රුසියාවේ යෙහෝවාගේ සාක්ෂිකරුවන්
දේවධර්මාධරයෙකුගේ දෘෂ්ටිකෝණය
රෝමයේදී, පළමු ශතවර්ෂයේ යුදෙව් ප්‍රජා නායකයන් ක්‍රිස්තියානි ධර්මය සම්බන්ධයෙන් මෙසේ සටහන් කළා: “මේ ලබ්ධිය ගැන සියලු තැන්හි විරුද්ධව කථාකරන බව අපි දනිමු.” ඒ නායකයන් මොනවද කළේ? ප්‍රශංසාත්මක ලෙස, එවිට හිර අඩස්සියේ සිටි ප්‍රේරිත පාවුල් ළඟට ගොස් ඔවුන් මෙසේ ප්‍රකාශ කළා: “නුඹ සිතන්නේ මොකද කියා නුඹෙන් අසන්ට කැමැත්තෙමු.” (ක්‍රියා 28:22) ක්‍රිස්තියානි ධර්මයට විරුද්ධව කතා කරන අයට සවන් දෙනවා වෙනුවට ඔවුන් දැන උගත් ක්‍රිස්තියානියෙකුට සවන් දුන්නා.
පිළිගත් රුසියානු දේවධර්මාධරයෙක් වූ ස’ගෙයි ඉවාන්යෙන්ක එලෙසම කළා. ඔහු යෙහෝවාගේ සාක්ෂිකරුවන් ගැන රුසියාවේ ප්‍රචාරය වෙමින් තිබුණ නිෂේධාත්මක වාර්තාවලින් බොහොමයක් විශ්වාස කළත්, තොරතුරු ලබාගැනීම සඳහා සැන් පීටස්බර්ග්වලට නුදුරින් පිහිටි සාක්ෂිකරුවන්ගේ ශාඛා කාර්යාලය අමතන්න තීරණය කළා. ශාඛා කාර්යාලයටම පැමිණ සාක්ෂිකරුවන්ව නිරීක්ෂණය කරන්නත්, ප්‍රශ්න අසන්නත් කියා කළ ආරාධනය ඔහු පිළිගත්තා.
ඉවාන්යෙන්ක මහතා 1996 ඔක්තෝබර්වලදී පැමිණි විට, රුසියාවේ යෙහෝවාගේ සාක්ෂිකරුවන්ගේ ශාඛා කාර්යමණ්ඩලයේ සාමාජිකයන් 200කට ආසන්න සංඛ්‍යාවකට පහසුකම් සලසා ඇති ගොඩනැඟිල්ල, සම්පූර්ණ කිරීමට ආසන්නව තිබුණා. ඉදි කිරීම් භූමිය බැලීමටත්, කෑම කාමරයේදී කෑම ගැනීමටත්, ඔහු කැමති ඕනෑම කෙනෙක්ගෙන් ප්‍රශ්න ඇසීමටත් ඔහුට ඊළඟ දවස් තුනේදී ප්‍රස්තාව ලබා දුන්නා.
ඉවාන්යෙන්ක මහතා සාක්ෂිකරුවන් ගැන ලියූ ලිපියක්, සතිපතා පළ වෙන ජනප්‍රිය රුසියානු මොස්කව් නියූස් 1997 පෙබරවාරි 16-23හි පළ කොට තිබුණා. “අපි යෙහෝවාගේ සාක්ෂිකරුවන්ට බිය විය යුතුද?” යන මැයෙන් වූ ලිපිය මොස්කව් නියූස් පෙබරවාරි 20-26 ඉංග්‍රීසි පිටපතේද පළ වුණා. රුසියාවේ යෙහෝවාගේ සාක්ෂිකරුවන්ගේ ක්‍රියාකාරකම් කෙරෙහි පිබිදෙව්! පාඨකයන් බොහෝදෙනෙක් ඉමහත් උනන්දුවක් දක්වන බැවින්, අවසරය ඇතුව, මේ ලිපියෙන් බොහෝමයක් අපි මෙහි නැවත පළ කරනවා. පැහැදිලිව පෙනෙන තද අකුරෙන් පළ වුණ මතු අද්දැකීමෙන් ඉවාන්යෙන්ක මහතා පටන්ගත්තා:
