පළවෙනි රාජාවලිය

6 සලමොන් රජ ඊශ්‍රායෙල් දේශයේ රජ වෙලා හතරවෙනි අවුරුද්දේ ෂීව්*+ මාසේදී (ඒ කියන්නේ දෙවෙනි මාසේදී) එයා යෙහෝවා දෙවියන්ගේ ගෘහය* ගොඩනඟන්න+ පටන්ගත්තා. ඊශ්‍රායෙල්වරු ඊජිප්තුවෙන් පිටත් වෙලා ඇවිත්+ 480වෙනි අවුරුද්දේදී තමයි ඒ වැඩ පටන්ගත්තේ. 2 යෙහෝවා දෙවියන්ට නමස්කාර කරන්න සලමොන් රජ ගොඩනඟපු ගෘහයේ* දිග රියන්* 60යි. පළල රියන් 20යි. උස රියන් 30යි.+ 3 ශුද්ධස්ථානයට* ඇතුල් වෙන තැන තිබුණ ශාලාවේ*+ පළල රියන් 20යි. ඒක ගෘහයේ පළලට සමානයි. ඇතුල් වෙන තැන ඉඳලා ඒ ශාලාව මැන්නොත් ඒකේ දිග රියන් දහයයි.

4 සලමොන් ගෘහයට කවුළු හැදුවා. ඒ කවුළු හැදුවේ ඇතුළේ ඉඳන් එළිය පැත්තට පටු වේගන යන විදිහටයි.+ 5 එයා ගෘහයේ බිත්තිවලට එළියෙන්, ඒ කියන්නේ ශුද්ධස්ථානයේ සහ අතිශුද්ධස්ථානයේ*+ බිත්තිවලට එළියෙන් ඒවා වටේට* තව ගොඩනැඟිල්ලක් හැදුවා. වටේට තිබුණ ඒ ගොඩනැඟිල්ලේ එයා කාමර හැදුවා.+ 6 කාමර තිබුණ පහළ තට්ටුවේ පළල රියන් පහයි. කාමර තිබුණ මැද තට්ටුවේ පළල රියන් හයයි. තුන්වෙනි තට්ටුවේ පළල රියන් හතයි. ඒ හැම තට්ටුවකටම දාලා තිබුණ බාල්ක රඳවන්න බිත්තියේ පඩියක්* හදලා තිබුණා. ඒ නිසා බාල්ක රඳවන්න බිත්තිය කඩන්න හරි හිල් කරන්න හරි අවශ්‍ය වුණේ නැහැ.+ ඒ ගෘහය වටේම තිබුණ බිත්ති හදලා තිබුණේ ඒ විදිහටයි.

7 ගෘහය හදන්න පාවිච්චි කරපු ගල් කලින්ම අවශ්‍ය හැඩේට කපලයි එතනට ගෙනාවේ.+ ඒ නිසා ගෘහය හදද්දී මිටියකවත් පොරොවකවත් වෙන කිසිම යකඩ ආයුධයකවත් සද්දේ ඇහුණේ නැහැ. 8 ගොඩනැඟිල්ලේ දකුණු පැත්තේ තමයි පහළ තට්ටුවේ තිබුණ කාමරවලට ඇතුල් වෙන තැන තිබුණේ.+ පහළ තට්ටුවෙන් මැද තට්ටුවට නඟින්නත් මැද තට්ටුවෙන් තුන්වෙනි තට්ටුවට නඟින්නත් රවුමට හදපු පඩි පෙළක් තිබුණා. 9 සලමොන් ගෘහයේ ඉතුරු වැඩකටයුතුත් දිගටම කළා.+ එයා වහලෙට දේවදාර පරාල දාලා දේවදාර ලෑලිවලින් ඒක සෙවිලි කළා.+ 10 ගෘහය වටේට හදපු කාමරවල+ උස රියන් පහයි. ඒ කාමර තිබුණ හැම තට්ටුවක්ම ගෘහයට සවි කරලා තිබුණේ දේවදාර ලී පාවිච්චි කරලයි.

