ගණන් කතාව

22 ඊශ්‍රායෙල් සෙනඟ එතැනින් පිටත්ව ගොස් මෝවබ් පාළුකරයේ+ එනම්, යොර්දාන් ගඟෙන් මෙතෙර යෙරිකෝවට මුහුණ ලා කඳවුරු බැඳගත්තෝය. 2 ඊශ්‍රායෙල් සෙනඟ අමෝරිවරුන්ට කළ දේ ගැන ෂිප්පෝර්ගේ පුත්‍රයා වන බාලාක්ට+ ආරංචි විය. 3 ඊශ්‍රායෙල්වරුන් විශාල ජාතියක් වූ බැවින් මෝවබ්වරු මහත් සේ භය වූහ. ඊශ්‍රායෙල් සෙනඟ ගැන ඔවුන්ට වෛරයක්ද ඇති විය.+ 4 මෝවබ්වරු මිදියන්හි ප්‍රධානීන්ට+ මෙසේ කීවෝය. “ගවයෙක් වත්තක තණකොළ කා දමනවා හා සමානව මේ සෙනඟත් අපේ මුළු දේශයම කා දමාවි.”

ඒ වන විට මෝවබ් දේශයේ රජුව සිටියේ ෂිප්පෝර්ගේ පුත්‍රයා වන බාලාක්ය.+ 5 ඒ කාලයේ බෙයොර්ගේ පුත්‍රයා වන බාලාම්+ තමන් උපන් රටේ පෙතෝර්+ නම් ප්‍රදේශයේ ගඟ*+ අසල ජීවත් විය. බාලාක් රජ බාලාම්ට පණිවිඩයක් යවමින් මෙසේ දැන්වූවේය. “ඊජිප්තුවෙන් සෙනඟක් අපේ දේශය අසලටම පැමිණ සිටිනවා. ඔවුන් දේශය අවට සෑම තැනම විසිර සිටිනවා.+ 6 ඔවුන් අපට වඩා බලවත් ජාතියක්. නමුත් ඔබ කෙනෙකුට ආශීර්වාද කළොත් එය එලෙසම සිදු වන බව මම හොඳින් දන්නවා. ඒ වගේම ඔබ කෙනෙකුට ශාප කළොත් එයත් එලෙසම සිදු වන බව මම දන්නවා.+ ඒ නිසා ඔබ අපේ දේශයට ඇවිත් මේ සෙනඟට ශාප කරන්න.+ එවිට ඔවුන්ට පහර දී මේ දේශයෙන් ඔවුන්ව පන්නා දමන්න මට හැකි වෙයි.”

7 පසුව මෝවබ්හි ප්‍රධානියෝද මිදියන්හි ප්‍රධානියෝද බාලාම් සිටි ස්ථානය බලා පිටත් විය. ඔහු ලවා කරගැනීමට බලාපොරොත්තු වූ මන්තර ගුරුකම් සඳහා ඔහුට තෑගිද ඔවුහු රැගෙන ගියෝය.+ ඔවුහු බාලාම්+ වෙත පැමිණ බාලාක් පැවසූ දේ ඔහුට දැන්වූවෝය. 8 එවිට බාලාම් ඔවුන්ට මෙසේ කීවේය. “අද රෑ මෙහි නවාතැන් ගන්න. යෙහෝවා දෙවි මේ ගැන පවසන්නේ කුමක්ද කියා මා ඔබට කියන්නම්.”+ එබැවින් මෝවබ්හි ප්‍රධානියෝ එදින බාලාම් සමඟ නතර වූහ.

9 දෙවි බාලාම්ට කතා කර,+ “ඔබ සමඟ සිටින මේ මිනිස්සු කවුද” කියා ඇසුවේය. 10 එවිට බාලාම් සැබෑ දෙවිට මෙසේ කීවේය. “ෂිප්පෝර්ගේ පුත් මෝවබ්හි රජු වන බාලාක්+ මේ මිනිසුන් අත මට මෙසේ පණිවිඩයක් එවා තිබෙනවා. 11 ‘ඊජිප්තුවෙන් ඇවිත් සිටින මේ සෙනඟ දේශය අවට සෑම තැනම විසිරී සිටිනවා.+ දැන් ඔබ අපේ දේශයට ඇවිත් මේ සෙනඟට ශාප කරන්න.+ එවිට මට පුළුවන් වෙයි ඔවුන්ට පහර දී මේ දේශයෙන් ඔවුන්ව පන්නා දමන්න.’” 12 එහෙත් දෙවි ඔහුට මෙසේ කීවේය. “ඔබ මේ මිනිස්සු සමඟ නොයන්න. ඒ සෙනඟ ආශීර්වාද ලත් සෙනඟක් නිසා+ ඔබ ඔවුන්ට ශාප නොකරන්න.”+

