නික්මයාම

2 ඒ කාලේදීම වගේ ලෙවී+ ගෝත්‍රයේ කෙනෙක් ඒ ගෝත්‍රයේම කාන්තාවක්* එක්ක විවාහ වුණා. 2 පස්සේ ඒ කාන්තාවට පුතෙක් ලැබුණා. ඒ දරුවා කොච්චර ලස්සනද කියලා දැක්කාම දරුවාගේ අම්මා මාස තුනක්ම දරුවාව හංගගෙන හිටියා.+ 3 පස්සේ එයාට තේරුණා දරුවාව තවත් නම් හංගගෙන ඉන්න බැහැ කියලා.+ ඉතින් එයා පැපිරස් බටවලින් හදපු කූඩයක් අරගෙන ඒකට තාර* ගාලා දරුවාව ඒක ඇතුළෙන් තියලා ඒ කූඩේ නයිල් ගංඉවුරේ බට පඳුරු අතරේ තිබ්බා. 4 දරුවාට මොනවාද වෙන්නේ කියලා දැනගන්න දරුවාගේ අක්කා+ ටිකක් ඈතට වෙලා බලන් හිටියා.

5 ටික වෙලාවකින් පාරාවෝගේ දුව නයිල් ගඟේ නාන්න ආවා. එයාගේ සේවිකාවෝ නයිල් ගංඉවුරේ ඇවිද ඇවිද හිටපු වෙලාවේ එයා දැක්කා බට පඳුරු අතරේ කූඩයක් තියෙනවා. ඉතින් එයා දාසියට කිව්වා ගිහින් කූඩය අරන් එන්න කියලා.+ 6 පාරාවෝගේ දුව කූඩය ඇරලා බලද්දී ඒකේ ඉන්න දරුවාව එයා දැක්කා. දරුවා අඬඅඬයි හිටියේ. එතකොට එයා කිව්වා “මේ හෙබ්‍රෙව්වරුන්ගේ දරුවෙක්නේ” කියලා. ඒත් දරුවා ගැන එයාට අනුකම්පාවක් ඇති වුණා. 7 ඒ වෙලාවේ දරුවාගේ අක්කා පාරාවෝගේ දුව ළඟට ගිහින් ඇහුවා “දරුවාට කිරි දෙන්න පුළුවන් කෙනෙක්ව මං හෙබ්‍රෙව්වරුන් අතරින් හොයාගෙන එන්නද” කියලා. 8 “හොඳයි, එක්කං එන්න” කියලා එයා කිව්වාම දැරිය දුවලා ගිහින් දරුවාගේ අම්මාව එක්කගෙන ආවා.+ 9 එතකොට පාරාවෝගේ දුව එයාට මෙහෙම කිව්වා. “මේ දරුවාව අරන් ගිහින් කිරි දීලා බලාගන්න. යන හැම වියදමක්ම මං දෙන්නම්.” ඉතින් ඒ කාන්තාව දරුවාව අරන් ගිහින් කිරි දීලා බලාගත්තා. 10 දරුවා ටිකක් ලොකු වුණාම දරුවාගේ අම්මා ආයෙත් පාරාවෝගේ දුවට දරුවාව භාර දුන්නා. පාරාවෝගේ දුව දරුවාව සැලකුවේ එයාගෙම පුතෙක් විදිහටයි.+ “මම එයාව වතුරෙන් ගොඩට ගත්තා”+ කියලා පාරාවෝගේ දුව දරුවාට මෝසෙස්* කියන නම දුන්නා.

11 මෝසෙස් උස් මහත් වුණාට පස්සේ එයාගේ සහෝදරයන් වන හෙබ්‍රෙව් ජාතිකයන්ගෙන් ඊජිප්තුවරුන් බලෙන් වැඩ ගන්න විදිහ බලන්න එයාට ඕනෙ වුණා.+ එයාලව බලන්න ගියාම මෝසෙස් දැක්කා හෙබ්‍රෙව් ජාතිකයෙක්ට ඊජිප්තු ජාතිකයෙක් පහර දෙනවා. 12 මෝසෙස් වටපිට බලලා කවුරුත් නැහැ කියලා දැක්කාම ඊජිප්තු ජාතිකයාට ගහලා එයාව මැරුවා. ඊටපස්සේ එයාව වැල්ලේ හැංගුවා.+