“සිරිනොව්ස්කිගේ LDPR පක්ෂයේ සාමාජිකයන්, යෙහෝවාගේ සාක්ෂිකරුවන්ගේ රැස්වීමකට විරුද්ධව උද්ඝෝෂණය කරමින් ‘නිකායවාදීන්, රුසියාවෙන් ඉවත් වෙනු!’ කියන පෝස්ටරය වැනුවා. ‘ඔබ මේ සංවිධානය සම්බන්ධයෙන් අකමැති මොනවටද?’ කියා උද්ඝෝෂණය කරන්නෙකුගෙන් මම ඇහැව්වා. ‘රිලිජස් සිෆිලිස් ඖට්බ්‍රේක් ඉන් කැම්චැට්කා’ (‘කැම්චැට්කාවල ආගමික උපදංශය පැතිර යයි’) යන සිරස්තලය ඇති මෙගපොලිස්-එක්ස්ප්‍රස් පුවත්පතේ පිටපතක් ඔහු මගේ අතේ තැබුවා. සංවිධානයේ මුදල් පෙට්ටි පිරවීම සඳහා යෙහෝවාගේ සාක්ෂිකරුවන් මැදහත්කරුවන් වී, ගණිකා ව්‍යාපාර පවත්වාගෙන යමින්, නාවිකයන් අතර සමාජ රෝග පතුරවන බව පුවත්පතේ පළ වී තිබුණා. ‘ඔබත් ඔවුන්ගේ ගොදුරක්ද?’ ‘ඔබ මේ තොරතුර විශ්වාස කරනවාද’ කියා මම අනුකම්පාසහගත ලෙස ඇහැව්වා. ‘වැදගත් දේ ඒක නෙවෙයි’ කියා පිළිතුර ලැබුණා. ‘ප්‍රධාන දෙය මේ අමෙරිකානු නිකාය රුසියාවේ ආත්මිකත්වය හා සංස්කෘතිය විනාශ කර දමන එකයි; අපි මේක නැවැත්විය යුතුයි.’”
ඉවාන්යෙන්ක මහතා ලියූ ලිපිය, “දර්ශනය පිළිබඳ අපේක්ෂකයෙකු වූ දේවධර්මාධර ස’ගෙයි ඉවාන්යෙන්ක විසින්” යන ශීර්ෂ පාඨයට පහළින් දැක්වෙනවා.
“රුසියන් ජාතිකයන් බොහෝදෙනෙක් යෙහෝවාගේ සාක්ෂිකරුවන් ගැන ඒ තරම් කරුණාවන්තව හිතන්නේ නැති වුණත්, මේ වගේ අවංකකමක් ඇත්තෙන්ම දකින්න ලැබෙන්නේ කලාතුරකින්. මේ සංවිධානය පිළිබඳ එක සඳහනකින්ම, එහි අඳුරු ධර්මෝන්මාදය, එහි අමෙරිකානු පටන්ගැන්ම, සංවිධානයේ නායකයන් කෙරෙහි සාමාන්‍ය සාමාජිකයන්ගේ අන්ධ විශ්වාසය සහ ලෝකාන්තිමය අප මත තිබෙන බවට වූ විශ්වාසය සම්බන්ධයෙන් අදහස් ප්‍රකාශයන් රාශියකට මඟ පාදනවා. බොහෝදෙනෙක් යෙහෝවාගේ සාක්ෂිකරුවන් දෙස බලන්නේ කුතුහලය මුසු බියකින්.
“මේ ආගම මොකක්ද? අපි ඒකට බය වෙන්න ඕනෙද?
“මමම මේ ගැන සොයා දැනගැනීමට, රුසියානු යෙහෝවාගේ සාක්ෂිකරුවන්ගේ පරිපාලන මධ්‍යස්ථානය පිහිටි සැන් පීටස්බර්ග්, කුරුට්නෝයිහි සෝල්නෙක්නොයි ගමට ගියා.
