අවශ්‍යතාව වැඩි ප්‍රදේශයක සේවය කරන්න ඔබත් කැමතිද?
“අපි ඇමරිකාවේ සැප පහසු ජීවිතයක් ගත කළා. එහෙ ඉන්න ගොඩක් අය කළේ සල්ලි හොයන එකයි විනෝද වෙන එකයි. ඒක අපිටත් අපේ පුතාලා දෙන්නටත් බලපායි කියලා අපිට බයක් තිබුණා. අපි දෙන්නා කලින් මිෂනාරිවරුන් හැටියට සේවය කළ නිසා අපිට ආයෙත් ඒ සරල ප්‍රීතිමත් ජීවිතය ලබාගන්න ඕන වුණා.”
ඔවුන්ට තිබූ ඒ ආශාව නිසා 1991දී රැල්ෆ් හා පාම් නමැති ක්‍රිස්තියානි යුවළ අවශ්‍යතාව වැඩි ප්‍රදේශයක සේවය කරන්න තීරණය කළා. ඒ බව දන්වා ඔවුන් ශාඛා කාර්යාල කිහිපයකටම ලිපි ලිව්වා. ඔවුන්ට මෙක්සිකෝවේ ශාඛා කාර්යාලයෙන් ඊට පිළිතුරක් ලැබුණා. තම රටේ ඉංග්‍රීසි භාෂාව කතා කරන ජනයාට ශුභාරංචිය ප්‍රකාශ කිරීමේ දැඩි අවශ්‍යතාවක් තිබෙන බව එහි සඳහන් වුණා. ඒ ගැන තවදුරටත් එම ලිපියේ සඳහන් වුණේ ඒ ප්‍රදේශය “අස්වැන්න නෙළීම සඳහා” සුදුසු තත්වයක තිබෙන බවයි. (යොහ. 4:35) වැඩිකල් නොගොස් රැල්ෆ් හා පාම් තම අවුරුදු අටක් සහ දොළහක් වයසැති පුතුන් දෙදෙනාත් සමඟ මෙක්සිකෝවට යන්න අවශ්‍ය දේවල් සූදානම් කරන්න පටන්ගත්තා.
විශාල ප්‍රදේශයක්
ඒ ගැන රැල්ෆ් මෙසේ සිහිපත් කරනවා. “අපි ඇමරිකාවෙන් යන බව දැනගත් සමහර සහෝදරයන් මෙහෙම කිව්වා. ‘ඔය යන ගමන නම් හරි භයානකයි.’ ‘හදිසියේවත් ඔයගොල්ලන් අසනීප වුණොත්?’ ‘ඉංග්‍රීසි භෂාව කතා කරන අය ඉන්න පැත්තකටම යන්නේ ඇයි? ඒ අය සත්‍යයට උනන්දු වෙන එකක් නැහැ.’ ඒ අය එහෙම කිව්වේ වැරදි චේතනාවකින් නොවන බව අපි දන්නවා. කොහොමවුණත් අපි යන්න තීරණය කරලයි තිබුණේ. අනෙක අපි මේක හදිස්සියේ ගත්ත තීරණයකුත් නෙවෙයි. මේ වෙනුවෙන් අපි අවුරුදු ගණනාවක් තිස්සේ සැලසුම් කෙරුවා. ඒ නිසා අපි ණය නොවී පුළුවන් තරම් ඉතිරි කෙරුවා. ඒ වගේම අලුත් තත්වයට මුහුණ දෙද්දී ඇති වෙන්න පුළුවන් අමාරුකම් ගැනත් පවුලක් හැටියට අපි ගොඩක් සාකච්ඡා කළා.”