13 බාලාම් පසුවදා උදෑසන අවදි වී බාලාක් එවූ ප්‍රධානීන්ට මෙසේ කීවේය. “ඔබ දැන් ඔබේ රටට යන්න. මන්ද ඔබ සමඟ යෑමට යෙහෝවා දෙවි මට අවසර දුන්නේ නැහැ.” 14 පසුව මෝවබ්හි ප්‍රධානියෝ බාලාක් රජු වෙත ගොස් මෙසේ කීවෝය. “බාලාම් අප සමඟ එන්න කැමති වුණේ නැහැ.”+

15 පසුව බාලාක් කලින් වතාවේ යැවූ ප්‍රධානීන්ට වඩා ශ්‍රේෂ්ඨ ප්‍රධානීන්ව බාලාම් වෙතට යැව්වේය. ඔවුන්ගේ ගණනද කලින් වතාවේ යැවූ ප්‍රධානීන්ගේ ගණනට වඩා වැඩිය. 16 ඔවුහු බාලාම් වෙත පැමිණ මෙසේ කීවෝය. “ෂිප්පෝර්ගේ පුත්‍රයා වන බාලාක් රජ ඔබට මෙසේ දැන්නුවා. ‘මගේ දේශයට එන්න බැහැ කියා නම් කියන්න එපා. 17 ඔබ පැමිණියොත් මම ඔබට ගෞරවයෙන් සලකනවා.+ ඔබ ඉල්ලන ඕනෑම දෙයක් මම ඔබට දෙන්නම්.+ මා වෙනුවෙන් මෙහි පැමිණ මේ සෙනඟට ශාප කරන්න කියා මම ඔබෙන් බැගෑපත්ව ඉල්ලා සිටිනවා.’” 18 එවිට බාලාම්, බාලාක් රජුගේ සේවකයන්ට මෙසේ කීවේය. “බාලාක් රජ ඔහුගේ මාලිගාව රන් හා රිදීවලින් පුරවා මට දුන්නත් මගේ දෙවි වන යෙහෝවාගේ අණට විරුද්ධව මට ක්‍රියා කරන්න බැහැ. කාරණය බරපතළ එකක් වුණත් සුළු එකක් වුණත් මට නම් දෙවිට විරුද්ධව ක්‍රියා කරන්න බැහැ.+ 19 ඔබ අද රෑ මෙහි නවතින්න. යෙහෝවා දෙවිට මේ ගැන තව දේවල් කීමට තිබේ නම් මම ඒ ගැන දැනගෙන ඔබට දන්වන්නම්.”+

20 එදින රාත්‍රියේ දෙවි බාලාම්ට මෙසේ කීවේය. “ඒ මිනිස්සු පැමිණ සිටින්නේ ඔබව රැගෙන යන්න නම් ඔබ ඔවුන් සමඟ යන්න. නමුත් මා ඔබට දන්වන දේ පමණක් ඔබ ඔවුන්ට කිව යුතුයි.”+ 21 බාලාම් පසුවදා උදෑසන නැඟිට තමාගේ බූරුදෙනව ගමනට සූදානම් කරගෙන මෝවබ්හි ප්‍රධානීන් සමඟ පිටත්ව ගියේය.+

22 නමුත් බාලාම් ඔවුන් සමඟ පිටත්ව ගිය නිසා දෙවි මහත් සේ උදහස් විය. බාලාම් තමාගේ බූරුදෙන පිට ගමන් කරමින් සිටියේය. ඔහුගේ සේවකයෝ දෙදෙනෙක්ද ඔහු සමඟ ගමන් කරමින් සිටියෝය. ඔහුට බාධා කරන පිණිස යෙහෝවා දෙවිගේ දූතයෙකු ඔහු ගමන් කරමින් සිටි මාර්ගය මැද සිටගත්තේය.+ 23 කඩුවක් අතැතිව පාර මැද සිටගෙන සිටි යෙහෝවා දෙවිගේ දූතයාව දැක+ බූරුදෙන ඔහුව මඟහැර ළඟ තිබූ කෙතකට යන්න උත්සාහ කළාය. නමුත් බාලාම් ඌව නැවත පාර දෙසට ගෙන යන පිණිස ඌට පහර දුන්නේය. 24 ඉන්පසු යෙහෝවා දෙවිගේ දූතයා මිදිවතු අතරේ තිබූ පටු මාර්ගයේ සිටගත්තේය. ඒ මාර්ගය දෙපැත්තේ තාප්ප තිබිණ. 25 ඒ අවස්ථාවේදී බූරුදෙන, යෙහෝවා දෙවිගේ දූතයාව දැක පාර අයිනටම ගොස් තාප්පයේ හැප්පුණාය. එවිට බාලාම්ගේ කකුල තාප්පයට තද වූ නිසා ඔහු ඌට හයියෙන් පහර දුන්නේය.

