නගරයේ තට්ටු නිවාසවල සිට තුන්ද්‍රා පාළුකරය දක්වා ජනයා වෙත යන්න
වර්ෂාවටවත්, හිමවලටවත්, හිම කැටවලටවත්, වෘකයන්ටවත්, කඳු සිංහයන්ටවත්, විරුද්ධවාදී බලප්‍රදේශවලටවත් ඔවුන්ගේ තිර අධිෂ්ඨානයේ ආත්මය දුර්වල කිරීමට නොහැකි වුණා. පුදුමාකාර වේගයකින් ඔවුන් බටහිර වෙරළ කරා අත්‍යවශ්‍ය තැපෑල ගෙන යෑමට විවෘත තණ බිම්, කැලඹිලි සහිත ගංගා හා ගැඹුරු මිටියාවත් හරහා යමින්, කිලෝමීටර් 3,000ක් පිම්මේ ගියා. ඔවුන් කවුද?
ඔවුන් පෝනි එක්ස්ප්‍රස් තැපැල් සේවයේ තරුණ නිර්භීත අසරුවන්.a මේ තරුණ මිනිසුන් තුළ එවැනි ප්‍රබල ආත්මයක් බිහි කළේ කුමක්ද? සමහරවිට අභියෝගය, දුෂ්කර වැඩක යෙදීමට ඇති කැමැත්ත හා තැපෑල ලැබීමට සැලැස්වීමේ තෘප්තිය නිසා විය හැකියි. ප්‍රමුඛතා තැපෑල සමඟ හැම අසරුවෙක්ම තම සෑදල බෑගයේ බයිබලයක්ද රැගෙන යෑම උනන්දුව ඇති කරවන්නක්.
ඊට සියවසකට වැඩි කාලයකට පසුව, කැනඩාව පුරා පැතිර සිටින කැප වූ රාජ්‍ය ප්‍රකාශකයන් 1,13,000කට වැඩි ගණනක් විසින් ඊටත් වඩා වැඩි අධිෂ්ඨානයේ, උද්‍යෝගයේ හා කැපවීමේ ආත්මයක් විදහාපානවා. ඔවුන්ගේ පෙලඹවීම කුමක්ද? දෙවි හා අසල්වැසියා සඳහා ප්‍රේමය ඔවුන්ව මුද්‍රිත පිටුවලින් හා කට වචනයෙන් රාජ්‍ය සත්‍යය බෙදාහැරීමට පොලඹවනවා. මේ ජීවනය ගෙන දෙන සත්‍යය පෝනි එක්ස්ප්‍රස් මගින් බෙදාහැරිය ඕනෑම තැපෑලකට වඩා බෙහෙවින් අත්‍යවශ්‍යයි. ඔව්, එය පෝනි-එක්ස්ප්‍රස් අසරුවන්ගේ සෑදල බෑගවල තිබුණු පොතේම, එනම් ශුද්ධ බයිබලයේම අගනා රාජ්‍ය පණිවිඩයයි.—හිතෝපදේශ 2:21, 22; යෙසායා 2:2-4; 61:2; මතෙව් 22:37-39; 24:14.
යෙහෝවා සහ ජනයා සඳහා ප්‍රේමය මගින් පෙලඹී
රාජ්‍යය පිළිබඳව ජනයාට කතා කිරීමට යෙහෝවාගේ සාක්ෂිකරුවන් බෙහෙවින් ප්‍රිය කරනවා. ඉතා ඉහළට ගොඩනැඟූ තට්ටු නිවාස ගොඩනැඟිලිවල, ගම්බද තුන්ද්‍රා ප්‍රජාවන්වල, ගුවන් තොටුපොළවල, වීදිවල හා වෙනත් ප්‍රසිද්ධ ස්ථානවල මෙන්ම දූරකථනයෙන් ඔවුන් එසේ කරමින් ඉන්නවා ඔබට දැකිය හැකියි. එවැනි විවිධ ස්ථාන මන්ද?