ඔවුන් මුලින්ම ගියේ මෙක්සිකෝවේ ශාඛා කාර්යාලයටයි. එහේ සහෝදරයෝ මේ පවුලේ අයට මෙක්සිකෝවේ සිතියම පෙන්නලා මෙහෙම කිව්වා. “මේ තමයි ඔයාලාට වැඩ කරන්න තියෙන ප්‍රදේශය.” පසුව රැල්ෆ් සහ ඔහුගේ පවුලේ අය මෙක්සිකෝ නගරයට කිලෝමීටර් 240ක් වයඹ දෙසින් පිහිටි සාන් මිගෙල් ඩේ ඇලෙන්ඩේවල පදිංචි වුණා. ඒක විදේශිකයන් විශාල ප්‍රමාණයක් ජීවත් වෙන නගරයක්. මේ පවුල එහි ගොස් අවුරුදු තුනකට පසු ප්‍රචාරකයන් 19දෙනෙකුගෙන් යුත් ඉංග්‍රීසි භාෂාව කතා කරන සභාවක් ඒ නගරයේ පිහිටුවන්න උපකාර කළා. එය මෙක්සිකෝවේ පිහිටෙවූ පළමු ඉංග්‍රීසි භාෂාව කතා කරන සභාවයි. නමුත් එහි තව බොහෝ වැඩ කරන්න තිබුණා.
මෙක්සිකෝවේ මිලියනයක් පමණ ඇමරිකානු වැසියන් ජීවත් වෙනවා. ඊට අමතරව මෙක්සිකානු ජාතික වෛද්‍යවරුන්, නීතීඥයන් වැනි අයගේ මෙන්ම බොහෝ ශිෂ්‍යයන්ගේද දෙවන භාෂාව වන්නේ ඉංග්‍රීසි භාෂාවයි. “තව සේවකයන් එවන්න කියා අපි දෙවිට යාච්ඤා කළා. ඒ වගේම මේ ප්‍රදේශයේ සේවය කරන්න තමන්ටත් හැකිද කියා බලන්න එන සහෝදරයන්ට නවාතැන් ගන්න අපි කාමරයක් සුදානම් කරලයි තිබුණේ” කියා රැල්ෆ් පවසනවා.—ගණන්. 13:2.
සේවය වැඩි කරන්න ජීවිතය සරල කළ ඔවුන්
තම දේවසේවය වැඩි කරගැනීමට ආශා කළ බොහෝදෙනෙක් මෙක්සිකෝවට එන්න පටන්ගත්තා. ඇමරිකාවෙන් පැමිණි බිල් හා කැතී නමැති යුවළද ඒ අතර වෙනවා. ඔවුන් ඒ වන විටත් අවුරුදු 25ක්ම අවශ්‍යතාව වැඩි ප්‍රදේශයක සේවය කර තිබුණා. ඔවුන් ස්පාඤ්ඤ භාෂාව ඉගෙනගන්න ආශාවෙනුයි සිටියේ. නමුත් චපාලා විලට යාබද නගරයක් වූ අජිජික්වලට පැමිණි පසු එය වෙනස් වුණා. ඊට හේතුව, විශ්‍රාම ගිය ඇමරිකානු ජාතිකයන් බොහෝදෙනෙක් ඒ ප්‍රදේශයේ ජීවත් වීමයි. බිල් ඒ ගැන මෙහෙම කියනවා. “අජිජික්වල ඉන්න, දෙවි ගැන ඉගෙනගන්න කැමති ඉංග්‍රීසි භාෂාව කතා කරන අයව හොයන්න අපි වැඩි වැඩියෙන් කාලය යෙදෙව්වා.” ඔවුන් ඒ නගරයට ඇවිත් අවුරුදු දෙකක කාලයක් තුළ අලුත් සභාවක් බිහි වීමේ ප්‍රීතිය අද්දැක්කා. එය මෙක්සිකෝවේ පිහිටෙවූ ඉංග්‍රීසි භාෂාව කතා කරන දෙවන සභාවයි.