***
[මෙය] පිහිටා තිබෙන්නේ කලින් ගිම්හාන කඳවුරක් තිබූ භූමියකයි. වර්ෂ 1992 වන විට [මුල්] ගොඩනැඟිල්ල සම්පූර්ණයෙන්ම වාගේ ජරාවාස වී තිබුණ අතර, දරුවන් වෙනුවට එහි ඉබාගාතේ ඇවිදින්නන් හා මී රංචු සිටියා. පෙනෙන විදිහට ප්‍රදේශයේ පිරිහුණු තත්වය නිසා අනියත කාලපරිච්ඡේදයකට ප්‍රයෝජන ගැනීම සඳහා යෙහෝවාගේ සාක්ෂිකරුවන්ට හෙක්ටෙයාර් හතක භූමිභාගයක් ලබාගන්න හැකි වුණා. පැරණි ඒවා අලුත් කළ ඔවුන් අලුත් ගොඩනැඟිලි සාදන්නත් පටන්ගත්තා; ඊට තට්ටු හතරකින් යුත් පරිපාලන ගොඩනැඟිල්ලක්, ආසන 500කින් යුතු [රාජ්‍ය ශාලාවක්] සහ කෑම ශාලාවක් ඇතුළත් වුණා. යෙහෝවාගේ සාක්ෂිකරුවන් අලුත් තණකොළද (ෆින්ලන්තයෙන් විශේෂයෙන් ගෙන්වන ලද), දුර්ලභ ගණයේ විවිධ ගස් වර්ගද සිටුවනවා. මේ එන ගිම්හානයේදී මේ වැඩය සම්පූර්ණ කිරීමට අපේක්ෂා කරනවා. පරිපාලන මධ්‍යස්ථානයේ ප්‍රධාන කාර්යය වන්නේ දේශනා කටයුතු සංවිධානය කිරීමත්, යෙහෝවාගේ සාක්ෂිකරුවන්ගේ ප්‍රාදේශීය සභාවලට පොත් පත් බෙදාහැරීමත්. සෝල්නෙක්නොයිහි මුද්‍රණ පහසුකම් නොතිබෙන නිසා, ජර්මනියේදී රුසියන් පොත් පත් මුද්‍රණය කර, ඉන්පසු සැන් පීටස්බර්ග්වලට බෙදාහරිනවා; එතැනින් අදාළ ප්‍රදේශවලට බෙදාහරිනු ලබනවා. දළ වශයෙන් මධ්‍යස්ථානයේ 190දෙනෙක් වැඩ කරනවා. ඔවුන් ස්වේච්ඡා පදනමක් මත සේවය කරන අතර, වේතන නොලැබුවත් ඔවුන්ට නැවතී සිටීමට ස්ථානයක්, ආහාර සහ ඇඳුම් පැළඳුම් වැනි මූලික අවශ්‍යතා සියල්ලම සපයනු ලබනවා.
“මධ්‍යස්ථානයේ වැඩ මෙහෙයවන්නේ වැඩිමහල්ලන් 18කින් යුත් කමිටුවක් මගිනුයි. වසිලයි ක’ලින් 1992 සිට පරිපාලන මධ්‍යස්ථානයේ සම්බන්ධීකාරක හැටියට සේවය කර තිබෙනවා. ඔහු ඉපදුණේ ඉවානෝ-ෆ්‍රාන්කොව්ස්කාවලදීයි. වර්ෂ 1951දී, ඔහුට අවුරුදු හතරේදී, ඔහුව සහ ඔහුගේ දෙමාපියන්ව සයිබීරියාවට පිටුවහල් කළා (යෙහෝවාගේ සාක්ෂිකරුවන් වී සිටි නිසා 1949 සහ 1951දී පවුල් 5,000කට පමණ බලධාරීන් විසින් පීඩා කරනු ලැබුවා). ඔහු 1965දී බව්තීස්ම වූ අතර ඉර්කුට්ස්ක් ප්‍රදේශයේ පදිංචිව සිටියා. ඔහු ලී පට්ටලයක බාස් කෙනෙක් හැටියට වැඩ කර තිබෙනවා.
“පරිපාලන මධ්‍යස්ථානයේ ස්වේච්ඡා සේවකයන්ට අමතරව රුසියාවෙන්, ෆින්ලන්තයෙන්, ස්වීඩනයෙන් සහ නෝර්වේවලින් පැමිණි ස්වේච්ඡා ඉදි කිරීමේ සේවකයන් 200ක්ද සිටිනවා: ඔවුන්ගෙන් වැඩිදෙනෙක්, තමන්ගේ සාමාන්‍ය රැකියාවෙන් නිවාඩු ලබාගත්තා. යුක්‍රේන්වලින්, මෝල්ඩෝවාවෙන්, ජර්මනියෙන්, එක්සත් ජනපදයෙන්, ෆින්ලන්තයෙන්, පෝලන්තයෙන් සහ වෙනත් රටවලින්ද යෙහෝවාගේ සාක්ෂිකරුවන් බහුතරයක් පැමිණ සිටියා. (යෙහෝවාගේ සාක්ෂිකරුවන් අතරේ ජාති අගතීන් නැහැ. ජෝජියන්වරුන්, ඇබ්කාෂියන්වරුන්, ආෂර්බිජාන්වරුන් සහ ආමේනියන්වරුන් මේ මධ්‍යස්ථානයේ එකට ජීවත් වුණත්, අවුරුදු හතර පුරා එක ගැටුමක්වත් තිබිලා නැහැ.)
