ගීතාවලිය

147 ජනයෙනි, යෙහෝවා දෙවිට ප්‍රශංසා කරන්න.+

අපේ දෙවිට ප්‍රශංසා ගී ගැයීම කොතරම් අගනේද!+

ඔහුට ගී ගැයීම කොතරම් ප්‍රීතියක්ද! ඔහු ඇත්තෙන්ම ප්‍රශංසාව ලැබීමට වටින්නේය.+

 2 යෙහෝවා දෙවි යෙරුසලම් නුවර නැවත ගොඩනඟන්නේය.+

විසිරී සිටින ඊශ්‍රායෙල්වරුන්ව ඔහු නැවත එක් රැස් කරන්නේය.+

 3 බිඳුණු සිත් ඇත්තන්ට+ ඔහු සහනය දෙන්නේය.+

ඔවුන්ගේ වේදනාකාරී තුවාල ඔහු සුව කරන්නේය.+

 4 ඔහු තාරකා සියල්ල ගණන් කරන්නේය.+

ඒ එක් එක් තාරකාවන් ඔහු, නම් වශයෙන් හඳුන්වන්නේය.+

 5 අපේ ස්වාමීන් ශ්‍රේෂ්ඨය. ඉතා බලවන්තය.+

ඔහු කොතරම් ප්‍රඥාවන්තද කියා කිසිවෙකුට තේරුම්ගත නොහැකිය.+

 6 නිහතමානී අයට යෙහෝවා දෙවි සහනය දෙමින් ඔවුන්ව නඟා සිටුවන්නේය.+

ඔහු දුෂ්ටයන්ව පහතට හෙළා පාගා දමන්නේය.+

 7 ජනයෙනි, යෙහෝවා දෙවිට ස්තුති කරමින් ගී ගයන්න.+

වීණා වයමින් ඔහුට ප්‍රශංසා ගී ගයන්න.+

 8 අහස වලාකුළුවලින් අතුරා+

පොළොවට වර්ෂාව ලබා දෙන්නේ ඔහුය.+

කඳු මුදුන් නිල් තණකොළවලින් වැසී යෑමට සලස්වන්නෙත් ඔහුය.+

 9 ඔහු සතුන්ටත්+

කෑම ඉල්ලා හඬන කපුටු පැටවුන්ටත්+ ආහාර සපයා දෙන්නේය.

10 අශ්වයෙකු සතු ශක්තිය ගැනවත්+

මිනිසෙකුට වේගයෙන් දිවීමට ඇති හැකියාව ගැනවත්+ ඔහු සතුටට පත් නොවන්නේය.

11 නමුත් යෙහෝවා දෙවි කෙරෙහි ගරුබියක් ඇති,+

ඔහු ප්‍රේමය* පෙන්වන තෙක් ආශාවෙන් බලා සිටින අය ගැන+ ඔහු සතුටු වන්නේය.

12 යෙරුසලම, යෙහෝවා දෙවිට ප්‍රශංසා කරන්න.+

සියොන්, ඔබේ දෙවිට ප්‍රශංසා කරන්න.+

13 මන්ද ඔහු ඔබේ දොරටුවල අගුල් ශක්තිමත් කළේය.

ඔබේ පුත්‍රයන්ට ඔහු ආශීර්වාද කළේය.+

14 ඔබේ දේශ සීමාව තුළ ඔහු සමාදානය ඇති කළේය.+

අනර්ඝතම තිරිඟුවලින් ඔහු ඔබව සැමදා තෘප්තිමත් කරන්නේය.+

15 ඔහු පොළොවට ආඥාවක් නිකුත් කරන්නේය.+

ඔහුගේ වදන් පොළොව පුරාම වේගයෙන් ඉටු වන්නේය.

16 ඔහු ලොම් මෙන් වූ හිම වස්සවන්නේය.+

පිනි කැට අළු මෙන් ඉසින්නේය.+

17 හිම කැට සීසීකඩ විසුරුවන්නේය.+

ඔහු ගෙනෙන සීතල දරාගත හැක්කේ කාටද?+

18 ඔහු අණ දෙන විට+ ඒවා දිය වී යන්නේය.

ඔහු සුළං හැමීමට සලස්වන්නේය.+

ඒ සුළඟින් ජලය ගලා බසින්නේය.

19 තම වදන් ඔහු යාකොබ්ට ප්‍රකාශ කරන්නේය.+

තම නියෝග+ සහ තීන්දු+ ඔහු ඊශ්‍රායෙල් ජනයාට කියා දෙන්නේය.

20 වෙන කිසි ජාතියකට ඔහු එසේ නොකළේය.+

ඔහුගේ තීන්දු ගැන වෙනත් කිසිම ජාතියක් දැනුවත් වී නොසිටියේය.+

ජනයෙනි, යෙහෝවා දෙවිට ප්‍රශංසා කරන්න.+