යොහන්
7 ඒකෙන් පස්සේ යේසුස් දිගටම ගලීලය අවට සේවය කළා. යුදෙව්වන්* ඔහුව මරන්න හොයපු නිසා+ යුදය අවට ප්‍රදේශවලට යන්න ඔහු කැමති වුණේ නැහැ. 2 ඔය අතරේ යුදෙව්වන්ගේ කූඩාරම් උත්සවය*+ ළං වුණා. 3 ඉතින් යේසුස්ගේ මල්ලිලා+ ඔහුට මෙහෙම කිව්වා. “දැන් ඔයා මෙහෙන් යුදයට යන්න. එතකොට එහේ ඉන්න ඔයාගේ ගෝලයන්ටත් ඔයා කරන දේවල් දකින්න පුළුවන් වෙයි. 4 සාමාන්‍යයෙන් කෙනෙක්ට ප්‍රසිද්ධ වෙන්න ඕනෙ නම් එයා හොරෙන් දේවල් කරන්නේ නෑ. ඔයා දැන් ගොඩක් දේවල් කරනවානේ. ඉතින් ගිහින් ඔයා කරන දේවල් ලෝකෙටම පෙන්නන්න.” 5 ඇත්තටම ඔහුගේ මල්ලිලට ඔහු ගැන විශ්වාසයක් තිබුණේ නැහැ.+ 6 ඉතින් යේසුස් එයාලට මෙහෙම කිව්වා. “මගේ වෙලාව තාම ඇවිල්ලා නැහැ.+ ඒත් ඔයාලට නම් උත්සවේට ඕනෙ වෙලාවක යන්න පුළුවන්. 7 ලෝකයේ ඉන්න අය ඔයාලට වෛර කරන්නේ නැහැ. ඒත් මම එයාලාගේ දුෂ්ට වැඩ ගැන ප්‍රසිද්ධියේ කියන නිසා එයාලා මට වෛර කරනවා.+ 8 ඔයාලා උත්සවේට යන්න. ඒත් මං දැන්ම යන්නේ නැහැ. මොකද මගේ වෙලාව තාම ඇවිත් නැහැ.”+ 9 ඒ දේවල් එයාලට කිව්වාට පස්සේ ඔහු ගලීලයේම නැවතිලා හිටියා.
10 ඒත් ඔහුගේ මල්ලිලා උත්සවයට ගියාට පස්සේ ඔහුත් ගියා. ඔහු ගියේ ප්‍රසිද්ධියේ නෙමෙයි රහසින්. 11 උත්සවේදී යුදෙව්වන් “කෝ අර මනුස්සයා” කියලා ඔහුව හොයන්න පටන්ගත්තා. 12 සෙනඟ අතරේ ඔහු ගැන කසුකුසුවක් ඇති වුණා. සමහරු “එයා හොඳ මනුස්සයෙක්” කියලත් තවත් සමහරු “නැහැ, එයා මිනිස්සුන්ව නොමඟ යවනවා”+ කියලත් කිව්වා. 13 ඒත් යුදෙව්වන්ට තිබුණ බය නිසා+ කවුරුත් ඔහු ගැන ප්‍රසිද්ධියේ කතා කළේ නැහැ.
14 උත්සවය පටන් අරන් දවස් හතරක් විතර ගියාට පස්සේ යේසුස් දේවමාලිගාවට ගිහින් උගන්නන්න පටන්ගත්තා. 15 ඒවා අහලා පුදුම වුණ යුදෙව්වන් “මෙයාට ශුද්ධ ලියවිලි ගැන මෙච්චර දැනුමක් තියෙන්නේ කොහොමද?+ මෙයා කාගෙන්වත්* ඉගෙනගෙනත් නැහැ”+ කියලා කිව්වා. 16 යේසුස් එයාලට මෙහෙම උත්තර දුන්නා. “මං උගන්නන්නේ මාව එවපු කෙනාගේ ඉගැන්වීම් මිසක් මගේම අදහස් නෙමෙයි.+ 17 කෙනෙක් දෙවියන් කැමති දේ කරන්න ආසාවෙන් ඉන්නවා නම් මං උගන්නන්නේ මගේම අදහස්ද නැත්නම් දෙවියන්ගේ ඉගැන්වීම්ද+ කියලා තේරුම්ගන්න ඒ කෙනාට පුළුවන්. 18 තමන්ගේ අදහස් උගන්නන පුද්ගලයා උත්සාහ කරන්නේ තමන්ටම ගෞරවය ලබාගන්නයි. ඒත් තමන් එවපු කෙනාට ගෞරවයක් ගේන විදිහට වැඩ කරන පුද්ගලයා+ තමයි සත්‍යය කතා කරන්නේ. එයාගේ කිසිම බොරුවක් වංචාවක් නැහැ. 19 ඔයාලට නීතිය ලබා දුන්නේ මෝසෙස් නේද?+ ඒත් ඔයාලාගෙන් එක් කෙනෙක්වත් ඒ නීතියට කීකරු වෙන්නේ නැහැ. ඇයි ඔයාලා මාව මරන්න හදන්නේ?”+ 20 එතකොට සෙනඟ “ඔයාට භූතයෙක්වත් වැහිලද? කවුද ඔයාව මරන්න හොයන්නේ” කියලා ඇහුවා. 