13 පහුවෙනිදාත් මෝසෙස් එයාගේ සහෝදරයන්ව බලන්න ගියාම එයා දැක්කා හෙබ්‍රෙව් ජාතිකයන් දෙන්නෙක් රණ්ඩු වෙනවා. එතකොට මෝසෙස් වරද කරපු කෙනාගෙන් ඇහුවා “ඇයි ඔයා ඔයාගෙම සහෝදරයාට ගහන්නේ” කියලා.+ 14 එතකොට ඒ කෙනා මෙහෙම ඇහුවා. “ඇයි ඔයා අපේ පාලකයාද? ඔයාව අපේ විනිශ්චයකාරයා විදිහට පත් කළේ කවුද? අර ඊජිප්තු ජාතිකයාව මරලා දැම්මා වගේ දැන් මාවත් මරන්නද හදන්නේ?”+ ඒක අහලා මෝසෙස් හොඳටම බය වෙලා මෙහෙම හිතුවා. “මං කරපු දේ හැමෝම දැනගෙන වගේ!”

15 මෝසෙස් කරපු දේ ආරංචි වුණාම පාරාවෝ හැදුවේ එයාව මරලා දාන්න. ඒත් මෝසෙස් පාරාවෝගෙන් බේරෙන්න මිදියන් දේශයට+ පලා ගියා. එයා මිදියන් දේශයට ඇවිත් එහේ තිබුණ ළිඳක් ළඟට ගිහින් ඉඳගත්තා. 16 මිදියන්වල+ පූජකයාට දුවලා හත්දෙනෙක් හිටියා. මෝසෙස් ළිඳ ළඟට යද්දී ඒ තරුණියන් ළිඳෙන් වතුර ඇදලා දියඔරු පුරවමිනුයි හිටියේ. ඒ, එයාලාගේ තාත්තාට අයිති සත්තුන්ට වතුර බොන්න දෙන්න. 17 වෙනදා වගේ එදත් එඬේරු ඇවිත් ඒ තරුණියන්ව එතනින් එළෙව්වා. මෝසෙස් ඒක දැක්කාම එයාලාගේ උදව්වට ඇවිත් සත්තුන්ට වතුර ඇදලා දුන්නා. 18 එයාලා ආයෙත් ගෙදර ගියාම එයාලාගේ තාත්තා වුණ රුවෙල්*+ පුදුමයෙන් වගේ ඇහුවා “ඔයාලා කොහොමද අද මෙච්චර ඉක්මනට ගෙදර ආවේ” කියලා. 19 එතකොට ඒ තරුණියන් මෙහෙම කිව්වා. “ඊජිප්තු ජාතිකයෙක්+ අපිව එඬේරුන්ගෙන් බේරගත්තා. එයා අපේ සත්තුන්ට වතුරත් ඇදලා දුන්නා.” 20 ඒ වෙලාවේ රුවෙල් එයාගේ දුවලට මෙහෙම කිව්වා. “කෝ ඒ කෙනා? ඇයි එයාව ගෙදරට එක්කං ආවේ නැත්තේ? එයාට කියන්න ඇවිල්ලා අපිත් එක්ක කෑම කන්න කියලා.” 21 ඊටපස්සේ මෝසෙස් රුවෙල්ගේ ගෙදර නවතින්න කැමති වුණා. රුවෙල් එයාගේ දුව වුණ ෂිප්පොරාව+ මෝසෙස්ට විවාහ කරලා දුන්නා. 22 පස්සේ ෂිප්පොරාට පුතෙක් ලැබුණා. “මම මේ දේශයේ ජීවත් වෙන්නේ විදේශිකයෙක් විදිහටයි”+ කියලා මෝසෙස් පුතාට ගේර්ෂොම්*+ කියන නම දුන්නා.

23 කාලයක් ගියාට පස්සේ ඊජිප්තුවේ රජ මිය ගියත්+ ඊශ්‍රායෙල්වරුන් දිගටම වහලුන් විදිහට වැඩ කළා. එයාලා අඬඅඬ එයාලාගේ දුක් ගැහැට ගැන කියලා සැබෑ දෙවියන්ගෙන් උදව් ඉල්ලුවා. එයාලා දිගින් දිගටම සැබෑ දෙවියන්ට කන්නලව් කළා.+ 24 කාලයක් ගියාම දෙවියන් එයාලාගේ දුක් ගැනවිල්ල අහලා+ ආබ්‍රහම්, ඊසාක් සහ යාකොබ් එක්ක කරපු ගිවිසුම මතක් කරගත්තා.+ 25 ඊශ්‍රායෙල්වරුන් කොයි තරම් දුක් විඳිනවාද කියලා දැකලා ඒ වෙනුවෙන් පියවර ගන්න දෙවියන් තීරණය කළා.