කැනඩාවේ සිටින කෙන් හා ජොඈන්ටද තම ජීවිතය සරල කරගෙන දේවසේවයට වැඩිපුර කාලයක් යොදවන්න අවශ්‍ය වුණා. ඔවුන්ද මෙක්සිකෝවට ආවා. ඒ ගැන කෙන් මෙසේ පවසනවා. “නුහුරු නුපුරුදු පරිසරයකට හුරු වෙන්න ටිකක් කල් ගියා. ඒ වගේම විදුලි බලය, දුරකථන පහසුකම් වැනි අපි පුරුදුව සිටි දේවල් දවස් ගණනාවක් පුරා නැතුව ඉන්නත් අපි පුරුදු වුණා.” ඒ වුණත් දේවසේවයේ හවුල් වීමෙන් ඔවුන් ලොකු ප්‍රීතියක් ලැබුවා. වැඩි කල් යන්න පෙර කෙන්ව සභා සේවකයෙක් ලෙස පත් කළ අතර ඉන් වසර දෙකකට පසුව ඔහු වැඩිමහල්ලෙක් ලෙසද සේවය කරන්න පටන්ගත්තා. මුලදී නම් ඔවුන්ගේ දියණිය වූ බ්‍රිටනිට ඉංග්‍රීසි භාෂාව කතා කරන ඒ කුඩා සභාවට හුරු වෙන්න අමාරු වුණා. ඇයට එහේ යහළුවන් හිටියේ කිහිපදෙනෙක් විතරයි. නමුත් පසුව ඇය රාජ්‍යශාලා ගොඩනැඟීමේ ව්‍යාපෘතිවල සේවය කළ නිසා ඇයට රට පුරාම හොඳ යහළුවෝ ඇති කරගන්න හැකි වුණා.
පැට්‍රික් හා රොක්සෑන් යුවළ ජීවත් වුණේ ඇමරිකාවේ ටෙක්සාස් ප්‍රාන්තයේයි. ඊට නුදුරුව මෙක්සිකෝවේ ඉංග්‍රීසි භාෂාව කතා කරන ජනයා සිටින ප්‍රදේශයක් තිබෙන බව දැනගැනීමෙන් ඔවුන් පුදුම වුණා. ඒ ගැන පැට්‍රික් මෙහෙම කියනවා. “මෙක්සිකෝවේ ඊසාන දෙසට වෙන්න තිබෙන මොන්ටෙරේ කියන නගරය බලලා ආවට පස්සේ අපිට දැනුණේ හරියට අපිට එහේ ගිහිල්ලා සේවය කරන්න යෙහෝවා දෙවි මඟ පෙන්නුවා වගේ කියලයි. ඉතින් අපි දවස් පහක් ඇතුළත අපේ ගේ විකුණලා මොන්ටෙරේවලට ගියා.” (ක්‍රියා 16:9) මෙක්සිකෝවේ රැකියාවක් සොයාගන්න එකත් එතරම් ලෙහෙසි දෙයක් නොවෙයි. ඒ දුෂ්කරතා මැද වුණත් අවුරුදු දෙකක් ගත වෙද්දී 17ක්ව සිටි ප්‍රචාරකයන් කණ්ඩායම 40දෙනෙකුගෙන් යුත් සභාවක් දක්වා වර්ධනය වෙනවා දැකීම මේ යුවළට ඉමහත් ප්‍රීතියක් වුණා.
