyigirizize ‘rhukaganja’ ebi omuhigo gwirhu gwafâ. (Lk. 14:28) Co cirhumire orhanye oku kasanzi, ebintu, n’obushiru wakaba olagirireko ly’ohikiriza omuhigo gwawe. Omu kanga kaguma na kaguma, wanaganiza abantu b’omu mulala gwawe ly’omanya bici ngasi muntu akajira ly’alunga okuboko ogo muhigo. Bulya gurhi okupanga ebintu ntyo kuli kwa bulagirire? Nkaba oko kwanayerekana oku oshinganine ojire mpindûlo ndebe lugenda omuhigo gwawe erhi kurhôla omuhigo guli lubero. N’amango oli wamanyisa abantu b’omu mulala gwawe omuhigo gwawe n’okuyumvirhiza entanya zabo, banaba babidu bwenene okukola haguma na nawe ly’omuhigo gwawe guhikirira. w25.01 buk. 18-19 cif. 14-15

Izaya ayerekine bulya gurhi rhugwerhe ngasi cirhumire c’‘okushagaluka n’okuhama n’omwishingo’ omu paradizo yirhu y’ekiroho. Yehova ye walemaga eyo paradizo y’olwiganyo. (Iz. 65:18, 19) Buzira karhinda, ali arhukolesa lyo rhurhenza abantu omu makubuliro g’er’igulu galimwo omwizimya gw’ekiroho n’okubahêka omu paradizo yirhu y’ekiroho nyinja bwenene! Rhushagalukire emigisho rhugwerhe bulya rhuli omu okuli, rhunanashumibwe okuyiganirira abandi. (Yer. 31:12) Nka bacikala b’eparadizo y’ekiroho, kandi rhuvuzire omunkwa oku bulangalire rhugwerhe rhunabushagalukire. Ebibliya elaganyize oku abakozi ba Yehova “bakaz’iyûbaka enyumpa banazibêremwo, bakaz’irhwera olukoma lw’emizabibu banalye amalehe gayo.” “Barhakacirhamira busha” bulya baba ‘bagishwa ba Nyakasane [Yehova, NWT].’ Arhulaganyize akalamo k’omurhûla, k’okurhimusa, kagwerhe omuhigo gw’okunali. Aba amanyire amalagirire ga ngasi muntu ‘anayish’iyigusa n’obugale bwage ngasi coshi cibâmwo omuka.’​—Iz. 65:20-24; Enna. 145:16. w24.04 buk. 22-23 cif. 11-12

Rhunajire Yehova abe ibuye lirhu erhi rhumulangalira loshi-loshi. Rhunalangalire oku rhwayunguka omu kumurhumikira, ciru n’omu mango mazibu. (Iz. 48:17, 18) Erhi rhucibonera oburhabale bwage, obulangalire bwirhu muli ye bunayushuke. Omu kujira ntyo, rhunayemezibwe n’obwalagale oku, Yehova yene wakahash’irhurhabala okulembera amazibu goshi-goshi, ciru gakaba madarhi gurhi. Ak’ibuye linenene, Yehova arhahuligana arhanashanja. Obumuntu bwage n’omuhigo gwage birhashanja. (Mal. 3:6) Yehova arhahuliganaga erhi alwisa obugoma omw’ishwa ly’e Edeni. Nk’oku entumwa Paolo yayandikaga, Yehova “arhankacihakana yêne.” (2 Tm. 2:13) Oko kuli kuderha oku ciru bici byakaba erhi ciru abandi bakajira gurhi, nta mango Yehova akashanja amorhere gage, omuhigo gwage, erhi amakanuni gage. Bulya Yehova arhashanja ciru n’olusiku luguma, rhumanyire oku arhurhabala omu mango mazibu, n’oku ahikiriza ebiragane byage lugenda amango gayisha.​—Enna. 62:6, 7. w24.06 buk. 27-28 cif. 7-8

Erhi akaba muli mwashebana, bici byakamurhabala lyo muhiga erhi mwarhôlana erhi nanga? Muhikire okumanyana bwinja. Wanaba wamanyire bintu bilebe lugenda owundi embere murhondeze obwîra. Cikone lero okola ogwerhe obulyo bw’okumanya ‘endubi y’omurhima.’ Oko kuhiziremwo okumanya binji lugenda ehali y’ekiroho, obumuntu, n’entanya z’omuntu olonzize okurhôlana naye. Enyuma za kasanzi kalebe, oshinganine obe n’obuhashe bw’okushuza oku madoso nka: ‘K’oyu muntu aba mulume erhi mukazi mwinja kuli nie?’ (Mig. 31:26, 27, 30; Ef. 5:33; 1 Tm. 5:8) ‘Ka ngasi muguma ahasha okuhikiriza amalagirire g’owabo g’ekandalala? Ka ngasi muntu ahasha okulembera obuzamba bw’owundi?’ (Rm. 3:23) Amango muli mwalonza okumanyana, mukengere ntya: Okupatana kurhali kushushana, cikone buli buhashe bw’okucipatanisa n’ebirhumire waba lubero n’owundi. w24.05 buk. 27 cif. 5