ආර්ථික හා ජන විකාශන තත්වයන් මගින් වෙනස් කරන ජීවන-රටාවන් ජනයාව නිවසේදී සොයාගැනීමට ලොකු අභියෝගයක් ඉදිරිපත් කරනවා. බොහෝ අවස්ථාවලදී, පවුලේ ප්‍රධාන ද්‍රව්‍යමය අවශ්‍යතා සඳහා කටයුතු කිරීමට ස්වාමිපුරුෂයා හා භාර්යාව වැඩ කරන අතර බොහෝවිට ආත්මික අවශ්‍යතා අතපසු වෙනවා. එවැනි පීඩන හා විඩාව මැද, ඔවුන්ට හද උණුසුම් කරවන බලාපොරොත්තුවේ පණිවිඩයක් ඉතාමත්ම අවශ්‍යයි. යෙහෝවාගේ සාක්ෂිකරුවන් සන්තෝෂයෙන් ප්‍රතිචාරය දක්වනවා. විචක්ෂණ බුද්ධිය හා කරුණාවන්තකම උපයෝගි කරගනිමින් ඔවුන් හද බැඳගන්නා, සිතුවිලි-අවුස්සවන ක්‍රමයකින් සියලු ආකාර මිනිසුන්ට ශුභාරංචිය දීමට ප්‍රස්තාවන් ඇති කරගන්නවා.—1 තිමෝති 2:3, 4.
වෙනත් භාෂා සම්බන්ධයෙන්: ‘ගොස් ගෝලයන් සාදන්න’ කියා තම අනුගාමිකයන්ට යේසු අණ කළ විට, සියලු භාෂාවල ජනයන්ට බලාපොරොත්තුවේ පණිවිඩය ගෙනයෑමේදී මුලපිරීම හා අධිෂ්ඨානය සඳහා ඔහු අවකාශ සැලසුවා. (මතෙව් 28:19) බොහෝ දේශවල වගේම කැනඩාවේ විවිධ සංස්කෘතිවල හා භාෂාවල සංකලනයක් ඇති වී තිබෙන අතර, බොහෝ රාජ්‍ය ප්‍රකාශකයන් අලුත් භාෂා ඉගෙනගැනීමෙන් සකස් වී සිටිනවා.
උදාහරණයක් වශයෙන්, ඇල්බ’ටා, එඩ්මන්ටන්හි පූර්ණ-කාලීන දේවසේවකයන් වන එක යුවළක් තම නගරයේ මැන්ඩරින් චීන භාෂාව කතා කළ ජනයා කරා යෑමේ අවශ්‍යතාව දුටුවා. කෙසේවුවත්, මුලින්ම, යුවළට භාෂාව ඉගෙනීමට සිදු වුණ නිසා ඔවුන් මැන්ඩරින් කතා කරන විශ්වවිද්‍යාල ශිෂ්‍යයෙක් හා සම්බන්ධ වුණා. ඔවුන්ට භාෂාව ඉගැන්වීමටත්, ඒත් එක්කම ඔවුන්ගෙන් බයිබලය ඉගෙනගැනීමටත් ඔහු එකඟ වුණා. මොනතරම් කදිම අවස්ථාවක්ද! මාස 24ක් ඇතුළතදී මේ කැප වූ රාජ්‍ය ප්‍රකාශකයන් දෙදෙනා මැන්ඩරින් ඉගැන්වීමට සුදුසුකම් ලබා සිටියා. ඒ අතරේ, ඔවුන්ගේ ගුරුවරයා/ශිෂ්‍යයා ක්‍රිස්තියානි බව්තීස්මය සඳහා සුදුසුකම් ලැබුවා.
රාජ්‍ය ප්‍රකාශකයන් ප්‍රේමයෙන් පෙලඹී පෝලන්ත, රුසියානු හා වියට්නාමීය වැනි භාෂා ඉගෙනීමෙන් වෙනත් රටවල්ද එවැනිම අද්දැකීම් ලැබීමේ ප්‍රීතිය අද්දැක්කා.