“ඉදි කිරීමේ අමුද්‍රව්‍ය හා උපකරණවලින් වැඩිහරියක් සපයනු ලැබුවේ ස්කැන්ඩිනේවියානු රටවලින් වූ අතර, සෙසු ඇදහිලිවන්තයන් විසිනුත් නොමිලේ බොහොමයක් සපයනු ලැබුවා. ස්වීඩන ජාතික යෙහෝවාගේ සාක්ෂිකරුවෙක් 1993දී සෝල්නෙක්නොයි වෙත ගෙනා බුල්ඩෝසරයක් මට පෙන්නුවා. ඔහු එහි සිටි කාලය පුරාම ඒකෙ වැඩ කළ අතර, තම නිවස බලා යද්දී ඔහු එය ඔහුගේ ඇදහිලිවන්ත සහෝදරයන්ට දීලා ගියා. ඉදි කිරීමේ සේවකයන් පහසුකම් ඇති නේවාසික නිවාසවල සහ පොඩි ගෙවල්වල නැවතී සිටියා. ඔවුන්ගේ දවස ගෙවුණේ මේ විදිහටයි: පෙ.ව. 7:00ට—උදේ ආහාරය සහ යාච්ඤා මෙහෙයන්; දවල් කෑමට පැයකුත් එක්ක ඔවුන් පෙ.ව. 8:00 සිට ප.ව. 5:00 දක්වා වැඩ කරනවා. සෙනසුරාදාවල ඔවුන් දවල් ආහාරය ගන්නා වෙලාව දක්වා වැඩ කරන අතර, ඉරිදා විවේක ගැනීමේ දවසක්.
“ඔවුන් හොඳට කනවා; ආහාර වට්ටෝරුවට හැමවිටම පලතුරුත් තියෙනවා. මේ ආගම නිරාහාරව සිටින්නේවත්, මොනයම් ආහාරයකට හෝ දැඩි සීමා පනවන්නේවත් නෑ. වැඩවලින් පස්සේ, බොහෝදෙනෙක් හුමාල ස්නානයට ගිහිල්ලා, බියර් එකක් අරන්, සංගීතයට සවන් දෙමින් ඉඳගෙන ඉන්නවා. යෙහෝවාගේ සාක්ෂිකරුවන් අතර බේබද්දන් නැති නමුත් මත්පැන් තහනම් කරලාද නැහැ. ඇදහිලිවන්තයන්ට වයින්, කොංයැක්, වොඩ්කා සහ එවැනි මත්පැන් පමණ නොඉක්මවා ගැනීමට අවසර දී තිබෙනවා. කෙසේවුවත්, යෙහෝවාගේ සාක්ෂිකරුවන් දුම්පානය කරන්නේ නැහැ.
***
“සතියකට තුන්පාරක් බයිබල්-පාඩම් පංති තිබෙනවා; ඒවාට වැඩියෙන් සහභාගි වන්නේ යෞවනයන්. කොහොමනමුත්, අවුරුදු 30-40ක් තිස්සේ යෙහෝවාගේ සාක්ෂිකරුවන් වී සිටින අයත් සොයාගැනීමට ලැබීම අසාමාන්‍ය දෙයක් නොවෙයි. මහලු අයගෙන් හැමෝම පාහේ සිරගෙවල්වල, වධක කඳවුරුවල සහ පිටුවහලුන් ලෙස කාලය ගත කර තිබෙනවා. යටපත් වී සිටීමේ කාලපරිච්ඡේදය අවසන් වූ පසු, බොහෝ වෛද්‍යවරුන්, නීතිඥයන්, ඉන්ජිනේරුවන්, ගුරුවරුන්, ව්‍යාපාරිකයන් සහ ශිෂ්‍යයන් යෙහෝවාගේ සාක්ෂිකරුවන්ගේ කණ්ඩායම්වලට එක් වී තිබෙනවා.
“සභාවල් තම සාමාජිකයන් අතර සමානතාවේ වාතාවරණයක් රැකගැනීමට වෑයම් කරනවා. උදාහරණයක් වශයෙන්, පරිපාලන මධ්‍යස්ථානයේ සම්බන්ධීකාරක පවා ඔහුගේ වාරය පැමිණියාම හවස් වරුවේ පිඟන් සෝදනවා. යෙහෝවාගේ සාක්ෂිකරුවන් එකිනෙකාව අමතන්නේ අසාමාන්‍ය විදිහකට නොවන අතර, යමෙකුට ඔහුගේ නමින් කතා කරන විට ‘සහෝදරයා’ හෝ ‘සහෝදරී’ කියන එකත් ඊට එකතු කරනවා.
“යෙහෝවාගේ සාක්ෂිකරුවෙක් බයිබල් ඉගැන්වීම් උල්ලංගනය කරමින්, පසුතැවිලි වීම ප්‍රතික්ෂේප කරන විට, ඔහුව ඉතාම බරපතළ දඬුවමකට යටත් කරනු ලබනවා—ඔහුව නෙරපනවා. ඒ වුණත් ඒ තැනැත්තාට රැස්වීම්වලට පැමිණෙන්න පුළුවන්; නමුත් ඔහුගේ සෙසු ඇදහිලිවන්තයන් ඔහුට තවදුරටත් ආචාර කරන්නේ නෑ. ඒ තරම් දරුණු නැති එකක් තමයි තරවටු කිරීම.