දේවසේවය වැඩි කිරීම සඳහා ජෙෆ් හා ඩෙබ් නමැති යුවළද ඔවුන්ගේ ජීවිත සරල කරගත්තා. ඇමරිකාවේ තිබූ තම විශාල නිවස විකුණූ ඔවුන් මෙක්සිකෝවේ කන්කූන් කියන නගරයෙන් කුඩා නිවසක් මිල දී ගෙන එහි පදිංචි වුණා. ඔවුන් පුරුදුවෙලා හිටියේ ඔවුන්ගේ නිවසට යාබද වායුසමනය කරන ලද සුවපහසු ශාලාවක එක්රැස්වීම්වලට සහභාගි වෙන්නයි. නමුත් දැන් ඉංග්‍රීසි භාෂාවෙන් පැවැත්වෙන එක්රැස්වීමකට සහභාගිවීමට නම් ඔවුන්ට පැය අටක් පමණ ගමන් කරන්න සිදු වෙනවා. ඒ වගේම ඒ එක්රැස්වීම් තිබෙන්නේත් එළිමහන් ක්‍රීඩාංගනවලයි. නමුත් කන්කූන් නගරයේ ප්‍රචාරකයන් 50දෙනෙක් පමණ සිටින සභාවක් බිහි වෙනවා දැකීම ඔවුන්ගේ ඉමහත් සතුටට හේතු වුණා.
මෙක්සිකානු සහෝදර සහෝදරියනුත් ඉංග්‍රීසි භාෂාව කතා කරන ජනයාට උපකාර කරන්න පටන්ගත්තා. රූබන් හා ඔහුගේ පවුලේ අය ඊට එක් උදාහරණයක්. සාන් මිගෙල් ඩේ ඇලෙන්ඩේවල ඉංග්‍රීසි භාෂාව කතා කරන පළමු සභාව පිහිටුවීම ගැන ඔහුට දැනගන්න ලැබුණා. ඒ වගේම මුළු මෙක්සිකෝවේම සිටින ඉංග්‍රීසි භාෂාව කතා කරන ජනයාට සාක්ෂි දැරීම එම සභාවට අයත් පැවරුමක් බවද ඔවුන් දැනගත්තා. ඒ නිසා ඊට උපකාර කරන්න ඔවුන් ඉක්මනින්ම තීරණය කළා. ඒ සඳහා ඉංග්‍රීසි භාෂාව ඉගෙනගන්න, වෙනත් සංස්කෘතියකට අනුව හැඩගැසෙන්න හා රැස්වීම් සඳහා සතිපතා කිලෝමීටර් 800ක් දුර ගෙවා යන්න ඔවුන්ට සිදු වුණා. ඒ ගැන රූබන් මෙහෙම කියනවා. “අවුරුදු ගණනාවක් මෙක්සිකෝවේ ජීවත් වුණත් තමන්ගේම භාෂාවෙන් ශුභාරංචියට ඇහුම්කන් දී නොතිබුණු විදේශිකයන්ව අපිට හමු වුණා. ඒ අයගෙන් සමහරුන් ඒක කොච්චර අගය කළාද කිව්වොත් ඔවුන්ගේ ඇස්වලට කඳුළුත් ආවා.” සාන් මිගෙල් ඩේ ඇලෙන්ඩේවල සේවය කිරීමෙන් පසුව රූබන් සහ ඔහුගේ පවුලේ අය පුරෝගාමීන් ලෙස ගුවානජුවාටා කියන නගරයේ සේවය කළා. ඔවුන් එහි ඉංග්‍රීසි භාෂාව කතා කරන ප්‍රචාරකයන් 30දෙනෙකුට වඩා සිටින සභාවක් පිහිටු වීමට දායක වුණා. දැන් ඔවුන් ගුවානජුවාටා නගරයට ආසන්න ඉරාපුවාටොහි ඉංග්‍රීසි භාෂාව කතා කරන කණ්ඩායමක සේවය කරමින් සිටිනවා.
හමු වීමට දුෂ්කර අයව හමු වී
විදේශිකයන්ට අමතරව සමහර මෙක්සිකානු ජාතිකයන්ද ඉංග්‍රීසි භාෂාව කතා කරනවා. ඔවුන්ගෙන් බොහෝදෙනෙක් ජීවත් වන්නේ ධනවත් ප්‍රදේශවලයි. ඒ නිසා නිතරම පාහේ නිවසේදී අප සමඟ කතා කරන්න එන්නේ එම නිවෙස්වල සේවය කරන අයයි. නිවෙස් හිමියා එළියට ආවත් මෙක්සිකානු සාක්ෂිකරුවන්ට ඇහුම්කන් දීමට ඔවුන් වැඩි කැමැත්තක් දක්වන්නේ නැහැ. ඔවුන් සිතන්නේ යෙහෝවා දෙවිගේ සාක්ෂිකරුවන් කුඩා නිකායක් කියායි. ඒ වුණත් විදේශ රටකින් පැමිණි සාක්ෂිකරුවෙක් ඔවුන් හමු වන විට හොඳ ප්‍රතිචාරයක් දක්වන්න ඔවුන් පෙලඹෙනවා.