21 යේසුස් එයාලට මෙහෙම උත්තර දුන්නා. “මම එක ආශ්චර්යයයි කළේ. ඔයාලා ඒ ගැන පුදුම වෙනවා නේද? 22 එහෙමනං මේ ගැන හිතන්න. මෝසෙස් ඔයාලට චර්මච්ඡේදනය ගැන නීතිය හඳුන්වලා දුන්නා.+ ඇත්තටම ඒක මෝසෙස් පටන්ගත්ත දෙයක් නෙමෙයි. ඒක අපේ මුතුන්මිත්තන්ගේ කාලේ ඉඳන් තියෙන දෙයක්.+ ඔයාලා සබත් දවසේදී වුණත් කෙනෙක්ව චර්මච්ඡේදනය කරනවා නේද? 23 මෝසෙස්ගේ නීතිය කඩ කරන්න කැමති නැති නිසා ඔයාලා සබත් දවසකදී වුණත් කෙනෙක්ව චර්මච්ඡේදනය කරනවා. එහෙමනං සබත් දවසකදී මං මනුස්සයෙක්ව සනීප කළා+ කියලා ඔයාලා මාත් එක්ක මෙච්චර කේන්තියෙන් ඉන්නේ ඇයි? 24 පිටින් බලලා විනිශ්චය කරන එක නතර කරන්න. ධර්මිෂ්ඨ ප්‍රමිතිවලට අනුව විනිශ්චය කරන්න.”+
25 එතකොට යෙරුසලමේ ජීවත් වුණ අයගෙන් සමහරදෙනෙක් මෙහෙම කියන්න පටන්ගත්තා. “එයාලා මරන්න හොයන්නේ මේ මනුස්සයාව නේද?+ 26 ඒත් බලන්න! එයා ප්‍රසිද්ධියේ කතා කළත් කවුරුත් එයාට මුකුත් කියන්නේ නැහැ. ඒ කියන්නේ මෙයා ක්‍රිස්තුස් කියලා පාලකයනුත් හිතන්න පටන් අරන්ද? 27 එහෙම වෙන්නේ කොහොමද? මේ මනුස්සයා ආවේ කොහෙන්ද කියලා අපි හොඳටම දන්නවා.+ ඒත් ක්‍රිස්තුස් එද්දී ඔහු එන්නේ කොහෙන්ද කියලා කාටවත් දැනගන්න විදිහක් නැහැ.” 28 යේසුස් දේවමාලිගාවේ උගන්නද්දී හැමෝටම ඇහෙන්න මෙහෙම කිව්වා. “ඔයාලා මාව දන්නවා. මං ආවේ කොහෙන්ද කියලත් ඔයාලා දන්නවා. මම මෙහෙට ආවේ මගේම තනි කැමැත්තෙන් නෙමෙයි.+ ඇත්තටම කෙනෙක් මාව එව්වා. ඔහු සැබෑ පුද්ගලයෙක්. ඒත් ඔයාලා ඔහුව අඳුරන්නේ නැහැ.+ 29 මම නම් ඔහුව හොඳින් අඳුරනවා.+ මොකද මම ඇවිත් ඉන්නේ ඔහුගේ නියෝජිතයෙක් විදිහටයි. ඔහු තමයි මාව එව්වේ.” 30 ඉතින් එයාලා යේසුස්ව අල්ලගන්න අවස්ථාවක් එන කල් බලාගෙන හිටියා.+ ඒත් ඔහුගේ වෙලාව ඇවිත් තිබුණේ නැති නිසා ඔහුට අතවත් තියන්න කාටවත් බැරි වුණා.+ 31 ඒ වුණත් සෙනඟගෙන් හුඟදෙනෙක් ඔහු ගැන විශ්වාසය තිබ්බා.+ “ක්‍රිස්තුස් ආවාම ගොඩක් ආශ්චර්යයන් කරනවා. මේ මනුස්සයාත් කරන්නේ ඒ දේවල්ම නෙමෙයිද” කියලා එයාලා කිව්වා.
32 ඔහු ගැන ඒ වගේ කසුකුසුවක් සෙනඟ අතරේ යනවා කියලා පරිසිවරුන්ට ආරංචි වුණා. ඉතින් නායක පූජකයන් සහ පරිසිවරු ඔහුව අල්ලගන්න* නිලධාරීන්ව යැව්වා. 33 යේසුස් සෙනඟට මෙහෙම කිව්වා. “මම ඔයාලා එක්ක ඉන්නේ තව ටික කාලයක් විතරයි. ඊටපස්සේ මාව එවපු තැනැත්තා ළඟට මං යනවා.+ 34 ඔයාලා මාව හොයයි. ඒත් මාව හොයාගන්න ඔයාලට බැරි වෙයි. මං ඉන්න තැනට ඔයාලට එන්න බැහැ.”+ 35 ඉතින් යුදෙව්වන් මෙහෙම කතා වුණා. “අපිට හොයාගන්න බැරි විදිහට මේ මනුස්සයා කොහේ යන්නද හදන්නේ? ග්‍රීකවරු අතරේ ජීවත් වෙන යුදෙව්වන් ළඟට ගිහින් මෙයා ග්‍රීකවරුන්ටත් උගන්නන්නද හදන්නේ? 36 එයා කියනවා ‘ඔයාලා මාව හොයයි. ඒත් මාව හොයාගන්න ඔයාලට බැරි වෙයි. මං ඉන්න තැනට ඔයාලට එන්න බැහැ’ කියලා. මොකක්ද ඒ කතාවේ තේරුම?”
