යෝනා
1 යෙහෝවා දෙවියන් අමිත්තයිගේ පුත් යෝනාට* මේ පණිවිඩය දුන්නා.+ 2 “නිනිවය කියන විශාල නගරයේ+ ඉන්න මිනිස්සුන්ගේ දුෂ්ටකම් මම දැක්කා. දැන් එහෙට ගිහින් මම එහේ ඉන්න අයව විනාශ කරනවා කියලා එයාලට කියන්න.”
3 ඒත් යෝනාට ඕනෙ වුණේ යෙහෝවා දෙවියන් දීපු පැවරුම දාලා පැනලා යන්න. එයා හිතුවා තර්ෂිෂ්වලට යන්න. යෝනා යොප්පාවට ආවාම තර්ෂිෂ්වලට යන නැවක් දැක්කා. එයා ගාස්තුව ගෙවලා ඒ නැවට නැග්ගා. ඒ විදිහට යෝනා යෙහෝවා දෙවියන් දීපු පැවරුම අත්හැරලා ගියා.
4 ඊටපස්සේ යෙහෝවා මුහුද දිහාවට තද හුළඟක් හමන්න සැලැස්සුවා. ඒ නිසා නැව ගිලෙන්න යන තරම් මහ කුණාටුවක් ඇති වුණා. 5 නැවියෝ කොච්චර බය වුණාද කියනවා නම් කෑගහලා එයාලාගේ දෙවිවරුන්ගෙන් උදව් ඉල්ලන්න පටන්ගත්තා. එයාලා නැවේ බර අඩු කරන්න ඒකේ තිබුණු බඩු මුට්ටු මුහුදට වීසි කළා.+ මේ දේවල් වෙද්දී යෝනා හිටියේ නැවේ පහළම තට්ටුවේ හොඳට නිදාගෙන. 6 කපිතාන් යෝනා ළඟට ගිහිල්ලා මෙහෙම කිව්වා. “මේ වගේ වෙලාවකත් ඔයා නිදාගෙන ඉන්නවාද? නැඟිටලා ඔයාගේ දෙවියන්ගෙන් උදව් ඉල්ලන්න. සමහරවිට සැබෑ දෙවියන් අපිට අනුකම්පා කරලා අපිව බේරගනියි.”+
7 ඒ අතරේ නැවියෝ මෙහෙම කතා වුණා. “අපි දාදු දාලා බලමු+ මේ කුණාටුව ආවේ කවුරු හින්දාද කියලා.” දාදු දැම්මාම තේරුණේ යෝනාව.+ 8 එතකොට එයාලා යෝනාගෙන් මෙහෙම ඇහුවා. “අනේ අපිට ඇත්ත කියන්න. අපිට මෙහෙම වෙන්නේ ඇයි? ඔයා මොනවා කරන කෙනෙක්ද? ඔයා ආවේ කොහේ ඉඳලාද? ඔයා මොන රටෙන්ද? ඔයාගේ ජාතිය මොකක්ද?”
9 යෝනා එයාලට මෙහෙම කිව්වා. “මං හෙබ්‍රෙව් ජාතිකයෙක්. මං නමස්කාර කරන්නේ* මුහුදත් ගොඩබිමත් හදපු ස්වර්ගයේ ඉන්න යෙහෝවා දෙවියන්ටයි.”
10 ඒක අහලා එයාලා තවත් බය වුණා. මොකද යෝනා යෙහෝවා දෙවියන් දීපු පැවරුම දාලා පැනලා යනවා කියලා නැවියන්ට කියලා තිබුණා. “ඔයා මොනවාද මේ කළේ” කියලා එයාලා යෝනාට කිව්වා. 11 කුණාටුව තවත් දරුණු අතට හැරුණු නිසා එයාලා යෝනාගෙන් මෙහෙම ඇහුවා. “මේ කුණාටුව නතර කරන්න* නම් අපි මොනවාද කරන්න ඕනේ?” 12 යෝනා එයාලට මෙහෙම කිව්වා. “මේ මහ කුණාටුව ඇති වුණේ මං නිසයි. ඒ හින්දා දැන් මාව මුහුදට දාන්න. එතකොට කුණාටුව නතර වෙයි.” 13 ඒත් එහෙම කරන්න එයාලා කැමති වුණේ නැහැ. නැව ආපහු ගොඩබිම පැත්තට ගෙනියන්න* එයාලා ගොඩක් උත්සාහ කළා. ඒත් මුහුද එන්න එන්නම රළු වුණ නිසා එයාලට ඒක කරන්න බැරි වුණා.
14 අන්තිමේදී වෙන කරන්න දෙයක් නැති නිසා එයාලා යෙහෝවා දෙවියන්ට මෙහෙම කන්නලව් කළා. “අනේ යෙහෝවා දෙවියනි, මේ මනුස්සයා නිසා අපේ ජීවිත නැති වෙන්න ඉඩ දෙන්න එපා. මේ අහිංසක මනුස්සයාගේ ජීවිතේ නැති කළා කියලා අපිට දඬුවම් කරන්න නම් එපා. යෙහෝවා දෙවියනි, මේ හැම දෙයක්ම වෙන්නේ ඔබේ කැමැත්ත නිසයි.” 15 එයාලා එහෙම කියලා යෝනාව උස්සලා මුහුදට දැම්මා. ඒ වෙලාවෙම කුණාටුව නතර වුණා. 16 ඒකෙන් පස්සේ ඒ මිනිස්සුන්ට යෙහෝවා දෙවියන් ගැන ලොකු ගෞරවයක්* ඇති වුණා.+ එයාලා යෙහෝවාට පූජාවක් ඔප්පු කළා. ඔහු වෙනුවෙන් දේවල් කරන්නත් පොරොන්දු වුණා.
17 යෙහෝවා දෙවියන් ලොකු මාළුවෙක්ව එව්වා. ඒ මාළුවා යෝනාව ගිලගත්තා. ඒ මාළුවාගේ බඩේ යෝනා දහවල් තුනකුයි, රෑ තුනකුයි හිටියා.+