***
“මේ ආගමික සංවිධානයට මේ තරම් විවිධ ජනකායක් පැමිණෙන හේතුව වටහාගැනීමට වුවමනා වූ නිසා මම යෙහෝවාගේ සාක්ෂිකරුවන්ව බොහෝ කාලයක් නිරීක්ෂණය කළා. ඔවුන්ගේ පෞද්ගලිකත්වයන්, අධ්‍යාපන මට්ටම් සහ පෞද්ගලික රුචි අරුචිකම් යන මේ සියල්ලේම වෙනස්කම් තිබුණත්, [යෙහෝවාගේ සාක්ෂිකරුවන්] පාපතර ලෝකයේ ප්‍රතිපත්ති පාවා දෙන ආගම් [එක්ක නමස්කාරයේ හවුල් වන්නේ නැහැ]. [ජනයා] අන්ධ ලෙස අධිකාරය විශ්වාස කළ යුතු ස්ථානවලදී, ගූඪ වාදයට ඉඩ දෙන ස්ථානවලදී, දේවසභා නායකයන්ගේ මණ්ඩලය හා කීකරු ජනයා ලෙස ජනයා බෙදී සිටින ස්ථානවලදී ඔවුන්ට අපහසුවක් දැනෙනවා.
“බයිබලයට අනුව ජීවත් වීමේ ස්ථිරසාර විශ්වාසය මගින් යෙහෝවාගේ සාක්ෂිකරුවන් කැපීපෙනෙනවා. ඔවුන් තමන්ගේ හැම ක්‍රියාවක්ම, මේ හෝ ඒ බයිබල් ප්‍රතිපත්තිය අනුව, එහෙමත් නැත්නම් පරණ හෝ අලුත් ගිවිසුමෙන් කොටසක් සඳහන් කරමින් ඒ අනුව ඔප්පු කරන්න වෑයම් කරනවා. යෙහෝවාගේ සාක්ෂිකරුවන් විශ්වාස කරන්නේ, සියලුම ප්‍රශ්නවලට උත්තර තියෙන්නේ බයිබලයේ හා බයිබලය ගැන අඩංගු දේවල පමණක් බවයි. යෙහෝවාගේ සාක්ෂිකරුවන්ට බයිබලය, ව්‍යවස්ථා සමූහයක්, සිවිල් නීති සංග්‍රහයක් සහ සත්‍යයේ උසස් ප්‍රකාශයක් වෙනවා.
“මේ හේතුව නිසා යෙහෝවාගේ සාක්ෂිකරුවන් ලොව පුරා ප්‍රසිද්ධව සිටින්නේ නිර්දෝෂව නීති පිළිපදින සෙනඟක් වශයෙනුයි; විශේෂයෙන්ම බදු ගෙවීම සම්බන්ධයෙන් ඔවුන් තුළ තිබෙන වැරදි නොකිරීමේ ආකල්පය සඳහායි. බදු පරීක්ෂණ කාර්යාලය ඔවුන් සම්බන්ධයෙන් නිතිපතා සෝදිසි කර බලන අතර, කිසිම වතාවක මොනයම් විදිහකින් හෝ උල්ලංගනය කිරීමක් අල්ලගන්න නොහැකි වීම ගැන පුදුමයට පත් වෙනවා. සැබවින්ම, වෙනත් බොහෝ අය මෙන් යෙහෝවාගේ සාක්ෂිකරුවන්ටත් බදු නොගෙවා සිටීමට හේතුවක් සොයන්න වෑයම් කළ හැකි නමුත්, බයිබලය පවසන්නේ බදු ගෙවීමේදී කෙනෙක් අවංක විය යුතු බවයි; ඉතින් යෙහෝවාගේ සාක්ෂිකරුවන්ට මෙයිට එහායින් වචනයක් නෑ.
“කෙසේවුවත්, බයිබලය කෙරෙහි ඇති ඔවුන්ගේ ප්‍රතිපත්ති පාවා නොදීමේ ආකල්පය, බොහෝවිට යෙහෝවාගේ සාක්ෂිකරුවන් හා රජය අතර යම් විදිහකින් බරපතළ ඝට්ටන ඇතිවීමේ මූලාශ්‍රය වෙනවා. දේශපාලනයට සම්බන්ධ නොවීමට ඇති ඔවුන්ගේ තිර අධිෂ්ඨානය තරඟයේ ප්‍රධාන විෂයක් වන අතර, ඔවුන් යුධ හමුදාවේ සේවය ප්‍රතික්ෂේප කිරීමෙන් එය පිළිබිඹු වෙනවා.