මඟ තොටේදී: තනිවම පෝනියාගේ පිටේ ගිය ඉකුත් සියවසේ පෝනි-එක්ස්ප්‍රස් අසරුවන් මෙන්, බ්‍රිතාන්‍ය කොලොම්බියාවේ අභ්‍යන්තරයෙහි සිටින ඇතැම් රාජ්‍ය ප්‍රකාශකයන් තනි පදවන්නන් වෙනවා. ඔවුන්ගේ කාලයෙන් වැඩිහරියක්, රටේ කැලෑ ප්‍රදේශවලින් ලී මෝල්වලට කොටන් ගෙන එන අධි බලැති ට්‍රක්රථ පැදවීමට තිබෙන තම බාහිර වැඩය සඳහා ගත වෙනවා. මෙයට ප්‍රවාහණ නීති හා පාරේ සිදු විය හැකි උපද්‍රව සම්බන්ධයෙන් සීබී (සිටිසන්ස් බෑන්ඩ්) ගුවන්විදුලිය මගින් වෙනත් ට්‍රක්රථකරුවන් සමඟ නිරතුරු සබඳතා පැවැත්වීම අවශ්‍ය කරනවා.
නිර්මාණාත්මක ලෙස, මේ රාජ්‍ය ප්‍රකාශකයන් අද්විතීය ආකාරයකින් තම සීබී ගුවන්විදුලි යොදාගන්නවා. ඔවුන් මෑත සිද්ධීන් සඳහන් කරමින් සීබී මගින් සාකච්ඡා ආරම්භ කරනවා. ඉන්පසු ඔවුන් දක්ෂ ලෙස බයිබලයට යොමු දක්වනවා. එක් අවස්ථාවකදී සෙසු ට්‍රක්රථ රියැදුරෙක් මළ අය සඳහා බලාපොරොත්තුවක් සම්බන්ධයෙන් බයිබලයේ පවසන දෙයට ප්‍රතිචාරය දැක්වුවා. (යොහන් 5:28, 29; ක්‍රියා 24:15) මහාමාර්ගයකදී අනතුරක් මගින් සෙසු රියැදුරෙකුගේ මියයෑම ගැන ඔහු බලවත් ශෝකයට පත්ව සිටියා. ඔහු කෘතඥපූර්වකව බයිබල් පාඩමක් පිළිගත් අතර, දැන් ඔහු සෙසු සේවකයන්ට හා මිත්‍රයන්ට ශුභාරංචිය ප්‍රකාශ කරමින් සිටිනවා සවන් දිය හැකියි. තවදුරටත්, ඔහුගේ මියගිය මිත්‍රයාගේ වැන්දඹුව සමඟ බයිබල් පාඩමක් පටන්ගෙන තිබීම ඔහුගේ ප්‍රීතියට කරුණක් වී තිබෙනවා. මේ අසාමාන්‍ය ක්‍රමයෙන් සත්‍යය පිළිබඳ ජීවනය-ගෙන දෙන පණිවිඩය ඉදිරිපත් කිරීමට මුලපිරීම මොනතරම් විපාකයක්ද!
ගුවනින්: සත්‍යයේ අගනා පණිවිඩය බෙදාහැරීමට අවස්ථාව පැමිණෙන විට, ජ්වලිතවත් රාජ්‍ය ප්‍රකාශකයන් කුඩා ගුවන් යානා මගින් ‘ගම්වලට ඇතුල් වෙමින්’ ජනයා සිටින තැන්වලට යනවා. (මතෙව් 10:11, 12) ටික කලකට පෙර, ජ්වලිතයෙන් පෙලඹුණු ගුවන් කණ්ඩායම් දෙකක් තුන්ද්‍රා පාළුකරයේ පුළුල් ප්‍රදේශයක විසිර සිටින ජනයාට ශුභාරංචිය ප්‍රකාශ කරන්න තම වියදමින්ම ගුවනින් ගමන් කළා. සෑම ගුවන්යානයකම කණ්ඩායම්, කිලෝමීටර් 3,000ක් සටහන් කළ අතර, ආක්ටික් වෘත්තයෙහි කිලෝමීටර් 250ක් ඇතුළත තිබෙන විවිධ ප්‍රජාවන් 14ක් වෙත ගුවනින් ගමන් කළා. වෙහෙස මහන්සිය නොබලන මේ ප්‍රකාශකයන් ඉතා ඈත තනි වී සිටින ජනයා වෙත ළඟා වන්න දිගටම සම්පූර්ණ දවස් හතක් ගත කළා.