Mwami Daudi ajijire ecaha cizibu. Cikone erhi omulebi Natani amubwira entanya za Yehova lugenda eco caha cage, Daudi aciyunjuza omu njira y’obwirhohye. (Enna. 51:3, 4, 17, enshokolezi) Mwami Ezekiya naye agomire Yehova. (2 Nga. 32:25) Cikone aka Daudi, Ezekiya aciyunjuza omu njira y’obwirhohye. (2 Nga. 32:26) Gurhi Yehova ayishir’imubona buzinda? Amubona nka mwami mwishwekerezi “wajiraga ebimusîmîsize.” (2 Bam. 18:3, Mashi Bible) Bici rhuciyigirizize? Rhushinganine rhuciyunjuze ebyaha birhu n’okujira okwirhu koshi lyo rhuyaka okubigalukira. Gurhigi erhi abagula b’ecigamba bakarhuha amahano, ciru lugenda igosa libonekine nka liri lisungunu bwenene? Rhurhashinganini rhuciyumve nka Yehova arharhuzigira erhi oku abagula barharhubonako. Ciru n’abami binja b’e Israheli bakag’ihâbwa amahano n’okukalihirwa. (Hb. 12:6) Erhi rhwakahanûlwa, rhushinganine (1) rhuyemere n’obwirhohye, (2) rhujire empindulo zihûnyirwe, na (3) rhugendekere rhwakolera Yehova n’omurhima gwirhu goshi. Erhi rhwakaciyunjuza ebyaha birhu, Yehova anarhubabalire.​—2 Kr. 7:9, 11. w24.07 buk. 21 cif. 8; buk. 22 cif. 9, 11

Omuntu wajiraga ecaha anarhenzibwe omu cigamba erhi akalahira okushanja, ciru akaba abagula bacihanganyire kanji-kanji lyo bamurhabala aciyunjuze. (2 Bam. 17:12-15) Ebijiro byage binayerekane oku acishozire okurharhumikira amakanuni ga Yehova. (Lush. 30:19, 20) Itangazo linajirwe ly’okumanyisa ecigamba oku oyo muntu arhaciri Muhamirizi wa Yehova. Omuhigo gw’ery’itangazo kurhaba kubonesa nshonyi omuntu wajiraga ecaha. Lubero n’oko, ery’itangazo linajirwe ly’ecigamba cikulikira irhegeko ly’Ebibliya lidesire oku ‘rhumanye rhwankakômera’ oyo muntu, ‘ciru rhumanye rhwankalira haguma’ naye. (1 Kr. 5:9-11) Hali ecirhumire cinja carhumaga obo bulongozi bwahânwa. Entumwa Paolo yayandika ntya: “Engezo nsungunu enabumbuguse omugati gwoshi.” (1 Kr. 5:6, Mashi Bible) Abanya-byaha barhaciyunjuzizi banazambanya omuhigo gw’abali bacihangana lyo balama kushimbana n’amakanuni mashinganyanya ga Yehova.​—Mig. 13:20; 1 Kr. 15:33. w24.08 buk. 27 cif. 3-4

Rhurhakaha abandi emisi omu njira y’okunali. Cikone rhwanakolesa emisi yirhu lyo rhubarhabala. Kwa lwiganyo, rhwanarhabala Omukristu okola mushosi erhi olwazire omu kugend’imugulira bintu bilebe erhi kumujirira emikolo y’omu nyumpa. Erhi kandi rhwanacihâna lyo rhucêsa erhi kushibirira Enyumpa y’Obwami. Kandi, orhayibagiraga oku enderho zijira obuhashe. Ka wanarhanya kuli muntu mulebe wakahâbwa omurhima erhi wakamubwira kurhenga oku murhima oku oshagalukire ebi ajijire? Ka hali omuntu omanyire olagirire oku burhulirize? Akaba ntyo kobiri, ojire kantu kalebe ly’oyo muntu amanya oku omushibirire. Wanalambagirira oyo muntu busu oku busu, wanamuhamagala kugerera etelefone erhi nkaba wanamurhumira akarte, amaruba erhi mesaje. Orhayobohaga bwenene lugenda eby’okuderha. Enderho nsungunu zirhenzire oku murhima, zanaba zo owinyu mwemezi alagirireko ly’abêra mwishwekerezi ciru lundi lusiku luguma, erhi kuciyumva bwinja lugenda akanga kage.​—Mig. 12:25; Ef. 4:29. w24.09 buk. 28 cif. 8-10

Erhi akaba hakola hali kasanzi oli wakola nka murhabazi w’abagula, wanaba erhi wakozire bwenene ly’ohikiriza manji g’omu morhere gahûnyirwe ly’oba mugula. Ka wanacihangana okuhikira ogo “mukolo mwinja”? Bici omukolo gw’abagula guba guhiziremwo? Abagula baba lwiganyo lwinja omu kujira omukolo gw’amahubiri, omu kukola bwenene lyo bashibirira ebibuzi n’omu kuyigiriza, bananazibuhye ecigamba kugerera enderho zabo n’olwiganyo lwabo. Ebibliya egwerhe ecirhumire cinja c’okuhamagala abagula bakola bwenene ‘nshokano’ omu balume. (Ef. 4:8) Gurhi wakahikirizamwo ebihûnyirwe ly’oba mugula? Okuhikiriza ebihûnyirwe ly’omuntu aba mugula, kurhali nk’oku omuntu akahikiriza ebihûnyirwe ly’apata kazi kalebe k’okulipwa ensaranga. Omu makazi g’er’igulu, kanji-kanji erhi akaba ogwerhe obulenga oli wahâna akazi ali alonza, wanahâbwa ako kazi. Lubero n’oko, erhi akaba olonzize obe mugula, oshinganine ojire binji ahanyuma n’okuba n’obulenga bw’okuhubiri n’okuyigiriza bone. Oshinganine ohikirize amorhere Amandiko gadesire abagula bashinganine babe nago, gayerekinwe omu 1 Timoteyo 3:1-7 n’omu Tito 1:5-9. w24.11 buk. 20 cif. 1-3