රාජ්‍ය ආරංචි අංක 37

මුළු ලෝකයටම පණිවිඩයක්

ආගමේ නාමයෙන් සිදු කරන දුෂ්ට දේවල්වලට අවසානයක් තිබෙනවාද?

▪ ආගමේ නාමයෙන් දුෂ්ට දේවල් සිදු කරන්නේ ඇයි?

▪ ඒවා අවසන් වෙන්නේ කොහොමද?

▪ ඒවා ඔබට බලපාන්නේ කොහොමද?

ආගමේ නාමයෙන් දුෂ්ට ක්‍රියා සිදු කරන්නේ ඇයි?

ආගමේ නාමයෙන් සිදු කරන එවැනි දේවල් නිසා ඔබ සිටින්නේ කලකිරීමකින්ද? ආගමේ මුවාවෙන් යුද්ධ, ත්‍රස්තවාදය, දූෂණය වැනි අපරාධ කරන අය ගැන ඔබට යම් සාධාරණ කෝපයක් ඇති වෙනවාද? අපි මුහුණ දෙන ගැටලු බොහොමයකට මූලිකම හේතුව ආගම බව පෙනෙන්න තිබෙන්නේ ඇයි?

මෙම දුෂ්ට ක්‍රියා සම්බන්ධයෙන් හැම ආගමකටම දොස් පවරන්න බැහැ. නමුත් දුෂ්ට ක්‍රියාවලට අනුබල දෙන ආගම් ඊට වගකිව යුතුයි. ලෝකය පුරාම පිළිගත් පුද්ගලයෙක් වන යේසුස් ක්‍රිස්තුස් පැවසුවේ “සෑම නරක ගසක්ම නොවටිනා පල” දරනවා වගේ එවැනි ආගම්ද දුෂ්ට ක්‍රියා සිදු කරන බවයි. (මතෙව් 7:15-17) එවැනි ආගම් සිදු කරන දුෂ්ට ක්‍රියා මොනවාද?

ආගමේ නාමයෙන් සිදු කරන දුෂ්ට දේවල්

◼ යුද්ධයට සහ දේශපාලනයට ඇඟිලි ගැසීම: “ආසියාවේ පමණක් නොව මුළු ලෝකය පුරාම බලයට කෑදර පාලකයන් ඉතා කූට ලෙස මිනිසුන් තුළ තිබෙන ආගමික හැඟීම් අවුස්සමින් ඒවා තම අරමුණු ඉෂ්ට කරගැනීමට යොදාගන්නවා” කියා ඒෂියාවීක් නම් සඟරාව පවසනවා. “මුළු ලෝකයටම ඉන් එල්ල වන්නේ මහත් තර්ජනයක්” කියාත් එම සඟරාව අනතුරු අඟවනවා. අමෙරිකා එක්සත් ජනපදයේ ප්‍රධාන පෙළේ එක් ආගමික නායකයෙක් පැවසුවේ “මේ සිදු වන ඝාතන නතර කරන්න නම්, මුලින්ම ත්‍රස්තවාදීන්ව මරලා දාන්න ඕනෙ” කියලයි. ඒ සඳහා ඔහුගේ විසඳුම කුමක්ද? “දෙවියන්ගේ නාමයෙන් ඔවුන් සියලුදෙනාවම වෙඩි තියලා මරලා දාන්න.” නමුත් ශුද්ධ බයිබලයේ කියන්නේ ඊට වඩා හාත්පසින්ම වෙනස් දෙයක්. “යමෙක් ‘මම දෙවිට ප්‍රේම කරමි’ කියමින් තමාගේ සහෝදරයාට වෛර කරන්නේ නම්, ඔහු බොරුකාරයෙකි” කියා එහි සඳහන් වෙනවා. (1 යොහන් 4:20) යේසුස් පවා මෙහෙම කිව්වා. “ඔබේ සතුරන්ට නොකඩවා ප්‍රේම කරන්න.” (මතෙව් 5:44) තම ආගමික සාමාජිකයන්ව යුද්ධයට යවන ආගම් කීයක් ගැන ඔබ දන්නවාද?