තවද එය ඇත්තෙන්ම වටිනා දෙයක් වුණාද? මේ ප්‍රජා මත බයිබල් පණිවිඩය ඇති කළ ඒකාන්ත බලපෑම ගැනම හිතලා බලන්න. නුදුරු අනාගතයේදී පාරාදීස පොළොවක් සඳහා යෙහෝවාගේ අරමුණ සංක්ෂිප්ත වශයෙන් දැක්වූ විට සංචාරක දේවසේවකයන් වැදගත් ආත්මික අවශ්‍යතාවක් පිරවීමට උපකාර කළා. (මතෙව් 5:3) පණිවිඩය දරන්නන් ඉකුත්ව ගියායින් බොහෝ කලකට පසු, ප්‍රජාවල සිටි අවංක හදවත් ඇති ජනයාට තම අතට පත් වූ බයිබල් හා බයිබල් පාඩම් ආධාරක 542කින් හා සඟරා 3,000කින් කියවීමට හැකියාව තිබුණා.—ක්‍රියා 12:24 සසඳන්න.
දූරකථනයෙන්: අධි-ආරක්ෂා ක්‍රමයක් යොදා තිබෙන නවාතැන් ගොඩනැඟිලිවලයි නගරවාසීන් දහස් ගණනක් වාසය කරන්නේ. ඒ එසේ වුවත්, කැප වූ රාජ්‍ය ප්‍රකාශකයන් ජ්වලිතය හා විචාර බුද්ධිය ඇතුව කටයුතු කරගෙන යනවා. මේ ජනයා ඉන්න ස්ථානයට ඔවුන්ට යෑමට හැකි වන්නේ කෙසේද? මූණට-මූණලා හමුවීම වඩාත් සුදුසු වුණත්, බොහෝවිට නවාතැන් ප්‍රවේශ අභ්‍යන්තර පණිවුඩ මාර්ගය සාර්ථකව යොදාගැනෙනවා. මෙය නොහැකි වූ විට, දූරකථනයෙන් ජනයාට කතා කිරීමේ වැඩය කිරීමට ඔවුන් තම ඇඟිලිවලට ඉඩහරිනවා.
දිනෙක උදෑසන වයසක ස්ත්‍රියක් තම දූරකථනයට පිළිතුරු දුන්නා. කෙටි, ආචාරසම්පන්න ඇමතීමකින් පසු, ජනයාට රාත්‍රියේදී වීදිවල ආරක්ෂිතව ඇවිදීමට හැකි වන කාලයක් තිබේවිද කියා ඇය කල්පනා කර තිබෙනවාදැයි ඇගෙන් අසනු ලැබුවා. අනාගතයේදී සාමය බහුලව තිබෙනු ඇති බවට පවසමින් ඇගේ බිය සැක දුරු කිරීමට ශුද්ධ ලියවිල්ලෙන් කියවනු ලැබුවා. (ගීතාවලිය 37:10, 11; දානියෙල් 2:44, 45; මතෙව් 6:9, 10) ඇයි අපට දෙවිගේ පොරොන්දු විශ්වාස කළ හැක්කේ කියා ඊළඟ සතියේ එම වෙලාවෙම දූරකථනයෙන් සාකච්ඡා කිරීමට ඇය එකඟ වුණා. දූරකථනයෙන් බයිබලය පාඩම් කිරීමෙන් මාසයකට පසුව, බයිබල් පාඩම් ආධාරකයකින් ඡේද කියවීම හා නිසි ප්‍රශ්න ඇසීම මගින් රාජ්‍ය ප්‍රකාශිකාව සෑම සතියකම බොහෝ විවිධ දේශනාවන් කිරීම වෙනුවෙන් ස්ත්‍රියගෙන් ප්‍රශංසාව ලැබුවා. පාඩම් කළ පොත විස්තර කිරීමටත්, ඇයට පෞද්ගලික පිටපතක් ඉදිරිපත් කිරීමටත් එය කාලය වුණා. දෙදෙනාටම පෞද්ගලිකව මුණගැසීමට කටයුතු පිළියෙළ කළා. ඇත්තෙන්ම, යෙහෝවාගේ සාක්ෂිකරුවන් ජනයාට තම ප්‍රේමය නිරූපණය කර තිබෙන අතර, මේ ක්‍රිස්තියානි දේශකයන් සමඟ යෙහෝවා සිටින බව වටහාගනිමින් ජනයා ප්‍රතිචාරය දක්වනවා.—1 කොරින්ති 14:25 සසඳන්න.