11 ඒ කාලේදී යෙහෝවා සලමොන්ට මෙහෙම කිව්වා. 12 “ඔයා මගේ පනත්වලට කීකරු වෙනවා නම් මගේ තීන්දුවලට එකඟව වැඩ කරනවා නම් මගේ ආඥා පිළිපැදලා ඒවාට අනුව ජීවත් වෙනවා නම්+ ඔයා හදන මේ ගෘහය ගැන ඔයාගේ තාත්තා වුණ දාවිත්ට මං පොරොන්දු වුණ දේ මම ඒ විදිහටම ඉටු කරනවා.+ 13 ඒ වගේම මං ඊශ්‍රායෙල් සෙනඟ එක්ක ජීවත් වෙනවා.+ මගේ සෙනඟ වන ඊශ්‍රායෙල්වරුන්ව මං කවදාවත් අත්හරින්නේ නැහැ.”+

14 සලමොන් ගෘහයේ වැඩකටයුතු දිගටම කරගෙන ගිහින් ඒක හදලා ඉවර කළා. 15 එයා ගෘහයේ ඇතුළත බිත්ති දේවදාර ලෑලිවලින් ආවරණය කළා. බිම ඉඳලා සිවිලිමේ පරාල වෙන කල්ම බිත්ති ආවරණය කළේ දේවදාර ලීවලින්. එයා ගෘහයේ බිම ආවරණය කළේ ජුනිපර් ලෑලිවලින්.+ 16 සලමොන් ගෘහයේ පිටිපස්සට වෙන්න රියන් 20ක කොටසක් වෙන් කළා. ඒ කොටස දේවදාර ලෑලිවලින් හදලා ඒකේ බිම ඉඳන් සිවිලිම වෙන කල් දේවදාර ලෑලිවලින් ආවරණය කළා. ඒ කොටසේ තමයි අතිශුද්ධස්ථානය තිබුණේ.+ 17 ඒකට ඉස්සරහින් ගෘහයේ ශුද්ධස්ථානය+ තිබුණා. ඒ කොටසේ දිග රියන් 40යි. 18 ගෘහයේ ඇතුළත තිබුණ දේවදාර ලෑලිවල කොමඩු ගෙඩි+ සහ පිපුණු මල්+ කැටයම් කරලා තිබුණා. ගෘහයේ හැම තැනක්ම දේවදාර ලීයෙන් ආවරණය කරලා තිබුණ නිසා කිසිම තැනක ගල් පේන්න තිබුණේ නැහැ.

19 එයා ගෘහයේ කෙළවරේම හදපු අතිශුද්ධස්ථානය+ සූදානම් කළේ යෙහෝවා දෙවියන්ගේ ගිවිසුම් පෙට්ටිය තියන්නයි.+ 20 අතිශුද්ධස්ථානයේ දිග රියන් 20යි. පළල රියන් 20යි. උස රියන් 20යි.+ ඊටපස්සේ එයා ඒක පිරිසිදු රත්තරන්වලින් ආවරණය කළා. එයා පූජාසනය*+ ආවරණය කළේ දේවදාර ලීයෙන්. 21 සලමොන් ගෘහයේ ඇතුල් පැත්ත පිරිසිදු රත්තරන්වලින් ආවරණය කළා.+ රත්තරන්වලින් ආවරණය කරලා තිබුණ අතිශුද්ධස්ථානයට ඉස්සරහින් රත්තරන්වලින් හදපු දම්වැල් ඇද්දා.+ 22 එයා මුළු ගෘහය සම්පූර්ණයෙන්ම රත්තරන්වලින් ආවරණය කළා. අතිශුද්ධස්ථානයට ඉස්සරහින් තිබුණ පූජාසනයත්+ ආවරණය කළේ රත්තරන්වලින්.