“යේසුගේ ගෝලයන් හා ඔහුගේ රාජ්‍යය මේ ලෝකයේ කොටසක් නොවන ආකාරය පිළිබඳ යේසුගේ වචන, යෙහෝවාගේ සාක්ෂිකරුවන් වචනයේ පරිසමාප්තියෙන්ම අර්ථකථනය කරනවා; මේ හේතුව නිසා දේශපාලනය හා යුද්ධය කොතැනක, මොන හේතුවක් නිසා සිදු වුණත් ඔවුන් එයට සහභාගි වීම ප්‍රතික්ෂේප කරනවා. යෙහෝවාගේ සාක්ෂිකරුවන් ‘හිට්ලර්ට ජය වේවා’ කියා කෑගැසීම සහ හිට්ලර්ගේ යුධ හමුදාවේ සේවය කිරීම ප්‍රතික්ෂේප කළ නිසා, ඇදහිලිවන්තයන් දහස් ගණනක් නාට්සි වධක ගාල් කඳවුරුවලට යැවූ අතර දහස් ගණනක් මියගියා. සෝවියට් සමූහාණ්ඩුවට විරුද්ධව සටනට සහභාගි වීම ප්‍රතික්ෂේප කළ නිසා තම ජීවිතය පිදූ හැම ජර්මන් ජාතික යෙහෝවාගේ සාක්ෂිකාරයෙක්වම රුසියානුවන් විසින් සලකනු ලැබුවේ උසස් සදාචාර ක්‍රියාවක් කළ පුද්ගලයෙක් හැටියටයි. කෙසේවුවත්, ඒ අතරතුරේම, යුද අවි දැරීමටත්, IIවන ලෝක සංග්‍රාමයේදී හවුල් වීමටත් ප්‍රතික්ෂේප කිරීම නිසා මරණීය දණ්ඩනය නියම වූ, නැතහොත් සාමකාමී කාලවලදී යුද හමුදාවේ සේවය කිරීම ප්‍රතික්ෂේප කළ නිසා මරණයට නියම වූ [රුසියානු] යෙහෝවාගේ සාක්ෂිකරුවන්ට බොහෝ රුසියානු ජාතිකයන් දයානුකම්පාව දක්වන්න පෙලඹී නැහැ. එහෙත් අවස්ථා දෙකේදීම යෙහෝවාගේ සාක්ෂිකරුවන් ක්‍රියා කරමින් සිටියේ දේශපාලනික ඒත්තුගැන්වීම් අනුව නොව, නමුත් ඔවුන්ගේ ආගමික විශ්වාසයන්ට අනුවයි.
“ජපානයෙත් එවැනිම ගැටලුවක් හටගත්තා; එහි යෙහෝවාගේ සාක්ෂිකරුවන් වූ සමහර ශිෂ්‍යයන් යුද ශිල්ප ඉගෙනීමට ප්‍රතික්ෂේප කළ අතර, විශ්වවිද්‍යාලයෙන් අස් කර දැමීමේ අවදානමට මුහුණ දුන්නේ වැඩි ඈතකදී නොවෙයි. මේ ශිෂ්‍යයන්ගේ අයිතිවාසිකම්වලට සහාය දක්වන නීතියක් පනවමින් 1996දී ජපන් ශ්‍රේෂ්ඨාධිකරණය ඔවුන්ට විකල්ප පංතිවලට යෑමට අවසර දෙනු ලැබුවා.
***
“නවීන චින්තකයන්ව පුදුමයෙන් ආකූල කරවන්නේ යෙහෝවාගේ සාක්ෂිකරුවන් පිළිබඳ කුමන දේද? ඒ සියල්ලටම වඩා, ලෝකාන්තිමය අප මත බව ඔවුන් නිරතුරුවම දේශනා කරනවා (ඔවුන් වීදිවල සහ ගෙයින් ගෙට මිෂනාරි වැඩයේ යෙදෙනවා). ‘ලෝකාන්තිමය’ හා පව්කාරයන්ට අත් වන ශෝචනීය ඉරණම මත එතරම් අවධාරණයක් නොදී, ඒ වෙනුවට ‘පාරාදීස පොළොවක සදාජීවනය’ ලැබීමට යෙහෝවා ඔවුන්ට ප්‍රස්තාව උදා කර දෙන බව සවන්දෙන්නන්ට පැහැදිලි කිරීමට මෑතකදී වැඩිමහල්ලන් දේශනා කරන්නන්ට උපදෙස් දී තිබෙනවා.