මුද්‍රිත පිටු මගින්: ක්‍යුබෙක්හි ප්‍රධාන වශයෙන් ප්‍රංශ භාෂාව කතා කරන පළාතේ සිටින රාජ්‍ය ප්‍රකාශකයන්ද ජනයා සිටින තැන්වලට යනවා. එක සංචාරක දේවසේවකයෙක් මෙසේ නිරීක්ෂණය කළා: “පල්ලියේ දරුණු විරුද්ධවාදිකම් නිසා තමන්ගේ වැඩකටයුතු ඉදිරියට කරගෙන යන්න විදිහක් නැති වෙයි කියා අවුරුදු ගණනාවක් පුරා සහෝදරයන්ට හැඟුණා. නමුත් සහෝදරයන් වෙහෙස මහන්සිය නොබලා වැඩ කිරීම හා නොකඩවා නැවත බැලීම් කිරීම මගින්, අප්‍රසිද්ධියේ තිබුණායයි කිව හැකි මෙන්ම සුළුතරයක් විසින් පමණක් කියෙවූ බයිබලය දැන් නිවාස වැඩිහරියක දකින්න තියෙනවා.”
වෛද්‍ය සමාජය ඇතුළුව, ක්‍යුබෙක් සමාජයේ සියලු මට්ටම්වලින් අලුත් එවැන්ජලිස්තවරුන් පැමිණෙන විට කුල්මත් කරවන ප්‍රතිඵල භුක්ති විඳිය හැකියි. එක වෛද්‍යවරයෙකු සම්බන්ධයෙන් සැබෑව එයයි. රාජ්‍ය ප්‍රකාශිකාවක් වූ ඔහුගේ භාර්යාව නිතර ඔහු සමඟ බයිබලයේ බලාපොරොත්තුව ගැන සාකච්ඡා කරනවා. ඔබේ ජීවිතය ගැලවීමට රුධිරයට හැක්කේ කෙසේද? නම් විවරණිකාව පාඩම් කරන විට සභා රැස්වීමට වෛද්‍යවරයාට ආරාධනා කිරීමට සාවධාන වූ සභා වැඩිමහල්ලෙක් මුලපිරුවා. ඔහු පැමිණියා පමණක් නොව සහභාගිත් වුණා. සාකච්ඡාවල ගුණත්වය හා ආත්මික ගැඹුර මගින් පෙලඹුණු ඔහු තමාට පෞද්ගලිකව පාඩමක් කරනවාට කැමැත්ත පළ කළා. දැන් ඔහුත් රාජ්‍ය ප්‍රකාශකයෙක්.