23 එයා අතිශුද්ධස්ථානයේ තියන්න පයින් ගහේ ලීවලින්* කෙරුබ්වරුන්ගේ+ රූප දෙකක් හැදුවා. ඒ රූපවල උස රියන් දහයයි.+ 24 එක කෙරුබ්වරයෙක්ගේ පියාපතක දිග රියන් පහයි. එක පියාපතක කොනේ ඉඳන් අනිත් පියාපතේ කොන වෙන කල් දිග රියන් දහයයි. 25 දෙවෙනි කෙරුබ්වරයාගේ පියාපත්වල දිගත් රියන් දහයයි. ඒ කෙරුබ්වරුන් දෙන්නාවම එකම ප්‍රමාණයට සහ එකම හැඩේට හදලා තිබුණා. 26 කෙරුබ්වරුන් දෙන්නාගෙම උස රියන් දහයයි. 27 ඊටපස්සේ එයා ඒ කෙරුබ්වරුන්+ දෙන්නාගේ රූප අතිශුද්ධස්ථානය ඇතුළේ තිබ්බා. එක කෙරුබ්වරයෙක්ගේ පියාපතක් එක බිත්තියකටත් අනිත් කෙරුබ්වරයාගේ පියාපත අනිත් බිත්තියටත් වැදෙන විදිහටයි ඒ දෙන්නාව තිබ්බේ. කෙරුබ්වරුන්ගේ ඉතුරු පියාපත් දෙක ගෘහයේ හරි මැද එකිනෙකට වැදුණා. 28 එයා ඒ කෙරුබ්වරුන්ව රත්තරන්වලින් ආවරණය කළා.

29 එයා අතිශුද්ධස්ථානයේ සහ ශුද්ධස්ථානයේ තිබුණ හැම බිත්තියකම කෙරුබ්වරුන්ගේ රූප,+ තාල වර්ගයේ ගස්+ සහ පිපුණු මල්+ කැටයම් කළා. 30 එයා අතිශුද්ධස්ථානයේ සහ ශුද්ධස්ථානයේ බිම රත්තරන්වලින් ආවරණය කළා. 31 අතිශුද්ධස්ථානයට ඇතුල් වෙන්න එයා පහෙන් කොටසක් වෙන විදිහට* දොරවල් දෙකක්, උළුවහු සහ ඒ දෙපැත්තේ තිබුණ කණු හැදුවා. ඒවා එයා හැදුවේ පයින් ගහේ ලීවලින්. 32 පයින් ගහේ ලීවලින් හදපු දොරවල් දෙකේ එයා කෙරුබ්වරුන්ගේ රූප, තාල වර්ගයේ ගස් සහ පිපුණු මල් කැටයම් කළා. දොරවල් දෙක රත්තරන්වලින් ආවරණය කළා. ඊටපස්සේ කැටයම් කරපු ඒ කෙරුබ්වරුන් සහ තාල වර්ගයේ ගස් සම්පූර්ණයෙන්ම රත්තරන්වලින් ආවරණය වෙන විදිහට රත්තරන් ඒවා උඩ තියලා තැළුවා. 33 එයා ශුද්ධස්ථානයට ඇතුල් වෙන තැනත් ඒ විදිහටම හැදුවා. හතරෙන් කොටසක් වෙන විදිහට* ඒකේ උළුවහු හදලා තිබුණා. ඒවා හදලා තිබුණේ පයින් ගහේ ලීවලින්. 34 එයා ජුනිපර් ලීවලින් දොරවල් දෙකකුත් හැදුවා. ඒ එක එක දොරට අකුළන පියන් දෙක ගාණේ තිබුණා.+ ඒවා හයි කරලා තිබුණේ සරනේරුවලින්. 35 ඒ දොරවල්වල කෙරුබ්වරුන්ගේ රූප, තාල වර්ගයේ ගස් සහ පිපුණු මල්වල රූප කැටයම් කරලා තිබුණා. කැටයම් කරපු ඒ රූප තළාගත්ත රත්තරන්වලින් ආවරණය කළා.

36 එයා ඇතුල් මළුවේ+ තාප්පය කපපු ගල් පේළි තට්ටු තුනකින් සහ දේවදාර ලී තට්ටුවකින් ගොඩනැඟුවා.+

37 යෙහෝවා දෙවියන්ගේ ගෘහයේ අත්තිවාරම දැම්මේ 4වෙනි අවුරුද්දේ ෂීව්* මාසේදී.+ 38 11වෙනි අවුරුද්දේ බූල්* මාසේදී (ඒ කියන්නේ අටවෙනි මාසේදී) සම්පූර්ණ සැලැස්මට අනුව ගෘහයේ වැඩ ඔක්කොම ඉවර කළා.+ ඒක හදන්න සලමොන්ට අවුරුදු හතක් ගත වුණා.