◼ බොරු ඉගැන්වීම් පැතිරවීම: බොහෝ ආගම්වල උගන්වන්නේ කෙනෙකුගේ මරණින් පසු ශරීරයෙන් යමක් ඉවත් වී නොමැරී පවතින බවයි. එම බොරු ඉගැන්වීම යොදාගෙන බොහෝ ආගම් තම සාමාජිකයන්ගෙන් අයුතු ලෙස මුදල් සූරා කන්නේ මිය ගිය අය වෙනුවෙන් දාන මාන හෝ පුද පූජා කිරීමට කියායි. නමුත් බයිබලය උගන්වන්නේ ඊට වෙනස් දෙයක්. මිනිසා මියයද්දී “ඔහුගේ හුස්ම නික්ම යයි. ඔහු ස්වකීය භූමියට හැරී යයි” කියා එහි සඳහන් වෙනවා. (ගීතාවලිය 146:4) මීට අමතරව “ජීවත් වන්නෝ තමන් නසින්ට ඕනෑ බව දනිති. මළාහු කිසිවක් නොදනිති. ඔවුන්ට තවත් විපාකයක් නැත” කියාද බයිබලයේ පවසනවා. (දේශනාකාරයා 9:5) යේසුස් ඉගැන්නුවේ මළවුන්ව නැවත නැඟිටුවන බවයි. මිනිසා ඇත්තටම මැරෙන්නේ නැත්නම් යේසුස් නැවත ජීවත් කරවන්න යන්නේ කුමක්ද? (යොහන් 11:11-25) ඔබගේ ආගමෙත් උගන්වන්නේ මරණයේදී ශරීරයෙන් යමක් ඉවත් වී නොමැරී පවතින බවද?

◼ දුරාචාර ක්‍රියාවලට ඉඩහැරීම: බටහිර රටවල පල්ලි විසින් සමලිංගික සේවනයේ යෙදෙන අයව පූජකයන් ලෙස පත් කරන අතර එවැනි විවාහයන් නීත්‍යනුකූල කරන්න කියා ඔවුන් ආණ්ඩුවලටද බල කරනවා. දුරාචාර ක්‍රියා හෙළා දකින පල්ලිවල වුණත් ළමා අපචාර සිදු කර ඇති තම නායකයන්ට විරුද්ධව කිසිම පියවරක් ගන්නේ නැහැ. ඒ වුණත් බයිබලය ඒ ගැන කියන්නේ කුමක්ද? “මුළා නොවන්න. වේශ්‍යාකම් කරන්නන්ටවත්, රූප වඳින්නන්ටවත්, පරදාර සේවනයේ යෙදෙන්නන්ටවත්, අස්වාභාවික කාම සේවනය සඳහා යොදාගන්නා ලද පිරිමින්ටවත්, සමලිංගික සේවනයේ යෙදෙන පිරිමින්ටවත්, . . . දෙවිගේ රාජ්‍යය උරුම වන්නේ නැත.” (1 කොරින්ති 6:9, 10) තම සාමාජිකයන්ගේ දුරාචාර ක්‍රියා ඉදිරියේ ඇහැ කන පියාගෙන සිටින ආගම් ගැන ඔබ දන්නවාද?

මෙවැනි දුෂ්ට ක්‍රියා කරන ආගම්වලට සිදු වෙන්නේ කුමක්ද? යේසුස් ඒ ගැන අනතුරු ඇඟවූයේ මෙසේයි. “හොඳ පල නොදරන සෑම ගසක්ම කපා ගින්නට දමනු ලැබේ.” (මතෙව් 7:19) එවැනි ආගම් සම්පූර්ණයෙන්ම විනාශ වීමට නියමිතයි! නමුත් එය වෙන්නේ කොහොමද? කවදාද? එයට පිළිතුරු සපයන්නේ ඉදිරියේදී සිදු වන දේවල් හෙළි කරන බයිබලයේ පොතක් වන එළිදරව් පොතේ 17වන සහ 18වන පරිච්ඡේදවලයි.

දුෂ්ට ක්‍රියාවලට අනුබල දෙන ආගම් විනාශ වෙන්නේ කොහොමද?

බයිබලයේ විස්තර කර තිබෙන මෙම දර්ශනය සිතේ මවාගන්න. එක් ගණිකා ස්ත්‍රියක් බියකරු වන මෘගයෙකු පිට ඉඳගෙන සිටියි. එම මෘගයාට හිස් සතක් සහ අං දසයක් තිබෙනවා. (එළිදරව් 17:1-4) එම ගණිකාවගෙන් නියෝජනය කරන්නේ කාවද? ඇය “පොළොවේ රජවරුන්ව පාලනය” කරනවා. ඇය දම්පාට ඇඳුම් ඇඳ, සුවඳ ද්‍රව්‍ය ඇඟ ගල්වා සිටින ඉතාමත් පොහොසත් ස්ත්‍රියක්. ඒ වගේම ඇගේ භූතවාදී ක්‍රියා නිසා “සියලු ජාතීහු නොමඟ ගියහ.” (එළිදරව් 17:18; 18:12, 13, 23) ලොව පුරාම පවතින යම් ආගමික සංවිධාන මෙම ගණිකාවගෙන් නියෝජනය කරන බව බයිබලයේ පෙන්වා දෙනවා. මේ ගණිකා ස්ත්‍රියගෙන් අදහස් කරන්නේ එක ආගමක් පමණක් නොවෙයි. නමුත් දුෂ්ට ක්‍රියා කරන සියලුම ආගම් ඊට ඇතුළත් වෙනවා.