මෙක්සිකෝවේ කුව්රිටාරෝහි ජීවත් වන ග්ලොරියාගේ අද්දැකීම සලකා බලන්න. ඇය මෙසේ පවසනවා. “මට මීට කලින් ස්පාඤ්ඤ භාෂාව කතා කරන සාක්ෂිකරුවන්ව හමු වුණත් මම ඔවුන්ට ඇහුම්කන් දුන්නේ නැහැ. නමුත් මගේ පවුලේ අය වගේම යාළුවෝ ප්‍රශ්න ගැටලුවලට මුහුණ දෙනවා දකිද්දී මට ඒ ගැන ලොකු කලකිරීමක් ඇති වුණා. ඒකට විසඳුමක් දෙන්න කියලා මම දෙවිට යාච්ඤා කළා. වැඩිකල් යන්න ඉස්සර වෙලා ඉංග්‍රීසි භාෂාව කතා කරන කාන්තාවක් අපේ ගෙදරට ආවා. මෙහේ ඉංග්‍රීසි කතා කරන කවුරුවත් ඉන්නවාද කියලා එයා ඇහැව්වා. මට ඇය ගැන දැනගන්න ඕන වුණ නිසා, මම ඉංග්‍රීසි කතා කරන බව ඇයට පැවසුවා. ඇය ආපු කාරණය විස්තර කරද්දී ‘මෙයා ඇමරිකාවෙන් ඇවිල්ලා මෙහේ මොකද කරන්නේ’ කියලා මට හිතුණා. කොහොමවුණත් මම දෙවිගේ උපකාර ඉල්ලලා තිබුණු නිසා මෙයාව එවලා ඇත්තේ දෙවි කියලා මම හිතුවා.” පසුව ග්ලොරියා බයිබලය පාඩම් කළ අතර පවුලේ අයගේ විරුද්ධවාදිකම් මැද වුණත් කැප වී බව්තීස්ම වුණා. දැන් ඇය ස්ථාවර පුරෝගාමියෙක් ලෙස සේවය කරන අතර ඇගේ ස්වාමිපුරුෂයාත් පුතාත් දෙවිට සේවය කරනවා.
තම සේවය පුළුල් කරන අයට ලැබෙන ආශීර්වාද
අවශ්‍යතාව වැඩි ප්‍රදේශයක සේවය කරන අයට යම් අභියෝග තිබුණත් ලැබෙන ආශීර්වාද ඉතා බහුලයි. කලින් සඳහන් කළ සහෝදර රැල්ෆ් ඒ ගැන කියන්නේ මෙහෙමයි. “අපි බ්‍රිතාන්‍ය, චීනය, ජැමෙයිකාව, ස්වීඩනය වැනි රටවලින් පැමිණි අය සමඟත් ඝානාවේ රාජකීය පවුලට අයත් අය සමඟත් බයිබලය පාඩම් කළා. ඔවුන්ගෙන් සමහරුන් දැන් දෙවිට පූර්ණකාලීනව සේවය කරනවා. පසුගිය අවුරුදු ගණනාව පුරා ඉංග්‍රීසි භාෂාව කතා කරන සභා හතක් බිහි වූ ආකාරය අපේ පවුලේ අය දැක්කා. අපේ පුතාලා දෙන්නත් පුරෝගාමී සේවය කරන්න පටන්ගත්තා. දැන් ඔවුන් එක්සත් ජනපදයේ බෙතෙල් නිවසේ සේවය කරනවා.”