“තවත් පීඩාකාරි විෂයක් වන්නේ අන්තර් ඇදහිලි සම්බන්ධතා කෙරෙහි යෙහෝවාගේ සාක්ෂිකරුවන්ගේ නිෂේධාත්මක ආකල්පය සහ සමස්ත ලෝක කිතුදහමට සහාය වීම ප්‍රතික්ෂේප කිරීමයි. ක්‍රිස්තියානි ලෝකය දෙවිට හා බයිබලයට ද්‍රෝහි වී ඇති බව හා අනිත් ආගම් සියල්ලම මහ ලොකු වැරදීමක් බවයි ඔවුන් විශ්වාස කරන්නේ. යෙහෝවාගේ සාක්ෂිකරුවන් ‘බබිලෝනියේ වේශ්‍යාවට’ මේ ආගම් සමාන කරන අතර, ඒවාවලටත් එම ඉරණමම අත් වෙන බව කියා සිටිනවා. විවිධ ආගම්වල අන්තිමය ළඟයි; ඉතිරි වෙන එකම ආගම යෙහෝවාගේ සාක්ෂිකරුවන් දේශනා කරන එක පමණයි කියා මෑත ‘පිබිදෙව්!’ කලාපයක ප්‍රකාශ කරනවා.
“ඒ විතරක් නෙවෙයි, හැම පුද්ගලයෙකුටම හෘදය සාක්ෂියේ නිදහස් අයිතිය තිබෙන බවත් යෙහෝවාගේ සාක්ෂිකරුවන් පිළිගන්නවා.
***
“යෙහෝවාගේ සාක්ෂිකරුවන්ගේ ඉගැන්වීම් සමාජයට තර්ජනයක් වෙනවාද නැද්ද යන්න ගැන රටවල් ගණනක් දැනටමත් සැලකිලිමත් වන බව ප්‍රකාශ කර තිබෙනවා. එක්සත් ජනපදයේ, කනෙක්ටිකට් ප්‍රාන්තයේ ශ්‍රේෂ්ඨාධිකරණය (1979) සහ ඕස්ට්‍රේලියාවේ නිව් සවුත් වේල්ස් (1972), කැනඩාවේ, බ්‍රිතාන්‍ය කොලම්බියාවේ පළාත් පාලන අධිකරණය (1986) සහ වෙනත් අධිකරණ, යෙහෝවාගේ සාක්ෂිකරුවන් සමාජ තර්ජනයක් හෝ ඔවුන් ජනයාගේ සෞඛ්‍යයට හෝ චිත්තවේගීය තත්වයට තර්ජනයක් වන බවට සාක්ෂි නැති බව ප්‍රකාශ කර සිටියා. යුරෝපීය මානව අයිතිවාසිකම් අධිකරණය (1993), යෙහෝවාගේ සාක්ෂිකරුවන්ට ආගම සම්බන්ධයෙන් තිබෙන නිදහස් අයිතිවාසිකමට පක්ෂව කතා කළා; ග්‍රීසියේ සහ ඔස්ට්‍රියාවේ එය සීමා කර තිබුණා. අදදින රටවල් 25ක යෙහෝවාගේ සාක්ෂිකරුවන් පීඩා විඳිමින් සිටිනවා . . .
“යෙහෝවාගේ සාක්ෂිකරුවන් බයිබල් සත්‍යයට කැප වී සිටීම හා පරාර්ථකාමී ලෙස තම විශ්වාසයන් වෙනුවෙන් ස්ථිරව සිටීමට ඇති ඔවුන්ගේ කැමැත්ත නිසා, ඔවුන්ගේ සෙසු පුරවැසියන්ට ආදර්ශයක් වශයෙන් ඔවුන්ව සැලකිය හැකියි. නමුත් මෙවැනි ප්‍රශ්නයක් පැනනඟිනවා: ජීවිතයේ හැම අංගයකටම පාහේ, සම්පූර්ණයෙන්ම හා ප්‍රතිපත්ති පාවා නොදෙන ආකාරයකින් බයිබලය මත පදනම් තම එළඹීම ස්ථිර ලෙස ප්‍රකාශ කරන සංවිධාන සඳහා, හෘදය සාක්ෂියේ නිදහස සම්බන්ධයෙන් ව්‍යවස්ථානුකූල සහතික වීම් සැපයීමට අපේ සමාජය සූදානම්ද?”
මේ අන්තිම වාක්‍යයෙහි, ඉවාන්යෙන්ක මහතා වැදගත් ප්‍රශ්නයක් පැනනැඟුවා. පළමුවන ශතවර්ෂයේදී, ක්‍රිස්තුස් විසින්ම තම නියෝජිතයා හැටියට සේවය කිරීමට තෝරාගත් ප්‍රේරිත පාවුල් අයුක්තිසහගත ‘සිර බැඳීම්වලින්’ වේදනා වින්දා. මේ හේතුවෙන්, පාවුල් තමන්ගේ “ශුභාරංචිය ගැන උත්තරදීමේදීද ඒක ස්ථිරකිරීමේදීද” ඔහුගේ වෑයම් සම්බන්ධයෙන් සෙසු ඇදහිලිවන්තයන්ට ලිව්වා.—පිලිප්පි 1:7; ක්‍රියා 9:3-16.