බයිබලය වෙත ජනයාව ඇදගැනීමේදී සඟරා බලපෑමෙන් යුතුව යොදාගැනීම වැදගත් කාර්යභාරයක් ඉටු කර තිබෙනවා. කෙනෙකුව සත්‍යයට ඇදගැනීම වේගවත් කරනු ඇත්තේ කුමන ලිපියද කියා කිසිවෙකු කවදාවත් දන්නේ නැහැ. පණිවිඩයට ඇහුම්කන් දීමට අකමැති නමුත් කෘමී ලෝකය කෙරෙහි උනන්දුවක් දැක්වුව අසල්වැසියෙකුට රාජ්‍ය ප්‍රකාශකයෙක් පිබිදෙව්! කලාපයක් ඉදිරිපත් කළා. “ෂාගා රෝගය—මරු වැලඳගැනීමක්” නම් 1992 නොවැම්බර් 22, පිබිදෙව්! (ඉංග්‍රීසියෙන්) ලිපියේ පින්තූරය ඇගේ කුතුහලය ඇවිස්සුවා. ඇය කියවූ දෙයින් පුදුමයට පත් වී, තව සඟරා ඉල්ලා සිටියා. බයිබල් පාඩමක් ඇරඹුණු අතර මාස හයක් ඇතුළතදී ඇය අන්‍යයන්ට සාක්ෂිදරමින් සිටියා.
ප්‍රසිද්ධ ස්ථානවලදී: ගුවන්තොටුපොළවල් වැනි ප්‍රසිද්ධ ස්ථානවලදී කතා කිරීමේ නිදහස සඳහා කැනඩාවේ නීතිය ඉඩ සලසනවා. හැලිෆැක්ස් ජාත්‍යන්තර ගුවන්තොටුපොළේදී, රාජ්‍ය ප්‍රකාශකයන් ගුවන්යානා යන එන අතරතුරේදී සංචාරකයන් වෙත විචක්ෂණව ළඟා වෙමින් ඔවුන් සමඟ සංවාදයන් අරඹනවා. සංවාදය බයිබලය වෙත යොමු කිරීමට කාලෝචිත මූලික ප්‍රශ්න යොදාගන්නවා. ඔවුන් සාක්කු ප්‍රමාණයේ බයිබලයක් හා පොත් පත් රැගෙන යන නිසා, ආත්මික අවශ්‍යතාවලට ප්‍රතිචාරය දක්වන්න ඔවුන්ට හැකියි. මේ ආකාරයෙන් රාජ්‍ය පණිවිඩයට සවන් දී, ඉතා ඈත ප්‍රදේශවල පැළ කිරීමට සත්‍ය බීජ රැගෙන යන අය අතර විදේශ රටවලින් පැමිණෙන ශල්‍යවෛද්‍යවරුන්, විද්‍යාඥයන්, නීතිඥයන්, නියමුවන්, පූජකයන්, පොලිස්භටයන්, ටැක්සි රියැදුරන්, ඉන්ජිනේරුවන්, ගුරුවරුන්, හමුදා නිලධාරීන් හා දේශපාලනඥයන් සිටිනවා.—කොලොස්සි 1:6.
එක උදෑසනක ගුවන්තොටුපොළේදී, මිනිසෙක් මුරටැඹ හා පිබිදෙව්! සඟරා පිළිගත්තා. එවිට ඔහු සන්සුන් පහත් හඬකින් මෙසේ පැවසුවා: “නැහැ, නැහැ යෙහෝවාගේ සාක්ෂිකාරයන් නම් එපා!” එවැනි ප්‍රතිචාරයක් මන්ද? ඔහු ගුවන්තොටුපොළේ මුස්ලිම් පල්ලියේ යාච්ඤා කරමින් සිට පැමිණි කැප වූ මුස්ලිම් භක්තිකයෙක් වූ නිසයි. ප්‍රඥාව, තීක්ෂ්ණ බුද්ධිය හා සත්‍යය තමාට දෙන්න කියා ඔහු දෙවිගෙන් යදිමින් සිට තිබුණා. ඔහුගේ යාච්ඤාවට පිළිතුර යෙහෝවාගේ සාක්ෂිකරුවන් තමයි යන අදහසින් ඔහු පුදුමයට පත් වුණා.