ගණිකාව ගමන් ගන්නා වන මෘගයාව බයිබලයේ සමාන කරන්නේ කාටද? අද දින ලෝකයේ පවතින දේශපාලන ආණ්ඩු ක්‍රමවලටයි.a (එළිදරව් 17:10-13) දුෂ්ට ක්‍රියාවලට අනුබල දෙන ආගම් මෙම දේශපාලනය නමැති මෘගයා මත නැගී ඔවුන්ගේ තීරණවලට බලපෑම් කිරීමටත් ඔවුන්ව පාලනය කිරීමටත් උත්සාහ කරනවා.

ඉතාමත්ම ඉක්මනින් සිදු වෙන්න යන්නේ හිතාගන්නවත් බැරි දෙයක්. “ඔබ දුටු අං දසය හා වන මෘගයා ගණිකාවට වෛර වී, ඇයව පාළු කර, නිර්වස්ත්‍ර කර, ඇගේ මාංසමය කොටස් කා දමා, ඇයව සම්පූර්ණයෙන්ම ගින්නෙන් දවනවා ඇත” කියා එළිදරව් පොතේ සඳහන්. (එළිදරව් 17:16) ක්ෂණයකින්, ලෝකයේ දේශපාලන ආණ්ඩු එවැනි ආගම්වලට එරෙහිව නැගී ඒවා සම්පූර්ණයෙන්ම විනාශ කර දමනවා! එසේ කිරීමට ඔවුන්ව පොලඹවන්නේ කුමක්ද? බයිබලයේ එළිදරව් පොතේ එයට පිළිතුරු දෙන්නේ මෙසේයි. “දෙවි, තමාගේ අදහස ඉටු කරන පිණිස ඔවුන්ගේ සිත් තුළට එම අදහස දැම්මේය.” (එළිදරව් 17:17) දෙවිගේ නාමයෙන් එවැනි ආගම් සිදු කර ඇති සියලුම දුෂ්ට ක්‍රියාවලට ඔවුන් දෙවිට වගකිව යුතුයි. එවැනි ආගම් විනාශ කිරීමට දෙවි යොදාගන්නේ ඔවුන් සමඟ අත්වැල් බැඳගෙන සිටි දේශපාලන ආණ්ඩු ක්‍රමයි. මෙමගින් දෙවි යුක්තිය මුළුමනින්ම ඉටු කරයි.

එවැනි ආගම්වලට අත් වන විනාශයෙන් බේරීමට නම් ඔබ කුමක් කළ යුතුද? “මාගේ සෙනඟෙනි, ඇගෙන් ඉවත්ව යන්න” කියා දෙවි අණ කරනවා. (එළිදරව් 18:4) ඇත්තෙන්ම එවැනි ආගම්වලින් ඉවත් වීමට කාලය දැන්! නමුත් කොහෙටද යන්නේ? දෙවි කෙනෙක් නැහැයි කියා විශ්වාස කරන අය අතරට යෑමෙන් කිසි පලක් නැහැ. හේතුව ඔවුන්ගේ අනාගතයත් ඉතා අඳුරුයි. (2 තෙසලෝනික 1:6-9) ආරක්ෂාව ඇත්තේ සැබෑ ආගම තුළ පමණයි. ඒත් සැබෑ ආගම හඳුනාගන්න පුළුවන් කොහොමද?

සැබෑ ආගම හඳුනාගන්නා ආකාරය

සැබෑ ආගමේ තිබිය යුතු ලක්ෂණ මොනවාද?—මතෙව් 7:17.

සැබෑ ආගම . . .

◼ ප්‍රේමය ක්‍රියාවෙන් පෙන්වයි: සැබෑ නමස්කාරකයන් “ලෝකයේ කොටසක්” නොවෙයි. ඒ නිසා ඔවුන් ජාතිය හෝ වර්ගය නිසා බෙදී නැති අතර ‘එකිනෙකාට ප්‍රේමය’ ක්‍රියාවෙන් පෙන්වයි. (යොහන් 13:35; 17:16; ක්‍රියා 10:34, 35) එකිනෙකාව මරා දමනවා වෙනුවට ඔවුන් අන් අය වෙනුවෙන් ජීවිතය පුද කිරීමට පවා කැමතියි.—1 යොහන් 3:16.