ඉවාන්යෙන්ක මහතා කළාක් මෙන් තම වැඩකටයුතු කිට්ටුවෙන් පරීක්ෂා කර බලන්න කියා යෙහෝවාගේ සාක්ෂිකරුවන්, සියල්ලන්ටම අදදින ඇරයුම් කරනවා. ජනයා එසේ කරනවා නම්, මුල් ක්‍රිස්තියානීන් පිළිබඳ එවැනි වාර්තා අසත්‍ය වූ ලෙසින්ම, සාක්ෂිකරුවන් පිළිබඳ නිෂේධාත්මක වාර්තාත් අසත්‍යය බව ඔවුන් දැනගනීවි කියා අපිට සහතිකයි. කැපීපෙනෙන ලෙස, “මා නුඹලාට ප්‍රේමකළාක්මෙන් නුඹලාත් එකිනෙකාට ප්‍රේමකර[න්න]” කියා යේසු සිය ගෝලයන්ට දුන් ‘අලුත් ආඥාවට’ සාක්ෂිකරුවන් කීකරු වෙනවා.—යොහන් 13:34, 35.
[23වන පිටුවේ කොටුව]
MN ලිපිගොමුව
(මතු දැක්වෙන තොරතුරු මොස්කව් නියූස් ලිපිගොමුවෙන් ලබාගෙන ස’ගෙයි ඉවාන්යෙන්ක විසින් මේ ලිපිය සමඟ මුද්‍රණය කරන ලද්දක්.)
“රුසියානු යෙහෝවාගේ සාක්ෂිකරුවන්, රටවල් 233ක ක්‍රියාත්මක වන හා සාමාජිකයන් මිලියන 5.4ක් සිටින සමස්ත ලෝක ක්‍රිස්තියානි සංවිධානයක කොටසක්. යෙහෝවාගේ සාක්ෂිකරුවන් අනුගමනය කරන්නේ, නියූ යෝක්, බෘක්ලින්හි පිහිටුවා ඇති පාලක මණ්ඩලයෙන් දෙන ආත්මික මඟ පෙන්වීමයි. නවීන-දින යෙහෝවාගේ සාක්ෂිකරුවන්ගේ සංවිධානය බිහි වුණේ පෙන්සිල්වේනියා, පිට්ස්බර්ග්හි චාල්ස් ටේස් රසල් විසින් 1870දී පිහිටෙවූ බයිබල් අධ්‍යයනයකින්. සංවිධානය රුසියාවට ආවේ 1887දී. රුසියානු යෙහෝවාගේ සාක්ෂිකරුවන්ගෙන් මුල් තැනැත්තෙක් වූ සිම්යෝන් කස්ලිට්ස්කිව 1891දී මොස්කව්වලින් සයිබීරියාවට පිටුවහල් කළා. පීඩාව තිබියදීත් සංවිධානය විඳදරාගත් අතර, 1956දී සෝවියට් සමූහාණ්ඩුවේ යෙහෝවාගේ සාක්ෂිකරුවන් 17,000ක් සිටියා. ‘ආගම පිළිබඳ නිදහස’ යන නීතිය සම්මත කිරීමෙන් පසුව, 1991 මාර්තු වන තෙක් යෙහෝවාගේ සාක්ෂිකරුවන්ව රුසියාවේ පිළිගත්තේ නෑ. අදදින රුසියාවේ, 500කට අධික ප්‍රජාවන්වල දළ වශයෙන් සාමාජිකයන් 70,000ක් පමණ ක්‍රියාශීලීව සිටිනවා. සංවිධානය ‘මුරටැඹ’ (භාෂා 125කින් පළ කරනවා, මිලියන 20ක් බෙදාහරිනවා) එමෙන්ම ‘පිබිදෙව්!’ (භාෂා 81කින්, මිලියන 18ක් බෙදාහරිනවා).”
[23වන පිටුවේ පින්තූරය]
රුසියාවේ ශාඛා කාර්යාල සංකීර්ණයේ කොටසක්
[24වන පිටුවේ පින්තූරය]
රුසියාවේ ශාඛා පවුල බයිබල් පාඩම සඳහා රැස්වෙන රාජ්‍ය ශාලාව
[25වන පිටුවේ පින්තූරය]
සාක්ෂිකාර පවුල් එකට පාඩම් කරන අතර විනෝද වෙයි
[26වන පිටුවේ පින්තූර]
ඔවුන් අන්‍යයන් සමඟ බයිබල් දැනුම බෙදාගනියි