වර්තමානයේ මෙක්සිකෝවේ ඉංග්‍රීසි භාෂාව කතා කරන සභා 88ක් හා කණ්ඩායම් විශාල ප්‍රමාණයක් තිබෙනවා. මෙවැනි විශාල වර්ධනයකට හේතුව කුමක්ද? මෙහි සිටින ඉංග්‍රීසි භාෂාව කතා කරන බොහෝදෙනෙකුට සාක්ෂිකරුවන්ව හමු වී තිබුණේ නැහැ. මෙහි සිටින විදේශිකයන්ට ඔවුන්ගේ නෑදෑයන්ගෙන් බලපෑම් එල්ල නොවුණු නිසා ඔවුන්ට සත්‍යය තුළ දියුණු වෙන්න පහසු වුණා. මෙහි සිටින තවත් අය විශ්‍රාමිකයන් නිසා බයිබලය අධ්‍යයනය කිරීමට ඔවුන්ට කාලය තිබුණා. ඊට අමතරව එම සභාවල තුනෙන් එකකට වඩා ප්‍රචාරකයන් පුරෝගාමීන් හැටියට සේවය කරනවා. එයත් සභාවේ උද්‍යෝගයට හා වර්ධනයට බොහෝ සේ දායක වී තිබෙනවා.
ඔබත් එම අශීර්වාද ලබන්න
ලෝකයේ සිටින සෑම කෙනෙකුටම ඔවුන්ගේ භාෂාවෙන් ශුභාරංචිය ප්‍රකාශ කළොත් ඔවුන්ගෙන් වැඩිදෙනෙක් ඊට හොඳ ප්‍රතිචාරයක් දක්වන බවට සැකයක් නැහැ. ඒ නිසා දෙවිගේ සේවයට මුල් තැන දී කටයුතු කරන බාල මහලු, විවාහක හෝ අවිවාහක දෙවිගේ සේවකයන් සිය කැමැත්තෙන්ම අවශ්‍යතාව ඇති ප්‍රදේශවලට ගොස් සේවය කිරීමට පෙලඹී තිබෙනවා. එය මොන තරම් හද උණුසුම් කරවන දෙයක්ද! ඔවුන් යම් අභියෝගවලට මුහුණ දිය හැකි බව ඇත්තයි. ඒ වුණත් ඔවුන්ට, දෙවි ගැන ඉගෙනගැනීමට කැමති මෘදු ගුණැති මිනිසුන් හමු වන විට ඇති වන ප්‍රීතිය නිසා එම අභියෝග අමතක වෙනවා. ඔබගේ රටේ හෝ වෙනත් රටක අවශ්‍යතාව ඇති ප්‍රදේශයකට ගොස් සේවය කිරීම සඳහා ජීවිතයේ යම් වෙනස්කම් කිරීමට ඔබටත් පුළුවන්ද?a (ලූක් 14:28-30; 1 කොරි. 16:9) ඔබ එසේ කළොත් කියා නිම කළ නොහැකි ආශීර්වාද ඔබ භුක්ති විඳිනවා නියතයි.
[පාදසටහන]
a අවශ්‍යතාව වැඩි ප්‍රදේශයකට ගොස් සේවය කිරීම පිළිබඳ තවත් තොරතුරු දැනගැනීම සඳහා 2007 මාර්තු අපගේ රාජ්‍ය සේවාවේ හතරවන පිටුවේ සඳහන් “අවශ්‍යතාව වැඩි ප්‍රදේශවල සේවය කිරීම” යන කොටස බලන්න.