37 උත්සවයේ වැදගත්ම දවස වන අන්තිම දවසේදී+ යේසුස් නැඟිටලා හැමෝටම ඇහෙන්න මෙහෙම කිව්වා. “කාට හරි තිබහක් දැනෙනවා නම් එයාට පුළුවන් මං ළඟට එන්න. මං එයාට බොන්න වතුර දෙන්නම්.+ 38 ශුද්ධ ලියවිල්ලේ කියලා තියෙන විදිහට මං ගැන විශ්වාසය තියන කෙනාගේ ‘හදවත ඇතුළෙන්ම ජීවනය ලබා දෙන වතුර කිසිම අඩුවක් නැතුව ගලාගෙන එයි.’”+ 39 ඔහු කතා කළේ දෙවියන්ගේ බලය ගැනයි. ඔහු ගැන විශ්වාසය තියන අයට ඒ බලය ලබා දෙන කාලය ළං වෙලා තිබුණා. ඒත් ඒ වෙද්දී දෙවියන් යේසුස්ව තේජසට පත් කරලා තිබුණේ නැති නිසා+ දෙවියන්ගේ බලය එයාලට ලැබිලා තිබුණේ නැහැ.+ 40 ඔහු කියපු දේවල් අහගෙන හිටපු සමහරු “මෙයා ඇත්තටම එන්න ඉන්න අනාගතවක්තෘවරයා තමයි”+ කියලා කිව්වා. 41 තවත් සමහරු “මෙයා තමයි ක්‍රිස්තුස්”+ කියලා කිව්වා. ඒත් තවත් අය මෙහෙම කිව්වා. “ක්‍රිස්තුස් එන්නේ ගලීලයෙන් නෙමෙයිනේ?+ 42 ශුද්ධ ලියවිල්ලේ කියන්නේ ක්‍රිස්තුස් දාවිත්ගේ පෙළපතින් එනවා කියලා.+ ඔහු දාවිත්ගේ ගම+ වුණ බෙත්ලෙහෙමෙන්+ එනවා කියලා නේද කියන්නේ?” 43 සෙනඟට ඔහු ගැන ඒ වගේ එක එක මත තිබුණා. 44 එයාලාගෙන් සමහරදෙනෙක්ට ඔහුව අල්ලගන්න* ඕනෙ වුණත් ඒ කිසිම කෙනෙක්ට ඔහුට අතවත් තියන්න බැරි වුණා.
45 ඊටපස්සේ ඒ නිලධාරීන් ආපහු නායක පූජකයන් සහ පරිසිවරුන් ළඟට ගියා. එයාලා නිලධාරීන්ගෙන් මෙහෙම ඇහුවා. “එයාව අල්ලගෙන මෙහාට ගෙනාවේ නැත්තේ ඇයි?” 46 ඒ නිලධාරීන් මෙහෙම උත්තර දුන්නා. “ඒ විදිහට උගන්නන කෙනෙක්ව නම් අපි කවදාවත් දැකලා නැහැ.”+ 47 එතකොට පරිසිවරු මෙහෙම කිව්වා. “ඔයාලත් ඒ මිනිහාට අහු වෙලාද? 48 එක පාලකයෙක් හරි පරිසිවරයෙක් හරි එයාව විශ්වාස කරනවාද?+ 49 එයා පස්සේ යන්නේ නීතිය ගැන කිසිම දෙයක් දන්නේ නැති කිසි වැඩකට නැති මිනිස්සු!”* 50 එතකොට පරිසිවරුන්ගෙන් කෙනෙක් වුණ, කලින් අවස්ථාවක යේසුස්ව හම්බ වෙන්න ගිය නිකදේමස් එයාලට මෙහෙම කිව්වා. 51 “අපේ නීතියට අනුව කෙනෙක්ව විනිශ්චය කරන්න කලින් අපි එයාට ඇහුම්කන් දීලා එයා කරපු දේවල් මොනවාද කියලා හරියටම දැනගන්න ඕනේ. ඒක නේද නීතිය?”+ 52 එතකොට එයාලා මෙහෙම ඇහුවා. “ඔයාත් ගලීලයේ කෙනෙක් වගේනේ කතා කරන්නේ. ශුද්ධ ලියවිලිවල කියලා තියනවාද ගලීලයෙන් අනාගතවක්තෘවරයෙක් එනවා කියලා? හොයලා බලන්නකෝ.”*