◼ බයිබලය දේවවචනය ලෙස විශ්වාස කරයි: “මිනිසුන්ගේ ආඥා” සහ ‘සම්ප්‍රදායන්’ ගැන උගන්වනවා වෙනුවට සැබෑ ආගමේ ඉගැන්වීම් පදනම් වෙන්නේ දේවවචනය වන ශුද්ධ බයිබලය මතයි. (මතෙව් 15:6-9) ඒ ඇයි? “මුළු ශුද්ධ ලියවිල්ලම දේවානුභාවයෙන්ය. එය ඉගැන්වීමටත්, අවවාද කිරීමටත්, කාරණා හරිගැස්වීමටත්, ධර්මිෂ්ඨකමින් හික්මවීමටත් ප්‍රයෝජනවත්” වන නිසයි.—2 තිමෝති 3:16.

◼ ශක්තිමත් බැඳීමක් ඇති පවුල් සහ උසස් සදාචාර ප්‍රමිති: ස්වාමිපුරුෂයන්ට ‘තම භාර්යාවන්ට තමුන්ගේ ශරීරවලට මෙන් ප්‍රේම’ කිරීමටත්, භාර්යාවන්ට ‘තම ස්වාමිපුරුෂයන් කෙරෙහි ගැඹුරු ගෞරවයක් ඇතිව’ සිටීමටත්, දරුවන්ට ‘තම දෙමාපියන්ට කීකරු’ වීමටත් සැබෑ ආගම ඔවුන්ව පුහුණු කරයි. (එෆීස 5:28, 33; 6:1) ඊට අමතරව සැබෑ ආගම තුළ මූලිකත්වය ගෙන කටයුතු කරන අයද උසස් සදාචාර ප්‍රමිති රැකිය යුතුයි.—1 තිමෝති 3:1-10.

එම ප්‍රමිතිවලට එකඟව ක්‍රියා කරන ආගමක් ගැන ඔබ දන්නවාද? වර්ෂ 2001දී ප්‍රකාශයට පත් පොතක මෙසේ සඳහන් වුණා. “යෙහෝවා දෙවිගේ සාක්ෂිකරුවන් දේශනා කරන සහ ක්‍රියාවෙන් පෙන්වන ප්‍රමිති, තවත් බොහෝදෙනා අනුගමනය කර තිබුණා නම් දෙවන ලෝක මහා යුද්ධයේ සිදු වූ සමූලඝාතන වළක්වාගන්න තිබුණා. එමෙන්ම දැන් පවා සිදු වන සමූලඝාතන වළක්වාගත හැකියි.”—Holocaust Politics නම් පොත.

රටවල් 235ක සිටින යෙහෝවා දෙවිගේ සාක්ෂිකරුවන් බයිබලයේ සඳහන් සදාචාර ප්‍රමිති ගැන නිකම්ම දේශනා කරනවා පමණක් නොවෙයි. ඔවුන් ඊට එකඟව ජීවත් වෙනවා. අපි ඔබටත් ආරාධනා කරන්නේ දෙවිට පිළිගත හැකි ආකාරයේ නමස්කාරයක් කරන්නේ කොහොමද කියලා යෙහෝවා දෙවිගේ සාක්ෂිකරුවන්ගෙන් විමසන්න කියායි. එය කල් දමන්න එපා. ඒ සඳහා කාලය දැනුයි. හේතුව දුෂ්ට ක්‍රියාවලට අනුබල දෙන ආගම්වල විනාශය ඉතාමත් ආසන්න නිසයි!—ශෙපනියා 2:2, 3.

යෙහෝවා දෙවිගේ සාක්ෂිකරුවන් දේශනා කරන පණිවුඩය ගැන වැඩි විස්තර දැනගැනීමට පහත සඳහන් ලිපිනයකට ලියන්න කියා ඔබට ආරාධනා කරමු.

□ සෝදිසියෙන් සිටින්න! නමැති පොත පමණක් ලබාගන්න කැමතියි.

□ නොමිලේ පවත්වන බයිබල් පාඩමක් සඳහා මා හමුවන්න.

[පාදසටහන]

[3වන පිටුවේ වාක්‍ය කණ්ඩය]

දුෂ්ට ක්‍රියාවලට අනුබල දෙන ආගම් ‘පොළොවේ රජවරුන්ට’ බලපෑම් කරනවා

[3වන පිටුවේ වාක්‍ය කණ්ඩය]

“මාගේ සෙනඟෙනි, ඇගෙන් ඉවත්ව යන්න”