ඇත්තෙන්ම, කැනඩාවේ ධෛර්යවත් රාජ්‍ය ප්‍රකාශකයන් අගනා රාජ්‍ය පණිවිඩය ඉදිරිපත් කිරීමෙන් තමන්ව වැළැක්වීමට කිසිවකට ඉඩහරින්නේ නැහැ. විදේශ භාෂාවලටවත්, රළු අපිරිසිදු පාරවල්වලටවත් ඈත පිහිටි රටවල්වලටවත්, නගරයේ අධි-ආරක්ෂිත නවාතැන්වලටවත් ඔවුන්ව වළක්වන්න ඔවුන් ඉඩහැරියේ නැහැ. අවංක හදවත් ඇති සත්‍ය සොයන්නන්ට ජීවිතය පිළිබඳ දෙවිගේ පණිවිඩය බෙදාහැරීමට ඔවුන් අධිෂ්ඨානයක් ගෙන සිටිනවා. තම ලෝක ව්‍යාප්ත සෙසු සේවක සහෝදරයන් සමඟ ඔවුන් පරාර්ථකාමී ලෙස ‘ගොස් ගෝලයන් සාදන්න’ යන යේසුගේ ආඥාවට කීකරු වෙනවා.—මතෙව් 28:19.
[පාදසටහන]
a පෝනි එක්ස්ප්‍රස්, 1860 සිට 1861 දක්වා මාස 18ක කෙටි කාලපරිච්ඡේදයකට එක්සත් ජනපදයේ පැවති තැපැල් සේවයක්.
[27වන පිටුවේ කොටුව]
සාර්ථක රාජ්‍ය ප්‍රකාශකයන් දූරකථනය උපයෝගී කරගන්නවා
සමහරු මෙසේ පවසා තිබෙනවා: “ආයුබෝවන්, මගේ නම [නම දෙන්න]. සාමය උදා කරගන්න පුළුවන් කොහොමද කියලා මම ඔයාගේ ගොඩනැඟිල්ලේ ඉන්න අය එක්ක කෙටියෙන් කතා කළා. කවදාහරි මුළු ලෝකෙම සාමය තිබෙයි කියලා ඔයා හිතනවාද? [ප්‍රතිචාරයට ඉඩහරින්න.] මම මේ සමීක්ෂණයක් පවත්වනවාවත්, නැත්නම් මොනවහරි විකුණන්න හදනවාවත් නම් නෙවෙයි. ඒත්, දෙවි ඇත්තෙන්ම සාමය ගේන්න යන බවට මම ශුද්ධ ලියවිල්ලෙන් අදහස් අනිත් අය එක්ක බෙදාගන්නවා.” එවිට කෙටි ශුද්ධ ලියවිලිමය සාකච්ඡාවකින් සංවාදය දිගටම කරගෙන යා හැකියි.
වෙනත් අය මෙසේ පවසා තිබෙනවා: “සුබ සැන්දෑවක්. මගේ නම [නම දෙන්න]. මම ඔයාගේ ප්‍රදේශයේ ස්වේච්ඡා සේවකයෙක්. ඔයාගේ ගොඩනැඟිල්ලේ ජීවත් වෙන අයගේ මත ගැන මම ඒ අය එක්ක කතා කළා. අපේ ප්‍රදේශයේ සාහසික දේවලුත්, අපරාධත් වැඩිවීම ගැන කල්පනා කරලා බලද්දී හුඟදෙනෙක් පෞද්ගලික ආරක්ෂාව ගැන සැලකිලිමත් වෙනවා. මේ ගැන ඔබත් සැලකිලිමත් වෙනවාද? [ප්‍රතිචාරයට ඉඩහරින්න.] මුළු ලෝකයටම ආරක්ෂාව හැඟෙන කාලයක් කවදාහරි තියෙයි කියලා ඔයා හිතනවාද?” පිළිතුරට ඉඩහැර, ඉන්පසු ශුද්ධ ලියවිලිමය පණිවිඩය දිගටම දෙන්න.