[21වන පිටුවේ කොටුව]
ඔවුන්ගේ ප්‍රීතිය අන් අයට කුතුහලයක්
බර්ල් නමැති කාන්තාව බ්‍රිතාන්‍යයේ සිට කැනඩාවට පදිංචියට ආවා. ඇය එහි ජාත්‍යාන්තර සමාගම් කිහිපයකම කළමනාකාරිණියක් ලෙස සේවය කළා. ඒ විතරක් නෙවෙයි, අශ්ව ධාවනයටත් ඇය හරි දක්ෂයි. ඒ නිසා 1980දී කැනඩාව නියෝජනය කරමින් ඔලිම්පික් තරඟාවලියකට සහභාගි වීමටද ඇයව තෝරාගෙන තිබුණා. පසුව ඇය තම ස්වාමිපුරුෂයා සමඟ මෙක්සිකෝවේ චපාලා නගරයට පදිංචියට ගියා. ඔවුන් සාමාන්‍යයෙන් ආහාර ගන්නේ අවන්හලකයි. දිනක් හරිම ප්‍රීතියෙන් කෑම ගනිමින් සිටින ඉංග්‍රීසි භාෂාව කතා කරන සාක්ෂිකරුවන් පිරිසක් ඔවුන් දුටුවා. බර්ල් ඔවුන් වෙතට ගොස් තමාව හඳුන්වා දී ඔවුන් මෙක්සිකෝවේ මොනවාද කරන්නේ කියා ඇසුවා. පසුව ඔවුන්ගේ ප්‍රීතියට හේතුව, යෙහෝවා දෙවි ගැන ඉගෙනගෙන ඔහුට සේවය කිරීම බව තේරුම්ගත් බර්ල් හා ඇගේ ස්වාමිපුරුෂායටත් එසේ කිරීමට උවමනා වුණා. මාස ගණනාවක් රැස්වීම්වලට පැමිණිමෙන් පසු බයිබල් පාඩමක් කිරීමට බර්ල් කැමති වුණා. මේ වන විට ඇය අවුරුදු ගණනාවක් තිස්සේ ස්ථාවර පුරෝගාමියෙක් ලෙස සේවය කරමින් සිටිනවා.
[22වන පිටුවේ කොටුව]
“ඔවුන් අපිට වටිනා තැග්ගක්”
වෙනත් රටකින් පැමිණ අවශ්‍යතාව ඇති ප්‍රදේශයක සේවය කරන අයව එම රටේ සහෝදර සහෝදරියන් බොහෝ සේ අගය කරනවා. කැරිබියන් දූපත්වල පිහිටි ශාඛා කාර්යාලයක් එවැනි අය ගැන මෙසේ ලිව්වා. “වෙනත් රටවල්වලින් ඇවිල්ලා මෙහේ සේවය කරන සහෝදර සහෝදරියන්ට මෙහෙන් යන්න සිද්ධ වුණොත් ඒක කියන්න බැරි පාඩුවක්. ඇත්තෙන්ම ඔවුන් අපිට ලොකු ආශීර්වාදයක්.”
“ශුභාරංචිය ප්‍රකාශ කරන ස්ත්‍රීහු විශාල හමුදාවක් මෙන් පිටත්ව එති” කියා බයිබලය පවසනවා. (ගීතා. 68:11, නව ලොව පරිවර්තනය, NW) ඒ අනුව බොහෝ තනිකඩ සහෝදරියන් වෙනත් රටකට ගොස් අවශ්‍යතාව ඇති ප්‍රදේශවල සේවය කිරීම පුදුමයට හේතුවක් නොවෙයි. එවැනි පරිත්‍යාගශීලි සහෝදරියන් අන් අයට විශාල උපකාරයක්. නැඟෙනහිර යුරෝපයේ ශාඛා කාර්යාලයකින් ඔවුන්ව මෙසේ පැසසුමට ලක් කළා. “මෙහේ බොහෝ සභාවල වැඩිපුරම සිටින්නේ සහෝදරියන්. සමහර සභාවල සියයට 70ක්ම සහෝදරියන්. ඔවුන්ගෙන් බොහෝදෙනෙක් සත්‍යයට අලුතින් පැමිණි අයයි. නමුත් වෙනත් රටවල්වලින් පැමිණ සිටින තනිකඩ පුරෝගාමී සහෝදරියන් මෙම නවකයන්ව පුහුණු කරමින් ලබා දෙන උපකාරය කියා නිම කරන්න බැහැ. ඇත්තටම ඔවුන් අපිට ලැබුණු වටිනා තෑග්ගක්!”