26 ඉන්පසු යෙහෝවා දෙවිගේ දූතයා එතැනින් පිටත්ව වමටවත් දකුණටවත් හැරෙන්න බැරි තරම් පටු ස්ථානයකට ගොස් සිටගත්තේය. 27 බූරුදෙන, යෙහෝවා දෙවිගේ දූතයාව දුටු විගස බාලාම් තම පිටේ සිටියදීම බිම දිගා විය. එවිට බාලාම් මහත් සේ උදහස් වී+ තම සැරයටියෙන් දිගටම ඌට පහර දුන්නේය. 28 ඒ අවස්ථාවේදී යෙහෝවා දෙවි බූරුදෙනට කතා කිරීමේ හැකියාව දුන්නේය.+ එවිට බූරුදෙන බාලාම්ට මෙසේ කීවාය. “ඔබ මේ විදිහට මට තුන් වතාවක්ම පහර දුන්නේ මම ඔබට මොන වරදක් කළාටද?”+ 29 එවිට බාලාම් බූරුදෙනට මෙසේ කීවේය. “නුඹ මාව විහිළුවකට ගත්ත නිසයි මම නුඹට ගැහුවේ. මගේ අතේ කඩුවක් තිබුණා නම් මම නුඹව මරලා දානවා.”+ 30 එවිට බූරුදෙන බාලාම්ගෙන් මෙසේ ඇසුවාය. “මුළු ජීවිත කාලය පුරා ඔබ ගමන්බිමන් ගියේ මා සමඟයි. මීට පෙර කවදාවත් මම ඔබට මේ විදිහට සලකලා තියෙනවාද?”+ බාලාම්ද, “නැහැ” කියා පිළිතුරු දුන්නේය. 31 එවිට යෙහෝවා දෙවි බාලාම්ට තම දූතයාව පැහැදිලිව දකින්න සැලැස්වූවේය.+ කඩුවක් අතැතිව පාර මැද සිටගෙන සිටින යෙහෝවා දෙවිගේ දූතයාව දුටු විගස බාලාම් දණින් වැටී පොළොව දෙසට හිස නමා ඔහුට ආචාර කළේය.

32 යෙහෝවා දෙවිගේ දූතයා ඔහුට මෙසේ කීවේය. “තුන් වතාවක්ම ඔබ ඔබේ බූරුදෙනට පහර දුන්නේ ඇයි? මා පැමිණියේ ඔබ මාගේ කැමැත්තට සම්පූර්ණයෙන්ම විරුද්ධ වී ඔබේ හිතුමතේට+ යන මේ ගමන වැළැක්වීමටයි. 33 ඔබේ බූරුදෙන තුන් වතාවක් මාව දැක ආපසු හැරී යෑමට තැත් කළා.+ ඌ එසේ නොකළා නම් මේ වන විටත් මම ඔබව මරා දමලා.+ නමුත් සතාට නම් මම කිසි හානියක් කරන්නේ නැහැ.” 34 එවිට බාලාම්, “මගේ අතින් සිදු වුණේ පාපයක්.+ මාව හමු වෙන්න ඔබ පාරේ සිටගෙන සිටි බව මම දැන සිටියේ නැහැ. මම යන ගමන ගැන ඔබ සතුටු නැත්නම් මම ආපහු හැරී යන්නම්” කියා යෙහෝවා දෙවිගේ දූතයාට කීවේය. 35 එහෙත් යෙහෝවා දෙවිගේ දූතයා බාලාම්ට මෙසේ කීවේය. “ඔවුන් සමඟ යන්න.+ ඒත් මා ඔබට කියන දේ හැර වෙන කිසිවක් ඔවුන්ට නොකියන්න.”+ බාලාම්ද බාලාක් රජු එවූ ප්‍රධානීන් සමඟ යන්න ගියේය.

36 බාලාම් පැමිණ සිටින බව දැනගත් විගස බාලාක් රජ ඔහුව හමු වන පිණිස මෝවබ් දේශ සීමාවේ ආනොන්+ ඔය අසල තිබෙන නුවර වෙතට ගියේය. 37 රජ බාලාම්ගෙන් මෙසේ ඇසුවේය. “මම ඔබට එන්න කියා පණිවිඩයක් එවූ විට ඔබ ආවේ නැත්තේ ඇයි? ඔබව ගෞරවයට පත් කරන්න මට නොහැකියි කියා ඔබ සිතුවද?”+ 38 එවිට බාලාම්, “ඔබේ ඉල්ලීමට අනුව මම දැන් මෙහෙට ආවා. නමුත් මා කැමති දේ කීමට මට කිසි බලයක් නැහැ.+ දෙවි කියන දේ මිස වෙන කිසිවක් කීමට මට නොහැකියි”+ කියා රජුට කීවේය.

39 ඉන්පසු බාලාම්, බාලාක් රජු සමඟ කිර්යත්-හූෂොත් වෙතට ගියේය. 40 බාලාක් ගවයන්ව හා බැටළුවන්ව පූජා කළ පසු+ එයින් කොටසක් බාලාම්ටද ඔහු සමඟ සිටි ප්‍රධානීන්ටද දුන්නේය. 41 පසුවදා උදෑසන බාලාක් රජ බාලාම් සමඟ බාමොත්-බාල්*+ නම් නගරය වෙත ගියේය. ඔහු බාලාම්ව බාමොත්-බාල් වෙත ගෙන ගියේ එතැන සිට මුළු ඊශ්‍රායෙල් සෙනඟ ඔහුට පෙන්වන පිණිසය.+