හොෂෙයා
1 මේ, බෙයේරීගේ පුතා වන හොෂෙයාට* යෙහෝවා දෙවියන් දුන්න පණිවිඩයයි. හොෂෙයා අනාවැකි කිව්වේ යූදාවල රජකම් කරපු උසියා,+ යෝතම්,+ ආහස්+ සහ හෙසකියා+ කියන රජවරුන්ගේ+ පාලන කාලයෙදියි. ඒ කාලයේ ඊශ්‍රායෙලයේ රජකම් කළේ යෝවාෂ්ගේ+ පුතා වන යෙරොබොවම්.+ 2 යෙහෝවා දෙවියන් හොෂෙයා මාර්ගයෙන් ඔහුගේ පණිවිඩය කියන්න පටන්ගත්ත අවස්ථාවේදී යෙහෝවා ඔහුට මෙහෙම කිව්වා. “ඔයා ගිහින් ස්ත්‍රියක්ව විවාහ කරගන්න. පස්සේ කාලෙකදී එයා ඔයාට ද්‍රෝහි වෙයි. එයා අනාචාරයේ යෙදිලා දරුවන් බිහි කරයි. මොකද මේ දේශයේ වැසියනුත් හරියට අනාචාරයේ යෙදෙන අය වගේ. එයාලා යෙහෝවා වන මට ද්‍රෝහි වෙලා මගෙන් සම්පූර්ණයෙන්ම ඈත් වෙලා ගිහින්.”+
3 හොෂෙයා දිබ්ලයිම්ගේ දුව වුණ ගොමෙර්ව විවාහ කරගත්තා. පස්සේ ගොමෙර්ට හොෂෙයාගෙන් පුතෙක් ලැබුණා.
4 යෙහෝවා දෙවියන් හොෂෙයාට මෙහෙම කිව්වා. “දරුවාට යෙෂ්‍රෙයෙල්* කියන නම තියන්න. මොකද යේහුගේ+ පවුලේ අය යෙෂ්‍රෙයෙල්වල හුඟක් ලේ හලපු නිසා තව ටික කාලෙකින් මං එයාලට දඬුවම් කරනවා.* ඊශ්‍රායෙලයේ රාජකීය පෙළපත මම නැති කරලා දානවා.+ 5 මං ඒ දවසේදී යෙෂ්‍රෙයෙල් නිම්නයේදී* ඊශ්‍රායෙල්වරුන්ගේ දුන්න කඩලා දානවා.”
6 ගොමෙර් ආයෙත් ගැබ් අරන් දුවෙක්ව බිහි කළා. ඒ වෙලාවේ දෙවියන් හොෂෙයාට කිව්වේ මෙහෙමයි. “දරුවාට ලෝරුහාමා* කියන නම තියන්න. මොකද මං ආයෙත් නම් ඊශ්‍රායෙල් සෙනඟට දයාව පෙන්වන්නේ නැහැ.+ මං එයාලව දේශයෙන් පන්නලා දානවා.+ 7 ඒත් මං යූදා සෙනඟට දයාව පෙන්වනවා.+ යෙහෝවා වන මම එයාලව බේරගන්නවා. මමයි එයාලාගේ දෙවියන්.+ ඒත් මං ඒක කරන්නේ දුන්නෙන්වත් කඩුවෙන්වත් යුද්ධයෙන්වත් අශ්වයන් සහ අසරුවන් මාර්ගයෙන්වත් නෙමෙයි.”+
8 ලෝරුහාමා මව්කිරි බොන එක නැවැත්තුවාට පස්සේ ගොමෙර් ආයෙත් ගැබ් අරන් පුතෙක්ව බිහි කළා. 9 ඒ වෙලාවේ දෙවියන් මෙහෙම කිව්වා. “දරුවාට ලෝඅම්මී* කියන නම තියන්න. මොකද මං ඔයාලව තවත් නම් මගේ සෙනඟ විදිහට පිළිගන්නේ නැහැ. මීට පස්සේ මං ඔයාලාගේ දෙවියන් නෙමෙයි.
10 “‘මං ඔයාලව තවත් නම් මගේ සෙනඟ විදිහට පිළිගන්නේ නැහැ’+ කියලා කියපු තැනදීම, ඔයාලව ‘ජීවමාන දෙවියන්ගේ දරුවන්’ විදිහට හඳුන්වන+ කාලයක් එනවා. ඒ කාලයේදී, ඊශ්‍රායෙල්වරු ගණනින් හුඟක් වැඩි වෙනවා. එයාලා හරියට කිරලා බලන්නවත් ගණන් කරන්නවත් බැරි මුහුදේ වැලි වගේ වෙනවා.+ 11 යුදයේ සහ ඊශ්‍රායෙලයේ ජනයාව එක සෙනඟක් විදිහට රැස් කරනවා.+ එයාලා එක නායකයෙක්ව පත් කරගෙන ආයෙත් තමන්ගේ දේශයට එනවා. ඒ කාලයේදී යෙෂ්‍රෙයෙල් නගරයට හුඟක් යහපත් කාලයක් උදා වෙයි.+