එවැනි සහෝදරියන්ට, ඔවුන් වෙනත් රටකට ගොස් කරන සේවය ගැන හැඟෙන්නේ කෙසේද? තිස්ගණන්වල මැද භාගයේ පසුවන සහෝදරී ඇන්ජලිකා මෙහෙම කියනවා. “මට ලැබුණ එක පැවරුමකදී නිතරම වගේ යන්න එන්න සිද්ධ වුණේ මඩ පාරවල්වලයි. ඒ වගේම මිනිස්සු දුක් විඳින හැටි හැම තිස්සෙම වගේ මම දැක්ක නිසා මට කලකිරීමක් ඇති වුණා. මේ වගේ ගොඩක් අභියෝගවලට මම මුහුණ දුන්නා. ඒ වුණත් දේවසේවයේදී මිනිසුන්ට උදව් කිරීමෙන් මම ලොකු තෘප්තියක් ලැබුවා. ඒ වගේම මෙහේ ඉන්න සහෝදරියන් මම කරන සේවය අගය කරලා පවසන වචන මට ලොකු හයියක්. එක් සහෝදරියකට පූර්ණකාලීන සේවය තෝරාගැනීමට බලපෑවේ මගේ ආදර්ශය කියා ඇය කිව්වා.”
පුරෝගාමි සේවයේ යෙදෙන පනස් ගණන්වල පසු වන සූ නමැති සහෝදරිය මෙසේ පවසනවා. “අභියෝග තිබෙන බව නම් ඇත්තයි. නමුත් මේ සේවයෙන් මම ලබන ආශීර්වාද ඊට වඩා ගොඩාක් වැඩියි. මේ සේවයෙන් මම පුදුම සතුටක් ලබනවා. මම වැඩි කාලයක් සේවයේ හවුල් වෙන්නේ යෞවන සහෝදරියන් එක්ක නිසා මම බයිබලයෙනුයි අපගේ ප්‍රකාශනවලිනුයි සොයාගත් තොරතුරු ඒ අය එක්ක කතා කරනවා. ඒවා යොදාගෙන ජීවිතයේ ගැටලු විසඳාගන්නේ කොහොමද කියලත් සාකච්ඡා කරනවා. මම තනිකඩව අවුරුදු ගණනාවක් පුරෝගාමියෙක් ලෙස කරන සේවය ඔවුන්ට හොඳ බලපෑමක් වෙලා තිබෙන බව ඔවුන් මට බොහෝවිට කියනවා. ඒ තුළින් ඔවුන් මුහුණ දෙන අභියෝග ජය ගන්නත් ඔවුන්ට පුළුවන් බව ඔවුන් පවසනවා. මේ වගේ සහෝදරියන්ට උපකාර කිරීම මට අසීමිත සතුටක්!”
[20වන පිටුවේ පින්තූරය සිතියම]
(මුද්‍රිත පිටපත බලන්න)
මෙක්සිකෝව
මොන්ටෙරේ
ගුවානජුවාටා
ඉරාපුවාටො
චපාලා
අජිජික්
චපාලා විල
සාන් මිගෙල් ඩේ ඇලෙන්ඩේ
කුව්රිටාරෝ
මෙක්සිකානු නගරය
කන්කූන්
[23වන පිටුවේ පින්තූරය]
පළමු වතාවට ශුභාරංචියට ඇහුම්කන් දෙන විදේශිකයන්ට සාක්ෂි දැරීමේ ප්‍රීතිය සමහර අය අද්දකිනවා